Malifalensi a Isibuku ya Sonkano wa Utumiki Koma Teto Moywi-u wa Ikristu
© 2025 Watch Tower Bible and Tract Society of Pennsylvania
MULUNGU WA JULAYI 7-13
CHUMA YOFWANYEYA M’MAWU A MULUNGU | MIYAMBO 21
Makundo Okami-a Ira Banja Likalenga Losangalala
w03 10/15 takuru 4 ndima 5
Kodi Munapange Avi Ira Musakulenga Vyoira Mwazelu?
Kaninasakule vyoira mwazelu akala ninasakula vyongo mopupuluma. Lemba la Miyambo 21:5 linonichenjeza ira: “Mapulani a muthu watindi kanomukami-a ira vyongo vimuendele pama, Koma etene anayo kanapanga vyongo mopupuluma kanosauwa.” Mwaisazo, azombwe anayo kali mu chikondi yokeda landeya maganizo, katinafuneya tamangela tela. Koma kakeda tamangela tela kanoza kaone vyevyo William Congreve, wolemba vya masika a Ingelezi mu chaka da m’ma 1700 aongile liye, liye aongile ira: “Watamangela tela, unoza uviimbe mulandu vanduli viwa.”
g 7/08 takuru 7 ndima 2
Vyevyo Munapange Nyo Ira Banja Linyu Liendenga Pama
Mukalenga Oviyevi-a. “Kamupangenga iliyetene na murima oomeliwa mikangano kapena chifukwa yovikuza, koma moviyevi-a, muonenga ira amo-i kanouposani.” Wiliwili, mikangano m’banja dinowambeeleya chifukwa yoi vakala mavuto, vikuza unopangi-a ira m’mo-iwa amuimbenga fwae mulandu m’malo moviyevi-a nofwanya ndila yomali-ela mavutwayo moomela uliwetene. Koma viyevi-a unokoza ukami-ani chosa maganizo oviona ira olakwa kai nyo.
w06 9/15 takuru 28 ndima 13
“Usangalalenga na Iyana Unoyo Wamutelile we Wangali Muzombwe”
Kodi vinakale avi akala banja linagumana na mavuto chifukwa ya vyevyo lombwana na iyana kanapangelanaathu? Vyera eno, Vanafuneya tindi ira kafwanye ndila yomali-ela mavutwayo. Mwaisazo, mwina m’banja mwiwamo katinaongi-ana pama, moi vano maongelo anayo kookala isimo iwa. (Miyambo 12:18) Monga mwemo nionele iyo mukhani ivirilele, vyevi vinokoza sokoneza vinjinji banja. Mwambi m’mo-iwa wa m’Baibulo unaonga ira: “Chi pama kala muipululu iyana nokala na iyana wavamulomoni koma teto woodimbeliwa lunduwa.” (Miyambo 21:19) Akala nyo muli iyana m’banja loi eno, vifukeni ira, ‘Kodi ikalelwanga inopangi-a mamunanga ira avuteyenga aleda na miyo?’ Baibulo linaonga ira: “Pitilizani aomeliwana a-iyaninyu, teto kamuwavyelenga murima vinjinji.” (Akolosi 3:19) Akala nyo muli lombwana, vifukeni ira, ‘Kodi kandinatonyi-eda chikondi, moi mpakana iyananga unoganizecha vyolimbikisiwa na athu amo-iwa?’ Pivyoona ira kavili chifukwa yovweya yopangela iwerewere. Komave, voi vyevi vinokoza ireya, chi pama ira mabanja kakambilanenga moovira m’bali vya mavutwiwa.
Makundo Okami-a
w05 1/15 takuru 17 ndima 9
Masompenya a Umwene wa Mulungu Kootanduwa Kala Vyoona
Yesu kai muthu wamba wogwela va mwana wa bulu, koma ngu Mwene wakopolo. Baibulo linofotokoza ira ugwela va Hachi ineyo m’Baibulo chi izindikilo ya kondo. (Miyambo 21:31) Lemba la Chivumbuluso 6:2 linaonga ira: “Ndangaing’anile, ndoona Hachi yowela moi unoyo agwelilevo ootukula uta. Liye oova-iwa isoti ya umwene nodowa gonji-a adanae moi oowina va kondo yolimbana na aluwa.” Koma teto voonga vya Yesu, Davide aongile ira: “Yehova unoza atapule imwirawo ya umwene ira walamulele teto madela amo-iwa, ookala mu Ziyoni moka. Liye unoza aonge ira: ‘Dowa vaari va adanawo moi waagonji-e.’” — Sal. 110:2.
FUNJI-A MWALUSO MU UTUMIKI
Fotokoza Vyevyo Munaroromela Nyo
ijwfq khani 54
Kodi a Mboni da Yehova kanaiona avi khani yomali-a Banja?
Nino-arela vinjinji vyevyo Baibulo linaongaathu vakhani ya ukwati koma teto mali-a banja. Vevo Mulungu ambeeli-a liye ukwati, afuna ira lombwana na iyana kakalenga limo-i wa moywiwa wetene. Baibulo linaonga ira banja linokoza mala akala m’mo-iwa m’banjamo upangile igololo. — Mateyu 19:5, 6, 9.
Kodi a Mboni da Yehova kanokami-a mabanja anayo kanagumana na mavuto?
Ee, moi kanopanga vyevi vo-indi-eda chito ndila do-iyana iyana monga:
● Mabuku. Thawi dinjinji mabukwi-u kanokaana khani dedo dinakami-e mabanja, ngakale anayo kanaoneya ira katinaambeele enda pama. Mwaisazo, onani khani yoi “Kalanive Ororomeleya Muukwatinyu,” “Kodi Munapange avi ira Mukululukelanenga?”, koma teto yoi “Vyevyo Munapange Nyo Ira Muwambeele Nawili Roromelana.”
● Misonkano. Misonkano di-u da pingo, davadela koma teto dachigawo, ninofunjedawo malangizo a m’Baibulo anayo kanakami-a mabanja .
● Andimuwa. Andimuwa kanokami-a mabanja anayo kanagumana na mavuto, moi kanopanga vyevi vo-indi-eda chito malemba monga la Aifeso 5:22-25.
Kodi andimuwa kanafuneya somedela akala wa Mboni da Yehova unafuna mali-a banja?
Naari. Akala banja lelo linagumana na mavuto livepile andimuwa ira liakami-e, andimuwayo katinafuneya sakulela vyoira banjalo. (Agalatiya 6:5) Komave, akala muthu unamali-e banja va vifukwa vyoogwilizana na vyevyo Baibulo linaongaathu, kanakaena mwai wopanga utumiki wavadela mu pingo koma teto kaana ufulu wotela kapena woteliwa. — 1 Timoteyu 3:1, 5, 12.
Kodi a Mboni da Yehova kanaiona avi khani yomwalana?
Baibulo linolimbikisa athu otelana ira kanafuneya kalelangave limo-i ngakale vyongo vya-aendanga pama. (1 Akorinto 7:10-16) Mavuto anjinji kanokoza mali-iwa vopempela kumela vati vamurima, indi-eda chito makundo a m’Baibulo koma teto tonyi-dana Chikondi.— 1 Akorinto 13:4-8; Agalatiya 5:22.
Komave, Akristu amo-iwa kanosakula mwalana akala kanagumana na mavuto alukulu monga:
● Lepela samalela banja mwadala. — 1 Timoteyu 5:8.
● Nkanza — Salimo 11:5.
● Akala moyo wauzimu uli vangozi. Mwaisazo, lombwana kapena iyana unoyo kai wa Mboni unokoza kanyi-eda fwae wa muukwati unoyo ngwa Mboni ira apange vyongo vimo-i viwa vyene vyosempana na malamulo a Mulungu. Vyera eno, unoyo unakanyi-ediwoyo unokoza sakula ira amwalane na fwaeyo chifukwa panga vyevi chi ndila yoka ineyo inamukami-e ira ‘avwele Mulungu monga olamulela, ookala athu.’ — Vyoira 5:29
MULUNGU WA JULAYI 14-20
CHUMA YOFWANYEYA M’MAWU A MULUNGU | MIYAMBO 22
Makundo Okami-a Volela A-ima
w20.10 takuru 27 ndima 7
Kodi A-iminyu Kaza Kaulukula Kanoza Katumikelenga Mulungu?
Akala muli vabanja moi munofuna mwangan’na a-ima, vifukeni ira: ‘Kodi nili athu oviyevi-a koma teto ninomuomeliwana Yehova na mawae? Kodi Yehova unokoza nisakula ira nikale makolo aa-ima anayo unaaona liye ira mba mtengo wavadimu?’ (Sal. 127:3, 4) Akala muli likolo munokoza vifuka ira: ‘Kodi ndinofunji-a a-imanga ira kaonenga funeya o-inda chito mwatindi?’ (Nam. 3:12, 13) ‘Kodi ndinoesaesa teteza a-imanga uvyongo vyoopi-a vyevyo kanagumanenaathu muilambo ya Satanela?’ (Miya. 22:3) Kamunakwakwani-e teteza a-iminyu wu mavuto etene anayo kanagumanenaathu. Vyevi kai vyowandeya. Koma munokoza akami-a kozeela mavuto anayo kanagumanenaathu vopitiliza afunji-a mwachikondi ira karoromelenga malangizo ofwanyeya m’mawu a Mulungu. (Welengani Miyambo 2:1-6.) Mwaisazo, akala balinyu m’mo-iwa u-iile tumikela Yehova, mumukami-enga mwaninyu vo-indi-eda chito Baibulo ira aiziwe funeya opitiliza kalave ororomeleya wa Yehova. (Sal. 31:23) Kapena akala muthu m’mo-iwa unoyo munamuomeliwana nyo ukhwile, mumutonyi-edenga mwaninyu mavesi a m’Baibulo anayo kanamukami-e vilela chisoni ineyo una liye koma teto ira akaena murendele. — 2 Akor. 1:3, 4; 2 Tim. 3:16.
w19.12 takuru 26 ndima 17-19
Makolo Kanafuneya Afunji-a A-imiwa Muomeliwana Yehova
Muwafunji-enga ami-nyu ambeela kangali ang’onong’ono. Vyongo vinoenda pama makolo kaambeela afunji-a a-imiwa kangali ang’onong’ono. (Miya. 22:6) Isazo ngu Timoteyu, unoyo aenda na namarumiwa Paulo. Am’mae a Timoteyu zina liwa a Yunike na ambwiyae zina liwa a Loisi koomufunji-a vya Yehova ambeela angakede “baliwa wene.” — 2 Tim. 1:5; 3:15.
M’bali m’mo-iwa zina lae Jean-Claude na iyanae Peace, anayo kanakala wu Côte d’Ivoire, koowakami-a a-imiwa etene 6 ira kamuomeliwengana Yehova koma teto mutumikela. Kodi chin’ni yaakami-ile? Aluwa koo-arela isazo ya Yunike na Loisi. Banjali laongile ira: “Noowambeela akokomeza Mawu a Mulungu mwa a-imi-u va-anavire thawi keda kumela vevo kabaliweathu.” — Doto. 6:6, 7.
Kodi mawu oyi “kokomeza” Mawu a Mulungu mwa a-ima kanatapulela n’ni? Kanatapulela “funji-a noumbucha moweli-edaweli-eda.” Ira vyevi viwandeye, makolo kanafuneya kaana thawi injinji yowaleda na a-imiwa. Thawi dimo-i, langiza a-ima moweli-edaweli-da unokoza kala wogomi-a. Komave makolo kanafuneya ona ira inela chi ndila yokami-ela a-imiwa vwechecha Mawu a Mulungu koma teto a-indi-eda chito.
w06 4/1 takuro 9 ndima 4
Makolo, Khalani Isazo Yapama wa A-iminyu
A-ima mba a-ima, moi katinavwa, moi amo-i kanokoza volowela. (Genesesi 8:21) Kodi makolo kanapange avi? Baibulo linaonga ira: “Uchisiru unogarateya m’murimani mwa mwana, koma imwiri yomulangela chineyo inautamangi-ela undendai na liye.” (Miyambo 22:15) Athu amo-i kanaona ira langa mwana mundila inela chi nkhaza koma teto kwawale. Pivyoona ira Baibulo linoidana na vyachiwawa koma teto zuzumi-a muthu mundila iliyetene. Koma thawi dimo-i mawu oyi “imwiri” kanatapulela udindo unoyo makolo kanaathu unoyo una-inda chito mo-olekelela koma mwachikondi koma teto mofwanelela vofuna ira a-imiwa kakaena moyo oomala. — Aheberi 12:7-11.
Makundo Okami-a
w21.08 takuru 22 ndima 11
Musangalalenga na Utumikinyu
Mofwanafwana na vyevyi, na-iyene teto ninokoza sangalalanga vinjinji akala ninapanga tindi va iliyetene ineyo ninapanga iyo votumikela Yehova. Thawi detene ‘nitanganisiwenga vinjinji’ na chito yolaleela teto nivipelekenga na murima wetene vo-inda chito da mupingo. (Vyo. 18:5; Aheb. 10:24, 25) Mukozeelenga pama misokhano nayolinga yoi mwapelekenga ndemanga dolimbikisa. Mukozeelenga teto pama mwava-iwa khani da ofunjeda vamisokhano da muwari mwa mulungu. Mwavepiwa ira mu-inde chito imo-iwene mupingo, musungenga thawi koma teto mukalenga ororomeleya. Kamuonenga ira vyevyo muvepiwe nyo kai vyofuneya kapena kukeda tatila thawi. Muesaesenga enjedela luso linyu. (Miya. 22:29) Mwavipelekanga vinjinji va utumikinyu, pavevo teto munadowa nyo vasogolo mombaraanya moi munosangalala. (Agal. 6:4) Vyevi vinokoza teto ukami-ani ira musangalalenga athu amo-iwa kava-iwa utumiki unoyo mwaulakalaka nyo. — Arom. 12:15; Agal. 5:26.
FUNJI-A MWALUSO MU UTUMIKI
Khani
ijwyp khani 100
Kodi Ndinapange Avi Akala Kandivwele Lamulo la Makolwanga?
Vyevyo vinaukami-eni
● Musomedelenga vyevyo mulakwi-ile nyo. Baibulo linaonga ira: “Wobisa machimwae vyongo kavinaza vimuendela pama.” (Miyambo 28:13) Makolwinyu kanoiziwa ira nyo kamuli angwilo. Koma yofuka chi yoi, Kodi munopangecha vyongo moona murima?
“Makolo kanoza kaupangele chifundo akala unaonga vyoona. Wasomedela vyevyo upangile we, kanoza kaambeele roromela ira uli oona murima koma teto ororomeleya.” — Olivia.
● Mupepesenga. Baibulo linaonga ira: “Mupangelanenga vyongo moviyevi-a.” (1 Petulo 5:5) Onga ira “pepani” koma teto pewa peleka vifukwa vyovikululukela, unofuna viyevi-a.
“Athu anayo thawi detene kanapeleka vifukwa vyovikululukela kanokoza ononga ikumbumtimiwa. Vanduli viwa kanokoza iya viimba mulandu kapanga vyongo vyotakala.” — Heather.
● Musomedelenga ilango ineyo muwachelile nyo. Baibulo linaonga ira: “Vwelani malangizo.” (Miyambo 8:33) Mupewenga dandaula teto mupangenga vyongo mogwilizana na ilango ineyo makolwinyu kauva-ileniathu.
Wakedanga dandaula na ilango ineyo uwachelile we, vyongo vinokoza takala vinjinji. Uesaesenga keda somedela ilangoyo m’malo moiganizelanga vinjinji.” — Jason.
● Muesaesenga kala ororomeleya. Baibulo linaonga ira: “Mukurule umuthu wawale unoyo unagwilizana na ikalelo yawale.” (Aifeso 4:22) Muambeele panga vyongo vyotonyi-eda ira muli ororomeleya.
“Thawi detene waesaesanga sakula vyoira mwazelu notonyi-edenga makolwao ira kunaza uwelela teto panga vyongo vyevyo walakwi-ile weevyo, aluwa kanoza kaambeele uroromela.” — Karen.
VYEVYO VINAUKAMI-ENI: Mupangenga vyetene vyevyo munawande nyo votonyi-eda ira muli ororomeleya. Mwaisazo, mwavenyavo vande, muwandelenga makolwinyu vevo mulinyo mundila yowelela waninyu, ngakale ira kamunafiya mochedwa. Vyevi vinokoza tonyi-eda ira munofuna ira aluwa kauroromelengani.
MULUNGU WA JULAYI 21-27
CHUMA YOFWANYEYA M’MAWU A MULUNGU | MIYAMBO 23
Makundo Okami-a Vakhani ya Walwa
w04 12/1 takuru 19 ndima 5-6
Ninafuneya Usamalana Walwa
Bwanji akala muthu unang’wa walwa koma athu amo-i katinamuzindikila ira ulezela? Athu amo-i katinaiziweya kalezela ngakale kangang’wile walwa vinjinji. Koma ganizela ira kavili vuto lililetene akala unapange vyevi, kuvinami-a vinjinji. (Yeremiya 17:9) Vira wa thawi koma teto vang’ono na vang’ono, muthu unokoza fiya mpakana vobulela akala unamale thawi indendai aanang’we walwa. ‘Koma teto unokoza kala kapolo wong’wa walwa vinjinji.’ (Tito 2:3) Voonga vya mwemo muthu munakalela liye idakwa, muzimai m’mo-iwa wolemba mabuku zina lae Caroline Knapp aongile ira: “Izolowezila inaambeela vang’ono vang’ono, mooiziweya pama muthu unokoza ambeela ng’wanga walwa vinjinji.” Ng’wa walwa vinjinji koopi-a vinjinji!
Koma teto kaganizelani chenjezo la Yesu loi: “Samalani ira mirima dinyu kandinyemeliwe nodja vinjinji, ng’wa vinjinji koma teto nkhawa da moyo, ira dambolo kalize liufiyedeni morurumucha ngati msampa.” (Luka 21:34, 35) Muthu unowambeela gona koma teto fooka na walwa aanafiye volezelana, moi vyevi vinokoza sokoneza moywae wauthuthu koma teto moywae wauzimu. Kodi vinakale avi dambo la Yehova laza limufwanya angali eno?
it-1 takuru 656
Lezela
Baibulo linoruni-a. Baibulo linoruni-a ng’wa vyong’wa vyolezeli-a mpakana fiya volezelana. Muthu wazelu unoyo alembile buku la Miyambo oofotokoza pama koma teto movweya pama vinjinji vyevyo vinamuireela muthu unoyo ung’wile walwa vinjinji. Liye aongile ira: “Mbaani unoyo unavuteya? Mbaani unoyo un’na nkhawa? Mbaani unoyo uli va mikangano? Mbaani unoyo uli va madandaulo? Mbaani unoyo un’na mabala va-ali chifukwa? Mbaani unoyo un’na maso ofiila? Ngunoyo unakala thawi indendai ang’wanga vinyu, unoyo unamusaelasaela vinyu wotangani-a. Kukopeye na vinyu vevo unanyezimela liye mu kapu. [Kapena vevo unaoneya liye wokopa] notitelanga uliko-ini mwa mwamyaa! Chifukwa vamapeto viwa unoluma ngati nyowa, moi unokumi-a poizoni ngati ivili. [Unowambeeli-a marenda a ilopa koma teto marenda amo-i okuza sokoneza ugogo, monga ngurumeda noona izungulile, moi thawi dimo-i muthu unokoza khwa]. Maswawo kanoza kaone vyongo vyailendo [walwa unowambeela lamulela ugogo wa muthu moi uno-iya ona vyongo mofwanelela, m’muruni mwa muthu wolezela munozaala na khani dosangalasa da vyongo vyevyo ugumanilena liye koma teto unopanga vyongo mooviruni-a], moi murimawo unoza uwambeele onga vyongo vyoolongosowa [vyevyo aganiza liye koma teto vyevyo avilakalaka liye, koma kaavionga unowambeela vionga vowela].” — Miy 23:29-33; Hos 4:11; Mat 15:18, 19.
Olemba Miyambola oopitiliza fotokoza vyevyo vinamuireela muthu wolezela moi aongile ira: “Unoza ukale ngati muthu unoyo ugonile vaari va nyanja, [unovwa ngati mwemo muthu munavwela liye abwina mwiko vanduli viwa nokomuwa], koma teto ngati munthu unoyo ugonile umapeto wa tengo wa ngalawa [mofwanafwana na ngalawa ineyo inandunyeya ndunyeya chifukwa ya mafunde, moyo wa muthu wolezela unokala vangozi chifukwa unokoza panga ngozi, unokoza wana na muthu na vyongo vimo-i]. Unoza uonge ira: ‘Koondivaza koma kandivwile voreya. Koondibubuda koma kandiiziwile iliyetene. [Unaonga eno muthu wolezela ngati unaviongela yekha, unakala ira kanaiziwa iliyetene ineyo inamuireele moi kanafunjedavo yongo]. Kodi ndinavenya thawi n’ni? Ndinafuna ndang’we walwa m’mo-iwa [unogona ira walwoyo umumalele m’muru, koma chifukwa yoi unouomeliwana, unokala kapolo moi unoona dimbeliwa ira ang’we teto nawili].’” Unosauwa chifukwa unoononga ndalama dinjinji vogulela walwa moi unokala woororomeleya chifukwa yolepela inda chito pamapama. — Miy 23:20, 21, 34, 35.
Makundo Okami-a
w04 11/1 takuru 31 ndima 2
Vyofuka Vyokumela wa Owelenga
Ruva mopitilila muyezo unokoza kala izindikilo yosusuka, koma kai mwemo vinakalelaathu thawi detene. Muthu unokoza ruva vinjinji chifukwa ya marenda. Mwina teto vinokoza kala ira oolandela wa makolwae. Ninafuneya teto umbuwela ira naonganga ira muthu ngoruva mopitilila muyezo ninakala nionganga vya thuthu lae, koma naonganga vyosusuka ninakala nionganga vya maganizwae. Ruva mopitilila muyezo kanaonga ira “kuinjiva wa makura muthuthu,” koma susuka ngu “umbombo kapena dja mooviruni-a.” Eno ulukula wa thuthu la muthu kai izindikilo yosusuka. Izindikilwiwa ku mwemo muthuyo munaonela liye vyodja. Muthu unokoza kala wathuthu lapama kapena woyeva thuthu koma kala wosusuka. Koma teto mwemo athu a mudela limo-i kanaonelaathu khani yoruva ko-iyana na mwemo athu a mudela limo-i kanaonelathu khanila.
MULUNGU WA JULAYI 28– OGASTE 3
CHUMA YOFWANYEYA M’MAWU A MULUNGU | MIYAMBO 24
Mukozeelenga Mavuto
it-2 takuru 610 ndima 8
Zuzumi-iwa
Akristu kanozindikila teto mphoto ineyo athu anayo kanavilela kanazeathu kawachele. Voonga vya mphotweyo, Yesu aongile ira: “Osangalala mbaathu anayo kanazuzumi-iwa chifukwa ya chilungamo moi Umwene waudimu ngweewa.” (Mt 5:10) Iziwa vya idedi-edo yoi okhwa kanoza kavenyi-iwe koma teto muiziwa pama unoyo unapeleka idedi-edo inela unowakami-a kala olimba. Iziwa vyevi unowakami-a kala ororomeleya vinjinji wa Mulungu ngakale vevo kanaopopi-iwaathu na athu ankhaza ira kanowapha. Chifukwa yororomela vyevyo khwa wa Yesu vyakwakwaneli-aathu, aluwa katinaova teto phiwa mwa nkhaza. (Ahe 2:14, 15) Ira Akristu kakaleve ororomeleya vevo kanaruni-iwaathu, kanafuneya kala na maganizo ofwanelela. ‘Kala namaganizo anayo teto Kristu Yesu an’na liye. Liye ookalave ovwela mpakana khwa wae, vyoona khwa wavatengo wozuzumelavo.’ (Afi 2:5-8) “Chifukwa yoiziwa ira unoza asangalale usogolo, oovilela vatengo ozuzumelavo. Liye katamaalile ira vyonyaswi-a vinomuireela.” — Ahe 12:2; onani teto 2Ak 12:10; 2At 1:4; 1Pe 2:21-23.
w09 12/15 takuru 18 ndima 12-13
Mukalengave Osangalala Mwagumananga na Mavuto
Lemba la Miyambo 24:10 linaonga ira: “Wafooka vevo unagumana we na mavuto kopolo dawo dinoza diyeve.” Mwambi umo-iwa unoonga ira: “Muthu kanasangalala akala murima unamuvoreya.” (Miya. 15:13) Akristu amo-i kanokumudwa mpakana iya funjeda Baibulo nosinkasinka Mawu a Mulungu. Mapempelwiwa kanakeda kala amwambo, moi kano-iya aleda na akristu afwiwa. Vinakeda oneya ira kala okumudwa wa thawi yolapa unokoza niporecha. — Miya. 18:1, 14.
Komave kaana maganizo apama unokoza nikami-a ela maganizwi-u va vyongo vyevyo vinanipangi-e kala osangalala va moywi-u. Davide alembile ira: “Ndinosangalala panga vyevyo munafuna nyo, nyo mulungwanga.” (Sal. 40:8) Nagumana na mavuto, kani-iye panga vyongo vyauzimu. Moi ndila yapama yomali-ela kumudwa kupanga vyongo vyevyo vinanikami-e kala osangalala. Yehova unoniwandela ira ninokoza kalanga osangalala nawelenganga mawae nowasinkhasinkhanga thawi detene. (Sal. 1:1, 2; Yak. 1:25) M’Baibulo koma teto umisonkano di-u da Ikristu ninowachela “mawu ooma” anayo kananilimbikise koma teto nikami-a kala osangalala.— Miya. 12:25; 16:24.
w20.12 takuru 15
Vyofuka Vyokumela wa Owelenga
Lemba la Miyambo 24:16 linaonga ira: “Wolungama unokoza gwa maulendo 7 moi unoza avenye.” Kodi veva kanaonga vya muthu unoyo unapanga machimo moweli-eda weli-eda koma vanduli viwa Mulungu mukululukela?
Vyevi kai vyevyo lembali linatapulelaathu. M’malomwiwa lembali linatapulela ira muthu agumana na mavuto anjinji unakala ngati ugwa, moi akwakwani-a avilela unakala ngati uvenya.
Eno vyetene vyevi vinatonyi-eda ira lemba la Miyambo 24:16, kalinaonga vyopanga chimo koma linaonga vyokuza gumana na mavuto moweli-edaweli-eda. Muilambo yotakalela muthu unokoza gumana na mavuto athanzi, kapena teto mavuto amo-iwa. Unokoza teto zuzumi-iwa na boma chifukwa ya iroromelo yae. Koma unororomela ira Mulungu unokoza mukami-a ira awande vilela, koma teto ira vyongo vimuendelenga pama. Mwina munokoza vifuka ira: ‘Kodi kandinaona ira thawi dinjinji atumiki a Mulungu vyongo vinowaendela pama?’ Pivyolimbikisa ira “Yehova unokami-a athu etene anayo ka-alile vang’ono gwa, moi unovenyi-a athu anayo kaoramile chifukwa ya mavuto.” — Sal. 41:1-3; 145:14-19.
Makundo Okami-a
w09 10/15 takuru 12
Vyofuka Vyokumela wa Owelenga
Muthawi ya wale, akala muthu afuna “manga nyumbae” kapena tela nokaana a-ima, afuneela vifuka ira, ‘Kodi ndili okozela samalela nokami-a iyananga koma teto a-ima anayo ndinaze miyo ndikaena?’ Muthu aanakale vabanja, afuneela iziwa inda chito daumunda. Chichifukwa iwa Baibulo la Today’s English Version latapulele vesili moi eni: “Kumange nyumbao nokaana banja waanalime mundao, moi usimikizele ira unoza ufwanyenga vyofuneya vamoyo.” Kodi likundo leli lino-inda teto chito malambwano?
Ee. Mulombwana unoyo unafuna tela, unafuneela kozeela pama udindwae. Akala vinawandeye, unafuneela iziwa inda chito. Pivyoona ira chito ineyo mulombwana unafuneela liye inda vosamalela banja lae, kinafuneela kala yodji-a kapena wari-a banjalo ba-i. Mawu a Mulungu kanotonyi-eda ira mulombwana unoyo kanaomeliwana banja lae koma teto lisamalela mwauthuthu koma teto mwauzimu, ngotakala kwaranya muthu oororomela. (1 Tim. 5:8) Eno vokozeela tela, mulombwana unafuneela vifuka vyofuka ngati vi: ‘Kodi ndili okozeya fwanyelanga banja langa vyofuneya vyauthuthu? Kodi ndili okozeya kala muru wabanja va khani dauzimu? Kodi ndinoza ndikwakwaneli-edenga udindo opanga phunzilo la Baibulo mogarateya na iyana koma teto a-imanga?’ Mawu a Mulungu kanosimikizela vinjinji maudindo anala.— Doto. 6:6-8; Aife. 6:4.
Eno azombwe anayo kanafuna tela kanafuneela ganizela pama likundo lava Miyambo 24:27. Sikana unafuneela teto vifuka akala uli wokozeya kwakwaneli-eda udindo wokala iyana koma teto m’ma wapama. Koma teto azombwe anayo kakede telana wene kanafuneela vifuka vyofuka ngati vyevi akala kanaganiza vyoza kaana a-ima. (Luka 14:28) Athu a Mulungu ka-arela malangizo anala, kanopewa mavuto anjinji moi kanosangalala na moyo wava banja.
MULUNGU WA OGASTE 4-10
CHUMA YOFWANYEYA M’MAWU A MULUNGU | MIYAMBO 25
Makundo Okami-a Ira Niongenga Pama
w15 12/15 takuru 19 ndima 6-7
Mu-indi-edenga Chito Pama Lumi Linyu
Lemba la Miyambo 25:11 linotonyi-eda funeya wosakula pama thawi yoonga. Lembali linaonga ira: “Mawu oongiwa va thawi yofwanelela kali ngati vipaso vya maapozi agolide m’mbale dasiliva.” Vyongo vyagolide vinakala vyoria moi mwavi-ela m’mbale dasiliva vinooneya pama vinjinji. Eno lembali linatonyi-eda ira nasakula mawu apama nowaonga teto vathawi yofwanelela, ninolimbikisa athu anayo ninaongana iyo. Koma kodi ninapange avi vyevi?
Vyevyo ninafuna iyo onga vinokoza kala vyolimbikisa, komave akala kaninavionge vathawi yofwanelela kavinakami-e. (Welengani Miyambo 15:23.) Mwaisazo mu Marichi 2011, wu Japan ooireya ivomelezi koma teto oosefuela ma-inje moi mizinda dinjinji doonongeya. Athu okwaranya 15,000 kookhwa. Ngakale ira abali na arongola udelali naaluwene teto kookuziwa na vutoli, kooesaesa limbikisa afwiwa vo-indi-eda chito Baibulo. Komave athu anjinji awewo kali a muipembezo ya ibuda moi kataiziwa makundo a m’Baibulo eno koororomela vyo-iyana vinjinji na vyevyo Baibulo linafunji-aathu. Eno abali kooiziwa ira thawila kayali yapama ira kaawandele athu anayo kakhweliwe vyoi Mulungu unoza avenyi-e athu okhwa. M’malomwiwa kakeda alimbikisa nowawandela kumela m’Baibulo chifukwa iwa athu apama naaluwene kanagumana na mavuto.
w15 12/15 takuru 21 ndima 15-16
Mu-indi-edenga Chito Pama Lumi Linyu
Nafunanga onga vimo-iviwa vyene, ninafuneela ganizela mwemo ninaongele iyo. Vevo Yesu aonga liye m’sunagoge wa waniwa wu Nazareti, athu anjinji ‘koodabwa na mawae o-inda murima.’ (Luka 4:22) Naonganga mwaulemu, mawi-u kanokala o-inda murima moi athu katinavuteya arela vyevyo ninaonge iyo. (Miya. 25:15) Ninokoza musazi-eda Yesu voonga mooma murima koma teto panga vyongo moganizela athu amo-iwa. Vathawi imo-iwa, athu kooesaesa dowa wewo wali Yesu, nayolinga yoi kavwe mawae. Liye angaaonile, oowavwela chifundo moi “oowambeela afunji-a vyongo vinjinji.” (Maliko 6:34) Ngakale vevo athu kamunyozaathu, kaaweli-edile mawu aibewe. — 1 Pe. 2:23.
Thawi dimo-i vinokala vyorucha onga mwaulemu wa abali-u kapena afwi-u mupingo chifukwa yoi noowalemeela. Ninokoza ganiza ira ninokoza onga mawu aliyetene moi katinakumudwe. Koma kodi Yesu aona ira unokoza onga mawu aliyetene wa ofunjedae chifukwa yoi kali afwae? Naari. Mwaisazo, ofunjedae kangakanganile va khani yoi mulukulu mbaani, Yesu oowakami-a mooma murima vo-indi-eda chito isazo ya mwana mung’onong’ono. (Maliko 9:33-37) Naaluwene teto andimuwa kanokoza panga pama sazi-eda Yesu vopeleka malangizo “na muzimu wofaasa.” — Agal. 6:1.
w95 4/1 takuru 17 ndima 8
Nilimbikisanenga va Khani Yotonyi-edana Chikondi — Moi Avi?
Votumikela Mulungwi-u, etene iyene ninokoza limbikisana mwaisazo yi-u. Yesu oolimbikisa anayo kamuvuruwana. Liye oomeliwana chito yolaleela moi ooiwona ira chiyofuneya vinjinji. Liye aongile ira yali ngati yodja yae. (Yohani 4:34; Aroma 11:13) Athu amo-i katinadimbeluwa landela tindi loi enolo. Kodi nanyeen’ne teto munokoza pangi-a ira athu kaonenga ira munosangalala na utumikinyu? Mufotokozelenga vyogumanana vinyu vyapama, koma mupewenga vitama. Mwavepa amo-iwa ira ka-inde nanyo chito yolaleela, muonenga akala munawakami-e ira kasangalalenga vinjinji kawandelanga amo-iwa vyokuza Mulengi-u Mulukulu, Yehova. — Miyambo 25:25.
Makundo Okami-a
it-2 takuru 399
Faasa
Munthu ofaasa unokwakwani-a kaana ikalelo inela chifukwa yoi unokala na iroromelo koma teto kopolo. Ngu muthu oyi kanasusi-eya mo-orucha kapena amo-iwa katinamupangi-e ira a-iye ona vyongo mofwanelela. Muthu unoyo kanapanga vyongo mofaasa, unopanga vyevyo chifukwa yoi unovivwa ira ngo-otetezeya, wolunduwa, wookaana iroromelo kapena idedi-edo, koma teto wosauwela yoira. Buku la Miyambo linofotokoza vya muthu unoyo kai wofaasa ira: “Muthu woou-inda murima uli ngati mzinda unoyo mpandiwa ugumuliwe.” (Miy 25:28) Vinakala vyo-orucha ira aambeele ganizela vyongo vyolakweya vyevyo vinamupangi-e ira apangenga vyongo vyotakala.
FUNJI-A MWALUSO MU UTUMIKI
Khani
ijwyp khani 23
Kodi Ndinapange Avi Akala Athu Amo-i Kanaomeliwa Onga Vya Miyo?
1: Munokoza keda vi-iya. Thawi dinjinji vinokala pama keda vi-iya simbwasimbwa akala khaniyo kai ilukulu. Munokoza indi-eda chito malangizo a m’Baibulo oonga ira: “Kumbaranyedenga lunduwa.” — Namalaleya 7:9.
“Athu koowambeela falisa ira ndili vaimweendi na muzombwe m’mo-iwene oyi kaninagumanevo. Vyoonditei-a vinjinji moi ndakede vi-iya.” — Elise.
“Akala muthu un’na mbili yapama kunadandaula. Ngakale athu kangafalisile vyokuza weyo, mbaathu oyeva vinjinji anayo kanaroromele. Moi dowa wathawi vyoona viwa vinoiziweya.” — Allison.
Esedani panga vi: Lembani (1) vyevyo vyaongiwe vyokuza nyo koma teto (2) mwemo vyaukuzeleniathu. Mwaonga “m’murima mwinyu” mwemo munavwela nyo, vinokala vyo-orucha keda vi-iya.— Salimo 4:4.
2: Munokoza onga na muthu unoyo uwambeeli-ile khaniyo. Thawi dimo-i vinofwanyeya ira athu koofalisa khani ilukulu yokuza nyo. Vyafiya veva munokoza panga pama onga na muthu unoyo aambeeli-ile khaniyo.
“Onga naathu anayo kaambeeli-ile khanayo, unokoza kami-a athwayo iziwa ira moovwa vyevyo kaongaathu. Koma teto unokoza kami-a ira vyoona viwa vyakhaniyo viiziweye, vanduli viwa mali-a vyonamavyo.” — Elise.
Munokoza panga pama ganizela makundo a m’Baibulo o-arelala koma teto vifuka vyofuka mwaanaongi-ane na muthu unoyo uuongeleni vyotakaloyo.
● “Muthu asomeda khani aanaivwecheche unakala puusa.” (Miyambo 18:13) ‘Kodi ndinoiziwa vyetene vyokuza khanila? Kodi muthu unoyo undiwandelile ira ndera ongeliwa vyotakalola oovwechecha vevo athwayo kaongaathu?’
● “Munthu uliwetene akalenga okozeya vuruwana, aganizelenga aanaonge, koma teto kambaranyedenga lunduwa.” (Yakobo 1:19) ‘Kodi ila chithawi yapama yoongi-ana na muthu unoyo andi-ongela vyotakalola? Kodi vyevyo ndinafuna miyo pangavi pivyofwanelela? Kapena kodi ndinafuneya dedi-a ira murimanga ukale m’malo?’
● “Eno vyongo vyetene vyevyo munafuna nyo ira athu amo-iwa kaupangeleni, nanyen’ne teto muwapangelenga vyevyo.” (Mateyu 7:12) ‘Vyaakale ira ngumiyo unoyo umuongele muthula, kodi ndafuna ira andiongele moi avi? Kodi ndaomeliwe ira aonge vamalo oyi avi? Kodi ndaomeliwe ira aonge mawu oyi avi, koma teto kovae ioneyenga moi avi?’
Esedani panga vi: Mwaanaonge na muthu unoyo unauongelani vyotakaloyo, lembani vyevyo munafuna nyo dowa onga. Vanduli viwa dedi-ani wa mulungu m’mo-i kapena wa milungu min’li, welengani teto vyevyo mwalembile nyoovyo moi muone akala munafuneela chenja vimo-i viwa vyene. Munokoza panga pama kambilana na makolwinyu kapena fwinyu woganiza pama ira auva-eni malangizo.
Likundo loona: Ongiwa uli mugulu la vyongo vyevyo kamunawande vipewa vamoywinyu. Koma vyevi kavinatapulela ira kavili yongo ineyo munapange nyo.
MULUNGU WA OGASTE 11-17
CHUMA YOFWANYEYA M’MAWU A MULUNGU | MIYAMBO 26
Mumupewenga “Muthu Opuusa”
it-2 takuru 729 ¶6
Zongwe
Nyengo. Muilambo Yolonjeziwa, mwali nyengo mbiili. Nyengo yovi-a na nyengo yodidila. Moi nyengo dedi dinokoza romoliwa teto ira nyengo ya Zuwa na nyengo ya zongwe. (Erekezelani na Sal 32:4; Nyi 2:11.) Ambeela vaari va mwedi wa Epulo fiya vaari va mwedi wa Okotobala, kawarumbwa zongwe vinjinji. Zongwe arumbwa woyeva va thawi ineyo athu ka-andaathu. Lemba la Miyambo 26:1, linatonyi-eda ira athu koodabwa kaona zongwe arumbwanga muthawi yo-anda. (Erekezelani na 1Sa 12:17-19.) Munyengo ya zongwe, zongweyo kaakeda rumbwa. Moi thawi dimo-i kawakala mirambo ngakale vang’ono. Chifukwa yoi inela yookala teto thawi yodidila, muthu anyeta na zongwe oodidiliwa vinjinji. (Eza 10:9, 13) Eno athu kafuneela kaana malo apama oyi kakalengamo. — Yes 4:6; 25:4; 32:2; Yob 24:8.
w87 10/1 takuru 19 ndima 12
Ilango Inobala Iphaso Yamurendele
Athu amo-iwa kanokoza funeela ilango ya kopolo monga mwemo lemba la Miyambo 26:3 linatonyi-edelaathu: “Imwiri yomukwapulela Hachi, migo-i dom’mangela vamulomoni va bulu, moi imwiri chi yokwapulela mutana wa athu opuusa.” Thawi dimo-i Yehova oolola ira Aisaraeli kagonji-iwe chifukwa ya vyotakala vyevyo kapangileathu: “Chifukwa yoi koopanduwela mawu a Mulungu, koonyoza malangizo a wamudimudimu. Eno Mulungu oowagwi-eda mavuto ira aluwa kakale na murima oviyevi-a. Aluwa kookwakwatuwa moi kavali unoyo awakami-a. Aluwa koomuitana Yehova ira aakami-e m’masauswiwa, moi liye oowavulumucha wu mavutwiwa.” (Salimo 107:11-13) Komave athu amo-i opuusa kanakala athu amakani teto katinavwa. Moi kavili ilango ineyo inawakami-e: “Muthu unoyo unaumi-a liko-i lae vanduli vozuzuliwa moweli-eda weli-eda unoza akotoliwe mwazizizi moi kanaza achila.” — Miyambo 29:1.
it-2 takuru 191 ndima 4
Rangala
Mwemo kana-indelaathu chito m’buku la Miyambo. “Mwene Solomo oonga ira: “Muthu unoyo una-iya chitwae m’mandani mwa muthu wopuusa uli ngati muthu unoyo urangali-ile manyalawe noviporecha ekave.” Onga vyoona, muthu unoyo unamuwandela muthu wopuusa ira amu-indele chito, unakala ira kanaifunela vyapama chitweyo. Kai vyokaiki-a ira unokoza ona chitweyo ionongeyanga, moi vyevi vinokoza muvoreya vinjinji. — Miy 26:6.
Makundo Okami-a
it-1 takuru 846
Wopuusa
Musomeda muthu wopuusa “mogwilizana na uchisirwae” vofuna muweli-eda mawu aibewe anayo unaonga liye vevo munakangana nyo na liye, unopangi-a nyo etene ambili, oneya ira kamunaganiza pama teto kamun’na zelu. Vofuna ira kanifwanafwane na muthu wopuusa, buku la Miyambo linoniwandela ira: Kumusomede uliwetene wopuusa mogwilizana na uchisirwae.” Koma lemba la Miyambo 26:4, 5 linatonyi-eda ira musomeda muthu wopuusa mogwilizana na uchisirwae” vofuna runi-ana na vyevyo unaonga liye, mutonyi-eda ira vyevyo unaonga liyevyo kaviin’na zelu koma teto mutonyi-eda ira vyevyo unaonga liye pivyo-iyana na vyevyo unaganiza liye unokoza kala wokami-a.
MULUNGU WA OGASTE 18-24
CHUMA YOFWANYEYA M’MAWU A MULUNGU | MIYAMBO 27
Afwi-u Apama Kanonikami-a
w19.09 takuru 5 ndima 12
Yehova Unoona Ira Atumikae Oviyevi-a Mba Antengo Wavadimu
Muthu oviyevi-a unoyamikela ava-iwa malangizo. Mwaisazo, nierekeele ira muli wu misonkano Ndiye mwangaaledile na abali na arongola angasene, muthu m’mo-iwa unaulandelani vambali nouwandelani ira m’mano mwinyu mukameela yodja imo-iwene. Kai vyokaiki-a ira munokoza nyaswa. Koma munokoza muyamikela ira uuwandelani vyevyo, moi mwina moosangalala aakale ira m’mo-iwa uuwandelani vyevyo mombaraanya. Mofwanafwana na vyevi, ninafuneya viyevi-a koma teto yamikela akala Mkristu fwi-u ulimbile murima noniva-a malangizo. Ninafuneya ona ira muthuyo ngu fwi-u ookala mdani-u. — Welengani Miyambo 27:5, 6; Agal. 4:16.
it-2 takuru 491 ndima 3
Muthu Owandamanana Nyumba
Buku la Miyambo linonilangiza ira ninafuneya roromela fwi-u va thawi ineyo ninafuneya iyo likami-edo: “Kumu-iye fwao kapena fwiwa wa babao, moi kuvolowe m’mba mwa chimwenao va dambo lelo soka linagwaathu. Muthu owandamanana nyumba unoyo uli vakwikwi ngwapama vinjinji kwaranya chimwenao unoyo uli undendai.” (Miy 27:10) Lembali linotonyi-eda ira fwao owandamanana nyumba unoyo munagwilizana nyo, ngunoyo unafuna we muonanga ira ngofuneya vinjinji moi ngunoyo unaukami-e vevo unafuneya we likami-edo akala balawo weniweni unakala undendai. Balawoyo kanakale wokozeya kapena kanakwakwani-e ukami-a chifukwa yoi uli undendai.
Azombwe, Kodi Munaza Mupanga N’ni va Moywinyu?
Khani ya Yehoasi inonifunji-a ira ninafuneela sakula afwi-u anayo kananikami-e ira nipangenga vyapama. Nisakulenga athu anayo kanamuomeliwana Yehova koma teto anayo kanafuna musangalasa. Kanikedenga waleda na athu a usinkhwi-u oka. Umbuwelani ira Yehoasi ali n’ng’onong’ono voerekezela na fwae Yehoyada. Mwasakulanga afwinyu muvifukenga ira: ‘Kodi aluwa kanondikami-a ira ndiroromelenga vinjinji Yehova? Kodi kanondilimbikisa ira ndi-arelenga makundo a Mulungu? Kodi kanoomeliwana onga vya Yehova koma teto choonadae yantengo wavadimwila? Kodi kanolemekeza makundo a Mulungu? Kodi aluwa kanakedecha ndiwandela vyongo ira kandisangalase kapena kanolimba murima nondiwandela vyevyo ndinalakwi-a miyo?’ (Miya. 27:5, 6, 17) Onga vyoona athu anayo katinamuomeliwana Yehova katinafuneela kala afwinyu. Koma akala mun’na afwinyu anayo kanamuomeliwana Yehova, pitilizani waleda na anayo chifukwa kanerenga ukami-ani! — Miya. 13:20.
Makundo Okami-a
w06 9/15 takuru 19 ndima 12
Makundo Alukulu a M’buku la Miyambo
27:21. Vyevyo ninapanga iyo athu m’mo-iwa kaniyamikela, vinotonyi-eda ira iyo nili athu oyi avi. Nazindikila ira vyevyo nipangile iyo nikwakwani-ile chifukwa ya Yehova, ninolimbikisiwa ira nipitilizeve mutumikela koma teto ninotonyi-eda ira nili athu oviyevi-a. Akala niyamikeliwe ndiye iyo vivwanga ira nili athu avadimu, ninotonyi-eda ira nili athu ovikuza.
FUNJI-A MWALUSO MU UTUMIKI
Khani
ijwyp khani 75
Kodi Ndinapange Avi Akala Fwanga Undikumudwi-ile?
Vyevyo munapange nyo
Muvisaele. Baibulo linaonga ira: “Kumbaranyedenga lunduwa, chifukwa athu opuusa mbanayo katinadimbeliwa lunduwa.” — Namalaleya 7:9.
Alyssa aongile ira: “Thawi dimo-i vavira malambo angasene pavevo unaona we ira wakede kumudwa va yongo ing’onong’ono.”
Vyoi muviganizele: Kodi munakedecha kumudwa va iliyetene? Kodi vikala vyevyo munapange nyo ira kamukumudwe vinjinji na vyevyo afwi-u kanapangaathu? — Namalaleya 7:21, 22.
Muganizelenga funeya wokululukela amo-i. Baibulo linaonga ira: ‘Nyalanyaza yolakwa ya [munthu] unopangi-a kala woriya.’ — Miyambo 19:11.
Mallory aongile ira: “Ngakale wangakumudwile va chifukwa yovweya, chipama kululuka na murima wetene. Wera eno kunafuneya teto muumbuchanga fwaoyo vyevyo alakwi-ile liye ira akedenga pepesa. Wamukululukela, khaniyo imalelenga teto vevo.”
Vyoi muviganizele: Kodi chi khani ilukulu? Kodi munokoza mukululukela ira mukale teto nawili vamurendele? — Akolosi 3:13.
Muganizelenga vyofuna vya fwinyuyo. Baibulo linaonga ira: “Kamuganizelenga vyofuna vinyu vyoka, koma muganizelenga vyofuna vya amo-i.” — Afilipi 2:4.
Nicole aongile ira: “Mwaomeliwananga koma teto lemekezana, munoesaesa teto ira mugwilizane teto nawili mombaraanya mwaasempana maganizo. Vinakala ira moopangela limo-i vyongo vinjinji eno kamunafuna ira mumwalane.”
Vyoi muviganizele: Kodi munokoza vwechecha chifukwa ineyo ipangi-ile fwinyuyo onga kapena panga vyongo vyevyo? — Afilipi 2:3.
Likundo lofuneya vinjinji: Munafuneya iziwa vyevyo munapange nyo fwinyu aukumudwi-ani moi vyevi vinoza viukami-eni mwaza muulukula. Esaesani funjeda panga vyevi vathawiila.
MULUNGU WA OGASTE 25-31
CHUMA YOFWANYEYA M’MAWU A MULUNGU | MIYAMBO 28
Iyana Vaari va Muthu Otakala na Muthu Olungama
w93 5/15 takuru 26 ndima 2
Kodi Muno-arela Yehova na Murima Wetene?
“OLUNGAMA unokala olimba murima ngati phodogoma.” (Miyambo 28:1) Unotonyi-eda iroromelo, unororomela mawu a Mulungu moi unopitiliza mutumukela Yehova molimba murima ngakale vevo unagumana liye na mavuto oopi-a.
it-2 takuru 1139 ndima 3
Vwechecha vyongo
Athu anayo ka-iile vwela Yehova. Athu anayo kaambeele muchimwela Mulungu katinaganizela vyevyo Mulunguyo unafuna liye kasakulanga vyoira kapena kapanganga mapulani va moywiwa (Yob 34:27) Muthu oyi enoyo unolola ira murimae uwambeele mupusi-a moi kanazindikila ira vyevyo unapanga liyevyo pi vyotakala moi uno-iya ona vyongo mofwanelela. (Sal 36:1-4) Ngakale aonganga ira unomulambela Mulungu, unoona ira maganizo a athu mbofuneya vinjinji kwaranya maganizo a Mulungu moi unowaomeliwana vinjinji maganizo a athu. (Yes 29:13, 14) Apanganga ikalelo yotakalela, unovikululukela noonganga ira vili ngati unapanga “masika” (Miy 10:23) Koma teto unoambeela ganiza mwachinyengo na mwauchisiru mpakana fiya voganizanga ira Mulungu kanaona kapena kanazindikila vyongo vyotakala vyevyo unapanga liye, ngati Mulunguyo kana kopolo dowanda zindikila vyongo. (Sal 94:4-10; Yes 29:15, 16; Yer 10:21) Vyoira na vyoonga vyae vinakala, ngati unaonga ira, “Yehova kaliwo” (Sal 14:1-3) Koma teto kanaganizela vya Yehovoyo. Chifukwa yoi kana-arela makundo a Mulungu, kanasakule vyongo mofwanelela, kanaonenga vyongo mofwanelela, kanaganizelenga makundo etene a khani dedo unafuna liye sakula, koma teto kanasakulenga vyongo mwazelu. — Miy 28:5.
it-1 takuru 1211 ndima 4
Roromeleya
Pivyowandeya kala ororomeleya wa Yehova, ookala na kopolo di-u, koma akala ninaroromela kopolo dae dovulumuchela. (Sal 25:21) Mulungu unolonjeza ira unoza akale “ishango” koma teto “malo aitetezo” wa athu ororomeleya. (Miy 2:6-8; 10:29; Sal 41:12) Chifukwa yoi athu ororomeleyala thawi detene kanoesaesa panga vyongo vyomusangalasa Yehova, kanokala na moyo osangalala vyevyo vinaakami-a ira kakwakwaneli-edenga vyolinga viwa. (Sal 26:1-3; Miy 11:5; 28:18) Komave, Yobu ookumudwa angazindikilile ira athu apama kanogumana na mavuto chifukwa ya vyoira vya athu otakala, moi kanokoza khwa limo-i na athu otakalayo. Koma oozindikila teto ira ngakale vili eno, Yehova unakala aonanga vyevyo muthu oolakoyo unagumanana liye moi unomusimikizela ira unoza amuva-e cholowae, unoza akalenga mwamurendele usogolo, koma teto unoza aachele vyongo vyapama. (Yob 9:20-22; Sal 37:18, 19, 37; 84:11; Miy 28:10) Monga mwemo vyaliliathu na Yobu, muthu unooniwa ira ngofuneya wa Mulungu akala uli ororomeleya, ookala akala un’na chuma. (Miy 19:1; 28:6) A-ima anayo ababiwa kali ororomeleya moi eni, kanokaana mwai ulukulu moi kanokala osangalala. (Miy 20:7) Koma teto kanolemekeziwa chifukwa ya isazo yapama na mbili yapama ya babiwa.
Makundo Okami-a
w01 12/1 takuru 11 ndima 3
Munokoza Pewa Marenda a Murima Wauzimu
Viroromela mopitilila muyezo. Athu anayo kabulelilevo murima kooviroromela vinjinji ira thanzi liwa lali lapama kaanaambeele bulela. Thawi dinjinji, koonyalanyaza dowa uchipatala moi koona ira kai vyofuneya ira kapange vyevyo. Chichimozimozi teto na athu amo-i anayo kanaganiza ira chifukwa yoi kookala Akhristu wa thawi indendayi, kilivo ineyo inaaireele. Mwina kanokoza ambeela nyalanyaza ira kavisaelenga mwauzimu mpakana soka langaaagwele. Pivyofuneya vinjinji umbuwela malangizo apama a Paulo oyi, nipewe viroromela mopitilila muyezo. Liye aongile ira: “Eno unoyo unaganiza ira uimela pamapama, asamale ira kagwe.” Eno pivyofuneya ira nizindikilenga ira kaniviroromelenga mopitilila muyezo. — 1 Akorinto 10:12; Miyambo 28:14.