Vyoira Vya Anamarumiwa
8 Saulo oosomedela ira Sitefano aphiwe.
Dambo lelo, pingo unoyo wali wu Yelusalemu oowambeela zuzumi-iwa vinjinji. Eno ofunjeda etene, iyavo anamarumiwa oka, koobalaleya dowa muvigawo vya Yudeya na Samariya. 2 Koma athu amo-iwa oova Mulungu koomulanda Sitefano dowa mu-ela m’manda, moi vanduli viwa koomuulela vinjinji. 3 Saulo oowambeela zuzumi-a pingo mwankhanza. Liye oovolowa munyumba iliyetene nolanda alombwana na a-iyana, moi oodowa a-eela mundende.
4 Komave, athu anayo kabalaleilale koolaleela uthenga wapama wa mawu a Mulungu m’madela anayo kataweleathu. 5 Filipo oodowa mu mzinda wa Samariya moi oowambeela laleela vya Kristu wa athu a wewo. 6 Athu anjinji koovuruwana vyevyo Filipo aonga liye. Etene koovuruwana koma teto koowona vizindikilo vyevyo apanga liye. 7 Wewo ookala athu anjinji anayo kan’na mizimu dotakala moi mizimudo dookuwa koma teto dookuma. Athu anjinji okhwa viwalo koma teto orangala koochili-iwa. 8 Eno athu a mu mzindamo koosangalala vinjinji.
9 Mu mzindola mookala teto muthu m’mo-iwa zina lae Simoni, unoyo vowambeela apanga vyongo vyamasenga moi oodabwi-a athu etene awu Samariya teto oovitama vinjinji. 10 Athu etene, a-ima na andimuwene, koopanga chidwi na liye moi kaonga ira: “Muthula ukaana kopolo dilukulu da Mulungu.” 11 Athu koopanga chidwi na liye chifukwa wathawi indendai oowadabwi-a na vyamasenga vyevyo apanga liye. 12 Koma Filipo angaalaleele uthenga wapama wa Umwene wa Mulungu na uthenga oonga vya zina la Yesu Kristu, aluwa koororomela moi alombwana na a-iyana koobatiziwa. 13 Naliyene teto Simoni oororomela moi angabatiziwe, kaa-iyana na Filipo uliwetene wewo adowa liye. Liye oodabwa voona vizindikilo koma teto chito dakopolo na dilukulu dedo Filipo apanga liye.
14 Anamarumiwa awu Yelusalemu kangavwide ira athu awu Samariya koowachela mawu a Mulungu, koowatumizela Petulo na Yohani. 15 Aluwa koodowa moi kangafiile wewo koowapempelela ira kawachele zimu owela. 16 Vathawi inela athwayo kali kaanawachele zimu owela, koma kali kangabatiziwe muzina la Mbwiye Yesu. 17 Eno Petulo na Yohani koowa-inda athwayo vamuru,* moi koowachela zimu owela.
18 Ndiye Simoni angaonile ira anamarumiwayo kakeda a-inda athwayo vamuru koowachela zimu owela, liye oofuna ira aava-e ndalama. 19 Moi aongile ira: “Namiyene teto mundiva-e kopolo inela, ira muthu uliwetene unoyo ndinamu-inde miyo vamuru awachelenga zimu owela.” 20 Koma Petulo oomuwandela ira: “Silivawoyo aonongiwe limo-i na weyo, chifukwa unaganiza ira mphaso yaulele ya Mulungu unokoza igula na ndalama. 21 Chito inela kinaukuza moi kun’na mbali iliyetene chifukwa murimawo kai olungama vamaso va Mulungu. 22 Eno lapa vyotakala vyevyo upangileweevi moi umuvepe Yehova* mochondelela ira akala pivyowandeya, aukululukele chifukwa ya maganizo otakala anayo kali m’murimani mwawo. 23 Ndiona ira weyo uli poizoni owaawa* koma teto uli kapolo wa vyongo vyachinyengo.” 24 Simoni oosomeda ira: “Ndipempeleleni wa Yehova* mochondelela ira vyongo vyetene vyevyo muongile nyo kavindiireele.”
25 Eno kangamalile pangela umboni mokwakwanela koma teto onga mawu a Yehova,* aluwa koowelela wu Yelusalemu. Vevo kadowaathu koolengeza uthenga wapama m’mavande anjinji awu Samariya.
26 Koma ngelo wa Yehova* oomuwandela Filipo ira: “Maruwa udowe um’mwela, wu sewu okumela wu Yelusalemu dowa wu Gaza.” (Unola ngu sewu wa muipululu.) 27 Eno Filipo oomaruwa moi oogumana na nduna wawu Itiyopiya. Muthu unola ookaana udindo ulukulu moi oomukami-a Kandake, mfumukazi wawu Itiyopiya. Teto ooing’anela chuma yetene ya mfumukaziyo. Liye adowile wu Yelusalemu dowa lambela Mulungu. 28 Vevo awelela liye waniwa, ali angagaratile mugaleta mwae moi awelenga mogweli-a mawu ulosi wa namaongela Yesaya. 29 Ndiye zimu owela oomuwandela Filipo ira: “Dowa waandamele galeta laelo.” 30 Filipo ootamanga aendanga m’mbali mwa galetalo moi oomuvwa awelenganga mogweli-a mawu ulosi wa namaongela Yesaya. Eno Filipo oomufuka ira: “Kodi munovwechecha vyevyo munawelenga nyo?” 31 Liye oosomeda ira: “Ndinavwecheche avi va-ali muthu ondimasulela?” Eno oomuvepa Filipo ira agwele mugaletamo nokala limo-i. 32 Mawu a m’Malemba anayo awelenga liye kali oyi: “Koomudowana umalo oyi kamuphele ngati khosa. Moi mofwanafwana na mwana wa khosa unoyo kanakuwa vevo kanafunaathu muinga maoya, kaa-ulile vamulomo vae. 33 Vevo kamupangelaathu vyongo vyonyaswi-a, katamupangele vyachilungamo. Kodi mbaani unafotokoze mwasatanesatane m’bado wa makolwae? Chifukwa liye unoza aphiwe vailambo yavati.”
34 Ndiye ndunoyo oomufuka Filipo ira: “Ndiwandeleni, kodi namaongelola unaonga vya mbaani? Unaonga vya liye kapena vya muthu m’mo-iwa?” 35 Vingairile eno, Filipo oowambeela muwandela uthenga wapama oonga vya Yesu, moi aambeele valemba leli. 36 Vathawi ineyo kaendaathu mu sewumo, koofiya vamalo anayo vali ma-inje anjinji moi ndunoyo aongile ira: “Kaonani, vano vikala ma-inje anjinji! Chin’ni inandilepeli-a batiziwa?” 37* —— 38 Eno liye oovepa ira galetalo liimele. Vanduli viwa Filipo na ndunoyo kootita dowa vamalo anayo vali ma-inje, moi Filipo oomubatiza ndunoyo. 39 Kangatavuwile mwikomo, zimu wa Yehova* oomuchosavo Filipo mombaraanya moi ndunoyo kaamuonile nawili, koma liye oopitiliza ulendwae asangalalanga. 40 Koma Filipo afwanyeile angali wu Asidodi, moi oowambeela lengeza uthenga wapama m’mizinda detene da mudelalo mpakana oofiya wu Kaisareya.