Yakobo na Esau Koowambeela Nawili Gwilizana

Yehova oomulonjeza Yakobo ira unomuteteza ngati mwemo mwatetezele liye Aburahamu na Isaki. Yakobo akala wu Harana teto ookaana banja lilukulu koma teto chuma yoinjiva.

Eno Yehova oomuwandela Yakobo ira: ‘Welela waninyu.’ Eno Yakobo na banja lae koomaruwa nowambeela enda ulendo wolapa owelela waniwa. Kangali mundila, athu amo-i koomuwandela Yakobo ira, ‘Esau unaaza moi ukaana athu 400.’ Yakobo aganiza ira Esau unaza na yolinga yoi amuphe liye limo-i na athu am’banja lae. Eno oopempela wa Yehova ira: ‘Pepani ndikami-eni ira balanga kandiphe.’ Dambo lo-arela, Yakobo oomutumizela Esau mpaso doinjiva monga khosa, mbudi, ng’ombe, ngamila na abulu.

Eno ma-iyu adambo lelo, Yakobo angali eka, oona mgelo. Thawi ineyo oowambeela limbana na liye moi kaamu-iile mpakana unde oowambeela cha. Ngakale ira Yakobo ooporeya, kaamu-iile mgeloyo. Vanduli viwa mgeloyo oonga ira: ‘We ndi-iye ndidowenga.’ Koma Yakobo oomusomeda ira: ‘Kandinau-iya mpakana ungandidalisile.’

Eno mgeloyo oomudalisa Yakobo. Moi vyevi vyoomukami-a Yakobo iziwa ira Yehova kanalole ira Esau amuphe.

Unde ungachile, Yakobo oomuona Esau azanga yavandendai limo-i na athu 400. Eno Yakobo oosogola moi aanagumane na balaeyo oomukokorela maulendo 7. Esau ootamanga nomukumbarela. Etene koowambeela ula moi koogwilizana nawili. Kodi munaganiza ira Yehova avwile avi na vyevyo Yakobo apangile liye vofuna gwilizana nawili na balae?

Vanduli viwa Esau oowelela waniwa moi Yakobo oopitiliza ulendwae. Yakobo an’na a-ima aalombwana 12. Maziniwa kali Rubeni, Simiyoni, Levi, Yuda, Dani, Nafitali, Gadi, Aseri, Isakara, Zebuloni, Yosefe na Benjamini. Yehova oomu-indi-eda chito Yosefe vofuna vulumucha athwae. Kodi munoiziwa vyevyo vyaireile? Ninokambilana vyevi m’muru o-arela.