Olembiwa na Mateyu
4 Vanduli viwa, zimu oomusogolela Yesu uipululu moi wewo ooesiwa na Mdjelekezi. 2 Angamalile malambo 40 tana na ma-iyu aanadje yongo, ookaana ndala. 3 Ndiye Mdjelekezi ooza ira amuese moi oomuwandela ira: “Akala muli mwana wa Mulungu, wandelani mabwe kali vevala ira kakale mikate.” 4 Koma liye oomusomeda ira, “Malemba kani: ‘Muthu kanakale na moyo na yodja yoka, koma na mawu etene okumela vamulomo va Yehova.’”
5 Vanduli viwa Mdjelekezi oomulanda nomudowana vamalo owela, moi oomugweli-a vadimu va chisi la mpanda wa kachisi* 6 nomuwandela ira: “Akala muli mwana wa Mulungu, muvivoche vati, vale Malemba kanaonga ira: ‘Liye unoza alamule angelwae vyokuza nyo,’ koma teto kanaonga ira, ‘Kanoza kautukuleni m’mandani mwiwa, ira nyalo linyu kalivaze libwe.’” 7 Koma Yesu oomusomeda ira: “Malemba teto kanaonga ira: ‘Kamumuese Yehova Mulungwinyu.’”
8 Vanduli viwa, Mdjelekezi oomulanda nomudowana va mwango olapa vinjinji moi oomuoni-a maumwene etene a vailambo yavati na ulemelelwiwa. 9 Ndiye oomuwandela ira: “Ndinouva-ani vyongo vyetene vyevi akala munandikokorele nondilambela ndila imo-i yoka.” 10 Koma Yesu oomusomeda ira: “Choka Satana! Voi Malemba kani, ‘Yehova Mulungwawo ngunoyo unafuneya we mulambela moi unafuneya mutumikela liye ekave ba-i.’” 11 Vanduli viwa Mdjelekezi oomu-iya moi angelo kooza nowambeela mutumikela.
12 Ndiye Yesu angavwile ira Yohani u-eeliwa mundende, oovenyawo wewo nodowa wu Galileya. 13 Angakumile wu Nazareti, oofiya wu Kaperenao nodowa kala mpepetele mwa nyanja muvigawo vya Zebuloni na Nafitali, 14 ira mawu anayo Mulungu aongile liye zela mwa namaongela Yesaya kakwakwaneli-ediwe. Liye aongile ira: 15 “Athu anayo kanakala muilambo ya Zebuloni na Nafitali, m’mbali mwa sewu odowa unyanja, ukombela imo-iwa ya Yorodano, wu Galileya wewo wakala athu a mitundu dimo-i, 16 athu anayo kakala mudima koowona wala ulukulu, moi athu anayo kakala mudela la fuli okhwa, wala oowamoneela.” 17 Ambeela thawi ineyo, Yesu oowambeela laleela ira: “Lapani, chifukwa Umwene waudimu uwandamela.”
18 Vevo Yesu aenda liye mpepetele mwa nyanja ya Galileya,* oomuona Simoni oromoliwa Petulo na nchimwenae Andreya. Aluwa kali kavochedanga mataviwa opela somba mu nyanja voi kali asozi. 19 Liye ooawandela ira: “Ndi-areleni, moi ndinoupangi-ani ira mukale asozi a athu.” 20 Thawi ineyo aluwa koo-iya mataviwa nomu-arela. 21 Angakwaranyile vevo, oowaona alombwana amo-iwa ambin’li avaibali, Yakobo mwana wa Zebedayo na nchimwenae Yohani. Aluwa kali mungalawa limo-i na babiwa Zebedayo, kasowanga mataviwa, moi oowaitana. 22 Thawi ineyo aluwa koo-iya ngalawa dile koma teto koomu-iya babiwa nomu-arela.
23 Vingairile eno, kooendaenda mu Galileya mwetene moi koofunji-a m’masunagoge mwiwa, laleela uthenga wapama wa Umwene koma teto chili-a marenda a tundu uliwetene anayo athu kabulelanaathu. 24 Eno mbilae yoofala mu Siriya mwetene. Moi athu koomuzelana athu etene anayo kabulela marenda o-iyana-iyana, o-indiwa na viwanda, a vifufu koma teto athu okhwa viwalo moi liye oowachili-a. 25 Eno athu anjinji okumela wu Galileya, wu Dekapoli,* wu Yelusalemu, wu Yudeya koma teto ukombela imo-iwa ya Yorodano, koomu-arela.