Vyoira Vya Anamarumiwa

19 Vevo Apolo ali liye wu Korinto, Paulo oovirela m’madela aukumani dowa fiya wu Ifeso. Wewo oofwanyawo ofunjeda amo-iwa, 2 moi oowafuka ira: “Kodi moowachela zimu owela mungakalile ororomela?” Aluwa koomusomeda ira: “Iyo kaninavwevo ira ukala zimu owela.” 3 Moi liye oowafuka nawili ira: “Nanga mwabatiziwe ubatizo wa mbaani?” Aluwa koomusomeda ira: “Nabatiziwe ubatizo wa Yohani.” 4 Vanduli viwa Paulo aongile ira: “Ubatizo unoyo Yohani abatiza liye athu wali izindikilo yoi muthu ulapa. Liye aawandela athu ira karoromele unoyo unaza munduli mwae, tapulela ira Yesu.” 5 Kangavwide vyevi, athwayo koobatiziwa muzina la Mbwiye Yesu. 6 Ndiye Paulo angaa-indile vamuru, aluwa koowachela zimu owela moi koowambeela onga viongelo vyo-iyana-iyana koma teto losela. 7 Athu etene kalivo alombwana okwakwana 12.

8 Wa medi miralu, Paulo oodowa wu sunagoge wewo aonga liye molimba murima. Moi ookamba khani koma teto fotokoza makundo o-inda murima okuza Umwene wa Mulungu. 9 Koma athu amo-iwa koopitiliza umi-a mirima diwa, moi koowonga vyonyoza Ndila ya Mbwiye vamaso va athu anjinji. Eno liye limo-i na ofunjeda koovenyavo vaari viwa. Moi dambo na dambo liye ookamba khani muholo va sukulu ya Turano. 10 Vyevi vyooireya wachaka mbin’li, moi athu etene okala muigawo ya Asia, Ayuda na Agiriki, koovwa mawu a Mbwiye.

11 Mulungu oopitiliza panga vyongo vyakopolo koma teto vyodabwi-a vomu-indi-eda chito Paulo. 12 Moi athu koolanda nguwo dovipukutana na vyowara vyevyo vyagunda thuthu la Paulo vidowana wa athu anayo kabulela, moi koochila. Teto mizimu dotakala dookuma mwa athwayo. 13 Koma Ayuda anayo kaendaenda nokumi-anga viwanda, kooshisheda romola zina la Mbwiye Yesu vofuna chili-a athu anayo kan’na mizimu dotakala. Moi kaonga ira: “Ndinaulamula muzina la Yesu unoyo Paulo unamulaleela liye.” 14 Vookala a-ima aalombwana 7 a Sikeva, wasembe mulukulu wa Iyuda, anayo kapanga vyevi. 15 Koma zimu otakala oowasomeda ira: “Miyo Yesu ndinomuiziwa moi Paulo ndinomuiziwa pama. Nanga nyo muli mbaani?” 16 Vanduli viwa, muthu unoyo an’na zimu otakaloyo oowalupela, moi oolimbana na aluwa m’mo-i na m’mo-i mpakana oowagonji-a etene anayo, moi kookuma m’mbamo notawa kangali mandave, koma teto kangaporeile. 17 Athu etene kooiziwa vyevi, Ayuda na Agiriki anayo kakala wu Ifeso. Eno etene koowova vinjinji moi zina la Mbwiye Yesu loopitiliza lemekeziwa. 18 Athu anjinji anayo kali ororomela kooza za ulula machimwiwa moi koofotokoza vowela vyotakala vyevyo kapangaathu. 19 Athu anjinji anayo kapanga vyamasenga koosonkani-a mabukwiwa nowathumeya vamaso va athu etene. Moi kangawelengile mtengo wa mabukwayo kafwanyile ira kali a ndalama dasiliva dokwakwana 50 000. 20 Eno mawu a Yehova* koopitiliza falikela moi katagonji-iwe.

21 Vyevi vingaireile, Paulo oosimikiza m’murimani mwae dowa wu Yelusalemu, virela wu Makedoniya dowa fiya wu Akaya. Liye aongile ira: “Ndafiya wewo, ndinodowa teto wu Roma.” 22 Eno wu Makedoniya ootumizawo athu ambin’li anayo kamukami-a, unoyo ali Timoteyu na Erasito. Koma liye ookalave muigawo ya Asia wa malambo anjinji.

23 Vathawi ineyo voowambeela isokonezo yokuza Ndila ya Mbwiye. 24 Vookala muthu m’mo-iwa opanga vyongo vya siliva zina lae Demetiriyo. Amisili koopindula vinjinji chifukwa ya chitwae yopanga manyumba ang’onong’ono a siliva ooneya ngati kachisi wa Atemi. 25 Demetiriyo oosonkani-a amisilayo, limo-i na athu anayo a-indana liye chito inela. Moi liye ooawandela ira: “Nyo munoiziwa ira ninofwanya ndalama kumela va chito inela. 26 Sopano munoona koma teto vwa vyoi Paulo unokopa athu anjinji ira kaambeele roromela vyongo vimo-i. Upangile vyevi ookala mu Ifeso moka, koma teto muigawo yetene ya Asia. Liye unaonga ira milungu dopangiwa na manda a athu kai milungu doona. 27 Moi ineyo inaopi-a vinjinji kai nyozeya wa chitwi-u ba-i, koma kachisi wa mulungu mulukulu wa-iyana wa Atemi, unoza aoniwe ngati ookaana chito. Munoiziwa ira muthu uliwetene muigawo yetene ya Asia koma teto vailambo yetene yavati unolemekeza Atemi, koma chifukwa ya vyevyo Paulo unaonga liye ulemelelwae unoza umale.” 28 Athwayo kangavwide vyevi, koolunduwa vinjinji moi koowambeela kuwa ira: “Mulukulu ngu Atemi mulungu wa Aifeso!”

29 Vingairile eno mu mzindamo moowambeela isokonezo, moi athu etene kootamangela umalo opangelawo masika, kangamu-indile Gayo na Arisitako nowakokela vamalo opangelavo masikayo. Gayo na Arisitako kooenda na Paulo moi waniwa wali wu Makedoniya. 30 Paulo oofuna volowa vaari va gulu la athulo, koma ofunjeda katamulolile. 31 Athu amo-iwa oing’anela vikondwelelo koma teto masika, anayo kali afwae, koomutumizela uthenga omuvepa ira ka-ele moywae vangozi vodowa volowa vaguluvo. 32 Onga vyoona, gulu letene lelo loosokonezeya, amo-i kaonga vimo-i, moi amo-iwa teto kaonga vimo-i. Athu anjinji kataiziwa ira chifukwa n’ni kasonkanile wewo. 33 Eno aluwa koomukumi-a Alekizanda mugululo moi Ayuda koomundunyela usogolo. Eno Alekizanda ooimecha muono ira aonge vofuna vitetezela wa athwayo. 34 Koma aluwa kangazindikilile ira liye ngu Muyuda, etene kookuwa wa maola otamangela men’li ira: “Mulukulu ngu Atemi mulungu wa Aifeso!”

35 Vogomi-eda viwa, oing’anela mzindoyo angawandelile gulu la athulo ira limiyale, aongile ira: “Nyo athu a mu Ifeso, kodi vikala muthu unoyo kanaiziwa ira mzinda wa Ifeso ngunoyo unaing’anela kachisi wa Atemi mulukulu na ifanizilo ineyo yamorile kumela udimu? 36 Voi kavali uliwetene unoyo unaruni-e vyevi, munafuneya kala odeka, kamupange vyongo mopupuluma. 37 Nyo muwazana athwala anayo katibile yongo mukachisi kapena nyoza mulungwi-u wa-iyana. 38 Eno akala Demetiriyo na amisili anayo kali limo-i na liye kanamuimba mulandu muthu, vikala malambo oweluza mulandu moi abwanamkubwa* kookalavo. Kadowe kasumelane wewo. 39 Koma akala munafuna vimo-i vyokwaranya veva, igamulwiwa inafuneya idowe yapelekiwe vamalo osomedeleya. 40 Vyevyo viireile peenovi pivyoopi-a chifukwa ninokoza imbiwa mulandu oukela boma. Kavali chifukwa yovweya yoi nipeleke umboni va ipolowe ineyo iireilela.” 41 Angaongile vyevi, ooawandela athwayo ira kadowenga.