INKANI IYAKUMANYILA 21
Mo u Yehova Akwamulila Inyiputo Zyitu
“Sona nanti tukumanya ukuti akutwivwa, bo tukumulaba ichintu chimo, po tukumanya sona ukuti twapokela chicho twamulabagha.”—1 YOHA. 5.15.
ULWIMBO 41 Mupulike Lurombo Lwane
VYO INTI TUMANYILEa
1-2. Choni cho akabalilo kamo tungakayikila nanti u Yehova akwamula inyiputo zyitu?
KA MWINONG’ONEYEPO lumo nanti u Yehova akwamula inyiputo zyinyu? Nanti vili bunubu, mute mwebene. Abakamu na bayemba abinji bope bakunena ukuti bakukayikila waghe u Yehova akwamula inyiputo zyabo nkani-nkani pakabalilo ko bakomana ni ntamyo. Nuswe nanti tukutamiwa, chingaba chakutamya ukumanya mo u Yehova akwamulila inyiputo zyitu.
2 Za twennye ichifukwa cho tungaba nu lusubilo ukuti u Yehova akwamula inyiputo izya babombi bache. (Yoha. 5.15) Inti tunenezanye sona amalalusyo agha: Choni cho akabalilo kamo vingaboneka ukuti u Yehova atakwamula inyiputo zyitu? Nkimba zila buli zyo u Yehova akwamulila inyiputo zyitu amasiku ghano?
U YEHOVA ATAKWAMULA MUZILA YO TWALINDILILAGHA
3. Choni cho u Yehova akulonda ukuti twiputaye kukwache?
3 Amasimbo ghakusimikizya ukuti u Yehova atughanite sona akutwennya ukuti swe bapamwanya sana kukwache. (Haga. 2.7; 1 Yoha. 4.10) Cho chifukwa akutubuzya ukuti tulabaghe ubutuli kukwache ukwendela mulwiputo. (1 Pita. 5.6, 7) Akulonda ukutwavwa ukuti tubukilile ukuba papipi nawe nu kukwanisya ukulimbana ni ntamyo zyo tukukomana nazyo.
U Yehova akamulagha inyiputo izya Devedi umwakumupoka ku bwalwani bache (Ennya indime 4)
4. Ka tukumanya buli-buli ukuti u Yehova akwamula inyiputo izya babombi bache?
4 Mu Bayibolo, tukubelenga inkani zyo zikulangizya ukuti u Yehova akwamula inyiputo izya babombi bache. Ka munginong’onelapo ichifwanikizyo chimo? Ichifwanikizyo choka cha Mwene u Devedi. Akaba na balwani abinji abakoghofya pa bumi bwache sona akabalilo kosi akalabagha ubutuli kwa Yehova munyiputo ukuti amwavwe. Pa chakubombiwa chimo akamulaba u Yehova ukuti: ‘Mwe Yehova ivwa ulwiputo lwane; mwivwisye ukulaba kwane po nkulaba ubutuli. Munamule mubusubaliwa bwinyu na mubugholosu bwinyu.’ (Sali. 143.1) U Yehova akamula inyiputo izya Devedi nu kumupoka. (1 Samu. 19.10, 18-20; 2 Samu. 5.17-25) U Devedi akanena nu lusubilo losi ukuti: ‘U Yehova ali papipi na bosi bo bakumwitizya.’ Nuswe bulo tungaba nu lusubilo ngati lunulu.—Sali. 145.18.
U Yehova akamulagha inyiputo izya mutumiwa u Pabuli umwakumupa amaka gho akalondiwanga ukuti ajimbe (Ennya indime 5)
5. Ka ababombi ba Yehova aba kale, bakamuliwanga inyiputo zyabo ukuyana na mo bakalondelagha? Nena ichifwanikizyo. (Ennya sona ichituzi.)
5 U Yehova atakwamula inyiputo zyitu muzila yo twalindililagha. Momo vikabela kwa mutumiwa u Pabuli. Akamulaba u Chala ukuti afyemo “umwivwa mumubili.” Katatu kosi, u Pabuli akiputa kwa Chala ukuti efyepo intamyo yache. Ka u Yehova akamula inyiputo zyache? Inga, loli muzila yo u Pabuli atakasubilagha. Mumalo mwakwefyepo intamyo, u Yehova akamupa amaka gho akalondiwanga ukuti abukilile ukumubombela umwabusubaliwa.—2 Koli. 12.7-10.
6. Choni cho akabalilo kamo tungennya ukuti u Yehova atakwamula inyiputo zyitu?
6 Akabalilo kamo nuswe bulo tungamuliwa inyiputo zyitu muzila yo tutalindililagha. Tukusubila ukuti u Yehova akumanya akiza ivintu vyo vingatwavwa. U Yehova “angabomba ivintu ivyinji ivisita kubelengiwa nukuchila vivyo tungalaba pamo ukuvyinong’ona.” (Efe. 3.20) Pa chifukwa chinichi, akwamula inyiputo zyitu pakabalilo, pamo muzila yo tutakwinong’onelapo.
7. Choni cho tukulondiwa ukusinta vyo tukwiputa? Nena ichifwanikizyo.
7 Tukulondiwa ukusinta akiputile kitu po tukubukilila ukumanya akiza ubwighane ubwa Yehova. Ennya ichifwanikizyo icha Martin Poetzinger. Umukamu Poetzinger akati asenda bulo, bakamwighalila ku jele iya Nazi. Kubwandilo, akamulaba u Yehova ukuti amwavwe ukuti afume mujele, umwakuti aye amupwelele umuchi wache nu kwanda sona imbombo iyakulumbilila. Loli pakati pendapo amasabata mabili, atakennyapo ubukaboni ubwakulangizya ukuti u Yehova inti amwavwe ukuti afume mujele. Pisinda pache akiputa kwa Yehova akati: “Mwe Yehova, napela nalamba ndangizye cho mukulonda ukuti mbombaghe.” Pa kabalilo aka akanda pakwinong’onelapo vyo abakamu ku kampu iyi bakabombagha ukuti bajimbe ku ntamyo zyo bakakomanagha nazyo. Abakamu abinji bakapasyanga nanti bakwinong’onelapo ivyakukwafannya na bachi na bana babo. Ukufuma apo Umukamu Poetzinger akiputa ukuti: “Mwe Yehova, nkupalizya sana ichifukwa cha mbombo impya yo mwampa. Munavwe ukuti imbaghomye abakamu bane.” Mujele akikalamo imyaka 9 akubomba imbombo yo u Yehova akamupa iyakughomya abakamu.
8. Nkimba tukulondiwa ukukumbikila ichoni nanti tukwiputa?
8 Tukumbukilaghe ukuti u Yehova ali vintu vyo akulonda ukubomba sona akulonda ukuti avikwanilisye pakabalilo ko asalite. Ubwighane bwache bukongelezyapo ukwefyapo intamyo zyosi ni vintu vyosi vyo vikupangisya ukuti pakabalilo aka tutamiwanje, ni ntamyo ngati ingozi izya muchipeliwa, imbina nu bufwe. U Yehova akwiza pakukwanilisya ubwighane bwache ubu ukwendela mu Bumwene bwache. (Dani. 2.44; Ubuvu. 21.3, 4) Loli u Yehova inti amwitikizye u Satana ukuti abukilile ukulaghila ichisu mupaka pakabalilo ko akwiza pakukwanilisya ubwighane bwache.b (Yoha. 12.31; Ubuvu. 12.9) Nanti pakabalilo aka u Yehova angefyapo intamyo zyosi izya bantu, vingaboneka ngati ukuti u Satana akulaghila akiza ichisu. Po tukulindilila ukuti u Yehova ize akwanilisye ivintu vyo atulayizizye, vitakung’anamula ukuti atulekite swebene ukusita ubutuli bulibosi. Pakabalilo aka za twennye izila zimo zyo u Yehova akubombezya ukuti atwavwe.
MO U YEHOVA AKWAMULILA INYIPUTO ZYITU AMASIKU GHANO
9. Ka u Yehova angatwavwa buli-buli nanti tukulonda ukusala ichakubomba? Nena ichifwanikizyo
9 Akutupa amahala. U Yehova akutulayizya ukutupa amahala gho ghangatwavwa ukuti tusalaghe akiza ivintu. Tukulondiwa amahala aghakufuma kwa Yehova nanti tukulonda ukusala ivintu ivikulu vyo vingasinta ubumi bwitu, ngati ukusala ukuti tube pa sendwa pamo awee. (Yako. 1.5) Ennya vyo umuyemba u Mariac akakomana navyo po akaba ukuti achili atasendizwe. U Maria akahobokagha nu bupayiniya ubwa kabalilo kosi po akakomanagha nu mukamu. Akanena ukuti: “Po ubumanyani bwitu bukakulagha, aliwesi akanda pakumughana uwamwabo. Nkamanya ukuti nkulonda ukusala ichintu ichikulu pa bumi bwane. Nkiputa kwa kabalilo akatali ivyakukwafannya ni nkani iyi. Nkalondiwanga ubulongozi ubwa Yehova, loli nkamanya ukuti u Yehova atangasalila ichakubomba.” U Maria akiyivwa ukuti u Yehova akamula inyiputo zyache pakumupa amahala. Buli-buli? Pakabalilo ko akalondagha ifundo izyakwavwa mu mabuku ghitu, akazyagha inkani zyo zikamwavwa ukwamuliwa amalalusyo gho akaba nagho. Akivwila sona ubulongozi ubwamahala ubwakufuma kwa mama wache yo akaba musubaliwa. Ubulongozi ubu bukamwavwa ukuti amanye mo angasalila akiza. Pabumalilo pache, vikamwavwa ukuti asale ivintu umwa mahala.
Ka u Yehova akutupa buli-buli amaka ukuti tujimbe? (Ennya indime 10)
10. Ukuyana na Aba Filipi 4.13, nkimba u Yehova akubomba ichoni ukuti abavwe ababombi bache? Nena ichifwanikizyo. (Ennya sona ichituzi.)
10 Akutupa amaka ukuti tujimbe. U Yehova akwiza pakutupa amaka aghakuti ghatwavwe ukujimba ku ntamyo zyitu ngati mo akabombela nu mutumiwa u Pabuli. (Belenga Aba Filipi 4.13.) Ennya mo u Yehova akamutulila umukamu yumo izina lyache u Benjamin ukuti ajimbe ku ntamyo zyo akakomana nazyo. Ukufuma ku bwana bwache, u Benjamin, ubaba wache, umama wache na bana abamwabo 4 bakikalagha ku Africa kumalo aghakusungilako abantu bo bachimbila kukwabo. U Benjamin akanena ukuti: “Akabalilo kosi nkiputagha kwa Yehova, ukumulaba ukuti ampe amaka aghakuti mbombaghe ivintu ivyakumuhobosya. U Yehova akamula inyiputo zyane pakumpa umutende uwa mu nyinong’ono, ukumpa amaka aghakuti mbukilile pakulumbilila na mabuku gho ghakanavwa ukuti mbukilile ukuba wakughoma mwabuzimu.” Akanena sona ukuti: “Ukubelenga inkani izya bakamu na bayemba nu kwennya mo u Yehova akabatulila ukuti bajimbe ku ntamyo zyabo, kukanavwa ukuti mbukilile ukuba musubaliwa.”
Ka u Yehova akabatulapo lumo pakubombezya abakamu na bayemba ukuti babavwe? (Ennya indime 11-12)d
11-12. Ka u Yehova angabombezya buli-buli abakamu na bayemba pakwamula inyiputo zyitu?
11 Akubombezya imbumba yitu iya buzimu. Pabusiku, bo u Yesu achili pakwiyipa ubumi bwache akiputa ukufuma pasi pa moyo. Akamulaba u Yehova ukuti atakitikizye ukuti abantu binong’one ukuti wamusamu nu kumuleka weka. Mumalo mwakuti abombe bunubu, u Yehova akamwavwa u Yesu pakumutumila uwantumi ukuti amukazye. (Luka 22.42, 43) Amasiku ghano, u Yehova angatwavwa pakubombezya imbombo abakamu pamo abayemba bo bangatwimbila ifoni pamo bangiza kunyumba yitu ukuti bize batukazye. Aliwesi uwa uswe angabombezya ulusako lo alwagha pakunena ‘amazyu amiza’ ku Bakilisitu abamwabo.—Mbupi. 12.25.
12 Ennya vyo umuyemba yumo izina lyache u Miriam akakomana navyo. Pakati pendapo amasabata aghadono bulo ukufuma po umulume wache akafwila, u Miriam akasyala weka panyumba, akiyivwanga ukuti atangabomba nachimo-chimo sona akatamiwanga inyinong’ono. Akabalilo kosi akalilagha bulo ukusita ukuleka, akalondagha ukuti anganenezannyako nu muntu yumo. Akanena ukuti: “Ntakaba na maka aghakuti ningamwimbila umuntu aliwesi ifoni, mumalo mwache nkiputa kwa Yehova. Pakabalilo ko nkaba ukuti inchili nkulila nu kwiputa, ifoni yane yikalila. Akaba umukamu u songo uwa chipanga weyo akanimbila.” U Miriam akakaziwa nu songo uwa chipanga nu muchi wache. Umuyemba uyu akamanya ukuti u Yehova weyo apangisya ukuti umukamu uyu amwimbile ifoni.
Ka u Yehova angabombezya buli-buli abantu abanji ukuti batwavwe? (Ennya indime 13-14)
13. Nena ichifwanikizyo cho chikulangizya mo u Yehova angabombezezya abantu bo batakumwiputa pakwamula inyiputo zyitu.
13 Angabombezya abantu bo batakumwiputa. (Mbupi. 21.1) Pakabalilo kamo, u Yehova akwamula inyiputo izya babombi bache pakubombezya abantu bo batakumwiputa. Umwakufwanikizya, akabombezya u Mwene u Alitazekisesi ukumwitikizya u Nehemiya ukuti abuke ku Yelusalemu nu kwavwapo pakuzenga sona itawuni iya Yelusalemu. (Nehe. 2.3-6) Umwakuyana bulo, amasiku ghano u Yehova angabombezya imbombo abantu bo batakumwiputa ukuti batwavwe pa vintu vyo tukulondiwa.
14. Ka vyo u Soo Hing akakomana navyo vyabaghomya buli-buli? (Ennya sona ichituzi.)
14 Umuyemba yumo izina lyache u Soo Hing akiyivwa ukuti u Yehova akamwavwa pakubombezya imbombo u dokotala wache. Umwana wache umulumendo akatamiwanga ni mbina izyakupambana-pambana izya mubongo. Umwana wabo akati apanga ingozi inkulu, vikapangisya ukuti umuyemba uyu nu mulume wache baleke imbombo ukuti bamupwelelelaghe umwana wabo. Ivi vikapangisya ukuti bande pakutamiwa ukwagha indalama. U Soo Hing akanena ukuti akiyivwa ukuti atangakwanisya ukujimba ku ntamyo iyi. Umuyemba uyu akapungulila umoyo wache kwa Yehova ukumulaba ukuti amwavwe. Udokotala akinong’ona ukuti aghe izila iyakuti amutulile umuyemba uyu ni mbumba yache. Ivi vikapangisya ukuti bapokele ubutuli ukufuma ku boma, vyo vikabavwa ukuti bande pakwikala pa malo aghakuti bangakwanisya ukulipila. Pisinda pache, u Soo Hing akanena ukuti: “Tukennya mo u Yehova akatutulila. Pakabalilo aka tukasimikizya ukuti u Yehova we Chala ‘uwa kwivwa inyiputo.’”—Sali. 65.2.
TUKULONDIWA UKUBA NU LWITIKO UKUTI TUMANYE NU KWITIKIZYA MO U YEHOVA ATWAMULILA
15. Choni cho chikamwavwa umuyemba yumo ukumanya ukuti u Yehova akamula inyiputo zyache?
15 Akabalilo kosi inyiputo zyitu zitangamuliwa muzila yo twalondagha. Loli amaansala gho tungapokela ghangaba ukuti ghogho twalondiwanga ukuti tubukilile ukuba basubaliwa kwa Baba witu uwa kumwanya. Akabalilo kosi mubanje maso ukuti mumanye mo u Yehova amulila inyiputo zyinyu. Umuyemba yumo izina lyache u Yoko akiyivwanga ukuti u Yehova atakwamula inyiputo zyache. Loli pisinda pache akanda ukusimba mwibuku ivintu vyo amulabite u Yehova. Akabalilo kakati kendapo, umuyemba uyu akennya mwibuku lyache mo akasimbamo ivintu vyo akamulabagha u Yehova, akagha ukuti inyiputo zyache izyinji zyamuliwe, ni vintu vimo vyo akalaba loli akaba ukuti aluvizye. Akabalilo kosi tukulondiwa ukuti twinong’onelaghepo mo u Yehova akwamulila inyiputo zyitu.—Sali. 66.19, 20.
16. Ka tungalangizya buli-buli ukuti tuli nu lwitiko munyiputo zyitu? (Aba Hebeli 11.6)
16 Tutakulangizya ukuti tuli nu lwitiko nanti tukwiputa bulo kwa Yehova loli nanti tukwitikizya muzila yiliyosi yo atwamulila inyiputo zyitu. (Belenga Aba Hebeli 11.6.) Ennya ichifwanikizyo icha Mike nu muchi wache u Chrissy. Bakalondagha ukuti baye bamubombele u Yehova pa Beteli. U Mike akanena ukuti: “Tukasimba amafomu kwa myaka iyinji nu kwiputa kwa Yehova umwakupyanizya-pyanizya ukuti atwavwe ukukwanilisya vyo tukalonda loli vitakabombiwa.” U Mike nu Chrissy bakabukilila ukusubila ukuti u Yehova akumanya po bangamubombela akiza mu mbombo yache. Bakabukilila ukubomba chilichosi cho bangakwanisya pakupanga ubupayiniya ubwa kabalilo kosi kumalo ko kukalondiwanga ubutuli nu kwavwapo pa mbombo iya vyakuzenga mugulu ilya Yehova. Amasiku ghano bakubomba imbombo iya kwendela ivipanga. U Mike akanena ukuti: “U Yehova atakamula inyiputo zyitu muzila yo tukalindililagha, loli akamula inyiputo zyitu muzila inyiza sana yo tutakinong’onelaghako.”
17-18. Ukuyana nu Salimo 86.6, 7, ka tubaghiye ukuba nu lusubilo buli?
17 Belenga Salimo 86.6, 7. Uwa masalimo u Devedi akasubilagha ukuti u Yehova akwivwa nu kwamula inyiputo zyache. Numwe bulo mungaba nu lusubilo ulwakuyana bulo. Ivifwanikizyo vyo twanenezannya munkani iyi vyatusimikizya ukuti u Yehova angatupa amahala na maka ukuti tukwanisye ukujimba ku ntamyo zyo tukukomana nazyo. Akabalilo kamo angabombezya abakamu na bayemba pamo abantu bo batakumwiputa ukuti batwavwe.
18 Napo akabalilo kosi u Yehova atangamula inyiputo zyitu muzila yo twalindililagha, loli tukumanya ukuti akwiza pakutwamula. Akwiza pakutupa vyo tukulondiwa sona pakabalilo kache. Mubukilile ukwiputa nu kusubila ukuti u Yehova pakabalilo aka akubivwa, akubapwelelela sona akwiza ‘pakwikutisya ichinyonywa icha chipeliwa chilichosi’ muchisu ichipya.—Sali. 145.16.
ULWIMBO 46 Tikumuwongani Yehova
a U Yehova akusimikizya ukuti akwamula inyiputo zyitu nanti zikukolelana nu bwighane bwache. Nanti tujimba ku ntamyo zyo tukukomana nazyo, tukuba nu lusubilo ulwakuti akutupa ubutuli bo tukulondiwa ukuti tubukilile ukuba basubaliwa kukwache. Za twennye mo u Yehova akwamulila inyiputo zyitu.
b Ukuti mumanye ichifukwa cho u Yehova amwitikizizye u Satana ukuti alaghile ichisu, ennya inkani iyakuti “Mughanaghanirenge Nkhani Yakuzirwa” mu Ichitembe cha Mulindilili icha Chitumbuka icha Juni 2017.
c Amazina ghamo munkani iyi ghasinta.
d AMAZYU AGHAKULONGOSOLA ICHITUZI: Umama nu mwana wache umulindu, bachimbila kukwabo nu kufika muchisu ichinji. Abakilisitu abamwabo bakubapokelela ni nyobe zibili nu kubapa ubutuli bo bakulondiwa.