Olembiwa na Mateyu

9 Eno Yesu oogwela ngalawa nolambuwela ukombela imo-iwa, moi oodowa wu mzinda unoyo akala liye. 2 Wewo athu koomuzelana muthu okhwa viwalo, angagonatile va machila. Yesu angaonile iroromelo iwa, oomuwandela muthu okhwa viwaloyo ira: “Limba murima mwananga! Machimwawo kookululukiwa.” 3 Angapangile eno, alembi amo-iwa koowonga m’murimani mwiwa ira: “Muthu unola unonyoza Mulungu.” 4 Koma Yesu ooiziwa vyevyo kaganizaathu moi oowafuka ira: “Chifukwa n’ni munaganiza vyongo vyotakala m’murimani mwinyu? 5 Kodi yokweya chiivi, onga ira, ‘Machimwawo kookululukiwa,’ kapena onga ira, ‘Maruwa uende’? 6 Dedi-ani ndiuoni-eni ira Mwana wa muthu ukaana kopolo vailambo yavati dokululukela machimo.” Vanduli viwa liye oomuwandela muthu okhwa viwaloyo ira: “Maruwa, tukula machilawo udowenga waninyu.” 7 Thawi ineyo liye oomaruwa nodowanga waniwa. 8 Gulu la athulo lingaonile vyevi, loowova vinjinji moi lootamanda Mulungu, unoyo apelekile kopolo dedi wa athu.

9 Angakwaranyile vevo, Yesu oomuona muthu m’mo-iwa zina lae Mateyu angagaratile mu ofesi yokomelamo misonkho, moi oomuwandela ira: “Ukale o-arelanga.” Thawi ineyo Mateyu oomaruwa nomu-arela. 10 Vathawi imo-iwa, vevo Yesu limo-i na ofunjedae kadjaathu* m’mba mwa Mateyu, athu anjinji okomi-a misonkho koma teto ochimwa kooza moi koowambeela dja na Yesu limo-i na ofunjedae. 11 Koma Afarisi kangaonile vyevi koowafuka ofunjedae ira: “Chifukwa n’ni mphunzisinyu unadja limo-i na okomi-a misonkho koma teto athu ochimwa?” 12 Yesu angavwile vyevi, oosomeda ira: “Athu apama katinafuneya dokotala, koma athu anayo kanabulela mbanayo kanafuna dokotala. 13 Eno dowani mwafunjede tapulela wa mawu oyi: ‘Ndinafuna chifundo, ookala sembe.’ Chifukwa miyo kandazide za itana athu olungama, koma ochimwa.”

14 Vanduli viwa ofunjeda a Yohani kooza wa liye nomufuka ira: “Chifukwa n’ni iyo na Afarisi ninasala dja koma ofunjedinyu katinasala dja?” 15 Yesu oowasomeda ira: “Kodi afwae a mkwati kanovwa chisoni mkwatiyo angali limo-i na aluwa? Koma inoza ifiye thawi yoi mkwatiyo unoza achosiwe vaari viwa moi vathawi ineyo kanoza kasale dja. 16 Kalivo muthu unoyo unasowela igamba ya nguwo isha va malaya aunde awale. Chifukwa igamba isheyo inokoza koka malaya awalayo moi vong’ambeyavo vanoulukula vinjinji. 17 Koma teto athu katina-ela vinyu musha m’matumba aikopa awale. Kapanga vyevyo, matumba aikopayo kanopuleya moi vinyuyo unotatiya teto matumbayo kanoonongeya. Koma athu kano-ela vinyu musha m’matumba aikopa asha, moi vyetene viili vinosungeya pama.”

18 Vevo aawandela liye vyevi, olamulela m’mo-iwa oomuwandamela. Vanduli viwa oomukokorela nomuwandela ira: “Mwananga wa-iyana unaabulela vinjinji moi vano mwina ukhwa wale. Koma tiyemoni mwamu-inde na ndanda linyu moi unokala na moyo.”

19 Eno Yesu na ofunjedae koomaruwa nomu-arela. 20 Sopano iyana m’mo-iwa unoyo abulela marenda otatila magazi wa chaka 12 ooza unduli wae no-inda ulusi oluwa wa mpepetele mwa malayae aunde, 21 chifukwa m’murimani mwae aonga ira: “Ndakeda inda malayae aunde oka, ndithu ndinochila.” 22 Yesu ootembenuwa moi oomuona iyanoyo noonga ira: “Kuove mwananga, iroromelwawo iuchili-a.” Thawi ineyo iyanoyo oochila.

23 Ndiye angavolowile m’mba mwa olamulelole, oowona athu kaimbanga vitolilo koma teto gulu la athu liulanga mokuwa. 24 Yesu ooawandela ira: “Kumamoni muno, chifukwa sikanola kakhwile koma unaagona.” Angaongile vyevi, athwayo koowambeela muteya monyoza. 25 Athwale kangakumile vande, Yesu oovolowa no-inda ndanda la sikanoyo, moi liye oovenya. 26 Khani inela yoofala mudela letene lelo.

27 Yesu akumelanga wewo, alombwana ambin’li anayo kan’na vuto lo-oona koomu-arela kakuwanga ira: “Munipangele chifundo, mwana wa Davide.” 28 Yesu angavolowile m’mba, alombwana ambin’li anayo kan’na vuto lo-oonale kooza wa liye, moi oowafuka ira: “Kodi munororomela ira ndinokoza panga vyevi?” Aluwa koomusomeda ira: “Ee Mbwiyeni.” 29 Ndiye Yesu oo-inda m’maso mwiwa noonga ira: “Mogwilizana na iroromelo inyu vyevyo munafuna nyo viireye wa nyo.” 30 Eno koowambeela ona, koma Yesu oowachenjeza mwakopolo ira: “Samalani ira muthu uliwetene kaiziwe vyevi.” 31 Koma kangakumile unde, koofalisa vyokuza liye mudela letene lelo.

32 Vevo alombwana ambin’layo kamaruwaathu, athu koomuzelana muthu o-oonga unoyo a-indiwe na iwanda. 33 Yesu angakumi-ile iwandeyo, muthu o-oongoyo oowambeela onga, moi gulu la athulo loodabwa noonga ira: “Vyongo ngati vyevi kavinaireyevo mu Isaraeli muno kumela wale.” 34 Koma Afarisi kaonga ira: “Muthu unola unakumi-a viwanda na kopolo da olamulela viwanda.”

35 Ndiye Yesu oowambeela ulendo oendela madela etene. Liye oofunji-a m’masunagoge koma teto laleela uthenga wapama wa Umwene moi oochili-a marenda a tundu uliwetene anayo athu kabulelanaathu. 36 Angaonile gulu la athu, liye oowavwela chisoni, chifukwa kali onyozeya koma teto katan’na owasamalela ngati khosa dedo kadin’na m’busa. 37 Ndiye ooawandela ofunjedae ira: “Onga vyoona, vikala vyongo vinjinji vyofuneya anda, koma achito mboyeva. 38 Eno vepani Mwinyailo wa munda ira atumize achito oyi ka-ande.”