Mwemo Yehova Asimikizele Liye Lonjezo Lae la Paradaizo

1. Kodi ngu uthenga woi avi unoyo Yesaya aafotokozela liye Aizarayeli afwae?

MNENERI Yesaya aongile ira Yehova ngu “Mulungu unoyo unaongecha vyoona.” Mawu anayo kamasuleliwe ira vyoona kanokoza tantauza “ame.” (Yes. 65:16, mawu a mpedi) Mawu oyi “ame” kanatantauza vikale eno. Mawu anala ka-indi-ediwanga chito m’Baibulo voonga vya Yehova na Yesu, kanosimikizela ira vyongo vimo-iviwa vyene pivyoona. Eno uthenga unoyo Yesaya aawandela liye Aizarayeli afwae ngoi vyevyo Yehova unaonga liye thawi detene vinokala vyororomeleya. Yehova ukala atonyi-edanga ira likundo leli tiloona vokwakwaneli-eda malonjezwae etene.

2. Chifukwa n’ni kaninafuneya kaikela malonjezo a Mulungu okuza Paradaizo, nanga ninakambilana mafuso aavi?

² Kodi na-iyene ninokoza roromela vyevyo Yehova alonjezile liye ira unoza avipange usogolo? Vangavirile chaka dotamangela 800 kumela muthawi ya Yesaya, mtumwi Paulo oofotokoza chifukwa iwa malonjezo a Mulungu kanakala ororomeleya thawi detene. Paulo eere: “Pivyo-owandeya ira Mulungu aname.” (Aheb. 6:18) Kasupe kanakumi-e ma-inje apama koma teto amwinyu vathawi imo-ive. Mofwanafwana na vyevi, Yehova unoyo ngu Mwinyailo wa choonadi kananame. Eno ninokoza roromela iliyetene ineyo Yehova unaonga liye tangani-avo vyevyo ulonjezile liye vyokuza usogolo. Mukhanila ninokambilana mafuso ala: Kodi Mulungu unilonjezile vyongo viivi usogolo? Nanga unisimikizele avi ira unoza akwakwaneli-ede malonjezo anala?

KODI YEHOVA UNILONJEZILE N’NI?

3. (a) Kodi tilonjezo liivi lelo atumiki a Mulungu kanalikondaathu? (Chivumbuluso 21:3, 4) (b) Kodi athu amo-iwa kanaongecha avi naafotokozela lonjezo leli?

³ Ninokambilana lonjezo lelo atumiki a Mulungu vailambo yetene kanalikondaathu. (Welengani Chivumbuluso 21:3, 4.) Yehova alonjezile ira “khwa kunaza ukalawo akoka. Kunaza ukala teto ula, kapena dumbela ngakale voreya.” Anjinji a iyo nalaleelanga ninoomeliwa awelengela athu lemba lolimbikisa leli vowafotokozela mwemo moyo unazeathu ukalele m’Paradaizo. Kodi athu amo-iwa kani avi naafotokozela lonjezo leli? Aliwa kanokoza onga ira “Lonjezoli tilapama koma tilorucha liroromela.”

4. (a) Kodi Yehova aiziwa likundo liivi? (b) Enjedela volonjeza, kodi Yehova unaza apanga n’ni?

⁴ Vevo amusogolele liye mtumwi Yohani lemba lonjezo lokuza Paradaizo leli, Yehova ooiziwa ira ninoza niwandelenga amo-iwa lonjezoli volaleela uthenga wa Umwene. Ooiziwa teto ira athu anjinji kanoza kavuteyenga roromela lonjezo la “vyongo visha.” (Yes. 42:9; 60:2; 2 Akor. 4:3, 4) Ndiye kodi ninasimikizele avi ira lonjezo lava Chivumbuluso 21:3, 4 linoza likwakwaneli-ediwe? Yehova angapelekile lonjezo leli, oopeleka teto vifukwa vyovweya vyonipangi-a ira niliroromelenga. Kodi apelekile vifukwa viivi?

YEHOVA OOSIMIKIZELA IRA UNOZA AKWAKWANELI-EDE VYEVYO ALONJEZILE LIYE

5. Kodi pivifukwa viivi vyevyo vinanipangi-a roromela lonjezo la Mulungu lokuza Paradaizo, nanga ninavifwanya waani?

⁵ M’mavesi o-arela mukala vifukwa vyonipangi-a roromela lonjezo la Yehova lokuza Paradaizo. M’mavesi anayo ninawelengecha ira: “Ndipo Mulungu unoyo ugaratile vapando wa umwene eere: “Kaonani! Vyongo vyetene vyevyo ndinapanga miyo pivisha.” Oonga teto ira: “Lemba, voi mawu anala mbororomeleya na oona.” Liye oondiwandela ira: “Vikwakwaneli-ediwa! Miyo ndili Alefa na Omega, chiyambi na mapeto.” — Chiv. 21:5, 6a.

6. Kodi vyevyo ninawelenga iyo va Chivumbuluso 21:5, 6 vinanikami-a avi roromela lonjezo la Mulungu?

⁶ Kodi mawu anala kananikami-a avi ira niroromelenga lonjezo la Mulungu? Voonga vya mawu a m’mavesi anala, buku la Revelation — Its Grand Climax At Hand! (Mapeto a Chivumbulutso) linaongecha vyoi: “Vyevi vili ngati Yehova unasainela ekave ikalata yosimikizela ira athu ororomeleya kanoza kawachele ndithu madaliso usogolo.”b Lonjezo la Mulungu lili va Chivumbuluso 21:3, 4. Koma mu vesi 5 na 6, mukala Mawu a Yehova okala ngati unanasainela ira vyevyo ulonjezile liyevyo vinoza vikwakwaneli-ediwe ndithu. Sopano tiyemoni nione mawu anayo Yehova a-indi-ede liye chito vosimikizela lonjezo leli.

7. Kodi mawu anayo Mulungu aongile liye kananisimikizela vya nʼni, nanga chifukwa nʼni mawu anala kali ofuneya?

⁷ Vesi 5 linaambeela na mawu oyi: “Ndipo Mulungu unoyo ugaratile vapando wa umwene eere.” (Chiv. 21:5a) Inela chiimo-i mwa thawi taaru vevo Yehova aongile liye ekave m’masomphenya a m’buku la Chivumbuluso. Eno veva Yehova unasimikizela ekave, o-okala zela mwa ngelo wakopolo kapena teto Yesu. Likundo leli linatonyi-eda ira mawu o-arelayo mbororomeleya vinjinji. Chifukwa n’ni ninaonga eno? Chifukwa Yehova “kananame.” (Tito 1:2) Vyevi vinatonyi-eda ira vyevyo ninawelenga iyo va Chivumbuluso 21:5, 6 pivyororomeleya vinjinji.

“VYONGO VYETENE VYEVYO NDINAPANGA MIYO PIVISHA”

8. Kodi Yehova asimikizile avi ira lonjezo lae linoza likwakwaneli-ediwe? (Yesaya 46:10)

⁸ Sopano, tiyemoni nikambilane mawu oyi: “Kaonani.” (Chiv. 21:5) Mawu a Chigiriki anayo kaamasuleleathu ira “kaonani” kooromoliwa moweli-edaweli-eda m’buku la Chivumbuluso. Buku limo-i linofotokoza ira mawu anala kana-indi-ediwa chito “vofuna kami-a muthu unoyo unawelenga ira apange chidwi na mawu o-arela.” Ndiye kodi mawu o-arelayo mboi avi? Mulungu unaonga ira: “Vyongo vyetene vyevyo ndinapanga miyo pivisha.” Pivyoona ira Yehova unafotokoza vyongo visha vyevyo unaze liye apange usogolo, koma wa liye vyevi pivyo-okaiki-a moi unavifotokoza ngati kuti vinanaireya. — Welengani Yesaya 46:10.

9. (a) Kodi mawu oyi “vyongo vyetene vyevyo ndinapanga miyo pivisha,” kanatonyi-eda ira Yehova unaza apanga vyongo vin’li viivi? (b) Kodi chin’ni inaze iireele “udimu” na “ilambo yavati” vyevyo vilivovi?

⁹ Tiyemoni nikambilane mawu amo-iwa ofwanyeya va Chivumbuluso 21:5, anayo kanaonga ira: “Vyetene vyevyo ndinapanga miyo pivisha.” Muchaputala inela mawu anala kanafotokoza vyongo vin’li vyevyo Yehova unapanga liye vyevyo vili chenja koma teto weli-eda. Yowambeela, kodi liye unachenja n’ni? Va Chivumbuluso 21:1 ninawelengecha ira: “Udimu wawale na ilambo yavati yawale vyali vingachosiwe.” Udimu wawale unaimelela maboma a athu anayo kanapanga vyongo mosogoleliwa na Satana na viwanda vyae. (Mat. 4:8, 9; 1 Yoh. 5: 19) Ndipo Baibulo lino-indi-eda chito mawu oyi “ilambo yavati” voonga vya athu. (Gen. 11:1; Sal. 96:1) Eno “ilambo yavati yawale” inaimelela athu otakala anayo kali vailambwela. Yehova kanaza akeda sakaeda vyongo vimo-i na vimo-i vyokuza “udimu” na “ilambo yavati” vyevyo vilivovi. M’malomwiwa unoza avichenje, kapena ira vichoselaatu. Unoza achose udimu na ilambo yavati vyevyo vilivo vathawiila noweli-eda “udimu usha na ilambo yavati isha,” vyevyo vinaimelela boma lisha koma teto athu olungama.

10. Kodi chin’ni ineyo Yehova unaze liye apange kala isha?

¹⁰ Va Chivumbuluso 21:5, ninawelengechavo vyevyo Yehova aongile liye vyokuza vyongo vyevyo unaze liye avipange kala visha. Yehova aongile ira: “Vyongo vyetene vyevyo ndinapanga miyo pivisha.” Veva-i vyali ngati liye unaonga ira “Ndinopanga vyongo vyetene kala visha.” Eno, Yehova unoza achenje ilambwela koma teto unoza apangi-e athu ira kakale asha vowakami-a ira kakale angwilo. Mogwilizana na vyevyo Yesaya aongile liye, ilambo yetene inoza ikale yoriya ngati munda wa Edeni. Muthu uliwetene vaekave unoza akami-iwe ira akale musha. Orangala, anayo kan’na vuto lo-oona koma teto lo-ovwa kanoza kachili-iwe ndipo ngakale anayo katatiile kanoza kakaena moyo nawili. — Yes. 25:8; 35:1-7.

“MAWU ANALA MBOROROMELEYA KOMA TETO OONA. . . . VIKWAKWANELI-EDIWA!”

11. Kodi Yehova amuva-ile Yohani lamulo liivi koma teto vachifukwa iivi?

¹¹ Kodi Mulungu asimikizele avi ira vyevyo aongile liye vinoza viireye? Liye amuwandelile Yohani ira: “Lemba, chifukwa mawu anala mbororomeleya koma teto oona.” (Chiv. 21:5) Yehova kaakede mulamula ira “lemba,” koma oofotokoza teto chifukwa iwa. Liye eere: “Chifukwa mawu anala mbororomeleya koma teto oona,” kapena ira mawu a Mulungu kai okaiki-a ndipo mbolondola. Ninoyamikela ira Yohani oovwela lamulo loi ‘alembe.’ Vachifukwa inela, ninokoza welenga lonjezo la Mulungu lokuza Paradaizo koma teto ganizelanga madaliso anayo ninaembekezela iyo.

12. Chifukwa n’ni pivyovweya ira Yehova aongile ira: “Vikwakwaneli-ediwa”?

¹² Vanduli viwa Mulungu aongile ira: “Vikwakwaneli-ediwa!” (Chiv. 21:6) Veva Yehova unaonga ngati vyetene vyevyo aongile liye vyokuza lonjezo la Paradaizo vikwakwaneli-ediwa wale. Ndipo pivyovweya ira liye unokoza onga eno chifukwa kilivo ineyo inamulepeli-e kwakwaneli-eda yolinga yae. Yehova oonga teto mawu amo-iwa osimikizela ira vyevyo alonjezile liye vinoza vikwakwaneli-ediwe ndithu. Kodi aongile n’ni?

“MIYO NDILI ALEFA NA OMEGA”

13. Chifukwa n’ni Yehova aongile ira: “Miyo ndili Alefa na Omega”?

¹³ Monga mwemo nifotokozele iyo wale, Yehova aongile ekave maulendo maralu m’masomphenya odowa wa Yohani. (Chiv. 1:8; 21:5, 6; 22:13) Va maulendo etene anala, Yehova aonga ira: “Miyo ndili Alefa na Omega.” Mawu oyi alefa kanafwanyeya umaambeelelo wa afabeti ya Chigiriki ndipo mawu oyi omega kanafwanyeya umapeto. Vo-indi-eda chito mawu oyi “Alefa na Omega,” Yehova atonyi-edile ira aambeela panga yongo kana-iya mpakana inga wandeile.

14. (a) Pelekani isazo yathawi ineyo vyaliathu ngati Yehova unaonga ira “Alefa,” nanga ti alini vevo vinazeathu vikale ngati unaonga ira “Omega”? (b) Kodi mba mawu aavi ava Genesesi 2:1-3 anayo kanasimikizela ira Yehova unoza akwakwaneli-ede yolinga yae?

¹⁴ Angakede mulenga Adamu na Hava Yehova oofotokoza yolinga yae volenga ilambo koma teto athu. Baibulo lini: “Koma teto, Mulungu oowadalisa noawandela ira: ‘Mubalane, muinjive, muzaale ilambo yavati ndipo muiing’anele.’” (Gen. 1:28) Vathawi inela vyali ngati Yehova unaonga ira “Alefa.” Veva liye oofotokoza movweya pama yolinga yae. Yolingeyo yali yoi vavira thawi, a-ima a Adamu na Hava anayo kakale angwilo koma teto ovwela kazaale ilambwela noisakaeda ira ikale Paradaizo. Vathawi inela pavevo vyakaleathu ngati uongile ira “Omega.” Angamari-ile lenga “udimu na ilambo yavati koma teto vyetene vyevyo vili mwemo,” oonga mawu osimikizela ira yolinga yae inoza iwandeye. Mawayo kali va Genesesi 2:1-3. (Welengani.) Yehova aongile ira dambo la 7 lali lopatuleya. Kodi vyevi vinatantauza n’ni? Veva Yehova oosimikizela ira yolinga yae yokuza ilambo koma teto athu kinaza ilepeleya. Yolinga inela yakwakwaneli-ediwa umapeto wa dambo la 7.

15. Chifukwa n’ni ninaonge ira vyaoneya ngati Satana ulepeli-a yolinga ya Mulungu?

¹⁵ Adamu na Hava kangachimwile koowava-eda a-imiwa uchimo na imfa. (Arom. 5:12) Veva vyaoneya ngati Satana ulepeli-a yolinga ya Mulungu yoi vailambwela vakale athu angwilo koma teto ovwela. Vyali ngati Satana umulepeli-a Yehova onga ira “Omega.” Satana mwina aganiza ira Yehova kanaikwakwaneli-ede yolinga yae. Liye aona ira Yehova unomupha Adamu na Hava nolenga banja limo-iliwa ira akwakwaneli-ede yolinga yae yokuza athu. Koma ngati Mulungu aapange vyevi, ndiye kuti Mdyerekezi ookoza onga ira Mulunguyo ngonama. Chifukwa n’ni? Chifukwa mogwilizana na Genesesi 1:28, Yehova ali angamuwandelile Adamu na Hava ira a-imiwa kanoza kazaale ilambo yavati.

16. Chin’ni yamupangi-e Satana onga ira Yehova ngolepela?

¹⁶ Kodi pivyongo vimo-iviwa viivi vyevyo Satana aganiza liye ira Mulungu unokoza vipanga? Mwina aganiza ira Yehova unoza alole ira Adamu na Hava kakaena a-ima oyi kavinaza viwandeya ira kakale angwilo. (Nam. 7:20; Arom. 3:23) Ndiye kuti Mdyerekezi ookoza onga ira Mulungu ngolepela. Chifukwa n’ni? Chifukwa ndila inela kayakwakwaneli-eda yolinga ya Mulungu yoi vailambwela vakale a-ima a Adamu na Hava angwilo koma teto ovwela.

17. Kodi Yehova aimali-ile avi khani ineyo Satana koma teto Adamu na Hava kaiambeeli-ileathu, nanga vyo-arelavo viwa vinaza vikala vyoi avi? (Onani teto ithuzithuzi)

¹⁷ Yehova oomali-a khani ineyo yaambeeli-iwe na Satana koma teto athu owambeelela anala mundila yoi Satanoyo kaan’na mawu. (Sal. 92:5) Volola ira Adamu na Hava kakaena a-ima, Yehova ootonyi-eda ira unoongecha vyoona o-okala vyonama. Yehova ootonyi-eda ira aonga ira unopanga yongo imo-iwene, kilivo ineyo inamulepeli-e. Yehova oonechecha ira yolinga yae ikwakwaneli-ediwe vopeleka “mbadwa” yoi ize ivulumuche a-ima ovwela a Adamu na Hava. (Gen. 3:15; 22:18) Satana mwina oomaliwa zelu na vyevyo Yehova apangile liye vyokuza dipo. Chifukwa n’ni ninaonga eno? Chifukwa vyootonyi-eda ira Yehova ukaana chikondi yo-okaana dyera. (Mat. 20:28; Yoh. 3:16) Satana kan’na ikalelo inela chifukwa liye ngwadyera. Ndiye kodi pivyongo viivi vyevyo vinaze viireye chifukwa ya dipo? Umapeto wa Ulamulilo wa Kiristu wachaka 1 000, a-ima angwilo koma teto ovwela a Adamu na Hava kanoza kakale m’Paradaizo vailambo yavati mogwilizana na yolinga ya Yehova yowambeela. Vathawi ineyo vinaza vikala ngati Yehova uongile ira “Omega.”

VYEVYO NINAPANGE IYO IRA NIROROMELENGA VINJINJI LONJEZO LA YEHOVA LOKUZA PARADAIZO

18. Kodi Yehova asimikizele mundila taaru diivi ira unoza akwakwaneli-ede malonjezwae? (Onani bokosi loi “Vifukwa Taaru Vyonipangi-a Roromela Lonjezo la Yehova.”)

¹⁸ Mogwilizana na vyevyo nifunjedile iyo, kodi ninakami-e avi athu anayo kanakaikela lonjezo la Mulungu lokuza Paradaizo? Yowambeela, unoyo upelekile lonjezoli ngu Yehova. Buku la Chivumbuluso lini: “Ndipo Mulungu unoyo ugaratile vapando wa umwene eere: ‘Kaonani! Vyongo vyetene vyevyo ndinapanga miyo pivisha.’” Liye ukaana zelu koma teto kopolo ndipo unofunechecha angakwakwaneli-ede malonjezwae. Yanambili, pivyo-okaiki-a ira lonjezoli linoza likwakwaneli-ediwe ndipo wa Yehova vili ngati likwakwaneli-ediwa wale. Pivyovweya ira liye uni: “Mawu anala mbororomeleya koma teto oona. . . . Vikwakwaneli-ediwa!” Yanaralu, mawu oyi, “Miyo ndili Alefa na Omega,” kanonisimikizela ira Yehova aambeela panga yongo kana-iya mpakana ingawandeile. Vyevyo Yehova unaze liye apange vinoza vitonyi-ede ira Satana ngonama koma teto olepela.

19. Kodi munaawandele n’ni athu anayo kanakaikela lonjezo la Yehova lokuza Paradaizo?

¹⁹ Iziwani ira thawi detene vevo munalaleela nyo nosimikizelanga ira vyevyo Mulungu alonjezile liye vinoza vikwakwaneli-ediwe, vinoukami-ani teto nyo ira muroromelenga malonjezo a Yehova. Ndiye mwaza mumuwelengelanga muthu lonjezo lolimbikisa lokuza Paradaizo lava Chivumbuluso 21:4, muthuyo noonga ira, “Vinovweya vyapama koma pivyorucha viroromela,” kodi munaza mumuwandela n’ni? Munokoza za muwelengela vesi 5 na 6 nomufotokozela vyevyo Yehova aongile liye vosimikizela lonjezolo, vyevyo vyali ngati unanasainela mawae. — Yes. 65:16.