Mo Tungabela Mumanyani Umwenecho

KA MUKOMANITEPO ni nthamyo yimo yo mukiyivwa ukuti nayumoyumo yo angabavwa? Tukwikala mu ‘tubalilo utupalapala nkhani’ to tungatupangisya ukuti tuwe amaka nu kwipaghula ku banji. (2 Timo. 3.1) Napo vili bunubu, tutakulondiwa ukumalana ni nthamyo zyo tukukomana nazyo pa twebene. Ibayibolo likulongosola ukulondiwa ukwa kuba na bamanyani abenecho ‘mu tubalilo utwa nthamyo.’—Mbupi. 17.17.

MO ABAMANYANI ABENECHO BANGATUTULILA

Umutumiwa u Pabuli akapindulagha sana ichifukwa chakuti akaba na bamanyani abinji po akabombagha ubumishonale. (Kolo. 4.7-11) Pa kabalilo ko u Pabuli akaba mujele ku Loma, abamanyani bache bakamubombelagha imbombo zyo nge atakakwanisya ukubomba. Umwakufwanikizya, u Epafulodito akamupa u Pabuli ivinthu vyo akalondiwanga pa bumi vyo abakamu na bayemba bakatumizya ukufuma ku Filipi. (Filipi 4.18) U Tikika akapelekagha amakalata aghinji muvipanga gho u Pabuli akasimbagha. (Kolo. 4.7) Ichifukwa chakuti abamanyani bache bakamwavwanga, u Pabuli akakwanisya ukubomba akiza imbombo yache iyakulumbilila napo akaba mujele ilya panyumba sona nanthi ali kwaweka mujele. Ka amasiku ghano mungaba bulibuli mumanyani umwenecho?

Amasiku ghano, pali abakamu na bayemba abinji bo bakulangizya ukulondiwa ukwakuba na bamanyani abenecho. U Elisabet, umupayiniya uwakabalilo kosi uwa ku Spain akalongosola mo umuyemba yumo akamutulila pa kabalilo ko akakomana ni nthamyo. Pa kabalilo ko umama wache bakamwagha ni mbina iya khansa iyakuti atangapola, umuyemba akamutumila u Elisabet amameseji aghakumughomya gho akasimbamo ifundo izya mu Bayibolo. U Elisabet akati, “Amameseji agha, ghakampha amaka gho ghakanavwa ukuti isiku lililyosi niyivwange ukuti nthe neka.”—Mbupi. 18.24.

Tungaghomya ubumanyani bwitu na Bakilisitu abamwitu nanthi tukwavwapo pa mbombo zyo zikubombiwa pa chipanga. Umwakufwanikizya, ka mungamwavwa umukamu pamo umuyemba ukuti abuke ku nkhomano pamo mu bulumbilili? Nanthi mungabomba bunubu, mungahoboka sana ukuti mwamughomya sona wepe bulo angabaghomya hee. (Loma 1.12) Loli Abakilisitu bamo bakwikala bulo pa nyumba ichifukwa cha nthamyo zimo. Ka tungabavwa bulibuli?

MUBE BAMANYANI ABANECHO KU BO BAKWIKALA BULO PANYUMBA

Abakilisitu abamwitu bamo bakubina pamo bakukomana ni nthamyo zimo zyo zikubapangisya ukuti bapotwange ukwaghiwapo pa nkhomano. Inong’onela ichifwanikizyo icha David, yo bakamwagha ni mbina iya khansa. Akapokelagha ubutuli ubwa chipatala ichifukwa cha mbina iyi ukwa myezi 6. Akabalilo kosi ko akapokelagha ubutuli ubwa chipatala, u David nu muchi wache u Lidia bakapangagha inkhomano umwakulumikizya bulo pa intaneti po bali ku nyumba.

Ka abamanyani babo abakuchipanga bakabavwa bulibuli? Nanthi inkhomano zyamala, abakamu na bayemba bamo bo bakabanga ku Nyumba ya Bumwene bakayezyayezyanga ukuti banene nu David nu Lidia umwakubombezya ividiyokonfelensi. Umwakongelezyapo, nanthi u David nu Lidia bamulapo pa nkhomano, bakapokelagha amameseji aghakughomya ukufuma ku Bakilisitu abamwabo. Choni cho chikakonkhapo? Bakanda ukwiyivwa ukuti bate beka.

Nkhimba tungingila mu bulumbilili nu mukamu pamo umuyemba yo akwikala bulo panyumba ichifukwa cha nthamyo zimo? Inga, nanthi tungasintha ivinthu vimo nu kwingila nabo, tungalangizya ukuti tutabaluvizye. (Mbupi. 3.27) Ka mwalekelachi ukupaghula akabalilo akakuti mulumbilile nabo umwakusimba amakalata pamo ukulumbilila pa foni? Bo bakwikala bulo panyumba ichifukwa cha nthamyo zimo, bakukwanisya ukupanga inkhomano izyakwisengannya ukwingila mu bulumbilili pakubombezya ividiyokonfelensi. U David nu Lidia bakupalizya sana indondomeko iyi. U David akati, “Ukunenezannya ko kukubombiwa nanthi tukwisengannya ulukomano ulwa kubuka mu bulumbilili nu lwiputo kukutughomya sana.” Nanthi mo ivinthu vibeleye pa bumi bwinyu vikubitikizya ukuti mungabomba bunubu, ka mungapanga indondomeko iyakuti mubukaghe nu mumanyili winu uwa Bayibolo ukuti muye mumanyila kunyumba iya mukamu pamo umuyemba yo akupotwa ukufumapo panyumba ichifukwa cha nthamyo zimo?

Nanthi tukubomba na bakamu na bayemba bo bakupotwa ukufumapo panyumba ichifukwa cha nthamyo zimo, vingatwavwa ukumanya inkhalo zimo inyiza zyo bali nazyo umwakuti tungaba nabo pabumanyani. Umwakufwanikizya, nanthi mukubombela poka na balumbilili aba, nu kwenelezya mo bakubombezezya Amazyu gha Chala umwaluso nu kumufika umunthu yumo pa moyo, vingabapangisya ukuti mwande ukubaghana nkhani. Nanthi mukubavwa Abakilisitu abamwinyu ukuti babombe ivinthu ivyabuzimu, vingapangisya ukuti mube na bamanyani abinji.—2 Koli. 6.13.

U Pabuli akalimbikisiwa sana nu mumanyani wache u Titi. (2 Koli. 7.5-7) Inkhani iyi yikutukumbusya ukuti, tutangamusangalusya bulo Umukilisitu uwamwitu umwakumupelela ichisa, loli tubaghiye ukuba nawe poka nu kubomba ivinthu vyo vingamwavwa.—1 Yoha. 3.18.

MUBE MUMANYANI UMWENECHO PA KABALILO KO BAKUTUYIVYA

Abakamu na bayemba bitu aba ku Russia bakulangizya ichifwanikizyo ichiza sana ichakwavwana. Ennya vyo vikabombiwa kwa Sergey nu muchi wache u Tatyana. Abapolisi bakati basecha munyumba yabo, bakabasenda ukuti baye babalalusye amalalusyo. U Tatyana weyo bakandila pakumusatula, pisinda pache akanyokela kunyumba. U Sergey akati: “U [Tatyana] akati afika bulo panyumba, umuyemba yumo umujimvu akiza nu kukong’osya pa mulyango. Ukufuma apo, abakamu na bayemba abinji bakiza nu kwanda ukutwavwa ukuti tunyosezye ivinthu mumalo ghache.”

U Sergey akongelezyapo ukuti: “Akabalilo kosi nkhighanagha sana isimbo ilya Isya Mbupingamu 17.17, lyo likunena ukuti: ‘Umumanyani umwenecho akulangizya ulughano akabalilo kosi, sona we mukamu yo apapiwe ukuti akwavwe mutubalilo utwa nthamyo.’ Amazyu agha ghakaba ni ching’anamulo ichiza sana kwa une pa kabalilo ko bakatuyivyanga, nkhaninkhani nanthi vikuboneka ukuti nthangajimba pa nemwene. U Yehova atupiye abamanyani bo bakutwavwa sana akabalilo kosi.”a

Tukulondiwa ukuba na bamanyani abenecho bo bangatwavwa ukuti tujimbe ku nthamyo zyo tukukomana nazyo amasiku ghano. Pa kabalilo aka nthamyo inkhulu, popo tukwiza ukulondiwa nkhani ukuba na bamanyani abenecho. Polelo, pa kabalilo aka, za tubombe chilichosi cho tungakwanisya ukuti tube bamanyani abenecho ku bamwitu!—1 Pita. 4.7, 8.