Adamu na Hava kangatamangi-iwe m’munda wa Edeni, kookaana a-ima anjinji. Mwaniwa owambeela ali Kaini teto wanambili ali Abele. Kaini ali mulimi koma Abele ali m’busa.

Dambo limo-i, Kaini na Abele koopeleka sembe wa Yehova. Kodi munoiziwa ira sembe chin’ni? Chi mpaso yavadela. Yehova oosangalala na sembe ya Abele koma kaasangalalile na sembe ya Kaini. Eno vyevi vyoopangi-a ira Kaini alunduwe vinjinji. Yehova oomulangiza ira a-iye lunduwa chifukwa unokoza panga vyongo vyotakala. Koma Kaini kavwele.

Eno Kainiyo oomuwandela Abele ira: ‘Tiyemo nidowe umunda.’ Kangali umundawo, oowambeela muvaza balaeyo mpakana oomupha. Kodi Yehova apangile n’ni? Oomulanga Kaini vomutamangi-ela undendai teto kaamulolile ira awelele waniwa.

Kodi khani inela inanifunji-a n’ni? Thawi dimo-i ninokoza kumudwa akala ira vyongo vimo-i kaviireile ngati mwemo nafunela iyo. Koma naona ira niambeela lunduwa vinjinji, kapena muthu m’mo-iwa aniva-a malangizo, ninafuneya iya lunduwawo, na yolinga yoi kanipange vyongo vyotakala.

Voi Abele oomuomeliwana Yehova koma teto oopanga vyongo vyapama, Yehova kanaza amudiwala. Unoza amuvenyi-e ira aze akale m’paradaiso.

Vangavirile thawi, athu kooinjiva va ilambwela, koma anjinji kali otakala. Ngakale teto angelo amo-i kali otakala. Aluwa kookuma udimu noza va ilambo yavati. Kodi munoiziwa chifukwa iwa angelwala kapangeleathu vyevi? Aluwa kafuna ira kakaena mathuthu a athu na yolinga yoi katele a-iyana a va ilambo yavati.

Angelwayo kangatelile a-iyanayo, koobala a-ima. A-imayo kali olapa koma teto akopolo vinjinji teto koozuzumi-a athu amo-iwa. Yehova kaalolile ira vyevi vipitilile. Eno ooganiza vyozi-a igumula kapena ira zongwe wakopolo ira awononge athu otakalayo.

Koma vookala muthu m’mo-i unoyo kaapangana vyongo vyotakala moi oomuomeliwana Yehova. Zina lae ali Nowa. Liye ookaana iyana na a-ima aralu aalombwana. Maziniwa kali Semu, Hamu, na Yafeti teto etene anala kookaana a-iyana. Yehova oomuwandela Nowa ira apange ingalawa yoi liye na banja lae kavulumuwelemo. Ingalaweyo yali ilukulu vinjinji moi yakeda enda vadimu va ma-inje. Yehova oomuwandela teto Nowa ira avolochi-e vinyama vinjinji muingalaweyo ira vivulumuwe.

Thawi ineyo, Nowa oowambeela panga ingalaweyo. Liye na banja lae koo-inda chito inela wachaka 50. Vopanga ingalaweyo liye oo-arela malangizo etene a Yehova. Vathawi inela, Nowa oochenjeza teto athu ira unoza igumula. Koma kalivo amuvwele.

Vanduli viwa, yoofiya thawi yoi kavolowe mu ingalaweyo. M’muru o-arela ninoona vyevyo vyaireile.