Olembiwa na Mateyu
3 M’malambo anayo, Yohani M’batizi oodowa muipululu ya Yudeya nowambeela laleela. 2 Liye alaleela ira: “Lapani, chifukwa Umwene waudimu uwandamela.” 3 Unola ngunoyo aongiwe na namaongela Yesaya m’mawu ala: “Muthu m’mo-iwene unaakuwa muipululu ira: ‘Sakaedani ndila ya Yehova! Muongole misewu dae.’” 4 Yohani awara yowara yopangiwa na maoya a ngamila na lamba waikopa muyuni mwae moi yodja yae yali aserebo na nuwi. 5 Eno athu okumela wu Yelusalemu na dela letene la Yudeya koma teto okumela m’mavande etene a vakwikwi na inje wa Yorodano koodowa wa liye. 6 Liye oowabatiza* mu inje wa Yorodano moi athwayo kooulula machimwiwa.
7 Yohani angaonile Afarisi na Asaduki kazanga ira kabatiziwe, ooawandela ira: “A-ima a nyowanyo, mbaani uuchenjezileni ira muthawe dambo la uwali wa Mulungu? 8 Eno pangani vyongo vyotonyi-eda ira mulapa. 9 Moi kamuvinami-enga ira, ‘Nikaana babi-u Aburahamu.’ Voi ndinauwandelani ira Mulungu unokoza tanducha mabwe anayo kali vevala ira kakale a-ima a Aburahamu. 10 Mbazo i-eliwa wale va michichi da mitengo. Eno tengo uliwetene o-obala vipaso vyapama unokakatiwa no-eliwa vamulo. 11 Miyo ndinaubatizani mwiko chifukwa yoi mulapa, koma unoyo unaza munduli mwanga ngwakopolo kwaranya miyo, moi kandili ofwanelela mukurula sapato dae. Liye unoza aubatizeni na zimu owela koma teto mulo. 12 Fosholwae yopurumuchelana makata ili m’mandani mwae, moi malwae obubudelavo mbewu unoza aaweli-e pama. Tirigu unoza amu-ele vasanja, koma makata unoza aatumeye na mulo unoyo kunatimi-iwe.”
13 Vanduli viwa Yesu ookuma wu Galileya dowa wu inje wa Yorodano ira Yohani adowe amubatize. 14 Koma Yohani ooesaesa koonda voonga ira: “Miyo ngunoyo ndinafuneya batiziwa na nyo, ndiye chifukwa n’ni munaza wa miyo?” 15 Yesu oomusomeda ira: “Vathawi yoka inela, lola ira vikale eno, chifukwa ninafuneya panga vyevi mogwilizana na vyetene vyevyo Mulungu unafuna liye.” Angairile eno oo-iya koonda. 16 Angabatiziwe, Yesu ootavuwa mwikomo. Thawi ineyo udimu oo-uleya, moi Yohani oowona zimu wa Mulungu utitanga ngati kangaiwa za muputela. 17 Teto voovweya mawu okumela udimu oonga ira: “Ula ngu Mwananga unoyo ndinamuomeliwana miyo, moi unondisangalasa vinjinji.”