Olembiwa na Mateyu
11 Yesu angamari-ile peleka malangizo wa ofunjedae 12, oovenyawo wewo nodowa funji-a nolaleela wu mizinda dimo-i.
2 Koma Yohani angali mundende, oovwa vyevyo Kristu apanga liye moi ooruma ofunjedae 3 nodowa mufuka ira: “Kodi Mesiya unoyo ninamudedi-edela iyo ngu nyo kapena nidedi-ede m’mo-iwa?” 4 Yesu oowasomeda ira: “Dowani mwamuwandele Yohani vyevyo munavwa nyo koma teto vyevyo munaona nyo: 5 Anayo kan’na vuto lo-oona kanoona, orangala kanoenda, a makate kanochili-iwa, moi anayo kan’na vuto lo-ovwa kanovwa. Okhwa kanovenyi-iwa teto osauwa kanowandeliwa uthenga wapama. 6 Osangalala ngu muthu unoyo kanafwanya yokumudwi-a mwa miyo.”
7 Vevo ofunjeda a Yohani kadowaathu, Yesu oowambeela wandela gulu la athu vyokuza Yohani ira: “Kodi mwadowile muipululu dowa ona n’ni? Kodi mwadowile dowa ona bango lotekenyeya na lipevo? 8 Nanga mwadowile dowa ona n’ni kwenikweni? Kapena mwadowile dowa muona muthu owara vyowara vyavadimu? Naari, vale athu anayo kanawara vyowara vyavadimu kanafwanyeya munyumba da mamwene. 9 Nanga chifukwa n’ni mwadowile wewo? Kapena mwadowile ira mwamuone namaongela? Ee, ndinaauwandelani, Yohani ngu namaongela koma teto ngofuneya vinjinji kwaranya anamaongela. 10 Malemba kanaonga vya muthu unola ira: ‘Kaona! Miyo ndinomutumiza mtumikanga ira asogole dowa usakaedela ndila!’ 11 Onga vyoona, va athu etene, kalivo mulukulu kwaranya Yohani M’batizi. Koma muthu unoyo uli n’ng’onong’ono mu Umwene waudimu ngu mulukulu kwaranya liye. 12 Ambeela m’malambo a Yohani M’batizi mpakana vano athu kanoesaesa mwatindi ira kafwanye mwai ovolowa mu Umwene waudimu, moi anayo kanaesaesa mwatindi kanofwanya mwai unola. 13 Chifukwa vyongo vyetene vyevyo anamaongela kalembileathu koma teto Ilamulo, vyoowonga vya vyongo vyevyo vyafuneya ireya mpakana muthawi ya Yohani. 14 Kaya munororomela kapena naari, Yohani ngu ‘Eliya unoyo anamaongela kaongileathu ira unoza aze.’ 15 Muthu unoyo un’na mabaru avwe.
16 Kodi m’bado unola ndiuerekezele na mbaani? Uli ngati a-ima ang’onong’ono anayo kagaratile musika nokuwelanga afwiwa owaledana 17 ira: ‘Noouimbelani itolilo, koma nyo kamwainile. Nooula mokuwa, koma nyo kamwavigugudile vamirima chifukwa ya chisoni.’ 18 Mofwanafwana na vyevi, Yohani ooza moi kaadja kapena ng’wa. Koma athu kaonga ira, ‘Ukaana iwanda.’ 19 Mwana wa muthu ooza moi unodja koma teto unong’wa koma athu kanaonga ira, ‘Konani! Muthu odja vinjinji na oomeliwa vinyu, fwae wa okomi-a misonkho na ochimwa.’ Mulimwetene, zelu inosimikizeleya ira chi yolungama chifukwa ya chito diwa.”*
20 Vanduli viwa oowambeela sumulula mizinda dedo apangilemo liye chito dinjinji dakopolo chifukwa kadalapile. Liye aongile ira: 21 “Soka wa nyo athu awu Korazini! Soka wa nyo athu awu Betisaida! Chifukwa chito dakopolo dedo mwapangile nyo, aakale ira daireile wu Turo na wu Sidoni, athu kakala kangalapile wale, kangawarile viguduli nogarati vadora. 22 Koma ndinauwandelani ira va Dambo la Iweluzo, ilango inyu inoza ikale yovoreya vinjinji kwaranya ya Turo na Sidoni. 23 Nanyen’ne teto athu awu Kaperenao, kodi mwina munoza mugweli-iwe udimu? Naari, koma munoza mutitele wu Manda,* chifukwa chito dakopolo dedo mwapangile nyo, aakale ira daireile wu Sodomu, mzindoyo wakala ungalivove mpakana peeno. 24 Koma ndinauwandelani ira va Dambo la Iweluzo, ilango ya Kaperenao inaza ikala yovoreya vinjinji kwaranya ya mzinda wa Sodomu.”
25 Vathawi ineyo Yesu oowonga ira: “Ndinoutamandani nyo Babani vamaso va athu etene, Mbwiye waudimu na ilambo yavati, chifukwa athu a zelu na ozindikila muwabisela vyongo vyevi moi muviulula wa a-ima ang’onong’ono. 26 Vyoona Babani, chifukwa nyo moosomedela ira vyevi viireye. 27 Babanga undiva-a vyongo vyetene moi kalivo unoyo unamuiziwa pama Mwana koma Baba eka. Koma teto kalivo unoyo unamuiziwa pama Baba koma Mwana eka na uliwetene unoyo Mwanoyo unafuna liye muululela vya Baboyo. 28 Zani wa miyo nyo etene anayo muna-inda chito yogomi-a na nyo onyemeliwa moi ndinoza ndiusisimuleni. 29 Tukulani goli* langa teto lolani ira ndiufunji-eni, chifukwa miyo ndili ofaasa na oviyevi-a moi munoza musisimuliwe. 30 Chifukwa goli langa kai lorucha tukula teto katundwanga ngovevuwa.”