Aisaraeli kangakumile Vamwango wa Sinai koovira muipululu ya Parana dowa fiya vamalo oromoliwa Kadesi. Kangali vamalwala, Yehova oomuwandela Mose ira: ‘Sakula alombwana 12 kumela mu fuko lililetene ira kadowe kaone ilambo ya Kanani ineyo ndinafuna miyo uva-ani.’ Eno Mose oosakula alombwana 12 nowawandela ira: ‘Dowani wu Kanani mwaone akala ilambweyo chi yapama limamo mbewu. Mwaone teto akala athwiwa kali akopolo kapena ofooka koma teto akala kanakala m’misasa kapena m’mizinda.’ Vingaireile eno, athwayo koowambeela ulendo odowa wu Kanani teto va gululi vookala Yoswa na Kalebe.

Vangavirile malambo 40 athwala koowelawo teto koolanda vipaso vya nkhuyu, makangaza, na mphesa. Aluwa koonga ira: ‘Ilambo iwa chi yapama vinjinji koma athwiwa mba kopolo moi kanakala m’mizinda da mipanda dolapadolapa.’ Eno Kalebe oonga ira: ‘Komave ninokoza agonji-a. Tiyemoni nidoweni.’ Kodi munoiziwa chifukwa iwa Kalebe aongile vyevi? Chifukwa yoi liye na Yoswa koororomela vinjinji Mulungu. Koma athu amo-iwa 10 kaongile ira: ‘Naari kanidowewo. Athwiwa mba alukulualukulu koma teto akapolo moi iyo nakeda oneya ngati a-ima.’

Aisaraeli kangavwile vyevi koofooka vinjinji. Koowambeela dandaula ira: ‘Tiyemoni nisakule sogoleli m’mo-iwa teto niwelele wu Iguputo. Vyoona nidowe naphiwe?’ Koma Yoswa na Kalebe koonga ira: ‘Athunyo, tiyemoni nimuvwele Yehova teto kaniove. Yehova unoza aniteteze.’ Komave Aisaraeli katavwele, moi mpakana koofuna mupha Yoswa na Kalebe.

Kodi Yehova apangile n’ni? Liye oomuwandela Mose ira: ‘Aisaraeli ndiapangela vyongo vinjinji koma aluwa katinandivwelave. Chifukwa ya vyevi, kanokala muipululu wa chaka 40 teto etene kanakhwela mwemu. Anayo kanavolowe mu ilambo ineyo ndialonjezile miyo mba a-imiwa ba-i na Yoswa na Kalebe.’

Thawi imo-iwa, Aisaraeli kangali muipululu, Kora, Datani, Abiramu, na athu amo-iwa 250 koomuukela Mose. Aluwa koonga ira: ‘Sopano nigoma na weyo! Chifukwa n’ni unafuna ira unilamulelenga teto umusakula Aroni ira akale ndimuwa wa sembe? Yehova uli na etene iyene, ookala weyo na Aroni ba-i.’ Vyevi kavyamusangalasile Yehova. Liye oona ira athwayo kanaruni-ana na liye.

Mose oomuwandela Kora na athu anayo kali umbali ya Kora ira: ‘Mechelo muze wu ihema, teto muzena mulo na vyongo vyonukela vyoi mwapeleke sembe. Yehova unonioni-a muthu unoyo umusakulile liye.’

Dambo lo-arela, Kora na athu 250 ale koodowa wu ihema. Aluwa koopeleka sembe ngakale ira katali asembe. Yehova oomuwandela Mose na Aroni ira: ‘Venyavoni kamuwandamane na Kora koma teto afwayayo.’

Koma Datani, Abiramu na mabanjiwa kookoonda dowa. Yehova oowawandela Aisaraeli ira katiandamele matenti a Kora, Datani na Abiramu. Thawi ineyo, Aisaraeli koodowa undendai na matentayo. Datani, Abiramu, na mabanjiwa kooimela vatando va matentiwa. Eno teya yoowambeela ng’ambeya nowamida. Teto wu ihema ule, mulo okumela wa Yehova ootumeya Kora na afwae 250 ale.

Vyangaireile eno Yehova oomuwandela Mose ira: ‘Landa imwiri ya sogoleli wa fuko lililetene teto ulembevo zina la sogoleliyo. Koma vaimwiri ya fuko la Levi ulembevo zina la Aroni. Vimwirivi uvi-ele mu ihema teto imwiri ya muthu unoyo ndimusakulile miyo inoza ipange maluwa.’

Dambo lo-arela, Mose oolanda vimwiri vyetene nowaoni-a asogolelale. Imwiri ya Aroni yali yangapangile maluwa nobala vipaso vya amondi vyoithwa. Vyevi vyoosimikizela ira Yehova ali angamusakulile Aroni ira akale ndimuwa wa asembe.