Ilalusyo Ilipepe Bulo lyo Aliwesi Angalalusya

U Mary nu mulume wache u John,a bakwikala ku chisu chimo cho bakulumbilila amazyu amiza ku banthu abinji bo bakufuma ku chisu icha Philippines. Pa kabalilo aka COVID-19, u Mary atakamanyila bulo Ibayibolo na banthu bo bakaba muchisu cho akikalagha loli akamanyilagha sona na banthu aba muvyisu ivyamwabo. Ka akabombagha bulibuli bunubu?

U Mary akabalalusyanga bo akamanyilagha nabo Ibayibolo ukuti, “Ka mumumenyeko yumo yo angalonda ukumanyila Ibayibolo?” Nanthi bamula ukuti inga, akababuzyanga ukuti bamwavwe ukuti amanyane nabo. Ukulalusya amalalusyo aghapepe ngati agha, kukaba ni vyakufumapo ivyiza. Chifukwa buli? Ichifukwa chakuti abanthu bo bakapalizyanga Amazyu gha Chala, bakalondagha ukubabuzyako vyo bakumanyila abamumbumba yabo na bamanyani babo. Choni cho chikabombiwa ichifukwa cha kulalusya amalusyo agha?

Umunthu yumo yo u Mary akamanyilagha nawe Ibayibolo izina lyache u Jasmin akamubuzya ukuti pali abanthu 4 bo bakulonda ukumanyila Ibayibolo. Weka uwa banthu aba akaba we Kristine, yo akahobokagha sana pakumanyila Ibayibolo umwakuti akamulaba u Mary ukuti bamanyilaghe kabili pa sabata. U Mary akati amulalusya nanthi angamumanyako aliweso yo wepe akulonda ukumanyila Ibayibolo, u Kristine akati, “Inga, alipo inthi mubuzye umumanyani wane ukuti mumumanye.” Pakati pendapo amasabata ghanandi bulo, u Kristine akamwavwa u Mary ukuti amanyane na banthu 4 bo bakalondagha ukumanyila. Pisinda pache, u Kristine akababuzya abamanyani bache abanji ivya Mary sona abanji bope bakabombagha bunubu ku banji.

U Kristine akalondagha sona ukuti imbumba yache ku Philippines yope yimanyilaghe Ibayibolo. Polelo akanena nu mwana wache umulindu u Andrea. Pabwandilo u Andrea akinong’onagha ukuti, ‘Abakaboni chipanga chimo cho chakuvulungannya, batakusubila mwa Yesu sona bakubombezya bulo Amasimbo agha Chihebeli basi.’ Loli akati amanyila koka bulo, akazyaghannya ukuti vyo akinong’onagha vikaba vyabumyasi. Pa kabalilo ko akamanyilagha, akanenagha ukuti, “Nanthi ivi vyovyo Ibayibolo likunena, kokuti vyabwanaloli!”

Akabalilo kakati kendapo, u Andrea akamubuzya u Mary ivya bamanyani bache babili sona ivya yo akabombagha nawe imbombo yo akanda ukumanyila nawe. Sona unasenje uwa Andrea, u Angela yo atakennyanga akateghelezyanga nanthi u Andrea akumanyila napo u Mary atakamanyagha. Loli isiku limo, u Angela akamubuzya u Andrea ukuti amubuzye u Mary ivya nasenje wache sona amulabe ukuti amanyilaghe nawe Ibayibolo. U Angela akavighana sana vyo akamanyilagha. Akati amanyila ukwa mwezi ghoka bulo, akasungila amasimbo aghinji sona akalondagha ukuti amanyilaghe amabulendo 4 pa sabata! U Andrea akamwavwa u Angela ukuti aghiwangepo pa nkhomano akabalilo kosi pakubombezya ividiyokonfelensi ichifukwa chakuti u Andrea akamutulagha.

U Mary akati amanya ukuti umulume uwa Kristine, u Joshua, akateghelezyanga po bakumanyila, akamulalusya nanthi wepe bulo angabangapo nanthi bakumanyila. U Joshua akamula ukuti , “Nkhuteghelezyako bulo, nthakulonda ukuti mundalusyange amalalusyo polelo nanthi mwandalusya bulo, inthi fumepo.” Ukwa 5 minisi iyabwandilo po bakamanyilagha, akalalusya amalalusyo aghinji ukuchila mo u Kristine akalalusyanga sona akalonda ukuti wepe bulo abukilile ukumanyila Ibayibolo.

Ichifukwa chakuti u Mary akalalusyanga amalalusyo aghapepe bulo, vikapangisya ukuti ande pakumanyila Ibayibolo na banthu abinji. Akapanga indondomeko iyakuti abinji mwa banthu aba, bamanyilaghe na Bakaboni abanji. U Mary akanda ukumanyila Ibayibolo na banthu 28 aba muvyisu 4 ivyakupambana.

U Jasmin yo akaba wabwandilo ukumanyila Ibayibolo, akoziwa mu Epulelo 2021. U Kristine akoziwa mu Meyi 2022 sona pa kabalilo aka akanyokela ku Philippines ukuti aye ikalaghe ni mbumba yache. Abanthu babili bo u Kristine akapangisya ukuti bande ukumanyila Ibayibolo nu Mary bope bulo bakoziwa. U Angela akoziwa pakati pendapo imyezi yinandi bulo sona pa kabalilo aka akubomba ngati mupayiniya uwa kabalilo kosi. Umulume wa Kristine u Joshua nu mwana wabo umulindu u Andrea, na banthu abinji bo bakamanyilagha, bakabukagha panthazi.

Mukabalilo aka Bakilisitu ababwandilo, amazyu amiza ghakasatagha mwalubilo sana pakasi pa banthu aba mumbumba na bamanyani babo. (Yoha. 1.41, 42; Imbo. 10.24, 27, 48; 16.25-33) Mungalalusya bo mukumanyila nabo Ibayibolo na banji ukuti, “Ka mumumenyeko yumo yo angalonda ukumanyila Ibayibolo?” Wenu yo angamanya abanthu bo banganda ukumanyila ichifukwa cha kulalusya ilalusyo ilipepe ili?