Olembiwa na Maliko

5 Vanduli viwa aluwa koofiya ukombela imo-iwa ya nyanja, mudela la Agerasa. 2 Ndiye Yesu angatitile mungalawa, oogumana na muthu m’mo-iwa o-indiwa na zimu otakala akumelanga umanda.* 3 Muthu unola akala umanda, moi ambeela wale kavali muthu uliwetene unoyo akwakwani-ile mumanga ngakale na unyolo chifukwa kamumanga liye oopaza. 4 Liye oomangiwavo na matangaza koma teto maunyolo moweli-edaweli-eda, koma oopaza maunyolwayo koma teto kotola matangazayo moi kavali muthu unoyo an’na kopolo dowanda mugonji-a. 5 Moi thawi detene, tana na ma-iyu, liye ookuwa umanda na m’mimwango koma teto oovichekacheka na mabwe. 6 Koma angamuonile Yesu angali vandendai, oomutamangela nomukokorela. 7 Vanduli viwa ookuwa na mawu akopolo ira: “Kodi munafuna n’ni wa miyo, Yesu Mwana wa Mulungu Wamudimu Vinjinji? Ndinauvepani ira mulumbele vamaso va Mulungu ira kamunandizuzumi-a.” 8 Muthuyo aongile eno chifukwa yoi Yesu oowandela zimuyo ira: “Zimu otakalawe, kuma mwa muthula.” 9 Ndiye Yesu oomufuka muthuyo ira: “Zina lawo uli mbaani?” Liye oosomeda ira: “Zina langa ndili Khamu, chifukwa nilivo anjinji.” 10 Liye oopitiliza muchondelela Yesu ira katumize mizimudo undendai na delalo.

11 Vathawi ineyo, vakwikwi na malo anayo vookala kumba dinjinji dedo dadja m’mbali mwa mwango. 12 Eno mizimudo doomuchondelela Yesu ira: “Nitumizeni ira nidowe navolowe mwa kumbado.” 13 Eno liye oodiloli-a. Angapangile eno mizimu dotakalado dookuma dowa volowa mwa kumba dile moi kumba detene dedo dootamangela upedi nolupela munyanja. Kumbado dalivo dotamangela 2 000, moi detene dakhwede munyanjamo. 14 Koma abusa anayo kaweta kumbado kootawa dowa onga vyevi mu mzinda na m’mavande, moi athu kooza ira kaone vyevyo vyaireile. 15 Eno koofiya wewo wali Yesu moi koomuona muthu unoyo a-indiwe na iwandole, unoyo vowambeela an’na gulu la mizimu dotakala. Koomuona angagaratile, angawarile pama koma teto maganizwae kangali pama moi aluwa koowova vinjinji. 16 Koma teto athu anayo kaonile vyevyo vyaireile, koowafotokozela athwayo vyevyo vyamuireele muthu o-indiwa na iwandole koma teto vyevyo vyaireile na kumba dile. 17 Eno athwayo koowambeela muchondelela Yesu ira avenyemo mudela liwa.

18 Vevo Yesu agwela liye ngalawa, muthu unoyo amukumi-ile liye viwandole oomuchondelela ira adowe limo-i na aluwa. 19 Yesu kaamulolile koma oomuwandela ira: “Dowa waninyu waawandele abalawo vyetene vyevyo Yehova* uupangele liye na chifundo ineyo uutonyi-edile liye.” 20 Eno muthule oodowa moi oowambeela falisa mu mzinda wa Dekapoli* vyongo vyetene vyevyo Yesu amupangele liye, moi athu etene koodabwa vinjinji.

21 Yesu angalambuwile nawili vangalawa welela ukombela imo-iwa ya nyanja, gulu lilukulu la athu loosonkana wa liye, vathawi inela liye ali mpepetele mwa nyanja. 22 Vanduli viwa m’mo-i wa asogoleli a sunagoge, zina lae Yairo, ooza. Angamuonile Yesu, ookokora va manyalwae. 23 Liye oomuchondelela Yesu moweli-edaweli-eda ira: “Mwananga wa-iyana unaabulela vinjinji.* Pepani tiyemoni mwamu-inde na mandinyu ira achile.” 24 Ndiye Yesu oodowa limo-i na liye, moi gulu lilukulu la athu loomu-arela nomupanikizanga.

25 Sopano vookala iyana m’mo-iwa unoyo abulela marenda otatila magazi wa chaka 12. 26 Madokotala anjinji koopangi-a ira avuteye vinjinji.* Liye oowononga chumae yetene koma kaachilile, m’malomwiwa marendayo kakeda enjedeleya. 27 Angavwile khani yokuza Yesu, oovolowa mugulu la athulo dowa unduli wae, vanduli viwa oo-inda malayae aunde. 28 Liye apangile vyevi chifukwa m’murimani mwae aonga ira: “Ndakeda inda malayae aunde, ndithu ndinochila.” 29 Thawi ineyo marendae otatila magazi koomala moi muthuthu mwae oovivwa ira uchila marenda alukulu anayo an’na liye.

30 Thawi ineyo, Yesu oozindikila ira kopolo ikuma muthuthu mwae moi ootembenuwa nofuka gulu la athulo ira: “Mbaani unoyo u-indile malayanga aunde?” 31 Koma ofunjedae koomusomeda ira: “Nyo munoona ira athu etene anala kanoupanikizani, ndiye chifukwa n’ni munafuka ira, ‘Mbaani unoyo undi-indile?’” 32 Koma Yesu oowambeela ing’anaing’ana ira amuone muthu unoyo umu-indile. 33 Iyanoyo angaiziwile vyevi oowova vinjinji moi oowambeela ngurumeda. Ndiye oodowa vevo vali Yesu nokokora vamaso vae nomuwandela vyoona viwa. 34 Liye oomuwandela iyanoyo ira: “Mwananga, iroromelwawo iuchili-a. Dowa mwamurendele moi marendawo alukulwayo kamale.”

35 Aanamari-e onga, voofiya alombwana amo-iwa kumela waniwa wa Yairo, moi koomuwandela Yairoyo ira: “Mwaninyule ukhwa! Mu-iyeni Mphunzisila kamumuvuti-e.” 36 Koma Yesu angavwile vyevyo aluwa kaongaathu oomuwandela msogoleli wa sunagogeyo ira: “Kuove, koma ukaena iroromelo.” 37 Vathawi ineyo liye kaalolile ira muthu uliwetene amu-arele koma amulandile Petulo, Yakobo na Yohani, unoyo ali nchimwenae wa Yakobo.

38 Eno aluwa kangafiile vande va msogoleli wa sunagoge, Yesu oovwa phokoso la athu anayo kaula mokuwa koma teto mokuziwa murima vinjinji. 39 Liye angavolowile muwari, oowafuka athwayo ira: “Chifukwa n’ni munaula mokuwa koma teto mokuziwa murima vinjinji eni? Mwanola kakhwile, koma unaagona.” 40 Angaongile vyevi, athwayo koowambeela muteya monyoza. Koma angaakumi-ile athu etene anayo vande, oomulanda baba na m’mae wa mwanoyo koma teto athu anayo kali limo-i na liye, moi koovolowa dowa vevo vagonatile mwanoyo. 41 Ndiye oo-inda ndanda la mwanoyo noonga ira: “Talʹi·tha cuʹmi,” mawu anayo kanatapulela ira: “Sikanawe, ndinaonga na weyo, venya!” 42 Thawi ineyo sikanoyo oovenya nowambeela enda. (Sikanoyo an’na chaka 12.) Moi athwayo koosangalala vinjinji. 43 Koma liye oowalamula moweli-edaweli-eda* ira katimuwandele muthu uliwetene vyevi. Vanduli viwa ooawandela ira kamuva-e sikanoyo yodja.