Olembiwa na Yohani

7 Vyevi vingamalile, Yesu oopitiliza inda chitwae mu Galileya. Liye kaafunile panga vyevi mu Yudeya chifukwa Ayuda koofuna ira kamuphe. 2 Koma Ikondwelelo ya Misasa ya Ayuda yali ingaandamele. 3 Ndiye achimwenae koomuwandela ira: “Mudowe wu Yudeya ira naaluwene teto ofunjedinyu kadowe kaone vyevyo munapanga nyo. 4 Chifukwa kavali muthu unoyo unapanga vyongo mwaisisi vevo unafuna liye iziweya wa athu. Akala nyo munapanga vyongo vyevi, muvioni-ede vowela wa athu etene.” 5 Onga vyoona achimwenayayo katamuroromela. 6 Yesu ooawandela ira: “Thawanga kinafiyeve, koma wa nyo, thawi iliyetene inokala yofwanelela. 7 Kavali chifukwa yoi ilambo iidanenga na nyo, koma inoidana na miyo, chifukwa yoi ndinopangela umboni ira chito diwa tidotakala. 8 Nyo maruwani mudowe wu ikondwelelowo. Miyo kandinadowawo vathawiila, chifukwa thawanga kinafiye.” 9 Angaawandelile vyevi, liye oo-ala wu Galileya wewo.

10 Koma achimwenayayo kangamaruwile dowa wu ikondwelelowo, naliyene teto oomaruwa. Koma adowile mwaisisi. 11 Ndiye Ayuda koowambeela musaelasaela wu ikondwelelowo. Aluwa kaonga ira: “Kodi muthule uli waani?” 12 Moi athu anjinji vaguluvo koowonga vyongo vinjinji vyokuza liye. Amo-iwa kaonga ira: “Unole ngu muthu wapama.” Koma amo-iwa kaonga ira: “Kai muthu wapama unole. Liye uno-olocha athu anjinji.” 13 Koma kavali muthu unoyo aonga vyokuza liye vowela chifukwa athwayo kaova Ayuda.

14 Ikondwelelweyo ingali muwari, Yesu oovolowa mukachisi moi oowambeela funji-a. 15 Ayudayo koodabwa nofuka ira: “Voi muthula kadowile usukulu, ndiye kodi Malembala uwaiziwile* avi?” 16 Yesu oowasomeda ira: “Vyevyo ndinafunji-a miyo kai vyaanga, koma pivya unoyo andirumile. 17 Akala muthu unafuna panga vyevyo Mulungu unafuna liye, unoza aiziwe akala vyevyo ndinafunji-a miyo vinakumela wa Mulungu, kapena akala ndinaonga vyevyo vili m’maganizo mwanga. 18 Muthu unoyo unaonga vya m’maganizo mwae unoviva-a ekave ulemelelo. Koma uliwetene omuva-a ulemelelo unoyo andirumile, muthu unoyo ngolungama moi unopanga vyongo mwachilungamo. 19 Mose oouva-ani Ilamulo, kai eno? Koma kalivo ngakale m’mo-i wa nyo unoyo unavwela Ilamulweyo. Nanga chifukwa n’ni munafuna ndipha?” 20 Gulu la athulo loomusomeda ira: “Wen’ne ukaana iwanda. Mbaani unafuna upha?” 21 Yesu oowasomeda ira: “Miyo ndikede panga yongo imo-i yoka moi etene nyen’ne munaadabwa. 22 Vachifukwa inela Mose oouva-ani mdulidwe koma mdulidwela kai okumela wa Mose, koma ngokumela wa makolwinyu awale, moi munopanga mdulidwe dambo la sabata. 23 Akala muthu unaduliwa va dambo la sabata vofuna pewa phwanya Ilamulo ya Mose, kodi munandivyela murima vinjinji chifukwa yoi ndoomuchili-a muthu va dambo la sabata? 24 Kamuweluzenga athu volandela mwemo kanaoneelaathu unde, koma muweluzenga mwachilungamo.”

25 Ndiye athu amo-iwa okala mu Yelusalemu koowambeela onga ira: “Kodi muthu unasaeliwa ira aphiwele kai unola? 26 Koma kaonani! Liye unaonga vowela moi aluwa katinamuwandela yongo iliyetene. Kodi sopano olamulelala koosimikizela ira liye ngu Kristu? 27 Koma iyo ninoiziwa wewo muthula unakumela liye. Koma Kristuyo aza afiya, kavali muthu unoyo unaze aiziwe wewo ukumele liye.” 28 Ndiye vevo Yesu afunji-a liye mukachisimo oowonga mokuwa ira: “Nyo munondiiziwa koma teto munoiziwa wewo ndinakumela miyo. Miyo kandazide mofuna mwanga, koma unoyo andirumile ukalavo moi nyo kamunamuiziwa. 29 Miyo ndinomuiziwa, chifukwa ndili namarumiwae. Liye ngunoyo andirumile.” 30 Eno aluwa koowambeela saelasaela ndila ira kamu-inde, koma kalivo unoyo amu-indile chifukwa thawae yali yaanafiye. 31 Komave athu anjinji vaguluvo koomuroromela moi kaonga ira: “Kodi Kristu aza afiya, unoza apange vizindikilo vyoinjiva kwaranya vyevyo muthula upangile liye?”

32 Afarisi koovwa gulu la athulo linong’onanga vyokuza Yesu moi asembe alukulu koma teto Afarisi kooruma alonda ira kadowe kamu-inde nomumanga. 33 Vanduli viwa Yesu aongile ira: “Ndinokalave limo-i na nyo wathawi yoyeva ndaanadowe wa unoyo andirumile. 34 Munoza mundisaelesaele koma kamunaza mundifwanya, moi wewo ndinadowa miyo kamunaza mufiyawo.” 35 Eno Ayudayo koowambeela fukana ekiwa ira: “Kodi muthula unafuna adowe waani, wewo iyo kaninawande mufwanya? Kapena unafuna adowe wa Ayuda anayo kabalaleile vaari va Agiriki ira adowe aafunji-e Agirikayo? 36 Kodi unatapulela n’ni vevo unaonga liye ira, ‘Munoza mundisaelesaele koma kamunaza mundifwanya, moi wewo ndinadowa miyo kamunaza mufiyawo’?”

37 Va dambo lomari-a, dambo lilukulu la ikondwelelo, Yesu ooimela noonga mokuwa ira: “Akala muthu m’mo-iwa un’na thona, aze wa miyo ira aze ang’we ma-inje. 38 Mogwilizana na vyevyo Malemba kanaongaathu, uliwetene ondiroromela ‘Muwari mwae munoza mukume ma-inje amoyo.’” 39 Veva liye aonga vya zimu owela unoyo athu etene anayo kamuroromela ka-alileathu vang’ono uwachela. Vathawi inela athu kali kaanawachele zimu owela chifukwa Yesu ali aanawachele ulemelelwae. 40 Amo-iwa mugululo anayo kavwide mawu anala, koowambeela onga ira: “Unola ngu namaongela.” 41 Athu amo-iwa kaonga ira: “Kristule ngunola.” Koma amo-iwa kaonga ira: “Kodi Kristu unokoza kumela mu Galileya? 42 Kodi vale Malemba katinaonga ira Kristu unoza akumele mwa a-ima a Davide koma teto wu Betelehemu, wewo Davide akala liye?” 43 Eno gulu la athulo loo-iyana maganizo vakhani yokuza liye. 44 Amo-iwa mwa aluwa koofuna mu-inda ira kamumange, koma kalivo ngakale m’mo-i unoyo amu-indile.

45 Vanduli viwa alondale koowelela wa asembe alukulu na Afarisi moi Afarisayo koowafuka ira: “Chifukwa n’ni kamumuzilena?” 46 Alondayo koosomeda ira: “Kumela wale kavali muthu unoyo aongilevo ngati liye.” 47 Ndiye Afarisayo kaongile ira: “Kodi nanyen’ne teto mu-olochiwa? 48 Kodi vaari va olamulela kapena Afarisi ukalavo ngakale muthu m’mo-i unoyo unamuroromela? 49 Koma gulu letene la athu o-oiziwa Ilamulwala ti lotembeleleya.” 50 Nikodemo unoyo mundulimo adowile wa Yesu, koma teto unoyo ali m’mo-i wa Afarisi, ooawandela ira: 51 “Kodi Ilamulo yi-u inolola muweluza muthu aanafotokoze maganizwae yowambeela koma teto naanaiziwe vyevyo unapanga liye?” 52 Aluwa koomusomeda ira: “Kodi nawen’ne teto uli okumela wu Galileya eti? Saela m’Malemba moi kunafwanya valivetene vevo vanaonga ira mu Galileya munoza mukume namaongela.”*