MURU 18
Kodi Akiristu Aimbarimbari Munaaiziwe Avi?
Athu mabiliyoni anjinji kanawonga ira mba Akiristu. Koma athu anala, kanororomela vyongo vyo-iyana, koma teto katina-arela makundo ofwanafwana vamoywiwa. Ndiye Akiristu aimbarimbari ninaaiziwe avi?
1. Kodi mawu oyi Mkiristu kanatapulela n’ni?
Mawu oyi Mkiristu kanatapulela wofunjeda, kapena wo-arela wa Yesu Kiristu. (Welengani Vyoira 11:26.) Kodi Akiristu kanatonyi-eda avi ira mbofunjeda a Yesu? Yesu awongile ira: “Mwasunganga mawanga thawi detene, eeno muli ofunjedanga.” (Yohani 8:31) Vyevi vinatapulela ira Akiristu aimbarimbari kanafuneela arela vyevyo Yesu afunji-a liye. Mofwanafwana na Yesu unoyo a-indi-edela chito malemba vofunji-a, vyevyo Akiristu aimbarimbairi kanaroromelaathu vinakumela teto m’Baibulo. — Welengani Luka 24:27.
2. Kodi Akiristu aimbarimbari kanatonyi-eda avi ira kanowomeliwana athu amo-iwa?
Yesu oowawandela ofunjedaye ira “muwomelanenga monga mwemo miyo ndiuwomeleni miyo.” (Yohani 15:12) Kodi Yesu atonyi-edile avi ira unowomeliwana ofunjedaye? Liye oofwanya thawi yowaleda na aluwa, alimbi-a koma teto akami-eda. Moi oofiya vowakhwela. (1 Yohani 3:16) Pivyofwanafwana teto na Akiristu aimbarimbari. Aluwa katinakeda wonga ira kokaana chikondi koma kanotonyi-eda ira kanowomeliwana afwiwa. Vyoonga na vyoira viwa vinotonyi-eda ira mba athu achikondi.
3. Kodi chi chito iivi ineyo Akiristu aimbarimbari kana-indaathu mwatindi?
Yesu oova-a ofunjedaye chito yoi ka-indenga. “Liye oowaruma ira kalaleele Umwene wa Mulungu.” (Luka 9:2) Akiristu owambeela katakeda laleela malo olambelela ba-i, koma koolaleela malo ofwanyeya athu anjinji na m’mavande mwa athu. (Welengani Vyoira 5:42; 17:17.) Malambwano teto Akiristu aimbarimbari kanolaleela makundo a m’Baibulo uliwetene wewo kanafwanyeathu athu. Voi kanowomeliwana athu, aluwa kanosangalala indi-eda chito thawi na kopolo diwa, vowandela amo-i uthenga wa m’Baibulo unoyo unadidili-a mirima athu nowava-a idedi-edo. — Maliko 12:31.
FUNJEDANI VYOWENJEDELEYA
Onani vyevyo vinaukami-eni iyani-a Akiristu aimbarimbari, na athu anayo kaana-arela koma teto panga vyevyo Yesu afunji-ile liye.
4. Kanosaela imbarimbari ya m’Baibulo
Akiristu owambeela koo-indi-eda chito mawu a Mulungu, koolaleela koma teto koowomeliwana m’mo-i na fwaye
Athu amo-iwa anayo kani mba Akiristu, katinaona ira imbarimbari ya m’Baibulo chofuneya, teto katina-indi-eda chito vamoywiwa. Onelani VIDIYO, era eeno tapanyani yofuka yo-arelela.
Kodi machalichi amo-iwa a Ikiristu kanafunji-a vyongo vyiivi vyo-iyana na vyevyo Yesu afunji-ile liye?
Yesu oofunji-a imbarimbari yokumela m’mawu a Mulungu. Welengani Yohani 18:37, era eeno tapanyani yofuka yo-arelela:
Mogwilizana na vyevyo Yesu awongile liye, kodi ninaaiziwe avi Akiristu anayo kali “umbali yaimbarimbari”?
5. Kanofunji-a imbarimbari ya m’Baibulo
Akiristu owambeela koo-indi-eda chito mawu a Mulungu, koolaleela koma teto koowomeliwana m’mo-i na fwaye
Yesu aanadowe udimu oowandela o-arelaye ira ka-indenga chito ineyo inaireyave malambwano. Welengani Mateyu 28:19, 20 na Vyoira 1:8, era eeno tapanyani yofuka yo-arelela:
Kodi Akiristu kanafuneela inda chito yolaleela fiyeda alini?
6. Kanoira vyevyo kanafunji-aathu
Chifukwa n’ni Tom afiile vosomedela ira ufwanya imbarimbari? Onelani VIDIYO, era eeno tapanyani vyofuka vyo-arelavi.
Muvidiywela, chifukwa n’ni Tom a-iile dowa uipembezo iliyetene?
Chin’ni yamukami-ile simikiza ira ufwanya imbarimbari?
Chito di-u tidedo dinairela umboni. Welengani Mateyu 7:21, era eeno tapanyani yofuka yo-arelela:
Kodi Yesu unaona ira yofuneya vinjinji kukeda wonga vyevyo ninaroromela iyo, kapena panga ninaroromela iyovyo?
7. Kanowomeliwana m’mo-i na fwaye
Akiristu owambeela koo-indi-eda chito mawu a Mulungu, koolaleela koma teto koowomeliwana m’mo-i na fwaye
Kodi Akiristu kosomedelavo ela moywiwa vangozi chifukwa ya Akiristu afwiwa? Onelani VIDIYO, era eeno tapanyani yofuka yo-arelela.
Muvidiywela chin’ni yakami-ile m’bali Likhwide ira alolele ela moywaye vangozi ira m’bali Johansson kaphiwe?
Kodi munaganiza ira ooira vyongo monga Mkiristu waimbarimbari?
Welengani Yohani 13:34, 35, era eeno tapanyani vyofuka vyo-arelavi:
Kodi Akiristu aimbarimbari kanafuneela ira vyongo moi avi na athu a mitundu dimo-i kapena okumela muvilambo vimo-i?
Nanga kanaire avi vyevi vathawi yakondo?
ATHU AMO-IWA KANAONGA IRA: “Akiristu amo-iwa kookala kairanga vyongo vyotakala vinjinji, ndiye vinawandeye avi ira ipembezo iwa ikale yapama?”
Kodi muthu unola munamuwelengele lemba liivi ira limukami-e aiziwa Akiristu aimbarimbari?
VYEVYO NIFUNJEDILE IYO
Akiristu aimbarimbari kano-arela vyevyo Baibulo linafunji-aathu vamoywiwa, kanotonyi-eda chikondi yololela zuzumela amo-i, koma teto kanolaleela imbarimbari ya m’Baibulo.
Vyofuka Vyoweli-eda
Kodi vyevyo Akiristu aimbarimbari kanaroromelaathu vinakumela uuvi?
Kodi chiikalelo iivi ineyo Akiristu aimbarimbari kanatonyi-edaathu ineyo inanikami-e ira niaiziwe?
Kodi Akiristu aimbarimbari kana-inda chito iivi?
ONANI VIMO-I
Iziwani vinjinji vyokuza gulu la athu anayo kanaesaesa landela isazo ya Yesu Kiristu koma teto arela vyevyo afunji-ile liye.
Onani vyevyo vyakami-ile muthu m’mo-iwa ira akale m’banja la athu anayo kanawomeluwana la vailambo yetene.”
“Ankagwiritsa Ntchito Baibulo Poyankha Funso Lililonse” (Nsanja ya Olonda, April 1, 2014)
Onani vyevyo Akiristu aimbarimbari kanairaathu votonyi-eda ira kanoomeluwana Akiristu afwiwa vevo kanafuneelaathu thandizo.
Kuthandiza Abale Athu Kukachitika Ngozi Zam’chilengedwe — Kachigawo Kake (3:57)
Yesu oosambaula vyongo vyevyo vinakami-e athu azindikila o-arelaye. Saelani ira muone mwemo Akiristu owambeela na Akiristu aimbarimbari a malambwano kanakwakwaneli-edaathu vyevi.
“Kodi Mungawadziwe Bwanji Akhristu Oona?” (Nsanja ya Olonda, March 1, 2012)