Abali Ambiili Asha M’Bungwe Lolamulela

VANSOKANO wavachaka unoyo waireile va 5 Okotobala 2024, voopelekiwa ilengezo yavadela yoi M’bali Jody Jedele na Jacob Rumph koo-eliwa ira katumikelenga m’Bungwe Lolamulela la Mboni da Yehova. Abali etene ambiilala kootumikela Yehova mororomelaya wa chaka dinjinji.

M’bali Jedele abaluwele muzinda wa Missouri, muilambo ya United States. Moi aleliwe m’banja la Mboni. Banja liwa lakala vakwikwi na dela lelo wali a Mboni oyeva. Vyevi vyoopangi-a ira agumanenga na abali na arongola okumela m’madela o-iyana-iyana amuilambwela anayo kaza laleela uthenga wapama mudelali. Liye oolimbikisiwa vinjinji aona chikondi koma teto mgwilizano wa abali na arongolayo moi oobatiziwa va 15 Okotobala 1983, angan’na chaka 13 kapena 14. Liye oosangalala vinjinji na chito yolaleela moi angamari-ile maphuzilo ausekondale, oowambeela upainiya wogarateya mu Septembala 1989.

M’bali Jedele angali muzombwe, makolwae koomeluwa mutukula limo-i na murongolae dowa ona malo wu Beteli. Vyevi vyoopangi-a ira akaena yolinga yofuna za tumikela va Beteli, moi vyoowandeya. M’bali Jedele oowambeela tumikela wu Beteli ya wu Wallkill mu Septembala 1990. Vowambeela atumikela mu Dipatimenti yoweli-a moi vanduli viwa oowambeela tumikela mu Dipatimenti ya Vyachipatala.

Vathawi ineyo, mipingo davakwikwi da Isipanishi dooulukula moi oofuneya olaleela Umwene anjinji oyi kakami-enga. Ndiye M’bali Jedele oowambeela sonkana mupingo wa Isipanishi nowambeela funjeda iwongelo inela. Va-anavire thawi indendai, M’bali Jedele oogumana na murongola Damaris unoyo apanga upainiya mudela leli. Vanduli viwa kootelana moi murongolola naliyene teto oowambeela tumikela va Beteli.

Mu 2005, koovenyavo va Beteli ira kasamalelenga makolwiwa anayo katumikela Yehova mororomeleya. Vathawi inela, M’bali na Murongola Jedele kapanga upainiya wogarateya. M’bali Jedele atumikela monga mulangizi wa Sukulu ya Utumiki ya Upainiya. Ootumikela teto mu Komiti Yoongi-ana na Chipatala koma teto mu komiti ya Vyomangamanga.

Mu 2013, M’bali na murongola Jedele kooitaniwa teto nawili wu Beteli ya wu Warwick ira ka-indenga chito da vyomangamanga. Keda kumela thawi ineyo kootumikela teto wu Patterson na wu Wallkill. M’bali Jedele atumikela mu Dipatimenti Yoona Vya Mapulani na Vyomangamanga koma teto mu Dipatimenti Yoing’anela Vyachipatala. Mu Marichi 2023, M’bali Jedele oo-eliwa kala wokami-a mu Komiti ya Utumiki. Voganizela vya mautumiki anayo upangile liye, liye aongile ira: “Waachela utumiki usha, unaona ngati kunaukwakwani-e. Koma vyera eno pavevo unafuneya we muroromela vinjinji Yehova chifukwa ngu liye unoyo unanikami-a ira nikwakwakwani-e panga utumiki uliwetene unoyo univa-ile liye.”

M’bali Rumph abaluwele muzinda wa California, muilambo ya United States. Liye angali mwana, am’mae koofooka mwauzimu koma kooesaesa mufunji-a m’balila choonadi ya m’Baibulo. Koma teto chaka na chaka, oodowa aleda na ambwiyaye aa-iyana anayo kali a Mboni ororomeleya. Aluwa kookami-a vinjinji m’balila ira aomeluwengana vinjinji choonadi, moi angakwakwani-ile chaka 13 oovepa ira afunjedenga Baibulo. Va-anavire thawi indendai, va 27 Septembala 1992, oobatiziwa. Vyali vyosangalasa vinjinji ona ira am’mae kowambeela nawili laleela koma teto sonkana mogarateya. Ababae koma teto abalae amo-iwa, koowambeela dowa vasogolo moi koobatiziwa.

Angali muzombwe, M’bali Rumph oona mwemo apainiya mwasangalalelaathu. Ndiye angamari-ile maphuzilo ausekondale, oowambeela upainiya mu Septembala 1995. Mu 2000, liye ootamela wu Ecuador wewo wafuneya olaleela Umwene anjinji. Wewo oogumana na Murongola Inga wa wu Canada unoyo ali mpainiya moi vanduli viwa kootelana. Kangatelanile koowambeela tumikela mu taoni imo-iwa ya wu Ecuador wewo wali gulu loyeva la ofalisa. Vathawiila gululi liulukula moi ngu pingo wakopolo vinjinji.

Vangavirile thawi, banjali loo-eliwa kala apainiya avadela moi vanduli viwa koowambeela utumiki wa oing’anela dela. Mu 2011 koovolowa kalasi nambala 132 ya sukulu ya Giliyadi. Kangamari-ile maphuziro, kootumikela muvilambo vinjinji koma teto koopanga mautumiki o-iyana-iyana monga tumikela va Beteli, umishonale koma teto chito yoing’anela dela. M’bali Rumph ootumikelavo monga mulangizi wa Sukulu ya Akristu Olaleela Vya Umwene.

Chifukwa ya mulili wa COVID-19 M’bali na Murongola Rumph koowelela wu United States. Aluwa kooitaniwa ira katumikelenga wu Beteli ya wu Wallkill moi M’bali Rumph oofunji-iwa chito mu Dipatimenti ya Utumiki. Vangavirile thawi, kootumiziwa nawili wu Beteli ya wu Ecuador wewo M’bali Rumph atumikela liye Mukomiti ya Thambi. Mu 2023, kootumiziwa wu Warwick. Mu Januwale 2024, M’bali Rumph oowambeela tumikela monga okami-a Mukomiti ya Utumiki. Voganizela vya vilambo vyevyo ukalile liye atumikelanga, liye aongile ira: “Ineyo inapangi-a ira utumiki ukale wavadela, kai malo anayo unatumikela we, koma mba athu anayo unatumikelana we limo-i.”

Ninoyamikela tindi la abali anala moi “ninowalemekeza vinjinji.” — Afil. 2:29.