KHANI YOFUNJEDA 26
NYIMBO 123 Tizigonjera Mulungu mokhulupirika
Nisomedelenga Moviyevi-a Ira Kaninaiziwa Vyetene
“Wakopolo detene kaninawande muvwechecha.” — YOBU 37:23.
VYEVYO NINAFUNJEDE IYO
Khanila inonikami-a iziwa mwemo somedela ira kaninaiziwa vyetene unanikami-eleathu vilela mavuto anayo ninagumanana iyo, koma teto inonikami-a ira niganizelenga vyevyo ninaiziwa iyo koma teto ira nimuroromelenga Yehova.
1. Kodi Yehova anilengile na luso lowanda panga n’ni, nanga chifukwa n’ni?
YEHOVA oonilenga na luso loi niwandenga ganiza, funjeda, vwechecha vyongo koma teto indi-eda chito vyevyo ninafunjeda iyo. Chifukwa n’ni anilengile mundila inela? Liye unafuna ira “nimuiziwe” pama koma teto ni-indi-edenga chito luso li-u lowanda ganiza vomutumikela. — Miya. 2:1-5; Arom. 12:1.
2. (a) Kodi ninafuneela iziwa n’ni vyokuza iyo athu? (Yobu 37:23, 24) (Onani teto ithuzithuzi.) (b) Kodi somedela moviyevi-a ira kaninaiziwa vyetene unanikami-a moi avi?
2 Ngakale ira Yehova oonilenga na luso lowanda ganiza, vikala vyongo vimo-i vyevyo iyo kaninaviiziwa. (Welengani Yobu 37:23, 24.) Isazo va khanila ngu Yobu. Va thawi imo-iwa oofuka vyofuka vingasi vyene vyevyo vyatonyi-eda ira vookala vinjinji vyevyo kaaviiziwa. Vyevi vyoomukami-a kala oviyevi-a koma teto chenja mwemo aganizela liye. (Yobu 42:3-6) Na-iyene teto ninokoza pindula vinjinji nasomedelanga moviyevi-a ira kaninaiziwa vyetene. Viyevi-a wewu unokoza nikami-a ira niroromelenga ira Yehova unoza anikami-e iziwa vyevyo ninafuneela iyo nayolinga yoi niwandenga sakula vyongo mwazelu. — Miya. 2:6.
Somedela ira kaninaiziwa vyetene unonikami-a ngati mwemo wakami-ileathu Yobu (Onani ndima 2)
3. Kodi ninakambilana n’ni mukhanila?
3 Mukhanila, ninokambilana vyongo vimo-i vyevyo iyo kaninaviiziwa koma teto mavuto anayo kanakalevo chifukwa ya vyevyo. Ninoona teto chifukwa iwa chipama ira vikala vyongo vimo-i vyevyo iyo kaninaviiziwa. Kambilana vyevi unonikami-a ira niroromelenga ira Yehova, “unoyo unaiziwa iliyetene,” unoniwandela vyevyo ninafuneela iyo iziwa. — Yobu 37:16.
KANINAIZIWA DAMBO LELO MAPETO A ILAMBWELA KANAZEATHU KAFIYE
4. Mogwilizana na Mateyu 24:36, kodi kaninaiziwa vya n’ni?
4 Welengani Mateyu 24:36. Kaninaiziwa dambo lelo mapeto a ilambwela kanazeathu kafiye. Ngakale vevo Yesu ali liye vailambwela, “kaaiziwa vya dambolo koma teto ola liwa.”a Vanduli viwa oowawandela anamarumiwae ira Yehova, unoyo Ngosunga Thawi Mulukulu, unosakula thawi yopangela vyongo “muulamulilwae,” kapena ira mogwilizana na mwemo unafunela liye. (Vyo 1:6, 7) Yehova oo-ela thawi ineyo unaze liye aonongele ilambwela, koma iyo kaninaiziwe thawi ineyo unaze liye apangele vyevi.
5. Kodi ooiziwa thawi ineyo mapeto a ilambwela kanazeathu kafiye unanikuza avi?
5 Mogwilizana na vyevyo Yesu aongile liye, kaninaiziwa ira nidedi-edelenga wa thawi yolapa moi avi ira mapeto a ilmbwela kafiye. Vyevi vinokoza nipangi-a ira nitatile murima kapena fooka, simbwasimbwa akala nikalile nidedi-edelanga dambo la Yehova wa thawi indendai. Kapena teto vinokoza nirucha vilela abali na afwi-u kaninyozanga chifukwa yoi mapeto a ilambwela katinafiyeve. (2 Pe. 3:3, 4) Mwina ninokoza ganizanga ira aakale ira niiziwa dambo lelo mapeto a ilambwela kanazeathu kafiye, vyoonikami-a ira kanitatile murima koma teto nivilelenga moorucha.
6. Chifukwa n’ni chi pama ira kaninaiziwa dambo lelo mapeto a ilambwela kanazeathu kafiye?
6 Vooniwandela dambo lelo mapeto a ilambwela kanazeathu kafiye, Yehova ooniva-a mwai otonyi-eda ira ninomutumikela chifukwa yomuomeluwana koma teto muroromela. Ninofuna mutumikela Yehova mpakana walewale ookala keda gomela vevo mapeto a ilambwela kanazeathu kafiye. M’malo mokedanga ganizela thawi ineyo “dambo la Yehova” linazeathu lifiye, ninokoza panga pama ganizelanga vyapama vyevyo vinaze viireye vanduli va dambolo. Napanganga vyevi, ninoza nipitilizeve kala vausamwali na Mulungu noesaesanga panga vyongo vyevyo vinamusangalasa. — 2 Pe. 3:11, 12.
7. Kodi chin’ni ineyo ninaiziwa iyo?
7 Ninokoza panga pama ganizelanga vyevyo ninaiziwa iyo, monga vyoi malambo omari-a kaambeele mu 1914. Maulosi a m’Baibulo anayo Yehova unafotokoza liye katinakeda romola chakela, koma kanofotokoza teto mwemo vyongo vikalileathu viireyanga ambeela va thawi ineyo. Vyevi vinokami-a ira kanikaikelenga ira “dambo lilukulu la Yehova lili vakwikwi.” (Zef. 1:14) Ninoiziwa teto vya chito ineyo Yehova unafuna liye ira nii-indenga ineyo kuwandela athu anjinji mwemo ninawandele iyo vyokuza “uthenga wapama wa Umwene.” (Mat. 24:14) Uthengola unolaleeliwa mu vilambo vyotamangela 240 koma teto muviongelo vyokwaranya 1,000. Kaninafuneela iziwa “dambolo na ola liwa” ira ni-indenga chito yofuneela mwatindi.
KANINAIZIWA MWEMO YEHOVA MUNAPANGELE LIYE VYONGO
8. Kodi mawu oyi “chito ya Mulungu oona” kanatapulela n’ni? (Namalaleya 11:5)
8 Iyo athu kaninaiziwa “chito ya Mulungu oona.” (Welengani Namalaleya 11:5.) Mawala kanaonga vya mwemo Yehova munavipangi-ela liye kapena teto vyevyo unalola liye ira viireye vofuna kwakwaneli-eda yolinga yae. Kaninaiziwe vifukwa vyetene vyevyo vipangi-ile ira Yehova alole ira vimo-iviwa vyene viireye kapena teto vyevyo unafuna liye panga ira anikami-e. (Sal. 37:5) Chito ya Mulungu oona chiyodii-a vinjinji moi kaninawande ivwechecha, ngati mwemo vinakalelaathu vyorucha iziwa mwemo mwana unaulukulela liye m’mbani mwa am’mae, vyongo vyevyo asayansi mpakana vano katinavivwechechave.
9. Kodi o-oiziwa vyevyo Yehova unapange liye vonikami-a unakale na mavuto oyi avi?
9 O-oiziwa ira Yehova unapanga n’ni vonikami-a unokoza nipangi-a ira nizengerezenga vosakula vyongo vimo-i. mwina ninokoza zengerezanga viimana vyongo vimo-i ira nipangenga vinjinji va utumiki-u, monga kala na moyo wo-oulela vyongo vinjinji kapena teto tamela wewo unafuneya olaleela vya Umwene anjinji. Mwina ninokoza kaikelanga akala Yehova unasangalala na iyo naonanga ira kaninakwakwaneli-eda vyolinga vi-u vyauzimu, akala kaninaona vyo-arelavo vya tindi li-u muutumiki kapena teto nagumananga na mavuto va chito imo-iwene ya mu gulu ineyo nina-inda iyo.
10. Kodi ninakala na makalelo ofuneya oyi avi chifukwa yo-oiziwa mwemo Yehova munanikami-ele liye?
10 O-oiziwa mwemo Yehova munanikami-ele liye unokoza nipangi-a ira nikale na makalelo ofuneya monga viyevi-a. Ikalelo inela inonikami-a iziwa ira maganizo koma teto ndila da Yehova tidavadimu kwaranya dee-u. (Yes. 55:8, 9) Inonikami-a teto ira nimuroromelenga vinjinji koma teto mudalila ira unerenga nikami-a. Vyongo vyaniendela pama muutumiki kapena va chito ya gulu li-u ineyo nina-inda iyo, ninopeleka ulemelelo wa Yehova. (Sal. 127:1; 1 Akor. 3:7) Kaya vyongo kaviendile paama ngati mwemo naganizela iyo, niumbuwelenga ira Yehova unoiziwa vyetene. (Yes. 26:12) Nipangenga mbali-u nororomelanga ira Yehova unopangavo mbalae. Kanikaikelenga ira liye unoza aniva-e malangizo anayo ninafuneela iyo, ngakale ira kanapange vyevyo modabwi-a ngati mwemo mwapangela liye wale. — Vyo. 16:6-10.
11. Kodi pivyongo vyofuneya vyoi avi vyevyo ninaiziwa iyo?
11 Ninoiziwa ira Yehova ngu Mulungu wachikondi, wachilungamo koma teto wazelu. Ninoiziwa teto ira unoyamikela vyevyo ninapanga iyo vomutumikela koma teto vyevyo ninapangela iyo Akristu afwi-u. Ninoiziwa teto ira thawi detene Yehova unodalisa athu anayo mbororomeleya wa liye. — Aheb. 11:6.
KANINAIZIWA VYEVYO VINAIREYE MECHELO
12. Mogwilizana na Yakobo 4: 13, 14, kodi kaninaiziwa vya n’ni?
12 Welengani Yakobo 4:13, 14. Likundo loona ti loi kaninaiziwa vyevyo vinaireye mechelo. Muilambo yotakalela ninokoza gumana na “thawi yasoka koma teto vyongo vyooembekezeleya.” (Nam. 9:11) Eno kaninaiziwa akala vyevyo nikozile iyo vinaze viireye kapena teto akala ninaze nikale na moyo ira nivipange koma teto mari-a vyevyo nikozile iyo.
13. Kodi thawi dimo-i ninavwa avi chifukwa ya vyevyo vinaireye usogolo?
13 Vinokoza kala vyorucha vilela chifukwa yo-oiziwa pama vyevyo vinaze viireye usogolo. Mwina ninokoza kumbanyedanga vinjinji vyevyo vinaireye moi vyevi vinokoza nipangi-a ira kanisangalalenga. Moywi-u unokoza chenja mo-oembekezeleya kapena teto vyongo vyotakala vinokoza niireela mwazizizi moi ninokoza fooka. Koma teto akala vyevyo nadedi-edela iyo kaviireile ninokoza kumudwa.— Miya. 13:12.
14. Kodi ninafuneela iziwa n’ni ira nifwanye isangalalo yeniyeni? (Onani teto ithuzithuzi.)
14 Kaya nigumane na vyoi avi va moywi-u, navilelanga ninotonyi-eda ira ninomutumikela Yehova chifukwa yoi ninomuomeluwana. Khani da m’Baibulo dinotonyi-eda ira kaninafuneya dedi-edanga ira Yehova unerenga niteteza va mavutwi-u etene koma teto liye kaakozile vyevyo vinaireya va moywi-u. Liye unoiziwa ira isangalalo yi-u kinaroromela voiziwa vyevyo vinaniireele usogolo. M’malo mwiwa, ninokala osangalala namuvwelanga koma teto lola ira anisogolelenga. (Yer. 10:23) Namuroromelanga vevo ninasakula iyo vyoira, ninakala ngati ninaonga ira: “Yehova alola, ninokaana moyo moi ninopanga vyakutivyakuti.” — Yak. 4:15.
Ninokala otetezeya namuvwelanga Yehova koma teto lola ira anisogolelenga (Onani ndima 14-15)b
15. Kodi ninaiziwa vyoi avi vyevyo vinaireye usogolo?
15 Ngakale ira kaninaiziwe vyevyo vinaireye dambo lililetene, ninoiziwa ira Yehova oonilonjeza ira ninoza nikaena moyo oomala, kaya udimu kapena vailambo yavatila. Ninoiziwa ira liye kananame moi kilivo iliyetene ineyo inamulepeli-e kwakwaneli-eda malonjezwae etene. (Tito 1:2) Ngu liye eka unoyo ‘unaonga vyongo vyevyo vinaireye, moi wale vinjinji oonga vyongo vyevyo vinaze viireye usogolo.’ Vyongo vyetene vyevyo aongile liye ira vinoza viireye mundulimu vyooireya moi vyetene vyevyo unaonga liye ira vinoza viireye musogolomu vinoza viireye. (Yes. 46:10) Ninoiziwa ira kilivo iliyetene ineyo inamulepeli-e Yehova niomeluwana. (Arom. 8:35-39) Liye unoza animiali-e koma teto niva-a zelu na kopolo ira nikwakwani-e vilela vyetene vyevyo ninagumanana iyo. Kaninakaikela ira liye unoza anikami-e koma teto nidalisa. — Yer. 17:7, 8.
KANINAVWECHECHE PAMA MWEMO YEHOVA MUNANIIZIWELA LIYE
16. Monga mwemo lemba la Salimo 139:1-6 linatonyi-edelaathu, kodi Yehova unaiziwa n’ni vyokuza iyo vyevyo kaninavivwecheche?
16 Welengani Salimo 139: 1-6. Mlengi-u unoiziwa mwemo mwanipangele liye moi unoiziwa vyevyo vinaireya ira nioneyenga, ganiza koma teto panga vyongo mundila imo-iwene. Thawi detene liye unopanga chidwi na iyo. Unoiziwa vyevyo ninaonga iyo koma teto vyevyo vili m’murimani mwi-u, vyevyo ninapanga iyo koma teto chifukwa iwa ninapanga vyongovyo. Monga mwemo Mwene Davide mwaongele liye, thawi detene Yehova unokala na iyo moi ngokozeya nikami-a. Pivyolimbikisa iziwa ira Mulengi-u wakopolo, unoyo ngu Mbwiye mulukulu muilengedwe yetene, unopanga chidwi na iyo. Chichifukwa iwa Davide aongile ira: “Vyongo vyevi pivyodabwi-a vinjinji wa miyo. Pivyavadimu vinjinji moi kandinawande vifiyeda.” — Sal. 139:6, mawu a m’pedi.
17. Chifukwa n’ni thawi dimo-i vinanirucha somedela ira Yehova unoniiziwa pama?
17 Mwina chifukwa ya ikalelwi-u, vyevyo vyaireile m’banja li-u kapena teto vyevyo naroromela iyo naanafunjede Baibulo, vinokoza niruchanga muonanga Yehova akala uli Babi-u wachikondi unoyo unapanga chidwi na iyo. Kapena teto chifukwa yoi noolakwi-avo vyongo mundulimu, ninokoza onanga ira Yehova kanafune niiziwa kapena teto kala va usamwali na iyo. Mu pumwemo teto thawi dimo-i Davide mwavwela liye. (Sal. 38:18, 21) Mwina teto muthu unoyo aesaesa ira a-arelenga makundo olungama a Yehova unokoza vifuka ira, ‘akala Mulungu unandivwechecha, chifukwa n’ni unaembekezela ira ndi-iye panga vyongo vimo-i vyevyo pi vyorucha wa miyo vi-iya?’
18. Kodi ninapindula avi chifukwa yosomedela ira Yehova unoniiziwa pama kwaranya mwemo ninaviiziwela iyo? (Onani teto ithuzithuzi.)
18 Ninokoza vifunji-a ira nisomedelenga ira Yehova unoniiziwa pama kwaranya mwemo ninaviiziwela iyo eki-u, koma teto unoona vyapama mwa iyo vyevyo mwaeki-u kaninavione. Ngakale ira unoona vyevyo ninalakwi-a iyo, liye unovwechecha chifukwa iwa nipangile vimo-iviwa vyene koma teto mwemo ninavwela iyo, moi unoniomeluwana. (Arom. 7:15) Zindikila ira Yehova unoniomeluwana koma teto unoiziwa vyevyo ninapanga iyo pama, unokoza niva-a kopolo dedo ninafuneela iyo ira nimutumikelenga mororomeleya koma teto mosangalala.
Yehova unonikami-a ira nivilelenga mavuto o-iyana-iyana anayo ninagumanana iyo. Liye unopanga vyevi vonikami-a ira niroromelenga vinjinji malonjezo a vyongo vyosangalasa vyevyo ninadedi-edela iyo muilambo isha (Onani ndima 18-19)c
19. Kodi pivyongo viivi ninaviiziwa iyo vyevyo kaninavikaikela vyokuza Yehova?
19 Ninoiziwa ira Yehova ngwa chikondi moi iyo kaninakaikela ngakale vang’ono likundo leli. (1 Yoh. 4:8) Ninoiziwa ira makundwae olungama kanotonyi-eda ira unoniomeluwana koma teto unonifunela vyapama. Ninoiziwa ira Yehova unofuna ira nize nifwanye moyo oomala. Ira vyevi viwandeye liye oopeleka dipo. Mphaso ya dipo inonisimikizela ira ninokoza mutumikela Yehova mundila ineyo unafuna liye ngakale nangali ochimwa. (Arom. 7:24, 25) Koma teto ninoiziwa ira “Mulungwi-u ngu mulukulu kwaranya mirima di-u moi unoiziwa vyetene.” (1 Yoh. 3:19, 20) Yehova unoiziwa vyetene vyokuza iyo moi kanakaikela ira ninokwakwani-a panga vyevyo unafuna liye.
20. Chin’ni inanikami-e ira kanikumbanyenga vinjinji na vyevyo na-anaiziwa iyo?
20 Yehova unoniwandela iliyetene ineyo ninafuneela iyo iziwa. Nasomedelanga moviyevi-a likundo leli, kaninakumbanya na iliyetene ineyo na-anaiziwa iyo. M’malo mwiwa, ninoganizela vyongo vyevyo pivyofuneya vinjinji. Napanganga vyevi ninotonyi-eda ira ninomuroromela vinjinji Yehova, “unoyo unaiziwa iliyetene.” (Yobu 36:4) Vathawiila kaninawande vwechecha vyongo vinjinji, koma ninodedi-edela thawi ineyo ninaza iyo niwande funjeda vyongo visha vyokuza Mulungwi-u mulukulu mpakana walewale. — Nam. 3:11.
NYIMBO 104 Mzimu Woyera Ndi Mphatso Yochokera Kwa Mulungu
a Yesu unoza asogolele voononga ilambo yotakala ya Satanela. Eno pivyovweya onga ira sopano unoiziwa dambo la khondo ya Aramagedo koma teto thawi ineyo unaze liye amari-e ‘gonji-a adanae.’ — Chiv. 6:2, 19:11-16.
b MAWU OFOTOKOZELA ITHUZITHUZI: Baba na mwanae kanalongeza vyongo vyevyo banja liwa linazeathu lifuneele vaza vaireya ngozi.
c MAWU OFOTOKOZELA ITHUZITHUZI: M’bali unoyo unaoneya ira ugumana na mavuto alukulu unaganizela mwemo moyo unazeathu ukalele muilambo isha.