Vyoira Vya Anamarumiwa
14 Paulo na Barnaba kangali wu Ikoniyo, koovolowa musunagoge wa Ayuda moi koowonga pama vinjinji. Chifukwa ya vyevi, Ayuda anjinji limo-i na Agiriki kookala ororomela. 2 Koma Ayuda anayo kataroromele, kooawandela vyongo vyotakala athu a mitundu dimo-i moi koowasokoneza maganizo ira karuni-ane na abalayo. 3 Eno wathawi yolapa, Paulo na Barnaba koowonga molimba murima chifukwa yoi koosogoleliwa na kopolo ya Yehova.* Mulungu oowa-indi-eda chito ofunjedayo ira kaonge vyokuza oma murima wae ulukulu, koma teto oowalola ira kapangenga vizindikilo na vyodabwi-a. 4 Chifukwa ya vyevi athu a mu mzindoyo koogawaneya. Amo-iwa kali umbali ya Ayuda, moi amo-iwa kali umbali ya anamarumiwa. 5 Ndiye athu a mitundu dimo-i koma teto Ayuda limo-i na olamuleliwa, koopanga iwembu ira kaapangele vyaibewe anamarumiwayo koma teto kaavoche na mabwe. 6 Koma aluwa kangawandeliwe vyevi, kootawela m’mizinda da Lukaoniya, Lusitara, Debe, na m’madela avakwikwi. 7 Wewo aluwa koopitiliza laleela uthenga wapama.
8 Wu Lusitara, ookala muthu m’mo-iwa orangala mendo moi ali angagaratile. Liye abaliwile angali orangala moi ali a-anaendevo. 9 Muthu unola oovuruwana vevo Paulo aonga liye. Ndiye Paulo angamuing’anechechile oowona ira ukaana iroromelo yoi unokoza chili-iwa. 10 Eno Paulo oomuwandela mogweli-a mawu ira: “Imela!” Muthu orangaloyo oovenya noimela moi oowambeela enda. 11 Gulu la athu lingaonile vyevyo Paulo apangile liye, lookuwa muiongelo ya Ilukaoniya ira: “Milungu dikala ngati athu moi dititela wa iyo!” 12 Eno aluwa koowambeela muromola Barnaba ira Zeu, koma Paulo kamuromola ira Heme, chifukwa ngunoyo asogolela voonga. 13 Ndiye wasembe wa mulungu oromoliwa ira Zeu, unoyo kachisae ali vakwikwi na vamulango ovolowela mu mzindoyo, oozana ng’ombe daphongo na khara da maluwa vamulango ulukulu na yolinga yoi liye limo-i na athwayo kapeleke sembe vofuna mulambela Paulo na Barnaba.
14 Koma Paulo na Barnaba kangavwide vyevi, koong’amba malaiwa aunde moi kootamanga dowa volowa mugulu la athulo kakuwanga ira: 15 “Chifukwa n’ni munapanga vyongo vyevi? Na-iyene nili athu okaana vyofooka ngati nyo. Ninalaleela uthenga wapama wa nyo ira mu-iye vyongo vyotakala moi muwambeele lambela Mulungu wamoyo, unoyo apangile udimu, ilambo yavati, nyanja na vyongo vyetene vyevyo vili mwemo. 16 M’mibado da mundulimu liye oolola ira athu a mitundu detene kapangenga vyevyo kanafunaathu. 17 Koma liye oouva-ani umboni oyi oopanga vyapama. Oouva-ani zongwe kumela udimu koma teto oouva-ani thawi ineyo vyo-anda vinyu vinakalaathu vyoinjiva vinjinji. Liye oouva-ani vyodja vyoinjiva na yolinga yoi mirima dinyu dikale dosangalala vinjinji.” 18 Ngakale ira anamarumiwayo koowonga vyevi, koovuteyave ira karuni-e gulu la athulo ira kalipeleke sembe wa aluwa.
19 Ndiye Ayuda anayo kazide kumela wu Antiokeya na wu Ikoniyo koowanyengelela athwayo, moi aluwa koomuvocha Paulo mabwe nomukokela unde wa mzindoyo voganiza ira ukhwa. 20 Koma vevo ofunjeda kazideathu vevo vali Paulo, liye oovenya dowa volowa mu mzinda. Dambo lo-arela liye limo-i na Barnaba koovenyawo wewo dowa wu Debe. 21 Aluwa kangalengezile uthenga wapama mu mzindola koma teto funji-a athu anjinji ira kakale ofunjeda, koowelela wu Lusitara, wu Ikoniyo na wu Antiokeya. 22 M’madela etene anala aluwa koolimbikisa ofunjeda koma teto akami-a ira kapitilize kaana iroromelo yolimba voawandela ira: “Ninafuneya gumana na mavuto anjinji ira nidowe navolowe mu Umwene wa Mulungu.” 23 Aluwa koosakula teto andimuwa mupingo uliwetene, moi kangapempelile koma teto sala dja, koowapeleka wa Yehova* unoyo kamuroromeleathu.
24 Vanduli viwa aluwa koovira wu Pisidiya dowa wu Pamfuliya. 25 Kangamari-ile laleela mawu a Mulungu wu Pega, koodowa wu Ataliya. 26 Vevo kakumelaathu wewo kooenda ulendo wavanyanja welela wu Antiokeya. Wu Antiokeya wewu ku wewo abali mundulimu kamuvepileathu Mulungu ira amutonyi-ede oma murima ulukulu Paulo na Barnaba, na yolinga yoi ka-inde chito inela moi vofiya vathawiila kali kangaimari-ile.
27 Kangafiile wewo koosonkani-a athu a mupingo moi koowafotokozela vyongo vinjinji vyevyo Mulungu apangile liye zela mwa aluwa. Koowafotokozela teto ira Mulungu oopeleka mwai wa athu a mitundu dimo-i ira kakale ororomela. 28 Eno aluwa kookala limo-i na athwayo wathawi yolapa.