Yehova Oomuva-a Kopolo Samisoni

Vathawi imo-iwa, Aisaraeli koowambeela teto nawili lambela mafano moi Yehova oolola ira Afilisiti kaalamulelenga mwauwalanga. Koma vookala Aisaraeli amo-iwa anayo kamuomeliwanave Yehova. Isazo ngu muthu m’mo-iwa zina lae Manowa. Koma liye na iyanae katan’na a-ima. Eno dambo limo-i liwa, Yehova ooruma mgelo ira adowe wa iyanae wa Manowa. Mgeloyo oomuwandela iyanoyo ira: ‘Unoza ukaena mwana wamulombwana unoyo unaze aavulumuche Aisaraeli wa Afilisiti. Koma mwanoyo unaza akala Mnaziri.’ Kodi nyo Anaziri munowaiziwa? Anaziri kali atumiki avadela a Yehova moi kataloliwa inga sisi.

Vangavirile thawi, iyana wa Manowa ookaana mwana teto koomuva-a zina loi Samisoni. Mwanoyo angaulukulile, Yehova oomuva-a kopolo dinjinji. Liye oopha podogoma ookaana ida iliyetene. Dambo limo-i angali eka oopha Afilisiti 30. Afilisiti kooidana vinjinji na Samisoni moi koosaela ndila yoi kamuphe. Dambo limo-i liye agonanga wu Gaza, Afilisiti koodowa va isewo ya mzindoyo mudedi-anga ira kamuphe unde wacha. Koma Samisoni oovenya vaari va ma-iyu nochosa iseweyo. Liye ooitukula dowa itatila vamwango m’mo-iwa vakwikwi na wu Heburoni.

Vyangaireile eno, Afilisiti koodowa wa imweendi ya Samisoni zina lae Delila. Aluwa koomufuka ira: ‘Kodi isisi ya kopolo da Samisoni ili vaavi? Waniwandela ninouva-a ndalama dinjinji. Ninafuna nimu-inde nomu-eela mundende.’ Delila ali oomeliwa ndalama moi oowawandela ira unosaela. Vowambeela Samisoni ookoonda muwandela Delila isisiyo. Koma liye oomukanyi-eda vinjinji moi Samisoni oofiya vogoma vamapeto viwa oomuululela. Liye oonga ira: ‘Miyo ndili Mnaziri. Kandinaingevo sisi langali. Keda ndiinga, kopolo danga detene dinamalela vevo.’ Samisoni aaiziwe kaamululela vyevi.

Thawi ineyo Delila oowawandela Afilisiti ira: ‘Undiwandela isisaele.’ Vanduli viwa oomugonati-a Samisoni vamendo noitana muthu woi amuinge. Kangamuingile, Delila ookuwa ira: ‘Samisoni! Afilisiti kooza.’ Samisoni oovenya koma kaan’na kopolo. Afilisitayo koomu-inda nomuchosa maso vanduli viwa koomu-eela mundende.

Dambo limo-i, Afilisiti koosonkana mukachisi unoyo kalambelelamoathu mulungwiwa zina lae Dagoni. Aluwa kookuwa ira: ‘Mulungwi-u univa-a Samisoni. Mukumi-eni ira niwalede na liye.’ Eno athwayo koomu-ela vaari va vipilala viili nowambeela muteya. Koma Samisoni ookuwa ira: ‘Yehova, pepani ndiva-eni kopolo ndila imo-i yoka.’ Vathawi inela sisi lae lali lingamelile. Liye oondunya vipilalavyo na kopolo dae detene. Nyumba yetene ineyo yoogwa moi yoopha athu etene. Naliyene teto Samisoni akhwele mwemo.