MURU 22
Vyevyo Munaire Nyo Ira Muwandelenga Amo-iwa Uthenga Wapama
Mwafunjedanga makundo amo-iwa a m’Baibulo, munoambeela ganizela ira, ‘Vyevi pivyofuneela ira uliwetene aviiziwe!’ Vyevi pivyoona, athu kanofuneela iziwa makundo a imbarimbari. Komave nyo munokoza ovanga wandela amo-iwa vyevyo mufunjedile nyo. Tiyemoni nitapanye vyevyo vinaukami-eni ira mumali-e ova nowambeela wandela amo-iwa uthenga wapama wa m’Baibulo.
1. Munaire avi ira muwandelenga athu anayo muwaiziwile nyo vyongo vyevyo mufunjedile nyo?
Ofunjeda a Yesu kawongile ira: “Iyo kanina-iye wonga vyongo vyevyo navionile iyo na vyevyo navivwile iyo.” (Vyoira 4:20) Ula nguumboni woi koowomeliwana vinjinji imbarimbari, koma teto koofuna wandela amo-iwa vyokuza imbarimbari. Kodi pumwemo munavwela nyo? Akala vili eeno, ganizelani mipata dedo munadi-indi-ede nyo chito ira muwandele abalinyu na afwinyu vyevyo mufunjedile nyo, koma mwaulemu. — Welengani Akolose 4:6.
Mwemo munaambeele nyo
Mwawaledanga na m’balinyu, munokoza muwandela likundo limo-iliwalene la m’Baibulo. Munokoza wonga ira: “Mulungu ula ndifunjeda likundo limo-iliwa loriya vinjinji.”
Akala mun’na fwinyu unoyo unabulela kapena unakumbanya, munokoza muwandela lemba lolimbi-a.
Afwinyu a uchito kaufukani mwemo moywinyu munaendelaathu, munokoza awandela vyevyo mufunjedile nyo vofunjeda Baibulo kapena vamisonkano da pingo.
Aoni-eni afwinywayo webusaiti ya jw.org.
Munokoza avepa afwinyu ira kakalevo mwafunjedanga Baibulo, kapena aoni-a mwemo kanavepeleathu muthu woi afunjedenga naaliwa va jw.org.
2. Chifukwa n’ni munafuneela kaana yolinga yolaleela limo-i na pingo?
Wenjedela va athu anayo kaaiziwaathu, ofunjeda a Yesu koolaleela uthenga wapama wa athu amo-iwa. Ira vyevi viwandeye, Yesu ‘oowaruma ambili ambili ira kasogole dowa munzinda’ uliwetene ira kalaleele. (Luka 10:1) Inda chito mo-arela ndila inela, ookami-eda ira athu anjinji kavwe uthenga wapama. Ookami-a teto ira ofunjeda a Yesu kasangalale vinjinji chifukwa yolaleela limo-i na afwiwa. (Luka 10:17) Kodi nanyene mukaana yolinga yolaleela limo-i na pingo?
FUNJEDANI VYOWENJEDELEYA
Ganizelani vyevyo munaire nyo ira kamuovenga koma teto munasangalalele nyo chifukwa yo-indana chito yolaleela uthenga wapama.
3. Yehova unoza aukami-eni
Athu amo-iwa kanoova kaganizela vyoambeela laleela, chifukwa yoova mwemo athu amo-iwa kanaaoneleathu koma teto vyevyo kanagumanenaathu.
Kodi munoovecha wandelawo amo-iwa vyevyo mufunjedile nyo? Chifukwa n’ni munawonga eeno?
Onelani VIDIYO, era eeno tapanyani yofuka yo-arelela.
Chin’ni yakami-ile azombwe a Mbonala ira ka-iye ova?
Welengani Yesaya 41:10, era eeno tapanyani yofuka yo-arelela:
Kodi pepelo linaukami-edeni avi, mwaovanga laleela?
Nanga munoiziwa?
Viikala a Mboni da Yehova anjinji anayo kaganiza ira katinawande limba murima wandelawo athu amo-iwa uthenga wapama. Mofwanafwani-a, Sergey ooviona ira kaali ofuneela moi vyoomurucha wonga na athu. Vanduli viwa oowambeela funjeda Baibulo. Sergey awongile ira: “Ngakale ira ndoova, ndoowambeela wandela amo-iwa vyevyo ndafunjeda miyo. Koma ndoodabwa vinjinji ona ira wandela amo-iwa vyokuza Baibulo oondikami-eda ira ndi-iye viona monga oofuneya. Vyevi vyookami-a teto ira iroromelo yanga ikale yolimba.”
4. Muirenga vyongo mwaulemu
Mwalaleelanga uthenga wapama, kamukedenga ganizela vyevyo munafuna nyo wonga, koma muganizelenga teto mwemo munaviwongele nyo. Welengani 2 Timoteyu 2:24 na 1 Petulo 3:15, era eeno tapanyani vyofuka vyo-arelavi:
Kodi muna-indi-ede avi chito makundo a m’mavesala votapanya na athu amo-iwa vyokuza Baibulo?
Abalinyu kapena afwinyu kanokoza uruni-ani. Kodi munafuneela panga n’ni? Nanga kamunafuneela panga n’ni?
Chifukwa n’ni munafuneela fuka vyofuka vyevyo vinaakami-e wonga maganizwiwa, m’malo moawandela vyofuneela roromela?
5. Athu anayo kanawandelawo athu amo-iwa uthenga wapama kanosangalala
Yehova oomuva-a Yesu chito yowandela athu amo-iwa uthenga wapama. Kodi Yesu aiona avi chito inela? Welengani Yohani 4:34, era eeno tapanyani vyofuka vyo-arelavi:
Nadjanga yodja yapama ninokaana thazi lapama teto ninosangalala. Chifukwa n’ni Yesu awongile ira, panga ifunelo ya Mulungu wewo unatangani-avo laleela uthenga wapama, wali ngati dja yodja?
Kodi wandelawo athu amo-iwa uthenga wapama unanikami-a avi ira nikalenga osangalala?
Vyevyo vinaukami-eni
Va thawi ya misonkano da muwari mwa mulungu, muirenga chidwi na mwemo munaambeele nyo tapanya na athu.
Wongani na malimba ufunji-ani ira auwandeleni vyevyo munaire nyo ira muva-iwenga mbali da ofunjeda vamisonkano damuwari mwa mulungu. Mbali dedi dinoukami-ani ira kaviuruchengani wandelawo athu amo-iwa vyevyo munafunjeda nyo.
M’bukuli mukala igawo yoi “Athu Amo-iwa Kanaonga Ira” koma teto yoi “Kodi Muthu M’mo-iwa Angaufukileni Ira.” Shishani indi-eda chito vigawovi voshishedela someda vyofuka vyevyo athu amo-iwa kanawomeliwanaathu fuka koma teto vyevyo kanawomeliwanaathu wonga akala ira katinafuna tapanya makundo a m’Baibulo.
KODI MUTHU M’MO-IWA ANGAUFUKILENI IRA: “Vinauwendelani avi afwi-u?”
Muna-indi-ede avi chito mwai unola vomuwandela vyevyo mufwanyile nyo vofunjeda Baibulo?
VYEVYO NIFUNJEDILE IYO
Nawandelanga athu amo-iwa uthenga wapama ninokala osangalala teto kamuganizenga ira ambeela tapanya na amo-iwa korucha.
Vyofuka Vyoweli-eda
Chifukwa n’ni ninafuneela wandela athu amo-iwa uthenga wapama?
Kodi munaire avi vyongo mwaulemu mwawandelanga athu amo-iwa uthenga wapama?
Kodi munaire avi ira mumali-e ova mwaganizelanga vyofuna ambeela laleela?
ONANI VIMO-I
Onani ndila 4 dedo munai-ndi-edele nyo chito mwalaleelanga na khaadi loiziwi-a athu vya jw.org.
Chitsanzo cha Ulaliki wa Khadi Lodziwitsa Anthu za JW.ORG (1:43)
Onani makalelo 4 anayo kanaukami-eni ira mulaleelenga uthenga wapama.
“Kodi Ndinu Okonzeka Kukhala Msodzi wa Anthu?” (Nsanja ya Olonda, September 2020)
Onelani vidiyo yotonyi-eda isazo ya m’Baibulo ineyo inakami-e muthu laleela molimba murima ngakale angali mwana.
Onani vyevyo munaire nyo ira mutapanye na athu a m’banja linyu akala katinaiziwa vyokuza Yehova.
“Kodi Tingathandize Bwanji Achibale Omwe Si Mboni?” (Nsanja ya Olonda, March 15, 2014)