Olembiwa na Yohani
13 Ikondwelelo ya Pasika yaanafiye, Yesu ooiziwa ira thawae yovenyavo vailambwela dowa wa Babae ikwakwana. Ndiye voi oowaomeliwana o-arelae anayo kali vailambwela, oowaomeliwana mpakana va mapeto a moywae. 2 Vevo kadjaathu yodja ya mazulo Mdjelekezi ali anga-elile maganizo ofuna mupeleka Yesu m’murimani mwa Yudasi Isikariyoti, mwana wa Simoni. 3 Yesu ooiziwa ira Babae upeleka vyongo vyetene m’mandani mwae koma teto ira ooza kumela wa Mulungu koma teto unowelela wa Mulungu. 4 Vanduli viwa Yesu oovenya noimela moi ookurula malayae aunde. Ndiye oolanda nguwo yopukutana noimangela muyuni mwae. 5 Vingairile eno oo-ela ma-inje m’beseni nowambeela uwa manyalo a ofunjedae koma teto apukuta na nguwo ineyo amangele liye muyuni mwae. 6 Eno oofiya vevo vali Simoni Petulo. Koma Petuloyo oomufuka Yesu ira: “Mbwiyeni, nyo munafuna mu-uwe manyalwanga?” 7 Yesu oomusomeda ira: “Vyevyo ndinapanga miyovi kunavivwecheche vathawiila, koma unoza uvivwecheche usogolo.” 8 Petulo aongile ira: “Kavinawandeye ira mu-uwe manyalwanga.” Yesu oomusomeda ira: “Akala kandina-uwa manyalwawo, kuli umbalanga.” 9 Simoni Petulo aongile ira: “Mbwiyeni, kamundi-uwe manyalo oka, koma mundi-uwe teto manda na muru.” 10 Yesu oomuwandela ira: “Unoyo u-ambile thuthu unafuneya keda uwa manyalo oka ba-i, chifukwa thuthu letene tilowela. Nyo muli owela, koma kai etene.” 11 Liye oomuiziwa muthu unoyo afuna za mupeleka. Mbaona aongile ira: “Koma kai etene anayo muli owela.”
12 Angamari-ile uwa manyalwiwa oowara malayae aunde, moi oogarati vatebulo. Ndiye oowafuka ira: “Kodi muiziwa ira chifukwa n’ni ndi-uwile manyalwinyu? 13 Nyo munondiromola ira ‘Mphunzisi’ koma teto ‘Mbwiye,’ munoonga vyoona, chifukwa ndili Mphunzisi koma teto ndili Mbwiye. 14 Eno akala miyo unoyo ndili Mbwiye koma teto Mphunzisi, ndi-uwile manyalwinyu, nanyen’ne teto munafuneya mu-uwanenga manyalo. 15 Chifukwa ndiuva-ani isazo ira mwemo ndipangele miyo wa nyo, nanyen’ne teto mupangenga chimozimozi. 16 Ndithu ndinaauwandelani, kapolo kanamukwaranya mbwiyae, teto muthu orumiwa kanamukwaranya unoyo umurumile. 17 Akala munaiziwa vyongo vyevi, munoza mukale osangalala mwavipanganga. 18 Miyo kandinaonga vyongo vyevi wa etene nyen’ne, chifukwa ndiaiziwa athu anayo ndiasakulile miyo. Koma vyevi viireya ira lemba likwakwaneli-ediwe, lelo linaonga ira: ‘Muthu unoyo adja yodja yanga undiukela.’ 19 Miyo ndiuwandelani vyongo vyevi vyaanaireye, ira vyaza viireya nyo muze muroromele ira unoyo mwamudedi-eda nyo ngu miyo. 20 Ndithu ndinaauwandelani, uliwetene unoyo umuwachelile muthu unoyo ndimurumile miyo undiwachela teto miyo. Moi unoyo undiwachelile miyo, umuwachela teto unoyo andirumile.”
21 Yesu angaongile vyevi, oovuteya vinjinji m’murimani, moi aongile ira: “Ndithu ndinaauwandelani, m’mo-i wa nyo unondipeleka.” 22 Ofunjedayo koowambeela ing’anana chifukwa kataiziwa ira unamuongana mbaani. 23 M’mo-i wa ofunjedayo, unoyo Yesu amuomeliwana liye vinjinji, oogarati vakwikwi na Yesuyo. 24 Eno Simoni Petulo oomuing’anechecha ofunjedoyo nomufuka ira: “Niwandele kodi unaonga vya mbaani?” 25 Ndiye ofunjeda unoyo ali vakwikwi na Yesuyo oomufuka ira: “Mbwiyeni, kodi munamuongana mbaani?” 26 Yesu oosomeda ira: “Ngunoyo ndinamuva-e miyo mkate unoyo ndinauvodi-e miyo m’mbalemu.” Eno oovodi-a mkateyo m’mbale, nomuva-a Yudasi, mwana wa Simoni Isikariyoti. 27 Yudasi angawachelile mkateyo, Satana oovolowa m’murimani mwae. Eno Yesu oomuwandela ira: “Vyevyo unafunawe panga, uvipange mombaraanya.” 28 Koma va athu anayo kali vatebulovo, kalivo ngakale m’mo-i unoyo aiziwile chifukwa iwa Yesu aongile mawu anala wa liye. 29 Voi Yudasi ngunoyo asunga bokosi la ndalama, amo-iwa kaganiza ira Yesu unamuwandela ira, “Ugule vyongo vyetene vyevyo vinafuneya vaikondwelelo,” kapena ira apeleke vyongo wa athu osauwa. 30 Eno Yudasi angawachelile mkateyo, ookuma mombaraanya moi vyevi vyaireya ma-iyu.
31 Yudasi angakumile, Yesu aongile ira: “Sopano Mwana wa muthu ulemekeziwa, moi Mulungu ulemekeziwa zela mwa Mwanoyo. 32 Mulungu unomulemekeza Mwanoyo moi unomulemekeza mombaraanya. 33 Nyo afwanga avamurima,* ndinokala na nyo wathawi yoyeva. Munoza mundisaele, moi vyevyo ndaawandelile miyo Ayuda pivyevyo teto ndinauwandelani miyo ira, ‘Wewo ndinadowa miyo nyo kamunawande fiyawo.’ 34 Ndinouva-ani lamulo lisha ira muomeliwanenga. Mofwanafwana na mwemo ndiuomeliwenani miyo, nanyen’ne teto muomeliwanenga. 35 Athu etene kanoza kaiziwe ira muli ofunjedanga akala munaomeliwana.”
36 Simoni Petulo oomufuka ira: “Mbwiyeni, munadowa waani?” Yesu oosomeda ira: “Wewo ndinadowa miyo kunakwakwani-e ndi-arela vathawiila, koma unoza undi-arele usogolo.” 37 Petulo oomufuka nawili ira: “Mbwiyeni, chifukwa n’ni kandinakwakwani-e u-arelani vathawiila? Miyo ndinoza ndipeleke moywanga chifukwa ya nyo.” 38 Yesu oomusomeda ira: “Kodi unoza upeleke moywawo chifukwa ya miyo? Ndithu ndinaauwandela ira, tambala aanaule, weyo unondikoonda maulendo maralu.”