Olembiwa na Luka

11 Vathawi imo-iwa Yesu ali apempelanga vamalo amo-iwene. Angamari-ile pempela, m’mo-i wa ofunjedae oomuwandela ira: “Mbwiyeni, nifunji-eni pempela ngati mwemo Yohani mwaafunji-ele liye ofunjedae.”

2 Ndiye liye ooawandela ira: “Thawi detene mwapempelanga muongenga ira, ‘Babani, zina linyu liweli-iwe.* Umweninyu uze. 3 Muniva-e yodja ya peeno mogwilizana na yodja ineyo ninafuneya iyo dambo lililetene. 4 Munikululukele machimwi-u, chifukwa na-iyene teto ninowakululukela athu anayo kananichimwela. Koma teto nikami-eni ira kanigonje naesiwanga.’”

5 Vanduli viwa ooawandela ira: “Nifwanafwani-ede ira m’mo-i wa nyo ukaana fwae moi udowa wa fwaeyo vaari va ma-iyu dowa muvepa ira, ‘Fwanga, ndiboli-ewo mikate miralu, 6 chifukwa fwanga m’mo-iwene ukede fiya wene kumela undendai moi kandin’na yongo yoi ndimuva-e.’ 7 Koma fwae unoyo uli m’mbamo unamusomeda ira: ‘Kundivuti-e. Ni-eya wale isewo, teto miyo na a-imanga ninaagona. Kandinavenya ira ndiuva-e yongo.’ 8 Ndithu ndinaauwandelani, liye unoza avenye nomuva-a yongo iliyetene ineyo unafuna liye, o-okala chifukwa yoi ngu fwae, koma chifukwa yoi oopitilizave muitana. 9 Eno ndinauwandelani ira, pitilizani vepa moi unoza auva-eni. Pitilizani saelasaela moi munoza mufwanye. Pitilizani gogoda moi unoza au-uleleni. 10 Chifukwa muthu uliwetene ovepa unowachela, uliwetene osaelasaela unofwanya moi uliwetene ogogoda unoza a-uleliwe. 11 Kodi vaari vinyu vikala baba unoyo mwanae angamuvepile somba, unokoza muva-a nyowa m’malo mwa somba? 12 Kapena teto angamuvepile libonje, kodi unokoza muva-a waluze? 13 Eno ngakale ira nyo muli athu otakala koma munoiziwa va-a a-iminyu mphaso dapama, nanga bwanji Babinyu waudimu? Liye unoza apeleke mofunechecha zimu owela wa athu anayo kanamuvepa.”

14 Vanduli viwa ookumi-a iwanda mwa muthu ineyo yamulepeli-a onga. Iwandeyo ingakumile, muthuyo oowambeela onga moi gulu la athu loodabwa vinjinji. 15 Koma athu amo-iwa kaongile ira: “Unola unakumi-a viwanda na kopolo da Belezebule,* olamulela viwanda.” 16 Koma athu amo-iwa vofuna muyesa, koowambeela muvepa ira aawoni-e izindikilo yokumela udimu. 17 Liye angaiziwile maganizwiwa, ooawandela ira: “Umwene uliwetene ogawaneya unomala, moi nyumba iliyetene yogawaneya inogumuwa. 18 Mofwanafwana na vyevi, akala naliyene Satana ugawaneile, kodi Umwenae unakalevo avi? Chifukwa nyo munaonga ira miyo ndinakumi-a viwanda na kopolo da Belezebule. 19 Akala miyo ndinakumi-a viwanda na kopolo da Belezebule, nanga o-arelinyu kanavikumi-a na kopolo da mbaani? Chichifukwa iwa o-arelinyu kanoza kauweluzeni ira muli olakwa. 20 Koma akala miyo ndinakumi-a viwanda na kopolo da Mulungu, ndiye kuti Umwene wa Mulungu uufiyelani morurumucha. 21 Muthu wakopolo unoyo un’na vida vyokwakwanela, aing’anelanga nyumbae, chumae inotetezeya. 22 Koma muthu m’mo-iwa wakopolo kwaranya liye aza nomugonji-a, unomuwaka vida vyae vyetene vyevyo aroromela liye moi katundu unoyo umuwakile liye, unomupeleka wa athu amo-iwa. 23 Muthu uliwetene unoyo kali umbalanga unoruni-ana na miyo koma teto unoyo kana-inda chito yosonkani-a athu limo-i na miyo unowabalalecha.

24 Zimu otakala wakuma mwa muthu, unosaelasaela malo okala, ndiye akala ira kufwanyile malo, unaongecha ira, ‘Ndinowelela mu nyumba ineyo ndakumilemo miyo.’ 25 Ndiye wafiya unafwanya ira muvyeliwa pama koma teto musamaleliwa pama. 26 Wera eno unodowa tukula mizimu dimo-idiwa 7 dotakala vinjinji moi davolowa mwa muthu dinakala mwemo. Vyo-arelavo viwa pivyoi vyoira vya muthuyo vinakala vyotakala vinjinji kwaranya vowambeela.”

27 Aanamari-e onga, iyana m’mo-iwa mugulu la athulo ookuwa nomuwandela ira: “Osangalala ngu iyana unoyo aubalileni koma teto uwamwi-ani!” 28 Koma Yesu aongile ira: “Naari, m’malomwiwa, osangalala mba athu anayo kanavwa mawu a Mulungu nowa-indi-edanga chito!”

29 Vevo gulu la athulo lainjivaathu, liye oowambeela onga ira: “Athu otakala a m’bado ula, kanofuna ira kava-iwe izindikilo. Koma katinaza kava-iwa izindikilo iliyetene koma izindikilo ya Yona yoka. 30 Mofwanafwana na Yona unoyo akalile izindikilo wa athu a wu Ninevi, Mwana wa muthu unoza akale teto izindikilo wa athu a m’bado ula. 31 Mfumukazi wa um’mwela unoza avenyi-iwe wa okhwa va Dambo la Iweluzo limo-i na athu a m’bado ula moi unoza aaruni-e, chifukwa mfumukazi unola ooza kumela umagomi-edo a ilambo yavati ira aze avwe zelu da Solomo. Koma sopano muthu m’mo-iwa mulukulu omukwaranya Solomo uli vano. 32 Athu awu Ninevi kanoza kavenyi-iwe va Dambo la Iweluzo limo-i na athu a m’bado ula moi kanoza kaaruni-e, chifukwa yoi aluwa koolapa kangavwile ulaliki wa Yona. Koma sopano muthu m’mo-iwa mulukulu omukwaranya Yona uli vano. 33 Muthu akari-a nyale kanai-ela vamalo obiseya kapena ikuneela na dengo, koma unoi-ela vamalo o-elavo nyale, ira athu anayo kanavolowa m’mbamo kaone wala. 34 Nyale ya thuthu ti liso. Eno akala liso lawo linaing’ana* va yongo imo-i, thuthu lawo letene linoza likale lowala vinjinji. Koma akala liso lawo kalinakutila, thuthu lawo letene linoza likale na dima. 35 Eno samalani ira wala wewo uli mwa nyo kukale dima. 36 Ndiye akala thuthu lawo letene tilowala vinjinji, moi kavali mbali iliyetene ineyo in’na dima, thuthu lawo letene linoza liwale vinjinji ngati mwemo nyale inapangelaathu voumoneela nowala uwa.”

37 Angamari-ile onga vyevi, Mfarisi m’mo-iwa oomuvepa ira adowe adje limo-i na liye. Eno liye oodowa moi oodja. 38 Koma Mfarisiyo oodabwa angaonile ira Yesu unadja aana-ambemo m’mandani.* 39 Eno Mbwiye oomuwandela ira: “Nyo Afarisi muli ngati kapu na mbale dedo di-uwiwe unde oka koma muwari mwiwa mungali motakala. Muwari mwa mirima dinyu muzaala djela na vyongo vyotakala. 40 Athu o-okaana zelu nyo! Kodi unoyo apangile unde kai unoyo teto apangile muwari? 41 Koma nyo mwapelekanga mphaso dachifundo,* mupelekenga vyongo vyokumela vati vamurima. Mwapanga eno vyongo vinyu vyetene vinaza vikala vyowela. 42 Soka wa nyo Afarisi, chifukwa munopeleka yakhumi ya mbewu da minti na luwe koma teto ya mbewu da udimba da tundu uliwetene. Koma munonyalanyaza chilungamo na chikondi ya Mulungu! Unola wali udindwinyu panga vyevi, koma kamunafuneya nyalanyazanga vyongo vyofuneya vyevi. 43 Soka wa nyo Afarisi, chifukwa m’masunagoge munoomeliwa garati m’mipando dausogolo* koma teto munoomeliwa va-iwa moni m’misika. 44 Soka wa nyo, chifukwa muli ngati manda* anayo katinaoneya pamapama* moi athu kanoenda vadimu viwa koma o-oiziwa!”

45 M’mo-i mwa athu oiziwa Ilamulo asomedile ira: “Mphunzisi, vyevyo munaonga nyoovi munaninyoza teto iyo.” 46 Ndiye liye aongile ira: “Soka teto wa nyo athu oiziwa Ilamulo, chifukwa munotukuli-a athu katundu onyemela vinjinji, koma nyo kamunamugunda katunduyo ngakale na nyalinyu!

47 Soka wa nyo, chifukwa munomanga manda* a anamaongela, koma makolwinyu awale mbanayo kaaphile! 48 Mookaikela, nyo munoiziwa vyevyo makolwinyu kapangileathu. Moi munogwilizana na vyevyo kapangileathu, chifukwa aluwa koopha anamaongela, koma nyo munamanga manda a anamaongelayo. 49 Chifukwa ya zelu dae, Mulungu aongile ira: ‘Ndinoza ndiatumizele anamaongela na anamarumiwa, koma aluwa konoza kaaphe koma teto azuzumi-a amo-iwa mwa aluwa. 50 Eno athu a m’bado ula kanoza kaimbiwe mulandu wa magazi a anamaongela, anayo kaaphileathu kumela vevo ilambo yalengiweathu. 51 Ambeela magazi a Abele mpakana magazi a Zekariya, unoyo mwamuphile nyo munyumba yopatuleya vakwikwi na guwa lasembe.’* Ndithu ndinauwandelani ira, m’bado unola unoza usomede mulandu wa vyongo vyetene vyevi.

52 Soka wa nyo athu oiziwa Ilamulo, chifukwa moowaka athu kiyi owakami-a iziwa vyongo. Nyo kamuvolowilemo mu Umwene* wa Mulungu, moi athu anayo kanafuna volowamo munowakoondi-a!”

53 Eno Yesu angakumile wewo, alembi na Afarisi koowambeela mupanikiza vinjinji nomufukanga vyongo vinjinji, 54 na yolinga yoi kamufwanyele chifukwa va vyevyo unaonge liye.