Olembiwa na Yohani
16 “Ndiuwandelani vyongo vyevi ira iroromelo inyu kifooke. 2 Athu kanoza kauchoseni musunagoge. Moi thawi inoza ifiye vevo muthu uliwetene unoyo unaze aupheni unoza aganize ira upanga utumiki opatuleya wa Mulungu. 3 Koma kanoza kapange vyevi chifukwa katinandiiziwa koma teto katinamuiziwa Babanga. 4 Komave ndiuwandelani vyongo vyevi vyaanaireye, ira vyaza viireya, muze muumbuwele ira ndoouwandelani.
Kandiuwandelileni vyongo vyevi vowambeela chifukwa ndali limo-i na nyo. 5 Sopano ndinadowa wa unoyo andirumile, koma kavali muthu uliwetene wa nyo unoyo unandifuka ira, ‘Munadowa waani?’ 6 Koma chifukwa yoi ndiuwandelani vyongo vyevi, mukaana chisoni ilukulu vinjinji m’murimani mwinyu. 7 Onga vyoona, ndinadowa ira nyo mupindule. Chifukwa akala kandinadowa, oukami-anile kanaza wa nyo koma ndadowa ndinoza ndimutumize wa nyo. 8 Moi oukami-aniyo aza afiya unoza apeleke umboni osimikizeleya muilambwela oonga vya chimo, na chilungamo koma teto iweluzo ya Mulungu. 9 Yowambeela unoza apeleke umboni oonga vya chimo, chifukwa aluwa katinandiroromela. 10 Vanduli viwa unoza apeleke umboni oonga vya chilungamo, chifukwa miyo ndinadowa wa Babanga moi nyo kamunaza mundiona nawili. 11 Vogomi-eda viwa unoza apeleke umboni oonga vya iweluzo ya Mulungu, chifukwa olamulela wailambwela uweluziwa wale.
12 Ndikaana vyongo vinjinji vyoi ndiuwandeleni, koma vathawiila kamunawande vivwechecha vyetene. 13 Koma oukami-aniyo aza afiya, unoyo ngu zimu owela wa choonadi, unoza ausogoleleni mu choonadi yetene. Chifukwa kanaza aonga vyokeda ganiza ekave, koma unoza aonge vyevyo uvwile liye moi unoza auiziwi-eni vyongo vyevyo vinaza. 14 Liye unoza andilemekeze, chifukwa unoza auiziwi-eni vyongo vyevyo uwachelile liye kumela wa miyo. 15 Vyongo vyetene vyevyo Babanga un’na liye pivyaanga. Mbaona ndinaonga ira oukami-aniyo unoza auiziwi-eni vyongo vyevyo uwachelile liye kumela wa miyo. 16 Wathawi yoyeva kamunaza mundiona nawili, moi wathawi yoyeva munoza mundione.”
17 Angaongile vyevi, ofunjedae amo-iwa koowambeela fukana ekiwa ira: “Kodi unatapulela n’ni vevo unaniwandela liye ira, ‘Wathawi yoyeva kamunaza mundiona nawili moi wathawi yoyeva munoza mundione,’ koma teto ira, ‘chifukwa ndinadowa wa Babanga’?” 18 Aluwa kaonga ira: “Kodi unatapulela n’ni vevo unaonga liye ira, ‘Wathawi yoyeva’? Iyo kaninaiziwa vyevyo unaonga liye.” 19 Yesu ooiziwa ira aluwa koofuna mufuka, eno oowafuka ira: “Kodi munafukana ekinyu chifukwa yoi ndiongile ira: ‘Wathawi yoyeva kamunaza mundiona nawili, koma teto ira wathawi yoyeva munoza mundione’? 20 Ndithu ndinaauwandelani, munoza muule mokuwa vinjinji, koma ilambwela inoza isangalale. Munoza mukaena chisoni, koma chisoninyu inoza ichenjiwe kala imwemwe. 21 Iyana afunanga bala mwana unovuteya vinjinji chifukwa thawae ifiya. Koma mwana abaliwa kanaumbuwela voreya wewo avwa liye chifukwa yosangalala ira mwana ubaliwa vailambo. 22 Chimozimozi nanyen’ne teto, vathawiila mukaana chisoni. Koma ndinoza ndiuoneni nawili moi mirima dinyu dinoza disangalale. Kavali muthu unoyo unaze apangi-e ira mu-iye sangalala. 23 Va dambo lelo kamunaza mundifuka nawili vyofuka. Ndithu ndinaauwandelani, yongo iliyetene ineyo munaze nyo muvepe wa Babanga muzina langa liye unoza auva-eni. 24 Mpakana vano kamunavepevo yongo iliyetene muzina langa. Vepani moi munoza muwachele ira imwemwe inyu ikale yoinjiva vinjinji.
25 Ndionga vyongo vyevi wa nyo vo-indi-eda chito mafanizo. Koma thawi inoza ifiye yoi kandinaza ndi-indi-eda chito mafanizo voonga na nyo, koma ndinoza ndiuwandeleni vya Baba movweya pama. 26 Va dambo lelo munoza muvepe yongo wa Baba muzina langa. Koma vyevi kavinatapulela ira miyo ngunoyo unafuna za uvepelani wa Baba. 27 Baboyo unouomeliwanani chifukwa moondiomeliwana moi muroromela ira miyo ndooza monga muthu unoyo arumiwe na Mulungu. 28 Ndooza vailambwela monga muthu unoyo arumiwe na Baba. Sopano ndinovenyamo muilambwela moi ndinowelela wa Babanga.”
29 Ofunjedayayo kaongile ira: “Mbwiyeni, sopano ninovwechecha vyevyo munaonga nyo chifukwa kamuna-indi-eda chito mafanizo. 30 Niiziwa ira nyo munoiziwa vyongo vyetene moi kai vyofuneya ira muthu aufukeni. Vachifukwa inela ninororomela ira mwakumele wa Mulungu.” 31 Yesu oowasomeda ira: “Kodi vathawiila munororomela? 32 Ndithu ndinaauwandelani, thawi inoza ifiye moi ifiya wale, teto etene nyen’ne munobalaleya, uliwetene dowa waniwa moi munondi-iya mekave. Koma kandili mekave, chifukwa Babanga uli na miyo. 33 Miyo ndiuwandelani vyevi ira mukaena murendele chifukwa ya miyo. Muilambwela munogumana na mavuto alukulu, koma limbani murima. Miyo ndiigonji-a ilambo.”