Olembiwa na Mateyu

27 Mamawa unde ungachile, asembe alukulu limo-i na andimuwa koogwilizana ira kamuphe Yesu. 2 Kangamumangile, koomudowana wa Bwanamkubwa Pilato.

3 Vanduli viwa Yudasi unoyo amupelekilole, angaonile ira Yesu uweluziwa ira aphiwe, oovivwela chisoni vinjinji moi oodowa weli-a ndalama 30 dasiliva dile wa asembe alukulu koma teto andimuwa. 4 Liye aongile ira: “Ndichimwa vomupeleka muthu o-olakwa.”* Aluwa kamusomedile ira: “Iyo kavinanikuza vyevyo. Unoiziwa wekave vyoira!”* 5 Eno liye oovocheda ndalama dasiliva dile mukachisi nokuma. Vanduli viwa oodowa vimangelela. 6 Koma asembe alukulu koolanda ndalama dasilivado noonga ira: “Kai vyololeya ira ndalamadi di-eliwe m’malo opatuleya osungelamo chuma, chifukwa ti ndalama da magazi.” 7 Kangakambilanile, koo-indi-eda chito ndalamado vogula munda wa oomba vyombwe ira kakale manda a alendo. 8 Eno munda unola unaromoliwa ira Munda wa Magazi mpakana vano. 9 Vyevi vyookwakwaneli-eda mawu anayo Mulungu aongile liye zela mwa namaongela Yeremiya* ira: “Aluwa koolanda ndalama 30 dasiliva, malipilo anayo amo-iwa mwa a-ima a Isaraeli kapanganileathu ira kamuguli-ele, 10 moi koogulela munda wa oomba vyombwe, mogwilizana na vyevyo Yehova andilamulile liye.”

11 Yesu angaimelile vamaso va Bwanamkubwa Pilato, Pilatoyo oomufuka ira: “Kodi uli Mwene wa Ayuda?” Yesu oosomeda ira: “Vili eno monga mwemo muongele nyo.” 12 Koma vevo asembe alukulu koma teto andimuwa kamunamedelaathu, liye kaasomedile iliyetene. 13 Ndiye Pilato oomufuka ira: “Kodi kunavwa vyongo vyetene vyevyo kanaunamedelaathuvi?” 14 Koma liye kaasomedile iliyetene, moi Pilato oodabwa vinjinji.

15 Vaikondwelelo iliyetene ya Pasika, Bwanamkubwa Pilato ookaana izolowezi yomasula mkaidi m’mo-i unoyo athwayo kanamufunaathu. 16 Ndiye vathawi inela vookala mkaidi m’mo-iwa unoyo ali oophi-a vinjinji, zina lae Baraba. 17 Eno athu kangasonkanile vamo-i, Pilato aafukile ira: “Kodi munafuna ira ndiumasuleleni mbaani, Baraba kapena Yesu unoyo munamuromola nyo ira ngu Kristu?” 18 Chifukwa Pilato ooiziwa ira kamupelekile chifukwa ya sanje. 19 Koma teto angagaratile vapando oweluzela milandu, iyanae oomutumizela uthenga oyi: “Khani ya muthu olungamola kiukuzeni chifukwa miyo ndivuteya vinjinji na vyevyo ndiro-ile miyo vyokuza muthu unola.” 20 Komave asembe alukulu limo-i na andimuwa koolimbikisa athu ira kavepe vyoi Baraba amasuliwe, koma Yesu aphiwe. 21 Ndiye Pilato oowafuka ira: “Kodi va athu ambin’lala munafuna ira ndiumasuleleni mbaani?” Aluwa koosomeda ira: “Baraba.” 22 Pilato oofuka teto nawili ira: “Nanga Yesu unoyo munamuromola nyo ira ngu Kristu, ndimupangena n’ni?” Athu etene koosomeda ira: “Apachikiwe unoyo!”* 23 Liye oowafuka ira: “Chifukwa n’ni? Kodi muthula uchimwile n’ni?” Koma athwayo koopitilizave kuwa mwakopolo ira: “Unoyo apachikiwe ba-i!”

24 Pilato angaonile ira kavinakami-a koma teto ira vanowambeela ipolowe, oolanda ma-inje no-amba m’mandani vamaso va gulu la athulo moi aongile ira: “Miyo kandin’na mulandu wa magazi a muthu unola. Mulandu wa magazae uli na nyo.” 25 Angaongile vyevi athu etene koosomeda ira: “Mulandu wa magazae ukale na iyo limo-i na a-imi-u.” 26 Eno oowamasulela Baraba, koma oolamula ira Yesu avaziwe vanduli viwa oomupeleka wa athu ira kadowe kamuphe vomupachika vatengo.

27 Ndiye asilikali a Bwanamkubwa Pilato koomulanda Yesu nomuvolowana m’mba mwa Pilatoyo moi koosonkani-a gulu letene la asilikali wa liye. 28 Ndiye koomukurula vyowara vyae nomuwari-a nguwo yofiila vinjinji. 29 Koma teto kooluwa chipewa ya umwene yaminga nomuwari-a umuru teto koomuva-a bango undanda lae lodjana. Vanduli viwa koomukokorela nomunyozanga ira: “Kacheluwani, nyo Mwene wa Ayuda!” 30 Vanduli viwa koomutapeda teto koolanda bango nowambeela muvazana m’muru. 31 Kangamari-ile munyozawo, koomukurula nguwo ineyo kamuwari-ileathu nomuwari-a malayae aunde teto koomudowana ira kamukomele vatengo.

32 Vevo kadowaathu, koogumana na muthu m’mo-iwa wawu Kurene, zina lae Simoni. Aluwa koomukanyi-eda muthu unola ira atukule tengo ozuzumelavo* wa Yesu. 33 Kangafiile vamalo oromoliwa ira Gologota, tapulela ira, malo otatilelawo makuva, 34 koomuva-a Yesu vinyu otangani-a na vyongo vyowaawa ira ang’we, koma liye angamulawile vinyuyo, ookoonda mung’wa. 35 Kangamukomele vatengo, aluwa koogaana malayae aunde vopanga maele, 36 teto koogarati vevo ira kamuing’anelenga. 37 Vadimu va murwae aluwa kookomelavo ikwangwani yotonyi-eda mulandu unoyo kamupheleathu. Kalembilevo ira: “Ula ngu Yesu, Mwene wa Ayuda.”

38 Ndiye machifamba ambin’li koopachikiwa limo-i na liye. Wachifamba m’mo-i kamupachikile undanda lae lodjana teto m’mo-iwa kamupachikile undanda lae lamazele. 39 Athu anayo kavira vakwikwi na malo anayo koowonga mawu omunyoza Yesu moi koopukusa miru diwa 40 noonganga ira: “We unoyo waonga ira unokoza gwi-a kachisi nomumanga wa malambo maralu, vivulumuche wekave! Akala uli mwana wa Mulungu, tita vatengo ozuzumelavoyo!”* 41 Naaluwene teto asembe alukulu limo-i na alembi koma teto andimuwa, koowambeela munyoza noonganga ira: 42 “Liye ookwakwani-a vulumucha athu amo-iwa, koma unaalepela vivulumucha ekave! Akala uli Mwene wa Isaraeli, atite vatengo ozuzumelavoyo* ira iyo nimuroromele. 43 Vale liye unororomela Mulungu, ndiye Mulunguyo amuvulumuche akala unamufuna chifukwa liye aonga ira, ‘Miyo ndili Mwana wa Mulungu.’” 44 Naaluwene teto achifamba anayo kapachikiwe limo-i na liye koomunyoza.

45 Ambeela 12 koloko tana* vailambo yetene vookala dima mpakana 3 koloko tana.* 46 M’ma 3 koloko thana, Yesu ookuwa mwakopolo ira: “Eʹli, Eʹli, laʹma sa·bach·thaʹni?” tapulela ira, “Mulungwanga, Mulungwanga, chifukwa n’ni mundi-iile?” 47 Athu amo-iwa anayo kaimelile vakwikwi kangavwile vyevi koowambeela onga ira: “Muthula unamuitana Eliya.” 48 Thawi ineyo m’mo-i mwa athwayo ootamanga dowa tukula siponje noibwini-a mu vinyu owaawa moi koi-ela wu bango nomuva-a ira ang’we. 49 Koma athu amo-iwayo kaongile ira: “Mu-iyeni! Ninafuna nione akala Eliya unaze ira amuvulumuche.” 50 Ndiye Yesu ookuwa nawili mogweli-a mawu, vanduli viwa ookhwa.

51 Thawi ineyo nguwo yochinga ya munyumba yopatuleya yoong’ambeya vaari kumela vadimu mpakana vati. Ilambo yavati yootekenyeya teto mabwe koong’ambeya. 52 Manda* koo-uleya moi mitembo dinjinji da athu owela anayo ka-eliwe mwemo doovochiwa unde, 53 moi athu anjinji koowona mitembo dedi. (Yesu angavenyi-iwe, athu anayo kakumela umandawo, koovolowa mu mzinda owela.) 54 Koma msogoleli wa asilikali limo-i na athu amo-iwa anayo kali na liye vomuing’anela Yesu kangaonile ivomeleziyo na vyevyo vyaireile, aluwa koowova vinjinji moi kaongile ira: “Ndithu, ula ali Mwana wa Mulungu.”

55 Koma teto wewo ookala a-iyana anjinji anayo kakumele wu Galileya nomu-arelanga Yesu ira kamukami-enga. Aluwa kooimela vandendai ira kaonenga vyevyo vyaireya. 56 Amo-iwa mwa aluwa ali Mariya wawu Magadala, Mariya am’mae a Yakobo na Yose, koma teto vookala am’mae a Yakobo na Yohani.*

57 Sopano mazulo vinjinji, vooza muthu m’mo-iwa wa chuma wawu Arimateya, zina lae Yosefe, unoyo teto akalile ofunjeda wa Yesu. 58 Liye oodowa wa Pilato dowa vepa mtembo wa Yesu moi Pilato oolamula ira kamuva-e mtemboyo. 59 Yosefe ootukula mtemboyo noupota nanguwo yowela yapama vinjinji, 60 moi oodowa u-ela m’mandae* asha anayo aasemile liye valibwe. Vanduli viwa oogubuducha libwe lilukulu no-eya vamulango wa mandayo.* Angapangile eno liye oomaruwa dowanga. 61 Koma Mariya wawu Magadala na Mariya m’mo-iwa koo-ala umandawo, moi koogarati vakwikwi na mandayo.

62 Dambo lo-arela, vanduli vokozeela Dambo la Sabata,* asembe alukulu na Afarisi koosonkana vamaso va Pilato, 63 noonga ira: “Mbwiyeni, iyo niumbuwela ira muthu wachinyengole angali moyo aongile ira, ‘Vanduli va malambo maralu ndinoza ndivenyi-iwe.’ 64 Eno lamulani ira vamandavo vakale itetezo ilukulu vinjinji mpakana dambo lanaralu, na yolinga yoi ofunjedae katize ira kamube noawandelanga athu ira, ‘Oovenyi-iwa wa okhwa!’ Chifukwa vyevi vyakeda ireya chinyengo inela inaza ikala yotakala vinjinji kwaranya yowambeelele.” 65 Pilato oowasomeda ira: “Alandeni asilikali oing’anelala. Dowani mwa-ele itetezo yakopolo mwemo munakwakwani-ele nyo.” 66 Eno koodowa ela itetezo yakopolo vamandavo vo-eyavo na libwe lilukulu no-elavo asilikali ira kaing’anelenga.