Vyoira Vya Anamarumiwa
17 Vanduli viwa aluwa koovirela wu Amfipoli na wu Apoloniya moi koofiya wu Tesalonika, wewo wali sunagoge wa Ayuda. 2 Eno monga mwemo Paulo apangela liye thawi detene, oovolowa musunagoge moi wa milungu miralu ookambilana na athwayo makundo a m’Malemba. 3 Liye oofotokoza vo-indi-eda chito umboni wa m’Malemba vowasimikizela ira vyali vyofwanelela ira Kristu avuteye, vanduli viwa avenyi-iwe. Moi aonga ira: “Yesu unoyo ndinamulaleela miyo wa nyo, liye ngu Kristu.” 4 Vogomi-eda viwa, amo-iwa mwa aluwa kookala ororomela moi koogwilizana na Paulo na Sila. Agiriki anjinji anayo kalambela Mulungu koma teto a-iyana anjinji olemekezeya naaluwene teto kookala ororomela.
5 Koma Ayuda kookaana sanje moi koosonkani-a athu amo-iwa otakala anayo kakeda endaenda vasika chifukwa yosauwela vyoira. Aluwa koopanga gulu lachiwawa nowambeeli-a ipolowe mu mzindamo. Vanduli viwa koodowa waniwa wa Yasoni, dowa musaela Paulo na Sila ira kaakumi-e unde nowapeleka wu gulu la athulo. 6 Kangalepelile afwanya, koomulanda Yasoni na abali amo-iwa adowana wa olamulela a mu mzindoyo, kakuwanga ira: “Athu anala, anayo kaambeeli-ile mavuto valivetene, sopano kali uno. 7 Moi Yasoni uawachela ngati alendwae. Athu etene anala kanapanga vyongo vyoruni-ana na malamulo a Kaisara. Moi kanaonga ira vikala mwene m’mo-iwa zina lae Yesu.” 8 Kangaongile mawu anala, gulu la athulo koma teto olamulela a mu mzindoyo koolunduwa vinjinji. 9 Olamulela a mu mzindoyo koomuliveli-a Yasoni na abali amo-iwayo ndalama, vanduli viwa koowamasula.
10 Unde ungadimbile, abali koomukumi-a Paulo na Sila moi koowatumiza wu Bereya. Aluwa kangafiile wewo, koovolowa musunagoge wa Ayuda. 11 Koma athu awu Bereya kookaana murima ofunechecha funjeda kwaranya athu awu Tesalonika. Aluwa koowachela mawu a Mulungu na murima wetene, moi dambo na dambo koosaela Malemba mosamala ira kasimikizele akala vyevyo kavwideathuvyo vyali vyoona. 12 Anjinji mwa athu anala kookala ororomela, tangani-avo a-iyana na alombwana amo-iwa ochuka Aigiriki. 13 Koma Ayuda okumela wu Tesalonika kangavwide ira Paulo unalaleela mawu a Mulungu wu Bereya, koodowa wewo ira kadowe kaalimbikise athu ira kaalunduwele anamarumiwayo koma teto kaambeeli-e ipolowe. 14 Thawi ineyo abali koomutumiza Paulo ira adowe wu nyanja. Koma Sila na Timoteyu koo-ala wewo. 15 Moi athu anayo kamuveleele Paulo koodowa mufii-a wu Atene. Koma Paulo ooawandela ira kawele na yolinga yoi kadowe kamuwandele Sila na Timoteyu ira kamu-arelenga Pauloyo mombaraanya.
16 Vevo Paulo aadedi-eda liye wu Atene, murima oowambeela muvoreya vinjinji voona ira mu mzindamo muzaala mafano. 17 Angavolowile musunagoge, oowambeela kambilana na Ayuda limo-i na athu amo-iwa anayo kalambela Mulungu. Moi dambo na dambo ookambilana teto na athu anayo aafwanya liye vasika. 18 Koma athu amo-iwa a zelu da Epikureya na Sitoiki koowambeela muruni-a. Amo-iwa kaonga ira: “Kodi muthula unafuna aonge n’ni?” Koma amo-iwa kaonga ira: “Unaoneya ira unalaleela vya milungu dailendo.” Kaonga vyevi chifukwa yoi Paulo oolengeza uthenga wapama wa Yesu na vyokuza venyi-iwa wa okhwa. 19 Eno koomu-inda mudowana umalo oweluzela milandu a Areopagi moi koomuwandela ira: “Kodi unokoza niwandela vya iphunziso isha ineyo unafunji-a we? 20 Chifukwa vyevyo unaonga we pivyailendo wa iyo. Ndiye ninafuna uniwandele vyevyo vinatapulelaathu.” 21 Moi athu etene awu Atene na alendo anayo kagonela wewo, koomalela thawiwa yetene yovuma kafotokozanga kapena vuruwana khani disha. 22 Sopano Paulo ooimela vaari va Areopagi noonga ira:
“Nyo athu awu Atene, ndiona ira va vyongo vyetene munoova vinjinji milungu* kwaranya mwemo athu amo-iwa kanapangelaathu. 23 Mwaisazo, vevo ndavira miyo ndiing’anechecha vyongo vyevyo munalambela nyo, moi ndifwanya guwa lasembe lolembiwa ira, ‘Guwa Lasembe la Mulungu O-oiziweya.’ Eno miyo ndinalaleela wa nyo vya Mulungu o-oiziweya unoyo munamulambela nyo. 24 Mulungu unoyo apangile ilambwela na vyongo vyetene vyevyo vili mwemo, kanakala mukachisi opangiwa na athu. Liye ngu Mbwiye waudimu na ilambo yavati. 25 Koma teto liye kanafuna kami-iwa na athu, ngati unosauwela yongo. Chifukwa liye ngunoyo unava-a athu moyo, mpweya na vyongo vyetene. 26 Moi kumela mwa muthu m’mo-i liye oopanga athu a mitundu detene, ira kakale vailambo yavati. Liye oo-ela thawi yoi vyongo vimo-iviwa viireyenga koma teto oo-ela malile a malo oyi athu kakalengamo. 27 Oopanga vyevi, ira athwayo kamusaele Mulungu nomufwanya, voi liye kali undendai na iyo. 28 Chifukwa ya liye nikaana moyo, ninoenda moi nikalavo, monga mwemo andakatulo amo-iwa kaongeleathu ira, ‘Vale nili a-imae.’
29 Eno voi nili a-ima a Mulungu, kaniganizenga ira Mulunguyo uli ngati golide, siliva, libwe kapena yongo iliyetene yosemiwa na athu. 30 Pivyoona ira Mulungu oolekelela thawi ineyo athu kapangaathu vyongo mo-oiziwa, koma sopano unowandela athu vailambo yetene ira kalape. 31 Chifukwa oogarati-a dambo lelo unafuna liye za weluza mwachilungamo ilambo yavati, zela mwa muthu unoyo umusakulile liye. Moi liye uwasimikizela athu etene ira unoza apange vyevi vevo amuvenyi-ile liye.”
32 Ndiye athwayo kangavwide vyokuza venyi-iwa wa okhwa, amo-iwa koowambeela muteya mwaibewe, koma amo-iwa kaongile ira: “Chabwino, uze uniwandele vyevi thawi imo-iwa.” 33 Eno Paulo oovenyavo nowa-iya. 34 Koma athu amo-iwa kookala umbalae moi kookala o-arela a Yesu. Amo-iwa mwa aluwa ali Diyonisiyo, oweluza wa mukhoti la Areopagi, koma teto iyana m’mo-iwa zina lae Damarisi na athu amo-iwa.