Olembiwa na Luka

23 Eno gulu letene loomaruwa mudowana Yesu wa Pilato. 2 Ndiye aluwa koowambeela munamedela ira: “Iyo nimufwanya muthula a-olochanga tundwi-u, nokoondi-anga athu ira katikomenga sonkho wa Kaisara koma teto unaonga ira ngu Kristu mwene.” 3 Sopano Pilato oomufuka ira: “Kodi uli Mwene wa Ayuda?” Liye oosomeda ira: “Vili eno, monga mwemo muongele nyo.” 4 Vanduli viwa Pilato ooawandela asembe alukulu na gulu la athulo ira: “Kandifwanyile mulandu uliwetene mwa muthula.” 5 Koma aluwa koopitiliza onga ira: “Vyevyo muthula unafunji-a liye athu mu Yudeya mwetene, ambeela wu Galileya mpakana uno vinopangi-a ira athu kativwelenga ulamulilo.” 6 Pilato angavwile vyevyo, oofuka akala Yesu ali wawu Galileya. 7 Eno angaiziwile ira unakumela muigawo ineyo yalamuleliwa na Herodi, oomutumiza wa Herodi, unoyo m’malambo anayo ali wu Yelusalemu.

8 Herodi angamuonile Yesu oosangalala vinjinji. Wathawi indendai oofunechecha ira amuone chifukwa ali angavwile vinjinji vyokuza liye. Koma teto oodedi-edela ira aone izindikilo ineyo unapange liye. 9 Eno oowambeela mufuka vyongo vinjinji, koma Yesu kaasomedile. 10 Koma asembe alukulu na alembi koopitilizave munyanyuwela. 11 Ndiye Herodi limo-i na asilikalae koomupangela vyaibewe. Koomunyoza vomuwari-a yowara yoriya vinjinji, vanduli viwa koomutumiza wa Pilato. 12 Dambo lelo Herodi ookala fwae wa Pilato, koma munduli mwetene mwemu vyevi vya-anaireye aluwa kooidana vinjinji.

13 Ndiye Pilato oosonkani-a asembe alukulu, olamulela na athu amo-iwa 14 noawandela ira: “Nyo mumuzana muthula wa miyo na mulandu oyi unolimbikisa athu ukela ulamulilo. Koma muona ekinyu! Miyo ndimufuka vamaso vinyu moi kandimufwanyilena chifukwa yomuimbela milandu dedo munamunamedela nyo. 15 Moi ngakale Herodi kamufwanyilena mulandu, chichifukwa iwa umutumizile wa iyo. Muthula kapangile yongo iliyetene yopangi-a ira aphiwe. 16 Eno ndinakeda muvaza nomu-iya.” 17* —— 18 Koma gulu letene lookuwa ira: “Muthu unoyo aphiwe ba-i, koma iyo munimasulele Baraba!” 19 (Muthu unola oo-eliwa mundende chifukwa youkela boma koma teto chifukwa yopha muthu.) 20 Pilato oonga nawili na athwayo chifukwa oofunechecha ira amumasule Yesu. 21 Ndiye athwayo koowambeela kuwa ira: “Apachikiwe unoyo! Apachikiwe unoyo!” 22 Oowafuka ulendo wanaralu ira: “Chifukwa n’ni? Kodi muthula uchimwile n’ni? Miyo kandimufwanyile na mulandu uliwetene ira mpakana aphiwe. Eno ndinakeda muvaza nomumasula.” 23 Koma athwayo kangavwile vyevi koopitiliza kuwa mogweli-a mawu ira Yesu aphiwe. Athwayo kookuwa mwakopolo moi Pilato akede lolela. 24 Eno Pilato akede panga vyevyo athwayo kafunaathu. 25 Liye oomumasula muthu unoyo athwayo kamufunaathu, unoyo a-eliwe mundende chifukwa youkela boma koma teto chifukwa yopha muthu. Koma oomupeleka Yesu m’mandani mwiwa ira kamupangena vyevyo kafunaathu.

26 Vevo kamudowanaathu, aluwa koomu-inda muthu m’mo-iwa zina lae Simoni wawu Kurene, unoyo akumela udela la umavande. Aluwa koomutukuli-a tengo ozuzumelavo* ira amu-arelenga Yesu munduli. 27 Gulu lilukulu la athu loomu-arela limo-i na a-iyana anjinji anayo kavivaza vamirima chifukwa ya chisoni koma teto anayo kamuulela. 28 Yesu ootembenuwa noawandela a-iyanayo ira: “Nyo a-ima a a-iyana awu Yelusalemu, iyani ndiulela. Koma muviulele ekinyu koma teto muwaulele a-iminyu. 29 Chifukwa thawi inoza ifiye vevo athu kanazeathu kaonge ira, ‘Osangalala mba a-iyana anayo katin’na a-ima, a-iyana anayo katinabalevo koma teto a-iyana anayo katinaamwi-evo!’ 30 Vathawi ineyo aluwa kanoza kaambeele wandela mimwango ira, ‘Nigumuweleni!’ teto kanoza kawandele mimwango ding’onong’ono ira, ‘Nivu-eleleni!’ 31 Akala kanapanga vyongo vyevi tengo wangali utiti, nanga vinaza vikala avi tengoyo waza uuma?”

32 Athwayo koowalanda teto alombwana amo-iwa ambin’li, anayo kali vigawenga, ira kadowe kaaphe limo-i na Yesu. 33 Ndiye kangafiile vamalo amo-iwa oromoliwa ira Chibade,* koomukomela vatengo limo-i na vigawenga vile. M’mo-i kamupachikile undanda lae lodjana, m’mo-iwa kamupachikile undanda lae la mazele. 34 Koma Yesu aongile ira: “Babani, akululukeleni, chifukwa katinaiziwa vyevyo kanapangaathu.” Aluwa koogaana vyowara vyae vopanga maele. 35 Athu kakede imela noing’ananga vyevyo vyaireya. Koma olamulela koowonga mwaibewe ira: “Liye ookwakwani-a vulumucha athu amo-iwa, ndiye mu-iyeni avivulumuche ekave, akala uli Kristu wa Mulungu, Osakuliwa.” 36 Naaluwene teto asilikali koomupangela vyaibewe, aluwa kooza nomuva-anga vinyu owaawa 37 noonganga ira: “Akala uli Mwene wa Ayuda, vivulumuche wekave.” 38 Aluwa kookomela ikwangwani vadimu va murwae nolembavo mulandu unoyo kamupheleathu ira: “Ula ngu Mwene wa Ayuda.”

39 Ndiye m’mo-i wa vigawenga vyevyo vyapachikiwe limo-i na Yesu, oowambeela onga vyaibewe ira: “Kodi weyo kuli Kristu? Vivulumuche wekave, koma teto univulumuche iyo.” 40 Fwae oosomeda vomusumulula ira: “Kodi weyo kunaova Mulungu voona ira nawen’ne teto unawachela ilango yofwanafwana na ya muthu unola? 41 Iyo ninolangiwa chifukwa ya vyevyo napangile iyo. Koma muthula kalakwile yongo iliyetene.” 42 Vanduli viwa liye aongile ira: “Yesu, mudowe mwandiumbuwele mwaza muvolowa mu Umweninyu.” 43 Yesu oomuwandela ira: “Ndithu ndinaauwandela peeno, ira weyo unoza ukale na miyo m’Paradaizo.”

44 Ambeela 12 koloko tana,* mpakana 3 koloko mazulo* muilambo yetene ineyo mookala dima, 45 chifukwa zuwa lootima. Vathawi inela nguwo yochinga ya munyumba yopatuleya yoong’ambeya vaari kumela vadimu mpakana vati. 46 Vanduli viwa Yesu ookuwa mogweli-a mawu ira: “Babani, ndinopeleka zimwanga m’mandani mwinyu!” Angaongile vyevi ookhwa. 47 Msogoleli wa asilikali angaonile vyevyo vyaireile, oowambeela tamanda Mulungu ira: “Ndithu muthula ali olungama.” 48 Athu etene anayo kasonkanile wewo kangaonile vyevyo vyaireile, koowelela waniwa kavivazanga vamirimani. 49 Athu etene anayo kamuiziwa kooimela vandendai. Koma teto a-iyana anayo kamu-arela kumela wu Galileya kali vevo moi koowona vyongo vyevi.

50 Ndiye vookala muthu m’mo-iwa zina lae Yosefe, unoyo ali wa Mukhoti Lilukulu la Ayuda. Muthu unola ali wapama koma teto olungama. 51 (Liye kaasomedele chiwembwiwa koma teto vyevyo kapangileathu.) Yosefe ali okumela wu Arimateya, mu mzinda wa Yudeya moi oodedi-edela Umwene wa Mulungu. 52 Liye oodowa wa Pilato dowa vepa mtembo wa Yesu. 53 Eno ootiti-a temboyo noupota na nguwo yapama vinjinji moi oou-ela m’manda* anayo asemile liye valibwe, anayo kamwa-eliwe muthu uliwetene. 54 Sopano lali Dambo Lokozeela, moi Dambo la Sabata lakede ala vang’ono ambeela. 55 Koma a-iyana anayo kazide limo-i na Yesu kumela wu Galileya, koomu-arela moi koowona mandayo* koma teto malo anayo temboyo wa-eliweathu. 56 Vanduli viwa koodowa ira kasakaede vyonukeli-a na makura onukela. Komave va Dambo la Sabata koovuma malinga na ilamulo.