Vyoira Vya Anamarumiwa
9 Koma Saulo oopitiliza aopopi-a ofunjeda a Mbwiye koma teto oofunechecha apha. Eno oodowa wa ndimuwa wa asembe 2 dowa vepa makalata ailolezo ira adowena wu masunagoge awu Damasiko. Oovepa makalatayo na yolinga yoi akala unamufwanye muthu uliwetene o-arela Ndila ya Mbwiye,* kaya ngu lombwana kapena iyana, adowe amumange nomuzana wu Yelusalemu.
3 Angali musewu, anga-alile vang’ono fiya wu Damasiko, morurumucha oowona wala okumela udimu ungamurungunuwile. 4 Vingairile eno oogwa vati moi oovwa mawu oyi: “Saulo, Saulo, chifukwa n’ni unandizuzumi-a?” 5 Liye oofuka ira: “Mbwiyeni, kodi muli mbaani?” Oomusomeda ira: “Ndili Yesu, unoyo unamuzuzumi-awe. 6 Maruwa, udowe mu mzindamo, moi unodowa waandeliwe vyevyo unafuneyawe panga.” 7 Athu anayo kali limo-i na liye vaulendoyo, kakede imela moi koosauwela yoonga. Aluwa koovwa mawu, koma katamuonile muthu unoyo aongile. 8 Vanduli viwa Saulo ooimela, koma ngakale ira ooing’ana, kaawanda ona yongo iliyetene. Eno athwayo koomu-inda muono mudowana wu Damasiko. 9 Saulo ookala malambo maralu aakwakwani-anga ona moi kaadjile kapena ng’wa yongo iliyetene.
10 Wu Damasiko ookala ofunjeda m’mo-iwene zina lae Hananiya. Ndiye Mbwiye oowonga liye m’masomphenya ira: “Hananiya!” Liye oosomeda ira: “Miyo Mbwiyeni.” 11 Ndiye Mbwiye oomuwandela ira: “Maruwa udowe wu Sewu Oongowa. Wafiya vande va Yudasi, udowe wafuke vya muthu m’mo-iwa zina lae Saulo, wawu Tariso. Liye unaapempela, 12 moi m’masomphenya liye umuona muthu m’mo-iwa zina lae Hananiya angafiile za mu-inda vamuru ira aambeele nawili ona.” 13 Koma Hananiya oosomeda ira: “Mbwiyeni, ndivwa wa athu anjinji vya muthu unola. Ndivwa vyotakala vyetene vyevyo apangela liye atumikinyu wu Yelusalemu. 14 Moi vano asembe alukulu koomuva-a kopolo ira amange athu etene oitana va zina linyu.” 15 Koma Mbwiye oomuwandela ira: “Dowa, chifukwa muthu unola ndimusakula mwavadela vinjinji ira alande zina langa lidowana wa athu a mitundu dimo-i koma teto wa mamwene na Aisaraeli. 16 Miyo ndinoza ndimuoni-e pamapama mavuto etene anayo unaze liye agumanena chifukwa ya zina langa.”
17 Eno Hananiya oodowa volowa m’mbamo. Ndiye oomu-inda vamuru moi aongile ira: “Balanga Saulo, Mbwiye Yesu unoyo aoneele wa weyo vasewu vevo wazawe uno, undiruma wa weyo ira uwambeele nawili ona koma teto ira uzaaliwe na zimu owela.” 18 Thawi ineyo m’maso mwa Saulo mookuma vyongo vimo-iviwavyene morela vati moi liye oowambeela ona.* Vanduli viwa oodowa batiziwa. 19 Angadjile yodja ookaana kopolo.
Liye ookala limo-i na ofunjeda wu Damasiko wa malambo angasene. 20 Thawi ineyo liye oowambeela laleela m’masunagoge, ira Yesu ngu Mwana wa Mulungu. 21 Koma athu etene anayo kamuvwile aonganga, koodabwa vinjinji moi kaonga ira: “Kodi muthula kai unole azuzumi-a athu awu Yelusalemu oitana va zina leli? Kodi liye kaazide uno ira aze amange athu nowadowana wa asembe alukulu?” 22 Komave Saulo oopitiliza kaana kopolo doinjiva moi Ayuda awu Damasiko koomaliwa zelu chifukwa liye oowafotokozela makundo ovweya pama osimikizela ira Yesu ngu Kristu.
23 Vangavirile malambo anjinji, Ayudayo koopanga iwembu yoi kamuphe. 24 Koma Saulo ooiziwa vya iwembu ineyo kapangileathu. Ayudayo kooing’anechecha mosamala m’misewu da mu mzindamo tana na ma-iyu ira kamuphe. 25 Eno ma-iyu, ofunjedae koomu-ela mudengo nomukumi-ela unde wa mzindoyo vomutiti-a zela valiwindo la mpanda.
26 Saulo angafiile wu Yelusalemu, ooesaesa ira agwilizane na ofunjeda a wewo. Koma athu etene koomuova, chifukwa aluwa kataroromela ira liye ngofunjeda wa Yesu. 27 Eno Barnaba oomukami-a vomulanda mudowana wa anamarumiwa. Moi liye oowafotokozela anamarumiwayo vyetene vyevyo vyaireile na Saulo vevo Mbwiye aongile liye na Sauloyo vasewu. Oowafotokozela teto mwemo Sauloyo aongile liye molimba murima wu Damasiko mu zina la Yesu. 28 Vingairile eno Saulo oopitiliza kala limo-i na aluwa moi ooenda momasuwa mu Yelusalemu, koma teto oowonga molimba murima mu zina la Mbwiye. 29 Liye oowonga koma teto runi-ana na Ayuda anayo kaonga Igiriki. Koma aluwa koowambeela saela ndila yoi kamuphele. 30 Abali kangazindikilile vyevi, koomudowana Saulo wu Kaisareya dowa mutumiza wu Tariso.
31 Ndiye mipingo da wu Yudeya wetene, wu Galileya na wu Samariya doowambeela kala mwamurendele moi dali dolimba. Chifukwa yoi ofunjeda koowova Yehova* koma teto koolimbikisiwa na zimu owela, mipingo doopitiliza ulukula.
32 Vevo Petulo aenda liye mudela letene lelo, oofiya wa ofunjeda amo-iwa anayo kakala wu Luda. 33 Wewo liye oomufwanya muthu m’mo-iwa zina lae Eneya, unoyo amalile chaka 8 angali ogonati chifukwa yoi ookaana marenda okhwa viwalo. 34 Ndiye Petulo oomuwandela ira: “Eneya, Yesu Kristu uuchili-a. Venya moi usakaede vabedi vaovo.” Thawi ineyo liye oovenya. 35 Athu etene okala wu Luda koma teto wu Sharoni kangamuonile, koowambeela roromela Mbwiye.
36 Wu Yopa ookala ofunjeda m’mo-iwa zina lae Tabita, mu Igiriki zina leli linatapulela Dolika.* Liye oopanga vyongo vinjinji vyapama koma teto oova-a athu amo-iwa mphaso dinjinji dachifundo. 37 Ndiye m’malambo anayo liye oobulela mpakana ookhwa. Koomu-ambi-a dowa mugonati-a musubi lamudimu. 38 Voi mzinda wa Luda wali vakwikwi na wu Yopa, ofunjeda kangavwide ira Petulo uli mu mzinda wa Luda, koowaruma athu ambin’li dowa muvepa ira: “Pepani ninavepa ira muze uno mombaraanya.” 39 Petulo angavwide vyevi, oomaruwa dowa limo-i na aluwa. Angafiile, aluwa koomulanda mudowana musubi lamudimu. A-iyana amasiye kooza wa liye kaulanga moi koomuoni-a vyowara vyoinjiva koma teto mikanjo dedo Dolika asowa liye angali moyo. 40 Petulo ooawandela athu etene ira kakume, moi liye ookokora nopempela. Vanduli viwa ootembenuwa ing’ana mtemboyo noonga ira: “Tabita, venya!” Iyanoyo oo-ula maso moi angamuonile Petulo oovenya liye garati. 41 Petulo oomu-inda ndanda nomuimecha. Angairile eno oowaitana ofunjedayo koma teto a-iyana amasiyale, moi athu etene koowona ira Tabita uli moyo. 42 Khani inela yooiziweya wu Yopa wetene moi athu anjinji koororomela Mbwiye. 43 Petulo ookalave wu Yopa wa malambo angasene moi akala waniwa wa muthu m’mo-iwa unoyo a-inda chito yochosa maoya a vikopa, zina lae Simoni.