MURU 58
Mzinda wa Yelusalemu Oonongiwa
Thawi dinjinji, Ayuda koo-iya lambela Yehova nolambelanga milungu dimo-i. Yehova ooesaesa akami-a wa chaka dinjinji. Oowatumizela anamaongela ira kaachenjeze koma aluwa kataavwela. Kodi Yehova amali-ile avi vuto lolambela mafanoli?
Nebukadinezara, unoyo ali mwene wa Babulo, oogonji-a vilambo vinjinji. Vaulendo owambeela unoyo agonji-ile liye Yelusalemu, oomu-inda Mwene Yehoyakini, akalonga, asilikali koma teto athu amo-iwa aluso. Etene anala oowadowana wu Babulo. Oolanda teto chuma yetene ineyo yali mukachisi wa Yehova. Vanduli viwa, Nebukadinezara oomusakula Zedekiya ira akale mwene wa Ayuda.
Vowambeela, Zedekiya oomuvwela Nebukadinezara. Koma vanduli viwa athu a muvilambo vyavakwikwi koma teto anamaongela onama koomuwandela ira a-iye vwela ulamulilo wa Babulo. Koma Yeremiya oomuwandela ira: ‘Mwa-iya avwela Ababulo, athwinyu anjinji kanophiwa moi muilambwela munokala ndala na marenda.’
Zedekiya angakede lamulela wa chaka 8, oo-iya avwela Ababulo. Liye oovepa asilikali awu Iguputo ira kamukami-e. Eno Nebukadinezara ootumiza asilikalae ira kaononge mzinda wa Yelusalemu. Asilikalayo kangaurungunuwile mzindoyo, Yeremiya oomuwandela Zedekiya ira: ‘Mwakeda awandela Ababulo ira mugonja, mzindola koma teto athwinyu kanovulumuwa. Koma mwapanga makani, Ababulo kanotumeya mzindola moi nyo kanoudowanani uukapolo.’ Zedekiya oosomeda ira: ‘Kandinayelekeze olo vang’ono awandela Ababulo ira ndigonja.’
Vangavirile chaka diralu na hafu, asilikali a Babulo koovolowa mu mzindoyo noutumeya. Aluwa kootumeya kachisi, pha athu anjinji nowalanda athu amo-iwa adowana uukapolo wu Babulo.
Zedekiya oowambeela tawa koma asilikali awu Babulo koomutamangi-a. Koomu-inda vakwikwi na wu Yeriko nomudowana wa Nebukadinezara. Mwenela yoopha a-ima a Zedekiya liye aonanga. Vanduli viwa koomuchosa maso nomu-eela mundende moi akhwele mwemo. Koma Yehova oowawandela Ayuda ira: ‘Chaka 70 damala munowelela wu Yelusalemu.’
Kodi munaganiza ira azombwe anayo kadowile wu Babulo vyaamalele avi? Kodi aluwa kookalave ororomeleya wa Yehova?
“Yehova Mulungu, nyo Wakopolo detene, viweluzo vinyu pivyoona koma teto vyolungama.” — Chivumbuluso 16:7