Olembiwa na Mateyu

23 Vanduli viwa Yesu oowandela gulu la athu na ofunjedae ira: 2 “Alembi na Afarisi koovi-ela ekiwa va udindo wa Mose. 3 Eno mupangenga no-arela vyongo vyetene vyevyo kanauwandeleniathu, koma kamupangenga vyevyo kanapangaathu, chifukwa aluwa kanakeda onga koma katinapanga vyevyo kanaongaathu. 4 Aluwa kanomanga katundu onyemela nomu-ela m’mafudi mwa athu, koma katinafuna susi-a katunduyo na nyaliwa. 5 Vyongo vyetene vyevyo kanapangaathu, kanavipanga na yolinga yoi athu kaaone. Aluwa kanoulukuli-a vimabokosi vyokaana malemba vyevyo kanawaraathu monga vyovitetezela. Teto kanolapi-a ulusi oluwa wa mpepetele mwa vyowara viwa. 6 M’maphwando aluwa kanoomeliwa garati vamalo olemekezeya vinjinji koma teto m’masunagoge, aluwa kanoomeliwa garati m’mipando dausogolo.* 7 Aluwa kanoomeliwa va-iwa moni m’misika na yolinga yoi athu kaaromolenga ira Rabi.* 8 Koma nyo kamuromoliwenga ira Rabi, chifukwa mphunzisinyu ngu m’mo-i eka, moi etene nyen’ne muli abali. 9 Koma teto kamuromolenga muthu uliwetene ira babinyu vailambo yavati vano, chifukwa Babinyu ngu m’mo-i eka, unoyo unakala udimu. 10 Kamuromoliwenga teto ira asogoleli, chifukwa Msogolelinyu ngu m’mo-i eka, Kristu. 11 Koma ndimuwa vinjinji vaari vinyu akale mtumikinyu. 12 Muthu uliwetene unoyo unavigweli-a unoza atiti-iwe, koma uliwetene unoyo unaviyevi-a unoza agweli-iwe.

13 Soka wa nyo alembi na Afarisi, athu achinyengo nyo! Chifukwa muno-eya sewu wa Umwene waudimu ira athu kativolowemo. Voi nyo kamunavolowamo, munokoondi-a athu anayo kanafuna volowamo. 14 ——

15 Soka wa nyo alembi na Afarisi, athu achinyengo nyo! Chifukwa munolambuwa nyanja koma teto enda maulendo olapa ira mudowe mwamukope muthu. Koma mwamukopa muthuyo munomupangi-a ira akale ofwanelela vochediwa mu Gehena* kwaranya nyo.

16 Soka wa nyo asogoleli o-oona, anayo munaonga ira, ‘Akala muthu uromolile kachisi volumbela, kavali vuto, koma akala muthu uromolile golide wa mukachisi volumbela, unafuneya kwakwaneli-eda lumbilo laelo.’ 17 Athu opuusa koma teto o-oona nyo! Yofuneya vinjinji chiivi, golide kapena kachisi unoyo upangi-ile ira golideyo akale owela? 18 Koma teto munaonga ira, ‘Akala muthu uromolile guwa lasembe volumbela, kavali vuto, koma akala muthu uromolile mphaso ineyo ili vaguwavo volumbela, unafuneya kwakwaneli-eda lumbilo laelo.’ 19 Athu o-oona nyo! Yofuneya vinjinji chiivi, mphaso kapena guwa lasembe lelo linapangi-a ira mphasweyo ikale yowela? 20 Eno muthu uliwetene unoyo uromolile guwa lasembe volumbela, ulumbelela guwalo na vyongo vyetene vyevyo vili vaguwavo, 21 teto muthu unoyo uromolile kachisi volumbela, ulumbelela kachisiyo koma teto Mulungu unoyo unakala mukachisimo. 22 Koma teto muthu uliwetene unoyo uromolile udimu volumbela, ulumbelela pando waumwene wa Mulungu koma teto Mulungu unoyo ugaratile vapandovo.

23 Soka wa nyo alembi na Afarisi, athu achinyengo nyo! Chifukwa munopeleka yakhumi ya mbewu da minti, dilili na chitowe, koma munonyalanyaza vyongo vyofuneya vinjinji vya mu Ilamulo, monga chilungamo, chifundo nororomeleya. Peleka yakhumi kofuneya koma kamunafuneya nyalanyazanga vyongo vyofuneya vyevi. 24 Asogoleli o-oona nyo, munosefa vyong’wa vinyu ira muchosemo nyelele, koma munomida ngamila.

25 Soka wa nyo alembi na Afarisi, athu achinyengo nyo! Chifukwa muli ngati kapu na mbale dedo di-uwiwe unde oka, koma muwari mwiwa mwangali motakala. M’murimani mwinyu munosilila vyongo vinjinji* koma teto kamunaviruni-a. 26 Mfarisi o-oona we, yowambeela uwa muwari mwa kapu na mbale, ira unde uwa teto ukale owela.

27 Soka wa nyo alembi na Afarisi, athu achinyengo nyo! Chifukwa munofwanafwana na manda o-eliwa laimu, anayo kanakeda oneya oriya unde oka, koma muwari mwiwa mungali makuva a athu okhwa na vyotakala vya mitundu detene. 28 Mofwanafwana na vyevi, nanyen’ne teto vamaso va athu, munooneya ngati olungama koma m’murimani mwinyu muzaala chinyengo koma teto o-ovwela malamulo.

29 Soka wa nyo alembi na Afarisi, athu achinyengo nyo! Chifukwa munomanga manda a anamaongela koma teto munosamalela manda* a athu olungama ira kakale oriya, 30 teto munoonga ira, ‘Aakale ira nookalawo thawi ya makolwi-u awale, iyo kanakaana mulandu wa magazi unoyo kan’naathu opha anamaongela.’ 31 Eno munovipangela umboni ekinyu ira muli a-ima a athu anayo kaphile anamaongela. 32 Ndiye mari-ani chito ineyo makolwinyu awale kaambeeli-ileathu.

33 Nyowanyo, a-ima a ivili, kodi munaza mukwakwani-a avi thawa iweluzo ya Gehena?* 34 Vachifukwa inela, ndinoutumizelani anamaongela, athu azelu na aphunzisi. Amo-iwa mwa aluwa munoza muwaphe, nowapachika vatengo teto amo-iwa munoza muwavaze m’masunagoge mwinyu nowazuzumi-a m’mizinda detene, 35 ira magazi etene a athu olungama anayo kaphiwe vailambo yavati kakale wa nyo. Ambeela magazi a Abele olungama mpakana magazi a Zekariya mwana wa Barakiya, unoyo mwamuphile nyo mu nyumba yopatuleya vakwikwi na guwa lasembe. 36 Ndithu ndinaauwandelani ira, m’bado unola unoza usomede mulandu wa vyongo vyetene vyevi.

37 Yelusalemu, Yelusalemu, we opha anamaongela na ovocha mabwe athu anayo katumiziwe wa weyo. Moweli-edaweli-eda ndoofunechecha ira ndisonkani-e a-imawo vamo-i, ngati mwemo mwanakhu unasonkani-ela liye a-imae m’mapepelu mwae. Koma nyo kamwafunile. 38 Sopano vuruwanani! Mulungu uu-iyedani nyumbela.* 39 Ndithu ndinaauwandelani, ambeela vano kamunaza mundiona mpakana vevo munaze nyo muonge ira, ‘Odalisiwa ngunoyo unaza muzina la Yehova!’”