Ukuhobokeliwa bo Isembe Iyakutusatula Yichili Yitapelekiwe

Tungahobokeliwa imbibi zyitu ukwendela mu sembe iyakutusatula yene yo u Yesu akapeleka pakubombezya ibanda lyache. (Efe. 1.7) Cho chifukwa Ibayibolo likunena ukuti: “U Chala akabomba bunubu ukuti alanjizye ubugholosu bwache, pachifukwa icha bufisalyoyo bwache atakabafundila zila abantu babo bakananga,” pa kabalilo ko u Yesu akaba ukuti achili pakupeleka isembe. (Loma 3.25.) Ka nge u Yehova akabahobokela buli-buli imbibi bo isembe iyakutusatula yitapelekiwe nu kubukilila ukuba we u Chala uwabugholosu?

Kale u Yehova akalayizya ukuti akwiza pakupeleka uluko lo lukwiza pakubapoka abantu bo bali nu lwitiko mumwache na mu vyo alayizizye. Pa kabalilo ko akalayizyanga ilayizyo ili kukwache vikaba ngati ukuti isembe yapelekiwa kale. (Ubwa. 3.15; 22.18) U Chala akaba nu lusubilo ukuti pa kabalilo kache ko asalite, Umwana wache umughaniwa mwene akwiza ukuba ni chinyonywa ichakuti apeleke ubumi bwache ukuba sembe. (Gala. 4.4; Hebe. 10.7-10) Pa kabalilo ko u Yesu akaba pachisu ichapasi, u Yehova akamupa amaka aghakuti angahobokela abantu imbibi zyabo napo isembe yikaba ukuti yichili yitapelekiwe. U Yesu akaba na maka aghakuhobokela imbibi izya bantu bo bakaba nu lwitiko ichifukwa chakuti akamanya ukuti isembe yo inti apeleke inti yikupikile imbibi zyabo zyosi.—Mata. 9.2-6.