Koneliyo Oowachela Zimu Owela

Wu Kaisareya ookala ndimuwa m’mo-iwa zina lae Koneliyo teto ali ndimuwa wa asilikali. Ngakale ira liye kaali Muyuda, Ayuda koomuva-a ulemu. Koneliyo ookami-a vinjinji athu ovuteya. Liye oomuroromela Yehova teto oomeliwana pempela. Dambo limo-i ooza mgelo moi oomuwandela ira: ‘Mulungu uvwa mapempelwawo. Tumiza athu ira kadowe wu Yopa ira kamuitane muthu m’mo-iwa zina lae Petulo.’ Thawi ineyo Koneliyo oowatumiza athu dowa wu Yopa moi wali ulendo wa makilomita 48 umwera wa Kaisareya.

Vathawi inela, Petulo ali angali wu Yopa moi athwale kangali mundila, liye oona masomphenya. Oona nyama dedo Ayuda kataloliwa didja moi oovwa mawu omuwandela ira adje nyamado. Petulo ookoonda moi oonga ira: ‘Kumela vevo ndabaluwile miyo kandinadjevo nyama dedi.’ Koma mawale koovweya teto nawili ira: ‘U-iye onga ira nyama dedi tidotakali-iwa chifukwa Mulungu udiweli-a.’ Vanduli viwa Petulo oowandeliwa ira: ‘Vikala athu aralu anayo kanaufuna. Dowa limo-i na aluwa.’ Petulo oodowa onana na athwayo moi angaava-ile moni, koomuwandela ira: ‘Unirumile ngu ndimuwa wa asilikali m’mo-iwa zina lae Koneliyo. Uongile ira nize niulandeni nidowele limo-i waniwa wu Kaisareya.’ Petulo oowavolochi-a m’mba nowasamalela monga alendwae. Mamawa wa dambo lo-arela oomaruwa limo-i na aluwa ulendo odowa wu Kaisareya. Oodowa teto limo-i na abali angasene awu Yopa.

Vanduli viwa koofiya wu Kaisareya. Koneliyo angamuonile Petulo, oomukokorela nomuworamela mpakana khovae vati. Koma Petulo oomuwandela ira: ‘Imelani, miyo teto ndili muthu ngati nyen’ne.’ Vanduli viwa oomuwandela ira: ‘Nyo munoiziwa ira Ayuda katinavolowa m’manyumba a athu amitundu dimo-i. Koma Mulungu undiwandela ira ndize waninyu uno. Sopano ndiwandeleni ineyo mwandifunela nyo.’

Koneliyo oomuwandela Petulo ira: ‘Malambo 4 kavirilayo, ndipempelanga, wa Mulungu, mgelo oondiwandela ira nditumize athu ira kaze kauitaneni. Ninavepa ira munifunji-e mawu a Mulungu.’ Petulo oonga ira: ‘Ndiiziwa ira Mulungu kan’na sakulo. Unomuwachela uliwetene unoyo unafuna mulambela.’ Petulo oowafunji-a vyongo vinjinji vyokuza Yesu. Vanduli viwa zimu owela oofiya va Koneliyo na athu anayo kali limo-i na liye moi etene anayo koobatiziwa.