Olembiwa na Mateyu
17 Vangavirile malambo 6, Yesu oomulanda Petulo, Yakobo na nchimwenae Yohani nowagwelana m’mwango olapa dowa kala waekiwa. 2 Ndiye wewo liye oochenja maoneelwae vamaso viwa. Kovae yoowala ngati zuwa teto malayae aunde koowala* vinjinji. 3 Vanduli viwa aluwa koomuona Mose na Eliya kakambilananga na Yesu. 4 Ndiye Petulo oomuwandela Yesu ira: “Mbwiyeni, vinokala pama ira iyo nikalenga vano. Akala munafuna, miyo ndinomanga matenti maralu vano, imo-i yeenyu, imo-iwa ya Mose na imo-iwa ya Eliya.” 5 Vathawi ineyo aonga liye, murambo owala vinjinji oowakuneela teto voovweya mawu okumela m’murambomo oonga ira: “Ula ngu Mwananga unoyo ndinamuomeliwana miyo, unoyo unandisangalasa vinjinji. Mumuvwelenga.” 6 Ofunjedayo kangavwile mawu anala, kookokora mpakana kove diwa vati moi koowova vinjinji. 7 Vanduli viwa Yesu ooawandamela nowa-inda moi aongile ira: “Venyani, kamuove.” 8 Kangavenyi-ile miru diwa, koowona ira kavali muthu uliwetene koma Yesu eka. 9 Vevo katitaathu m’mwangonimo, Yesu oowalamula ira: “Kamumuwandele muthu uliwetene vya masomphenya anala mpakana Mwana wa muthu angavenyi-iwe wa okhwa.”
10 Koma ofunjedayo koomufuka ira: “Nanga chifukwa n’ni alembi kanaonga ira Eliya unafuneya za yowambeela?” 11 Liye oowasomeda ira: “Ee, Eliya unoza aze teto unoza aweli-ede vyongo vyetene. 12 Komave, miyo ndinauwandelani ira Eliya ooza wale koma aluwa katamuzindikilile moi koomupangela vyongo vyotakala mogwilizana na vyevyo aluwa kafunaathu. Aluwa kanoza kamuzuzumi-e teto Mwana wa muthu mwandila inela.” 13 Angapangile eno, ofunjedayo koozindikila ira unaonga vyokuza Yohani M’batizi.
14 Kangafiile vakwikwi na gulu la athu, mulombwana m’mo-iwa oomuwandamela moi oomukokorela noonga ira: 15 “Mbwiyeni, mupangeleni chifundo mwananga walombwana, chifukwa unobulela marenda avifufu moi unovuteya vinjinji. Thawi dinjinji unomorela vamulo koma teto mwiko. 16 Ndoomuzana wa ofunjedinyu koma koolepela muchili-a.” 17 Yesu oosomeda ira: “Nyo athu otakala na ookaana iroromelo, kodi ndinakalave na nyo mpakana alini? Ndipitilizeve uvilelani mpakana alini? Muzenani uno.” 18 Kangamudowilena, Yesu oosumulula iwandeyo moi yookuma. Thawi ineyo muzombweyo oochila. 19 Vanduli viwa ofunjeda kooza wa Yesu angali vaekave nomufuka ira: “Chifukwa n’ni iyo nalepelile kumi-a iwandele?” 20 Liye oowasomeda ira: “Chifukwa yoyeva wa iroromelo inyu. Ndithu ndinaauwandelani, akala mun’na iroromelo yoyeva mofwanafwana na kongolo ya mpilu, munoza muwande wandela mwangola ira, ‘Venyavo vano udowe vale,’ moi mwangoyo unoza uvenyevo. Vyongo vyetene vinaza vikala vyowandeya wa nyo.” 21 ——
22 Kangasonkanile vamo-i wu Galileya, Yesu ooawandela ira: “Mwana wa muthu unoza apelekiwe m’mandani mwa athu 23 moi kanoza kamuphe. Koma va dambo lanaralu unoza avenyi-iwe.” Ofunjedae kangavwile vyevi kookaana chisoni vinjinji.
24 Kangafiile wu Kaperenao, athu okomi-a sonkho wa madalakima ambin’li koodowa wa Petulo nomufuka ira: “Kodi mphunzisinyu unopeleka sonkho?” 25 Petulo oosomeda ira: “Ee unopeleka.” Koma angavolowile m’mba, aanaonge iliyetene, Yesu oomufuka ira: “Simoni, unaganiza avi? Kodi mamwene a vailambo yavati kanawachela ndalama da viphaso kapena da misonkho kumela wa mbaani? Kumela wa a-imiwa kapena kumela wa athu ailendo?” 26 Angasomedile ira: “Kumela wa athu ailendo,” Yesu oomuwandela ira: “Akala vili eno, a-ima katinafuneya khoma sonkho. 27 Koma ira kaniakumudwi-e, dowa unyanja, wavoche mbeza moi udowe walande somba yowambeela meza. Wai-ule umulomo uwa, moi unodowa wafwanyewo ndalama imo-i ya siliva.* Udowe walande ndalameyo wakomele sonkhwawo na wanga.”