Vyoira Vya Anamarumiwa
12 Vathawi inela Mwene Herodi* oowambeela zuzumi-a athu amo-iwa mupingo. 2 Liye oolamula ira Yakobo, nchimwenae wa Yohani aphiwe na supada. 3 Angaonile ira vyevi viaomela Ayuda, oomumanga teto Petulo. (Vyevi vyaireile vathawi ya ikondwelelo ya Mikate Do-okaana Vyofufumi-a.) 4 Liye oomu-inda nomu-eela mundende moi oosakula magulu 4 a asilikali ira kachenjanenga vomuing’anela. Gulu lililetene lookaana asilikali okwakwana 4. Herodi afuna ira aze amuimbe mulandu vamaso va athu Pasika amala. 5 Eno Petulo oo-eeliwa mundende, koma pingoyo oomupempelela vinjinji wa Mulungu.
6 Ndiye ma-iyu oyi mechelo liwa amuzena wa athu, Petuloyo ali angagonatile vaari va asilikali ambin’li moi ali angamangiwe na maunyolo men’li. Vamulango vookala teto alonda anayo kaing’anela ndendeyo. 7 Koma morurumucha, ngelo wa Yehova* oofiya, moi musubi la ndendeyo moowala. Vanduli viwa ngeloyo oomuvenyi-a Petulo moi oomutikinya nomuwandela ira: “Venya mombaraanya!” Vingairile eno maunyolo anayo kamumangilenaathu manda koomorela vati. 8 Ngeloyo oomuwandela ira: “Wara vyowara vyawo na sapato dawo.” Moi liye oowara. Vanduli viwa oomuwandela ira: “Wara malayawo aunde undi-arelenga.” 9 Eno liye ookuma ambeela mu-arela, koma kaaiziwile ira vyevyo vyaireya na ngeloyo vyali vyoona. Liye akeda ganiza ira unaona masomphenya. 10 Kangavirile gulu lowambeela na lanambili, koofiya vamulango ulukulu wa isulo okumana vodowa mu mzinda, moi iseweyo yoo-uleya ekiwa. Kangakumile kooenda limo-i, koma mo-ooneya paama ngeloyo oomu-iya ekave. 11 Koma Petulo angaambeele zindikila vyevyo vyamuireela aongile ira: “Sopano ndiiziwa ira Yehova* ngunoyo umutumizile ngelwae za ndivulumucha m’mandani mwa Herodi koma teto wu vyongo vyevyo Ayuda kaembekezelaathu ira vinokoza ndiireela.”
12 Angazindikilile vyevi, liye oodowa waniwa wa Mariya, m’mae wa Yohani oromoliwa teto ira Maliko. Wewo athu anjinji kali kangasonkanile moi kera pempela. 13 Angagogodile isewo ya vamulango ulukulu, sikana m’mo-iwa wachito zina lae Roda oodowa ira amuone unoyo unagogoda. 14 Koma angazindikilile mawu a Petulo, oosangalala vinjinji eno m’malo mo-ula iseweyo, ootamangela muwari dowa onga ira Petulo uli vamulango. 15 Koma aluwa koomusomeda ira: “Ukaana misala eti!” Aluwa kangaonile ira unaalimbi-eda onga vyevyo, athwayo koowambeela onga ira: “Ngu ngelwae unoyo.” 16 Koma Petulo oopitilizave gogoda. Aluwa kanga-ulile isewo, koowona ira ngu liyene moi koodabwa vinjinji. 17 Koma liye ooawandela vo-indi-eda chito manda ira kamiyale, moi oowafotokozela vyongo vyetene vyevyo Yehova* apangile liye vomukumi-a mundende. Moi aongile ira: “Khani inela mudowe mwamuwandele Yakobo na abali amo-iwa.” Vanduli viwa ookuma dowa wu malo amo-iwa.
18 Unde ungachile, asilikalale koosokonezeya vinjinji chifukwa kataiziwa vyevyo vyamuireele Petulo. 19 Herodi oomusaela Petulo valivetene moi angalepelile mufwanya, oowafuka alonda vyofuka vinjinji koma teto oolamula ira kalandiwe ira kava-iwe ilango. Vanduli viwa Herodi oovenyawo wu Yudeya dowa wu Kaisareya, moi ookala wewo wathawi yoyeva.
20 Herodi oowalunduwela vinjinji* athu awu Turo na wu Sidoni. Eno athwayo kooza wa liye mogwilizana moi kangamuvepile Balasito, unoyo aing’anela nyumba ya mwene* ira aakami-e, aluwa koodowa onga na Herodi ira agarati-e murendele na aluwa. Chifukwa yodja iwa kagula muilambo ineyo yalamuleliwa na Herodi. 21 Dambo limo-iliwa, Herodi oowara vyowara vyae vya umwene liye garati vapandwae oweluzela milandu moi oowambeela onga na athu. 22 Athwayo kangavwide mawae koowambeela kuwa ira: “Anala mba mawu a mulungu, o-okala a muthu!” 23 Thawi ineyo ngelo wa Yehova* oomubuleli-a, chifukwa kaalemekezile Mulungu. Moi oodjiwa na mapwisi liye khwa.
24 Koma mawu a Yehova* koopitiliza falikela moi athu anjinji kookala ororomela.
25 Barnaba na Saulo kangamari-ile chito yopeleka likami-edo wu Yelusalemu koowelela wu Antiokeya. Vevo kadowaathu koomulanda Yohani, unoyo aromoliwa teto ira Maliko.