MURU 23
Ubadizo Unokoza Ukami-ani Kaana Sogolo Lapama!
Yesu oofunji-a ira Akiristu kanafuneela badiziwa. (Welegani Mateyu 28:19, 20.) Koma kodi ubadizo chin’ni? Nanga muthu unafuneela panga n’ni ira abadiziwe?
1. Kodi ubadizo chin’ni?
Mawu oyi “badiza” kanakumela wu mawu a Igiriki anayo kanatapulela “bwini-iwa” mwiko. Vevo Yesu abadiziwa liye, thuthu laye letene loobwini-iwa mu-inje wa Yorodano, angairile eeno ‘ootavuwa mwikomo.’ (Maliko 1:9, 10) Mofwanafwana na Yesu, malambwano Akiristu kabadiziwanga, thuthu liwa letene linobwini-iwa, kapena nere midiwa m’ma-inje.
2. Kodi ubadizo unatonyi-eda n’ni?
Muthu abadiziwa, unatonyi-eda ira oovipeleka wa Yehova Mulungu. Koma kodi muthu unavipeleka avi? A-anabadiziwe, unopepela wa Yehova vaeka, vomuwandela ira unofuna mutumikela wamoywaye wetene. Unomulonjeza Yehova ira unerenga mulambela liye eka, koma teto ira yongo yofuneya vinjinji vamoywaye kuira vyevyo Yehova unafuna liye. Liye unosakula ‘vikoonda eka . . . no-arela vyevyo Yesu afunji-ile liye nodowanave viira.’ (Mateyu 16:24) Vipeleka koma teto badiziwa unomukami-a ira akale vausamwali olimba na Yehova koma teto Akiristu afwaye.
3. Kodi muthu unafuneela ira n’ni ira abadiziwe?
Mwa-anabadiziwe, munafuneela funjeda vyokuza Yehova koma teto ambeela muroromela vinjinji. (Welengani Aheberi 11:6.) Mwadowanave funjeda vinjinji vyokuza Yehova koma teto muroromela, pavevo munaambeele nyo muomeliwana vinjinji. Era eeno, munoza muwambeele funa laleela vyokuza Yehova koma teto panga vyevyo unafuna liye vamoywinyu. (2 Timoteyu 4:2; 1 Yohani 5:3) Muthu aambeela ‘enda mogwilizana na vyevyo Yehova unafuna liye ira amuomeli-enga vailiyetene,’ unosakula peleka moywaye wa Mulungu era eeno unobadiziwa. — Akolose 1:9, 10.a
FUNJENDANI VYOWEJEDELEYA
Onani vyevyo ninafunjede iyo vaubadizo wa Yesu koma teto vyevyo muthu unaire liye vokozeela ubadizo.
4. Vyevyo ninafunjeda iyo vaubadizo wa Yesu
Welengani Mateyu 3:13-17 ira muiziwe vyevyo vyaireile vaubadizo wa Yesu. Era eeno tapanyani vyofuka vyo-arelavi:
Kodi Yesu abadiziwile angali mwana m’ng’nong’no?
Kodi vevo abadiziwa liye, kakede mukupeda ma-inje?
Yesu angabadiziwile, oowambeela inda chito yavaekiwa ineyo Mulungu amurumile liye vailambwela. Welengani Luka 3:21-23 na Yohani 6:38, era eeno tapanyani yofuka yo-arelela:
Yesu angabadiziwile, kodi chichito iivi ineyo aiona liye ira chofuneya vinjinji vamoywaye?
5. Pivyowandeya kwakwaneli-eda yolinga inyu yoi mubadiziwe
Voambeela munokoza ovanga mwaganizela vyovipeleka wa Mulungu koma teto badiziwa. Komave mwadowanave funjeda vinjinji vyokuza Yehova, nofiya vomuiziwa pama, ova unoza umale moi munoza mukwakwani-e yolinga yofuneya vinjinjila. Ira muone athu amo-iwa anayo kawandile irana vyevi, onelani VIDIYO.
Welengani Yohani 17:3 na Yakobo 1:5, era eeno tapanyani yofuka yo-arelela:
Kodi muthu unaire n’ni ira akozeele badiziwa?
Ninovipeleka wa Yehova vomuwandela mupepelo ira ninofuna mutumikela wamoywi-u wetene
Vadambo laubadizo ninotonyi-eda wa athu ira noovipeleka wa Mulungu
6. Nabadiziwa ninokala m’banja la Yehova
Nabadiziwa, ninokala m’banja logwilizana la vailambo yetene. Ngakale ira nino-iyana wewo ninakumela iyo na vikalelo, ninororomela vyongo vyofwanafwana teto ninoendela makundo amakalelo apama ofwanafwana vamoywi-u. Welengani Salimo 25:14 na 1 Petulo 2:17, era eeno tapanyani yofuka yo-arelela:
Mogwilizana na mavesala, kodi ubadizo unakami-eda avi muthu?
ATHU AMO-IWA KANAONGA IRA: “Ndinoza ndibadiziweve usogolo chifukwa ndinaova chosiwa ndachimwi-a.”
Akala nanyene munaganiza eeno, kodi munaona ira munofuneela esaesa ira mubadiziwe?
VYEVYO NIFUNJEDILE IYO
Yesu afunji-ile ira Akiristu kanafuneela badiziwa. Muthu unoyo unafuna badiziwa, unafuneela roromela vinjinji Yehova, endela makundo a Yehova vamoywaye, koma teto vipeleka wa Yehova.
Vyofuka Vyoweli-eda
Kodi ubadizo chin’ni? Nanga chifukwa n’ni athu kanafuneela badiziwa?
Kodi vipeleka no badiziwa kogwilizana moi avi?
Kodi pivyongo vyiivi vyevyo muthu unafuneela liye ira aanafiye vovipeleka koma teto badiziwa?
ONANI VIMO-I
Welengani khanila ira muiziwe vyevyo ubadizo unatapulelaathu.
Onani vyevyo muthu unafuneela liye panga, ira afiye vobadiziwa.
“Munthu Amabatizidwa Chifukwa Chokonda Yehova Komanso Kumuyamikira” (Nsanja ya Olonda, March 2020)
Welengani khanila ira muone mwemo muthu m’mo-iwa asakulele liye badiziwa chifukwa yovwechecha makundo a m’Baibulo.
“Ankafuna Kuti Ndione Ndekha Kuti Zoona Ndi Ziti” (Nsanja ya Olonda, February 1, 2013)
Onani chifukwa iwa ubadizo uli wokami-a koma teto vyevyo munaire nyo ira mufiye vobadiziwa.
“Kodi Ndiyenera Kubatizidwa?” (Mayankho a Zimene Achinyamata Amafunsa, Buku Lanambili, muru 37)