Olembiwa na Luka
15 Sopano okomi-a misonkho etene koma teto athu ochimwa, kooza wa Yesu ira kaze kamuvuruwane. 2 Ndiye Afarisi na alembi koong’ung’uza noonganga ira: “Muthu unola unowachela athu ochimwa nodja limo-i na aluwa.” 3 Eno liye ooawandela fanizo loi: 4 “Ngu mbaani vaari vinyu unoyo angan’na khosa 100, imo-i dimeela, kana-iye khosa 99 muipululu dowa saela khosa imo-i ineyo idimeeleyo mpakana angaifwanyile? 5 Moi aifwanya unoitukula valifudi vae teto unosangalala. 6 Afiya waniwa unosonkani-a afwae koma teto athu owandamanana nyumba moi unoawandela ira, ‘Sangalalani limo-i na miyo, chifukwa ndifwanya khosanga ineyo yadimeele.’ 7 Ndithu ndinaauwandelani ira, mofwanafwana na vyevi, udimu unoza ukale isangalalo yoinjiva chifukwa ya muthu m’mo-i ochimwa unoyo ulapile kwaranya ya athu 99 olungama anayo katinafuneya lapa.
8 Kapena ngu iyana uuvi unoyo un’na ndalama dokwakwana madalakima 10,* ndiye imo-i dimeela, kanakari-e nyale novyela m’mba mwae koma teto saela mosamala vinjinji mpakana angaifwanyile? 9 Moi aifwanya unosonkani-a afwae* koma teto athu owandamanana nyumba moi unoawandela ira, ‘Sangalalani limo-i na miyo, chifukwa ndifwanya ndalama ya dalakima* ineyo yadimeele.’ 10 Eno ndinauwandelani ira, mofwanafwana na vyevi, angelo a Mulungu kanosangalala vinjinji chifukwa ya muthu m’mo-i ochimwa unoyo ulapile.”
11 Vanduli viwa aongile ira: “Muthu m’mo-iwa ookaana a-ima ambin’li aalombwana. 12 Mwana n’ng’onong’ono oomuvepa babae ira, ‘Babani, mundiva-e cholowanga va chuminyu.’ Eno baboyo oowagawela chumae a-imayo. 13 Vangavirile malambo oyeva, mwana n’ng’onong’onoyo oosonkani-a chumae yetene dowa uilambo imo-iwa yaundendai. Wewo oowambeela panga makalelo otakala moi oowononga chumae yetene. 14 Angaonongile chumae yetene, muilambo yetene ineyo moowambeela ndala ilukulu moi liye oowambeela vuteya vinjinji. 15 Liye oowambeela inda chito wa muthu m’mo-iwa wa muilambweyo moi muthuyo oomutumiza ira adowe awetenga khumba dae. 16 Liye oofiya volakalaka yodja ineyo khumbado dadjaathu, koma kavali muthu unoyo amuva-a yodja.
17 Angaganizile modii-a aongile ira, ‘Babanga ukaana aganyo anjinji moi aluwa kookaana yodja yoinjiva, koma miyo uno ndinaakhwa na ndala! 18 Ndinowelela wa babanga moi ndinodowa ndamuwandele ira: “Babani, ndichimwela udimu koma teto ndiuchimwelani nyo. 19 Kandili ofwanelela romoliwa ira ndili mwaninyu. Koma mundionenga ngati m’mo-i mwa aganyo anayo mun’na nyo.”’ 20 Eno oomaruwa nowelela wa babae. Angali vandendai, babae oomuona moi oomuvwela chisoni. Vingairile eno oomutamangela nomukumbarela koma teto mukisa mwachikondi. 21 Mwanoyo oomuwandela babae ira, ‘Babani, ndichimwela udimu koma teto ndiuchimwelani nyo. Kandili ofwanelela romoliwa ira ndili mwaninyu.’ 22 Koma babaeyo ooawandela aganyo ira, ‘Mbaraanyani, landani mkanjo wapama vinjinjile mumuwari-e. Mumuwari-e teto mphete munyala mwae na sapato. 23 Koma teto mumuzena mwana wa ng’ombe oruva, mumuphe ira nidje nosangalala. 24 Chifukwa mwanangola ookhwa koma sopano uli moyo, oodimeela koma vano ufwanyeya.’ Eno athu etene koowambeela sangalala.
25 Koma mwanae wandimuwa ali angali umunda. Ndiye vevo aza liye, angaandamele fiya vandevo, oovwa phokoso la nyimbo koma teto athu kainanga. 26 Eno oomuitana wachito m’mo-i nomufuka ineyo yaireya. 27 Liye oomuwandela ira, ‘Nchimweninyu uza moi babinyu umuphela mwana wa ng’ombe oruva, chifukwa uza angali wapamene.’ 28 Koma liye oolunduwa vinjinji moi ookoonda volowa m’mbamo. Ndiye babae ookuma nowambeela muchondelela ira avolowe. 29 Liye oomuwandela babae ira, ‘Wachaka detene dedi ndikala ndiu-indelangani chito ngati waganyo moi kandinaphwanyevo malamulwinyu ngakale ndila imo-i. Koma kamunandiva-evo ngakale mwana wa budi ira ndisangalale na afwanga. 30 Koma mwaninyula angafiile, unoyo aonongile* chuminyu na mahule, mumuphela mwana wa ng’ombe oruva pama.’ 31 Koma babaeyo oomuwandela ira, ‘Mwananga, weyo ukala na miyo wathawi detene moi vyongo vyetene vyevyo ndin’na miyo pi vyaawo. 32 Koma ninafuneya sangalala, chifukwa balaola ookhwa koma sopano uli moyo, oodimeela koma vano ufwanyeya.’”