Olembiwa na Yohani
15 “Miyo ndili tengo wa mphesa moi Babanga ngu mulimi. 2 Liye unokakata thambi iliyetene mwa miyo ineyo kinabala vipaso moi thambi iliyetene ineyo inabala vipaso unoisamalela ira ibale vipaso vyoinjiva. 3 Nyo muli osamaleliwa wale chifukwa ya mawu anayo ndiuwandelileni miyo. 4 Mukale ogwilizana na miyo moi namiyene teto ndinokala ogwilizana na nyo. Mofwanafwana na thambi ineyo kinabale vipaso vaekiwa, koma inobala akala ili yolumikizana na tengo wa mphesoyo, nanyen’ne teto kamunabale vipaso akala ira kamuli ogwilizana na miyo. 5 Miyo ndili tengo wa mphesa, nyo muli thambi diwa. Uliwetene unoyo uli olumikizana na miyo, moi miyo teto ndakala olumikizana na liye, unobala vipaso vyoinjiva chifukwa kamunawande panga iliyetene vaekinyu. 6 Akala muthu kanapitiliza kala olumikizana na miyo, unovochiwa unde ngati thambi moi unouma. Athu kanodisonkani-a thambido nodivocha vamulo moi dinovya. 7 Mwapitiliza kala ogwilizana na miyo koma teto mawanga kapitiliza kala mwa nyo, yongo iliyetene ineyo munaze nyo muvepe inoza iireye mogwilizana na mapempelwinyu. 8 Baba unolemekeziwa mwapitiliza bala vipaso vyoinjiva koma teto mwatonyi-edanga ira muli ofunjedanga. 9 Mofwanafwana na Baba unoyo unandiomeliwana, namiyene teto ndinouomeliwanani. Eno pitilizani panga vyongo vyevyo vinapangi-e ira ndipitilizeve uomeliwanani. 10 Mwa-arelanga malamulwanga munoza mupangi-e ira thawi detene ndiuomeliwenganani, mofwanafwana na miyo unoyo ndina-arela malamulo a Babanga nopangi-a ira thawi detene andiomeliwengana.
11 Ndiuwandelani vyongo vyevi ira mukaena imwemwe ineyo ndin’na miyo koma teto ira imwemwe inyu ikale yoinjiva vinjinji. 12 Ndinaulamulani ira muomeliwanenga mofwanafwana na mwemo ndiuomeliwenani miyo. 13 Kavali muthu unoyo un’na chikondi ilukulu kwaranya ya muthu unoyo upelekile moywae chifukwa ya afwae. 14 Mwapanganga vyevyo ndinaulamulani miyo munokala afwanga. 15 Kandinauromolani ira akapolo chifukwa kapolo kanaiziwa vyevyo mbwiyae unapanga liye. Koma ndiuromolani ira afwanga, chifukwa ndiuwandelani vyongo vyetene vyevyo ndavwile miyo wa Babanga. 16 Kai nyo anayo mwandisakulile, koma miyo ndoousakulani ira mupitilize bala vipaso vyoinjiva, koma teto ira vipasovyo kavimale, ira iliyetene ineyo munavepe nyo wa Baba muzina langa auva-eni.
17 Ndinaulamulani vyongo vyevi na yolinga yoi muomeliwanenga. 18 Akala ilambo inaidana na nyo, muumbuwelenga ira yaambeele idana na miyo yaanaidane na nyo. 19 Aakale ira muli mbali ya ilambo, ilambweyo yoouomeliwanani. Koma voi kamuli mbali yailambwela, koma miyo ndoousakulani kumela muilambo, vachifukwa inela ilambo inoidana na nyo. 20 Muumbuwelenga mawu anayo ndauwandelileni miyo oyi: Kapolo kanakale mulukulu mukwaranya mbwiyae. Akala kandizuzumi-ile miyo, nanye’ne teto kanoza kauzuzumi-eni. Akala kasungile mawanga, kanoza kasunge teto mawinyu. 21 Koma kanoza kaupangeleni vyetene vyevyo chifukwa ya zina langa, chifukwa unoyo andirumile aluwa katinamuiziwa. 22 Aakale ira kandazide za onga na aluwa, katakaana chimo. Koma vathawiila katinakoonde chimo liwa. 23 Uliwetene unoyo unaidana na miyo unoidana teto na Babanga. 24 Aakale ira kationile chito dedo ndipangile miyo vamaso viwa dedo muthu uliwetene kanapangevo, katakaana chimo. Koma sopano koondiona moi koidana na miyo koma teto koidana na Babanga. 25 Vyevi viireya ira mawu anayo kalembiwe mu Ilamulo kakwakwaneli-ediwe. Mawiwa mboi: ‘Koidana na miyo vookala chifukwa iliyetene.’ 26 Oukami-ani unoyo ndinaze miyo ndiutumizeleni kumela wa Babanga aza afiya, unoyo uli zimu owela wa choonadi, unoza andipangele umboni, 27 moi nanyen’ne teto munoza mundipangele umboni, chifukwa mukalave na miyo kumela vowambeela.”