Olembiwa na Yohani
12 Unga-alile malambo 6 ira Pasika aireye, Yesu oofiya wu Betaniya wewo wali waniwa wa Lazalo, unoyo Yesu amuvenyi-ile liye. 2 Eno koomuphiyela yodja ya mazulo moi Marta ngunoyo agawa yodjeyo. Lazalo ali m’mo-i wa athu anayo kadja limo-i na Yesu. 3 Ndiye Mariya oolanda makura onukela. Makurayo kali a nado odura vinjinji, okwakwana magaramu 327.* Mariya ookutulela makurayo vamanyalo a Yesu nopukuta manyalwayo na sisi lae. M’mba mwetene mwemo moozaala fungo lonukela pama la makura anala. 4 Koma Yudasi Isikariyoti, m’mo-i wa ofunjedae, unoyo ali anga-alile vang’ono mupeleka aongile ira: 5 “Chifukwa n’ni makura onukelala katiguli-iwe madinari* 300 nopeleka ndalamado wa athu osauwa?” 6 Liye kaaongile vyevi chifukwa yoi oowavwela chisoni athu osauwa, koma aongile vyevi chifukwa yoi ali oba. Liye ngunoyo asunga bokosi la ndalama moi ooba ndalama dedo da-eliwa mubokosimo. 7 Ndiye Yesu ooawandela ira: “Mu-iyeni apange vyevi vokozeela dambo lelo ndinaze miyo ndi-eliwe m’manda. 8 Osauwayo munokalanawo thawi detene, koma kamunaza mukalave na miyo thawi detene.”
9 Vanduli viwa gulu lilukulu la Ayuda looiziwa ira Yesu uli wu Betaniya. Eno athwayo koodowa wewo, koma katadowile ira kamuone Yesu eka, koma kafuna kamuone teto Lazalo, unoyo Yesuyo amuvenyi-ile liye. 10 Sopano asembe alukulu koopangana vyoi kamuphe Lazalo, 11 chifukwa Ayuda anjinji koodowa wewo moi koomuroromela Yesu chifukwa ya Lazaloyo.
12 Dambo lo-arela, gulu lilukulu la athu anayo kazide wu ikondwelelo koovwa ira Yesu unaaza wu Yelusalemuwo. 13 Eno aluwa koolanda thambi da kanjeza kuma dowa muchingamela. Moi koowambeela kuwa ira: “Muvulumucheni! Odalisiwa ngu Mwene wa Isaraeli, unoyo unaza muzina la Yehova!”* 14 Yesu angafwanyile bulu n’ng’onong’ono, oogwela vatana va buluyo monga mwemo Malemba kanaongelaathu ira: 15 “Kuove mwana wa-iyana wa Ziyoni. Kaona! Mwenawo unaaza angagwelile mwana waphongo wa bulu.” 16 Vowambeela ofunjedae katavwechecha vyevi. Koma Yesu angava-iwe ulemelelo, aluwa kooumbuwela ira vyevyo athwayo kamupangeleathu vyali vyofwanafwana ndendende na vyevyo vyalembiwe vyokuza liye.
17 Sopano athu anjinji anayo kalivo vathawi ineyo Yesu amuvenyi-ile liye Lazalo m’manda,* koopitiliza mupangela umboni. 18 Mbaona athu anjinji kadowile dowa muchingamela, chifukwa koovwa ira liye oopanga yodabwi-a inela. 19 Eno Afarisi koowambeela kambilana ekiwa ira: “Veva muvionela ekinyu ira kilivo ineyo ninapindulavo iyo. Kaonani! Athu etene kanadowa wa liye.”
20 Wu ikondwelelowo ookala teto Agiriki anayo kazide za lambela. 21 Aluwa koodowa wa Filipo unoyo waniwa wali wu Betisaida wawu Galileya, moi koowambeela muvepa ira: “Iyo ninafuna nimuone Yesu.” 22 Filipo oodowa muwandela Andreya moi Andreya na Filipo koodowa muwandela Yesu.
23 Koma Yesu oosomeda ira: “Thawi yoi Mwana wa muthu alemekeziwe ifiya. 24 Ndithu ndinaauwandelani, akala ira mbewu ya tirigu kimorele vateya nokhwa, inopitilizave kala imo-ive ineyo. Koma yakhwa inobala vipaso vinjinji. 25 Muthu uliwetene unoyo unaomeliwana moywae unaauwononga, koma uliwetene unoyo unaidana na moywae muilambwela unaauteteza ira aze afwanye moyo oomala. 26 Akala muthu unafuna nditumikela andi-arele moi wewo ndinaze miyo ndikale, mtumikangoyo teto unaza akala wewo. Uliwetene onditumikela miyo, Babanga unoza amulemekeze. 27 Moywanga unovuteya vinjinji, kodi ndionge n’ni? Babani ndivulumucheni vathawi yoruchela. Komave thawi inela inafuneya ndifiyela chifukwa pivyevyo ndazede miyo. 28 Babani lemekezani zina linyu.” Angaongile eno udimu oovweya mawu oonga ira: “Ndililemekeza moi ndinoza ndililemekeze.”
29 Eno gulu la athu anayo kaimelile vevo koovwa mawu anala moi koowambeela onga ira udimu uguza mwakopolo. Amo-iwa kaonga ira: “Ngelo uonga na liye.” 30 Yesu ooawandela ira: “Mawu anala kativweile chifukwa ya miyo, koma kavweile chifukwa ya nyo. 31 Sopano ilambwela inaaweluziwa, moi olamulela wa ilambwela unovochediwa unde. 32 Koma ndaza ndipachikiwa vatengo, ndinoza ndikokele athu o-iyana-iyana wa miyo.” 33 Liye aongile vyevi vofuna tonyi-eda mwemo unaze liye akhwele vavira thawi yoyeva. 34 Ndiye gulu la athulo loomusomeda ira: “Ilamulo inaonga ira Kristu unoza akalewo mpakana walewale. Nanga chifukwa n’ni nyo munaonga ira Mwana wa muthu unafuneya pachikiwa vatengo? Kodi Mwana wa muthu unoyo mbaani?” 35 Yesu ooawandela ira: “Wala unopitilizave kala vaari vinyu wa thawi yoyeva. Endani vathawi ineyo walawo uliathu na nyo, ira dima kuufiyedeni. Muthu uliwetene unoyo unaenda mudima kanaiziwa wewo unadowa liye. 36 Vevo muli nyo mowala, tonyi-edani ira munororomela walawo, ira mukale a-ima owala.”
Yesu angaongile vyevi, oodowa vitaala. 37 Ngakale ira liye oopanga vyodabwi-a vinjinji vamaso viwa, aluwa katamuroromela, 38 moi mawu a namaongela Yesaya kookwakwaneli-ediwa. Liye aongile ira: “Yehova,* kodi mbaani unoyo uroromele vyevyo naongile iyo? Teto mbaani unoyo uoni-iwe kopolo da ndanda la Yehova?”* 39 Chifukwa vyevyo vyapangi-ile ira aluwa katiroromele pivyevyo teto Yesaya aongile liye ira: 40 “Liye u-eya maswiwa ira aluwa katione, koma teto uumi-a mirima diwa, ira kativwecheche vyongo notembenuwa ira ndiachili-e.” 41 Yesaya aongile vyevi chifukwa yoi oowona ulemelelo wa Kristu. 42 Komave vookala athu amo-iwa anayo kamuroromele, ngakale teto olamulela anjinji. Koma aluwa katasomedele vowela chifukwa kaova ira Afarisi kanokoza achosa musunagoge. 43 Chifukwa aluwa koowomeliwa vinjinji ulemelelo wa athu kwaranya ulemelelo wa Mulungu.
44 Koma Yesu oowonga mokuwa ira: “Muthu uliwetene unoyo unandiroromela kanandiroromela miyo mekave, koma unomuroromela teto unoyo andirumile. 45 Muthu uliwetene unoyo undionile miyo umuona teto unoyo andirumile. 46 Ndiza monga wala muilambo, ira uliwetene ondiroromela kapitilize kala mudima. 47 Akala muthu uvwile mawanga koma lepela a-arela, miyo kandinamuweluza, chifukwa kandazide za weluza ilambo, koma za ivulumucha. 48 Muthu uliwetene ondinyalanyaza koma teto olepela wachela mawanga, ukalavo unoyo unaze amuweluze. Mawu anayo ndiongile miyo mbanayo kanaze kamuweluze va dambo lomari-a. 49 Chifukwa vyevyo ndinaonga miyo kavinakumela m’maganizo mwanga, koma Babanga unoyo andirumile oondiva-a lamulo va vyevyo ndinafuneya miyo onga na vyevyo ndinafuneya miyo funji-a. 50 Moi ndinoiziwa ira malamulwae mbokami-a ira athu kaze kafwanye moyo oomala. Eno vyevyo ndinaonga miyo, ndinovionga mogwilizana na vyevyo Babanga andiwandelile liye.”