Olembiwa na Yohani
17 Yesu angaongile vyongo vyevi, ooing’ana udimu noonga ira: “Babani, thawi ifiya. Mulemekezeni mwaninyu, ira mwaninyuyo aulemekezeni. 2 Nyo mumuva-a mwaninyu ulamulilo ira liye apeleke moyo oomala wa athu etene anayo mwamuva-ile nyo. 3 Moyo oomala kanoza kaufwanye kafunjedanga noiziwa vya nyo, Mulungu unoyo ngoona, koma teto vya Yesu Kristu, unoyo mwamurumile nyo. 4 Ndiulemekezani vailambo yavati, chifukwa ndimari-a inda chito ineyo mwandiva-ile nyo. 5 Sopano Babani, ndiloleni ira ndikale vambali vinyu moi mundiva-e ulemelelo unoyo ndan’na miyo ilambo yaanakalewo.
6 Ndiaiziwi-a zina linyu athu anayo mwandiva-ile nyo vailambo yavati. Kali eenyu, koma moowapeleka wa miyo moi aluwa koovwela mawinyu. 7 Sopano aluwa kooiziwa ira vyongo vyetene vyevyo mwandiva-ile nyo pivyokumela wa nyo, 8 chifukwa ndiawandela mawu anayo mwandiva-ile nyo. Aluwa kooawachela moi kooiziwa ira miyo ndooza monga muthu unoyo arumiwe na nyo moi koororomela ira nyo ngunoyo mwandirumile. 9 Eno ndinowapempelela. Kandinapempelela ilambo, koma ndinapempelela athu anayo mwandiva-ile nyo, chifukwa aluwa mbeenyu. 10 Vyongo vyetene vyevyo ndin’na miyo pivyeenyu moi vyongo vinyu vyetene pivyaanga. Miyo ndilemekezeya vaari va athu anayo mwandiva-ile nyo.
11 Miyo kandinapitiliza kala muilambwela chifukwa ndinaza wa nyo, koma aluwa kali muilambwela. Baba owela, aing’aneleni chifukwa ya zina linyu lelo mwandiva-ile nyo, ira kakale ogwilizana monga mwemo nilili iyo. 12 Vevo ndali miyo limo-i na aluwa, ndoowaing’anela chifukwa ya zina linyu lelo mwandiva-ile nyo. Miyo ndiatetezela moi kavali uliwetene wa aluwa unoyo uwonongeile koma mwana wa chiwonongeko eka. Vyevi viireya ira lemba likwakwaneli-ediwe. 13 Koma sopano ndinaza wa nyo, moi ndinaonga vyevi vevo ndili miyo vailambo ira aluwa kakaena imwemwe ilukulu vinjinji ngati ineyo ndin’na miyo. 14 Aluwa ndiava-a mawinyu, koma ilambo inoidana na aluwa chifukwa katili mbali yailambo, mofwanafwana na miyo unoyo kandili mbali yailambo.
15 Kandinavepa ira muwachose muilambo, koma ndinavepa ira muwateteze wa otakaloyo. 16 Aluwa katili mbali yailambo, mofwanafwana na miyo unoyo kandili mbali yailambo. 17 Pangi-ani ira kakale owela* vo-indi-eda chito choonadi. Mawinyu chi choonadi. 18 Nyo moondiruma muilambo. Mofwanafwana na vyevi namiyene teto ndiaruma muilambo. 19 Miyo ndinovipangi-a kala owela chifukwa ya aluwa, ira naaluwene teto kakale owela na choonadi.
20 Kandinapempelela oka anala, koma ndinopempelela teto anayo kanandiroromela kangavuruwanile vyevyo aluwa kanafunji-aathu. 21 Ndinopanga vyevi ira etene anala kakale ogwilizana ngati mwemo nyo Babani na miyo nilili iyo ogwilizana, ira naaluwene teto kakale ogwilizana na yolinga yoi ilambo iroromele ira nyo moondiruma. 22 Ndiava-a ulemelelo unoyo mwandiva-ile nyo, ira aluwa kakale ogwilizana ngati mwemo nilili iyo. 23 Miyo ndikale ogwilizana na aluwa, nyo mukale ogwilizana na miyo, ira aluwa kakale ogwilizana vinjinji, ira ilambo iiziwe ira nyo moondiruma miyo koma teto ira munowaomeliwana ngati mwemo munandiomeliwana nyo miyo. 24 Babani, ndinafuna ira athu anayo mundiva-ile nyo kaze kakale limo-i na miyo wewo ndinaze miyo ndikale, ira kaze kaone ulemelelwanga unoyo mundiva-ile nyo, chifukwa moondiomeliwana ilambo yaanalengiwe. 25 Baba olungama, ilambo kinauiziwani, koma miyo ndinouiziwani moi athwala kooiziwa ira nyo moondiruma. 26 Miyo ndipangi-a ira aluwa kaiziwe zina linyu moi ndinoza ndipitilize aiziwi-a zinali ira naaluwene teto katonyi-edenga chikondi ngati ineyo mwanditonyi-edile nyo, ira namiyene teto ndikale ogwilizana na aluwa.”