KHANI YOFUNJEDA 30
Pitilizani Muwomeliwana Yehova na Athwae
“Tiyemoni niulukule mu vyongo vyetene.” — AIFE. 4:15.
NYIMBO 2 Dzina Lanu Ndinu Yehova
VYEVYO NINAFUNJEDE IYOa
1. Kodi mbamakundo aimbarimbari aavi anayo mwaaiziwile nyo mungaamben’le funjeda Baibulo?
KODI munoumbuwela vyongo vyevyo mwaviiziwile nyo mwangaamben’le funjeda Baibulo? Mwina moodabwa mungaiziwile ira Mulungu ukaana zina. Mwina teto moovwa pama mungazindikilile ira Mulungu kanazuzumi-a athu umulo. Mookaikela moosangalala teto mungaiziwile ira vikala idedi-edo yoi munoza muonane nawili na athu anayo mwaawomeliwana nyo anayo katatiile moi munoza mukale nawo limo-i m’paradaizo vailambwela.
2. Enjedela vofunjeda makundo aimbarimbari a m’Baibulo, kodi mwapangile n’ni teto ira mudowe vasogolo? (Aifeso 5:1, 2)
2 Vevo mwafunjeda nyo vinjinji Mawu a Mulungu, pavevo teto mwaamben’le nyo muwomeliwana vinjinji Yehova. Chikondiyo yooulimbikisani ira mu-arelenga vyevyo mwafunjeda nyo. Moosakula vyoira mwazelu mogwilizana na makundo a m’Baibulo. Moochenja mwemo mwaonela nyo vyongo koma teto ikalelo inyu chifukwa moofuna musangalasa Mulungu. Mofwanafwana na mwana unoyo unasazi-eda likolo lachikondi, nanyen’ne moomusazi-eda Babinyu waudimu. — Welengani Aifeso 5:1, 2.
3. Kodi ninavifuke vyofuka viivi?
3 Mwina ninokoza vifuka ira: ‘Kodi vano ndinomuwomeliwana vinjinji Yehova kwaranya mwemo ndamuwomeliwana miyo ndangakede kala wene Mkiristu? Keda kumela vevo ndabadiziwe miyo, kodi ndinoganizela kapena panga vyongo ngati Yehova simbwasimbwa votonyi-eda chikondi wa abali na arongola?’ Akala chikondi ineyo mwan’na nyo vowambeela iambeele yeva, kamufooke. Vyevi vyoowaireelavo teto Akiristu amuthawi ya anamarumiwa. Yesu kaa-iile awomeliwana, moi na-iyene teto kana-iye niwomeliwana. (Chiv. 2:4, 7) Liye unoiziwa ira ninokoza ambeela nawili kaana chikondi ngati ineyo nan’na iyo nangakede iziwa wene imbarimbari.
4. Kodi ninakambirana n’ni mukhanila?
4 Khanila inonikami-a ona vyevyo ninaire iyo ira nipitilize muwomeliwana Yehova koma teto athu. Vanduli viwa ninoona madaliso amo-iwa anayo ninafwanye iyo chifukwa yomuwomeliwana vinjinji Yehova koma teto athu amo-iwa.
PITILIZANI MUWOMELIWANA YEHOVA
5-6. Kodi mbamavuto aavi anayo namarumiwa Paulo agumanilena liye va utumikae, nanga chin’ni yamukami-ile pitilizave tumikela Yehova?
5 Namarumiwa Paulo oosangalala votumikela Yehova, koma oogumana na mavuto anjinji. Thawi dinjinji liye ooenda maulendo olapa olapa moi vathawi ineyo kavyali vyokweya panga vyevi. Va maulendwae anala, thawi dimo-i oogumana na “vyoophi-a vya m’mi-inje” koma teto “vyoophi-a vya achifamba vasewu.” Thawi dimo-idiwa athu omuruni-a koomupangela vyauwalanga. (2 Akor. 11:23-27) Koma teto kai thawi detene vevo Akiristu afwae katonyi-edaathu ira kooyamikela tindi lae lofuna akami-a. — 2 Akor. 10:10; Afil. 4:15.
6 Chin’ni yamukami-ile Paulo ira apitilizeve tumikela Yehova? Liye oofunjeda vinjinji vyokuza makalelo a Yehova m’Malemba koma teto va vyevyo vyamuireele. Paulo kaakaikela ira Yehova Mulungu oomuwomeliwana. (Arom. 8:38, 39; Aife. 2:4, 5) Moi naliyene teto oowambeela muwomeliwana vinjinji. Paulo ootonyi-eda ira oomuwomeliwana Yehova ‘votumikela owela nopitilizave atumikela.’ — Aheb. 6:10.
7. Kodi chiyongo imo-i iivi ineyo inanikami-e ira nimuwomeliwengana vinjinji Yehova?
7 Yongo imo-iwa ineyo inanikami-e ira nipitilize muwomeliwana vinjinji Mulungu kufunjeda Mawae mwatindi. Mwawelenganga Baibulo, mushishenga ona mwemo vyevyo muwelengile nyo vinaukami-edelaniathu iziwa vyokuza Yehova. Muvifukenga ira: ‘Kodi khanila inatonyi-eda avi ira Yehova unondiwomeliwana? Kodi inandikami-a iziwa vifukwa viivi vyondipangi-a muwomeliwana Yehova?’
8. Kodi pepelo linanikami-e avi ira nipitilize muwomeliwana vinjinji Mulungwi-u?
8 Pepela wa Yehova mokumela vati va murima thawi detene unokoza nikami-a ira nimuwomeliwengana vinjinji. (Sal. 25:4, 5) Nairanga eno, liye unosomeda mapepelwi-u. (1 Yohani 3:21, 22) Murongola m’mo-iwa wa wu Asia zina lae Khanh, awongile ira: “Vowambeela ndakeda muwomeliwana Yehova chifukwa ya vyevyo ndaiziwa miyo vyokuza liye, koma ndoowambeela muwomeliwana vinjinji ndangaonile mwemo asomedela liye mapepelwanga. Vyevi vyoondilimbikisa ira ndipangenga vyongo vyevyo vinamusangalasa.”b
MUWOMELIWENGA VINJINJI ATHU AMO-IWA
9. Kodi Timoteyo atonyi-edile avi ira oodowa vasogolo va khani yowawomeliwana abali na arongola?
9 Vangavirile chaka doyeva kumela vevo Paulo akan’le liye Mkiristu, oogumana na muzombwe m’mo-iwa zina lae Timoteyo. Muzombwela oomuwomeliwana vinjinji Yehova koma teto athu. Paulo oowandela Akiristu a wu Filipi ira: “kandin’na m’mo-iwa wa murima ngati liye, unoyo unatamaale vya nyo moona murima.” (Afil. 2:20) Valembali, liye kaawonga vyokuza mwemo Timoteyo airela liye vyongo mwadongosolo kapena luso lae loonga vagulu, koma pivyovaela oneya ira liye ooira chidwi na mwemo Timoteyo awomeliwana liye abali na arongola. Mookaikela, abali na arongola kooembekezela mwachidwi maulendo a Timoteyo odowa aledela mipingo diwa. — 1 Akor. 4:17.
10. Kodi Anna na mamunae katonyi-edile avi ira koowawomeliwana abali na arongoliwa?
10 Na-iyene teto ninosaelasaela ndila dokami-edela abali na arongoli-u. (Aheb. 13:16) Kaganizelani vyevyo vyamuireele Anna unoyo nimuromon’le iyo mukhani ivirilele. Vanduli va lipevo lakopolo, liye na mamunae koodowa dowa ona banja limo-i la Mboni moi kafwanyile ira denga la nyumbiwa lali lingaonongeile. Chifukwa ya lipevolo, vyowara viwa vyetene vyootakala. Anna awongile ira: “Nootukula vyowara viwavyo dowa vichapa, teto naava-ile nangavisitile koma teto vivinda pama. Wa iyo, vyevi kayali khani ilukulu, koma vyookami-a ira nigwilizanenga nawo vinjinji mpakana vano.” Awomeliwana abali na arongoliwa, woomupangi-a Anna na mamunae ira kaakami-e. — 1 Yohani 3:17, 18.
11. (a) Kodi vyevyo ninaira iyo votonyi-eda amo-iwa chikondi vinaakuza avi? (b) Mogwilizana na Miyambo 19:17, kodi Yehova unapangecha n’ni naatonyi-edanga amo-iwa chikondi?
11 Naawomeliwangana koma teto awomela murima athu amo-iwa, thawi dinjinji aliwa kanoona vyevyo ninaira iyo vomusazi-eda Yehova vakhani ya mwemo unaganizela liye koma teto mwemo unairela liye vyongo. Moi kanokoza yamikela vinjinji vyevyo ninaire iyo vowatonyi-eda oma murima kwaranya mwemo ninaganizela iyo. Khanh unoyo nimuromon’le iyo walele, unosangalala aumbuwela mwemo amo-iwa kamukami-edeleathu. Liye awongile ira: “Ndinoyamikela vinjinji arongola etene anayo kanditukula kadowanga wolaleela. Kooza wani-u za nditukula, ndiitanela yodja koma teto za ndi-iya. Vano pavevo ndinazindikila miyo ira kafuneela panga tindi ira kairenga vyevi moi kapanga vyevi chifukwa ya chikondi.” Pivyoona ira kai etene anayo kanayamikele vyevyo niwairele iyo. Voonga vya athu anayo kamukami-ile, Khanh awongile ira: “Ndinolakalaka ndangaaweli-ede vyapama vyevyo kandiireleathu, koma kandinaiziwawo wewo etene anala kanakalaathu. Komave, Yehova unoiziwa moi ndinomuvepa ira aadalisenga.” Khanh awongile vyoona. Yehova unoiziwa ngakale vyongo ving’onong’ono ving’onong’ono vyevyo ninaira iyo vowawomela murima athu amo-iwa. Liye unoona ira dedi ti sembe da ntengo wavadimu koma teto ngongole ineyo unaze liye aweli-e. — Welengani Miyambo 19:17.
Muthu apanganga vinjinji votumikela Yehova, unosaela ndila dokami-edela amo-iwa (Onani ndima 12)
12. Kodi abali kanatonyi-ede avi ira kanowawomeliwana athu amo-iwa mupingo? (Onani teto vithuzithuzi.)
12 Akala muli m’bali, kodi munatonyi-ede avi ira munowawomeliwana athu amo-iwa koma teto vipeleka ira muwakami-e? M’bali m’mo-iwa waizombwe zina lae Jordan oomufuka ndimuwa mupingo ira amukami-e iziwa vyevyo unapange liye ira akami-enga amo-iwa mupingo. Ndimuwola oomuyamikela chifukwa ya vyevyo akwakwani-a liye panga moi oomuva-a malangizo okuza vyevyo unapange liye ira apitilize panga vyevi. Liye oomuwandela Jordan ira afiyenga mombaraanya wu Nyumba ya Umwene na yolinga yoi apelekenga moni, asomedenga vamisonkano, thawi detene alaleelenga na athu amugulu lae la utumiki koma teto asaelenga ndila dokami-edela athu amo-iwa. Jordan angaamben’le arela malangizo anala, kaakeda funjeda maluso asha, koma oowambeela teto awomeliwana vinjinji abali na arongolae. Liye oofunjeda likundo loi m’bali akala mtumiki wokami-a kanakeda ambeela kami-eda amo-iwa, koma unopitilizave kami-eda amo-iwa. — 1 Tim. 3:8-10, 13.
13. Kodi chikondi yamukami-ile avi m’bali m’mo-iwa zina lae Christian ira aambeele nawili tumikela monga ndimuwa?
13 Bwanji akala mundulimu mwatumikelevo ngati ndimuwa mupingo kapena mtumiki wokami-a? Yehova unoumbuwela vyevyo mwaira nyo vomutumikela koma teto ira mwapanga vyevyo chifukwa ya chikondi. (1 Akor. 15:58) Liye unoona teto chikondi ineyo munapitiliza nyo itonyi-eda. M’bali m’mo-iwa zina lae Christian ookumudwa angaimechiwe tumikela monga ndimuwa. Komave, liye afotokozile ira: “Ndoosakula ira ndipangenga vyetene vyevyo ndinawande miyo votumikela Yehova chifukwa yomuwomeliwana, kaya ndili va udindo kapena naari.” Vangavirile thawi, liye oo-eliwa nawili kala ndimuwa. Christian oosomedela ira: “Ndoozengereza ira ndisomede tumikela nawili. Koma ndoowona ira akala Yehova mwachifundo yae undilolile ira nditumikele nawili monga ndimuwa, ndinafuneela tumikela chifukwa yomuwomeliwana liye koma teto abali na arongolanga.”
14. Kodi munafunjeda n’ni va vyevyo murongola m’mo-iwa wawu Georgia awongile liye?
14 Atumiki a Yehova kanotonyi-eda ira kanowawomeliwana athu amo-iwa. (Mat. 22:37-39) Mofwanafwani-a, murongola m’mo-iwa wawu Georgia zina lae Elena, awongile ira: “Vowambeela ndakeda laleela chifukwa yomuwomeliwana Yehova. Koma vevo ndaamben’le miyo muwomeliwana vinjinji Babanga waudimu, ndoowambeela teto awomeliwana vinjinji athu. Ndooganizela mavuto anayo kanagumananaathu koma teto khani dedo dinaafiye vamurima. Ndapanganga vyevi vakwikwi vakwikwi, pavevo teto ndafunechecha miyo akami-a.” — Arom. 10:13-15.
MADALISO ANAYO NINAFWANYE IYO CHIFUKWA YOWAWOMELIWANA ATHU AMO-IWA
Vyoyeva vyevyo ninaire iyo votonyi-eda chikondi vinokoza kami-a athu anjinji (Onani ndima 15-16)
15-16. Mogwilizana na vithuzithuzi, kodi mbamadaliso aavi anayo ninafwanya iyo chifukwa yowawomeliwana athu amo-iwa?
15 Naawomeliwangana abali na arongoli-u, ninokami-a teto athu amo-iwa. Mulili wa COVID-19 ungakede ambeela, m’bali m’mo-iwa zina lae Paolo na mu-iyanae kookami-a arongola anjinji ouluula iziwa mwemo kana-indi-edeleathu chito vipangizo viwa vyamakono volaleela. Murongola m’mo-iwa unoyo vowambeela vyamurucha indi-eda chito ipangizo yae yamakono ooiziwa mwemo unai-indi-edele liye chito. Chifukwa ya vyevi, liye ookwakwani-a itanela abalae wu Iwumbuwelelo. Abalae 60 koopangana mwambola zela va vidiyokonferensi. Vyevyo Paolo na mu-iyanae kairileathu vyookami-a vinjinji murongolola koma teto abalae. Vangavirile thawi, murongolola oomulembela Paolo kalata yoi: “Zikomo chifukwa yonifunji-a athu ouluula iyo. Kandinaza ndidiwala mwemo Yehova unatonyi-edela liye ira unoniganizela koma teto tindi linyu.”
16 Vyoireya ngati vyevi vyoomufunji-a Paolo likundo lofuneya vinjinji. Liye ooumbuchiwa ira chikondi chofuneya vinjinji kwaranya iziwa vyongo kapena luso lobaliwana. Liye awongile ira: “Vowambeela ndali woing’anela dela. Vano ndizindikila ira ngakale ira mwina ofalisa koodiwala khani dedo ndakamba miyo, kanoumbuwelave vyevyo ndaira miyo vowakami-a.”
17. Kodi natonyi-edanga chikondi ninamukami-echa teto mbaani?
17 Naatonyi-edanga amo-iwa chikondi, na-iyene ninopindula mundila yoi kanaiganizela. Jonathan, unoyo unakala wu New Zealand, oowona ira vyevi pivyoona. Loweluka limo-iliwa mutana unde uvi-anga, liye oomuwona mpainiya m’mo-iwa alaleelanga m’mbali mwa sewu. Vanduli viwa ooganiza ira avolowenga muutumiki limo-i na mpainiyoyo mutana wa Loweluka lililetene. Vathawila liye kaazindikilile ira vyevyo airile liye mooma murimavi vinoza vimukami-e liyene. Jonathan oosomedela ira, “Vathawi ineyo kandawomeliwana laleela. Koma ndangaonile mwemo mpainiyoyo afunji-ela liye koma teto ira vyongo vyoomuendela pama muutumiki, ndoowambeela iwomeliwana vinjinji chito yolaleela. Liye ookala fwanga wapama unoyo andikami-ile ira ndikale wolimba mwauzimu, ndiwomeliwengana laleela koma teto ndikale va usamwali wapama na Yehova.”
18. Kodi Yehova unafuna ira nipangenga n’ni?
18 Yehova unafuna ira nimuwomeliwengana vinjinji koma teto niawomeliwengana athu amo-iwa. Monga mwemo nifunjedile iyo, ninerenga muwomeliwana vinjinji Yehova akala ninawelenga koma teto ganizela Mawae, koma teto pepela wa liye thawi detene. Ninokoza awomeliwangana vinjinji abali na arongoli-u vowakami-a mundila do-iyana-iyana. Vevo chikondi-u inaulukulaathu, ninoza nikale va usamwali wapama vinjinji na Yehova koma teto banja li-u lauzimu. Teto ninoza nisangalale na vyevi mpakana walewale.
NYIMBO 109 Tizikondana Kwambiri Kuchokera Mumtima
a Kaya nikede funjeda wene imbarimbari kapena nikala nitumikelanga Yehova wa thawi indendai, etene iyene ninafuneela pitiliza dowa vasogolo. Mukhanila ninokambirana ndila yofuneya ineyo ninapangele iyo vyevi ineyo ili pitiliza muwomeliwana Yehova na athwae. Nafunjedanga, ganizelani mwemo mutonyi-edele nyo wale ira munodowa vasogolo koma teto mwemo munapitilizele nyo panga vyevi.
b Mazina amo-iwa koochenjiwa.