Kodi Yehova Ngoi Avi?

Kodi nyo munaganiza ira Yehova Mulungu ngoi avi? Kodi munaona ira ngodabwi-a vinjinji moi unakala undendai na nyo monga mwemo vililiathu nyenyedi udimu? Kapena kodi munaona ira ngwakopolo vinjinji ngati mabingu moi kan’na makalelo apama aliyetene? Koma kodi Yehova ngoi avi? Yehova unosambaula makalelwae zela m’Baibulo, moi unotonyi-eda ira unouomeliwanani.

1. Chifukwa n’ni kaninawande muona Mulungu?

“Mulungu ngu Zimu.” (Yohani 4:24) Yehova kan’na thuthu ngati li-uli. Liye ngu Zimu moi unakala udimu wewo iyo kaninawande onawo.

2. Kodi mbamakalelo am’mo-i aavi anayo Yehova un’na liye?

Ngakale ira Yehova kaninawande muona, liye ukalawo ndithu moi ukaana makalelo anayo kananipangi-a ira nimuomeliwengana vinjinji. Baibulo linaonga ira: “Yehova unoomeliwana chilungamo, moi kanaza a-iya athwae ororomeleya.” (Salimo 37:28) Linoongecha teto ira liye ngu “wachikondi ilukulu koma teto wachifundo,” simbwasimbwa wa athu anayo kanavuteya. (Yakobo 5:11) “Yehova uli vakwikwi na athu anayo kan’na murima wothweya. Teto ovivwela chisoni m’murimani mwiwa unowavulumucha.” (Salimo 34:18) Kodi munoiziwa ira vyevyo iyo athu ninapanga iyo vinomukuza Yehova? Muthu unoyo unasakula panga vyongo vyotakala unopangi-a ira Mulungu akumudwenga koma teto vwa chisoni. (Salimo 78:40, 41) Koma muthu unoyo unapanga vyapama unomusangalasa Mulungu. — Welengani Miyambo 27:11.

3. Kodi Yehova unatonyi-eda avi ira unoniomeliwana?

Likalelo lilukulu la Yehova chi chikondi. Moi Baibulo linaonga ira “Mulungu ngu chikondi.” (1 Yohani 4:8) Ninoona umboni oyi Yehova unoniomeliwana nawelenganga Baibulo koma teto naonanga vyevyo alengile liye. (Welengani Vyoira 14:17.) Mwachisazo kaganizelani mwemo mwanilengede liye. Mwachisazo, oonilenga ira niwandenga ona riya wa mitundu do-iyana-iyana da vyongo, vuruwana nyimbo dapama, koma teto vwa oma wa yodja. Vyevi vinatonyi-eda ira liye unofuna ira nisangalalenga na moyo.

FUNJEDANI VYOWENJEDELEYA

4. Zimu owela chikopolo yo-inda chito ya Mulungu

Yehova uno-indi-eda chito zimu owela monga mwemo iyo nina-indi-edela iyo chito mandi-u. Baibulo linotonyi-eda ira zimu owela kai muthu, koma chikopolo ineyo Mulungu una-indi-eda liye chito. Welengani Luka 11:13 na Vyoira 2:17, era eeno tapanyani vyofuka vyo-arelavi:

• Mulungu ‘unova-a’ zimwae owela wa athu anayo kanamuvepa. Kodi nyo munaganiza ira zimu owela ngu muthu kapena chikopolo yo-inda chito ya Mulungu? Chifukwa n’ni munaonga eeno?

Yehova uno-indi-eda chito zimwae owela ira apange vyongo vyodambwi-a vinjinji. Welengani Salimo 33:6 na 2 Petulo 1:20, 21, era eeno tapanyani yofuka yo-arelela:

• Kodi Yehova oo-indi-eda chito zimwae owela mundila ndim’mo-i diivi?

5. Yehova ukaana makalelo apama

Mose ootumikela Mulungu mororomeleya koma oofuna muiziwa pama mulengae. Eeno Mose oovepa ira: “Ndiiziwi-eni ndila ndinyu ira ndiuiziweni.” (Ekisodo 33:13) Vosomeda, Yehova ookami-a Mose iziwa makalelwae am’mo-iwa. Welengani Ekisodo 34:4-6, era eeno tapanyani vyofuka vyo-arelavi:

• Kodi Yehova akami-ile Mose zindikila makalelo aavi?

• Nanga mbamakalelo aavi a Yehova anayo kanausangalasani vinjinji?

6. Yehova unowaomeliwana vinjinji athu

Aizaraeli, anayo kali athu a Mulungu kali akapolo wu Iguputo. Ndiye Yehova avwa avi aliwa kavuteyanga? Vuruwanani teto ari-edangani muwelenganga, kapena welengani Ekisodo 3:1-10. Era eeno tapanyani vyofuka vyo-arelavi.

AUDIO: Yehova Vyoomukuza Vinjinji Athwae Kavuteyanga (2:45)

• Kodi khanila inatonyi-eda ira Yehova unavwa avi athu kavuteyanga? — Onani vesi 7 na 8.

• Kodi nyo munaganiza ira Yehova unofuna kami-a athu moi unokoza akami-a? Chifukwa n’ni munaonga eeno?

7. Vyongo vya muchilengedwe vinotonyi-eda makalelo a Yehova

Yehova unotonyi-eda makalelwae zela muvyongo vyevyo alengile liye. Onelani VIDIYO. Teto welengani Aroma 1:20, era eeno tapanyani yofuka yo-arelela.

VIDIYO: Chilengedwe Inotonyi-eda Ira Yehova Ngwachikondi — Thuthu la Muthu (1:57)

• Kodi mbamakalelo aavi a Yehova anayo munaona nyo muvyongo vyevyo alengile liye?

VYEVYO NIFUNJEDILE IYO

Yehova ngu zimu moi kaninawande muona, ukaana makalelo apama anjinji moi likalelo lae lilukulu chi chikondi.

Vyofuka Vyoweli-eda

• Chifukwa n’ni kaninawande muona Yehova?

• Kodi zimu owela chin’ni?

• Romolani makalelo am’mo-iwa anayo Yehova un’na liye.

ONANI VIM’MO-I

Iziwani vinjinji vyokuza Yehova vofunjeda makalelo 4 opangi-a chidwi anayo un’na liye.

“Kodi Mulungu Ali Ndi Makhalidwe Otani?” (Nsanja ya Olonda Na. 1 2019)

Onani umboni osimikizela ira Yehova kanakeda fwanyeya valivetene koma teto thawi iliyetene.

“Kodi Mulungu Amangopezeka Pena Paliponse?” (Khani yavawebusaiti)

Onani chifukw iwa Baibulo linafwanafwani-eda zimu owela na manda a Mulungu.

“Kodi Mzimu Woyera N’chiyani?” (Khani yavawebusaiti)

Muthu m’mo-iwa unoyo an’na vuto loona aganiza ira Mulungu kanamuomeliwana. Kaonani vyevyo vyamukami-ile ira achenje maganizwae.

“Panopa Ndimaona Kuti Ndingathe Kuthandiza Ena” (Nsanja ya Olonda, October 1, 2015)