INKANI IYAKUMANYILA 20
Mo Tungiputila Inyiputo Inyiza
‘Mupungulile imyoyo yinyu kukwache.’—SALI. 62.8.
ULWIMBO 45 Maghanoghano gha Mtima Wane
VYO INTI TUMANYILEa
Akabalilo kosi tungiputa kwa Yehova nu kulaba ubulongozi pa chilichosi cho tukulonda ukubomba pa bumi bwitu (Ennya indime 1)
1. Nkimba u Yehova akulonda ukuti abantu bo bakumwiputa babombaghe ichoni? (Ennya sona ichituzi.)
KA WENU yo angatusangalusya nu kutupa ubulongozi? Uansala uwi lalusyo ili tumumenye kale. Tungiputa kwa Yehova u Chala. U Yehova akutubuzya ukuti tubombaghe bunubu. Ibayibolo likutubuzya ukuti “mwiputaye akabalilo kosi,” ivi vikulangizya ukuti u Yehova akulonda ukuti akabalilo kosi tumwiputaye. (1 Tesa. 5.17) Akabalilo kosi tungiputa kwa Yehova nu kulaba ubulongozi pa chilichosi cho tukulonda ukubomba pa bumi bwitu. (Mbupi. 3.5, 6) Ichifukwa chakuti u Yehova wakufikilika, akutubuzya ukuti tungamufika mu lwiputo akabalilo kosi ko tukulonda.
2. Nkimba munkani iyi inti tunenezannye ichoni?
2 Tukumupalizya nkani u Yehova chifukwa chakutupa ulusako ulwakuti twiputaghe kukwache. Aliwesi ali nu bwabuke ubwa lwiputo, loli akabalilo kamo chingaba chakutamya ukuti twaghe akabalilo akakuti twipute. Tubaghiye ukwinong’onelapo mo tungiputila inyiputo inyiza. Tukupalizya sana ukuti mu Masimbo tungaghamo ifundo izyakukazya nu bulongozi. Munkani iyi, inti tunenezannye mo tungabombela ukuti tupaghulaghe akabalilo akakwiputila ngati mo u Yesu akabombelagha. Inti tunenezannye ifundo 5 zyo zingatwavwa mo tungiputila inyiputo inyiza.
U YESU AKAPAGHULAGHA AKABALILO AKAKWIPUTILA
3. Nkimba u Yesu akamanyagha ichoni ivyakukwafannya ni nyiputo?
3 U Yesu akamanyagha ukuti inyiputo zyitu zyakulondiwa sana kwa Yehova. Bo atizite pachisu ichapasi, akennyanga mo u Baba wache akamulilagha inyiputo izya banavuli na bakolo abasubaliwa. Umwakufwanikizya, u Yesu akaba papipi nu Bababa wache po akamulagha inyiputo izya Hana, u Devedi, u Eliya sona na bantu abanji abasubaliwa. (1 Samu. 1.10, 11, 20; 1 Nyafya. 19.4-6; Sali. 32.5) Cho chifukwa u Yesu akabamanyisya abamanyili bache ukuti akabalilo kosi biputaghe nu lusubilo!—Mata. 7.7-11.
4. Nkimba tukumanyilako ichoni ukufuma ku nyiputo izya Yesu?
4 Mo u Yesu akiputilagha kwa Yehova, vikabavwa abamanyili bache ukumanya mo bangiputila. Mukabalilo kosi ko akalumbililagha pachisu ichapasi, u Yesu akiputagha papipi-papipi. U Yesu akalondiwanga ukupaghula akabalilo akakwiputila ichifukwa chakuti akabalilo akinji akabanga wakutangwanika sona akabanga na bantu abinji. (Mali. 6.31, 45, 46) Akalabilanga pandabi-ndabi ukuti abe na kabalilo akakwiputila pa weka. (Mali. 1.35) Pachakubombiwa chimo, akiputa busiku bosi po achili atasalite ichintu chimo ichakulondiwa sana. (Luka 6.12, 13) Ubusiku bwache ubwabumalilo pachisu ichapasi bo achili pakufwa, u Yesu akiputa umwakupyanizya-pyanizya ukuti vimwavwe ukumalizya akiza ichigaba ichakutamya ichabumalilo icha mbombo yo u Tata wache akamupa pachisu ichapasi.—Mata. 26.39, 42, 44.
5. Ka tungamuyezya buli-buli u Yesu po tukwiputa?
5 Mo u Yesu akabombelagha, vikutumanyisya ukuti nuswe bulo napo tungaba bakutangwanika, loli tupaghulaghe akabalilo akakuti twiputaye. Ngati we Yesu, nuswe bulo tukulondiwa ukwagha akabalilo akakwiputila. Tungasala ukwiputa kundabi-ndabi pamo kuchamabwila. Nanti tukubomba bunubu, tukulangizya ukuti tukumupalizya u Yehova ichifukwa icha chabupi ichapamwanya ichi. Umuyemba yumo izina lyache u Lynne, akukumbukila mo akapalizizya akati amanya ulusako lo ali nalo ulwakwiputa. U Lynne akanena ukuti, “Nkati namanya ukuti ningiputa kwa Yehova akabalilo kosi, vikanavwa ukuti nande pakwinong’ona ukuti u Yehova we Mumanyani wane uwa papipi sona nkalondagha ukumanya mo ningiputila inyiputo inyiza.” Tutakukayikila ukuti twebingi tukwiyivwa umwakuyana bulo. Pakabalilo aka za tunenezannye ifundo 5 izyakulondiwa zyo tungazitambula munyiputo zyitu.
IFUNDO 5 IZYAKULONDIWA PO TUKWIPUTA
6. Nkimba u Yehova akulondiwa ukupokela ichoni ukuyana nu Ubuvumbuli 4. 10, 11?
6 Ukumupala u Yehova. Muchisetuka, umutumiwa u Yohani akennya abasongo 24 kumwanya ukuti bakumwiputa u Yehova. Bakamupalagha u Chala nu kunena ukuti weyo abaghiye ukupokela “ubuchindamu, nu muchizi na maka.” (Belenga Ubuvumbuli 4.10, 11.) Abantumi abasubaliwa bope bali ni vifukwa ivyinji ivyakumupalila nu kumuchindika u Yehova. Bakwikala nawe kumwanya sona bamumenye akiza sana. Bakuzimanya akiza inkalo izya Yehova ukwizila mu vintu vyo akubomba. Nanti bakwennya mo u Yehova akubombela ivintu, vikubapangisya ukuti bamupalaghe.—Jobu 38.4-7.
7. Chifukwa buli tukulondiwa ukumupala u Yehova?
7 Nuswe bulo tukulonda ukuti tumupalaghe u Yehova munyiputo zyitu. Tungabomba bunubu nanti tukumubuzya ivintu vyo tuvighanite ivyakukwafannya nu Yehova ni chifukwa cho tukumuchindikila. Nanti mukubelenga nu kumanyila Ibayibolo, muyezye ukwennya inkalo zyo u Yehova ali nazyo zyo mukunyonywa ukuti numwe mube nazyo. (Jobu 37.23; Loma 11.33) Pisinda pache mumubuzye u Yehova mo mukwiyivwila ichifukwa cha nkalo zyache zyo mwamanyila. Tumupalaghe u Yehova ichifukwa chakuti akutwavwa sona akwavwa abakamu na bayemba bitu bosi. Akabalilo kosi atupasikizya nu kutufighilila.—1 Samu. 1.27; 2.1, 2.
8. Nkimba tuli ni vifukwa buli ivyakumupalizizya u Yehova? (1 Aba Tesalonika 5.18)
8 Ukumupalizya u Yehova. Tuli ni vifukwa ivyinji ivyakumupalizizya u Yehova mu lwiputo. (Belenga 1 Aba Tesalonika 5.18.) Tungamupalizya ichifukwa cha ivintu ivyiza vyosi vyo tuli navyo, ichifukwa ichabupi chosi ichiza chikufuma kwa Yehova. (Yako. 1.17) Tungamupalizya ichifukwa icha chisu ichiza cho tukwikalamo ni vipeliwa vyosi vyo apelite ivyakuswighisya. Tungamupalizya sona ichifukwa cha bumi, imbumba yitu, abamanyani bitu nu lusubilo lo tuli nalo ulwa vintu ivyamuntazi. Tukulonda ukumupalizya sona u Yehova ichifukwa chakutwitikizya ukuti tube bamanyani bache.
9. Choni cho tukulondiwa ukubukilila ukumupalizya u Yehova?
9 Tukulondiwa ukuti aliwesi pa weka apaghulaghe akabalilo nu kwinong’onelapo ivifukwa ivyakumupalizizya u Yehova. Tukwikala muchisu cho abantu abinji batakupalizya. Abantu abinji bakubika inyinong’ono zyabo pa vintu vyo bakulonda ukuti babe navyo, mumalo mwa kwennya vyo bangabomba ukuti bapalizye ivintu vyo bali navyo kale. Nanti nuswe tungasendelako akinong’onele aka, vingapangisya ukuti akabalilo kosi inyiputo zyitu zibanje bulo izyakumulaba. Ukuti ivi vitakabombiwe, tukulondiwa ukubukilila ukumupalizya u Yehova pa chintu chilichosi cho akutubombela.—Luka 6.45.
Nanti tukumupalizya u Yehova mu lwiputo pa vintu vyo atupiye, vingatwavwa ukuti tujimbe (Ennya indime 10)
10. Ka ukuba nu moyo uwakupalizya kukamwavwa buli-buli umuyemba yumo ukuti ajimbe? (Ennya sona ichituzi.)
10 Nanti tuli nu moyo uwakupalizya, vingatwavwa ukuti tujimbe ku ntamyo zyo tungakomana nazyo. Ennya intamyo yo umuyemba Kyung-sook akakomana nayo. Inkani yache yikwaghiwa mu Ichitembe cha Mulindilili icha Chitumbuka icha Janiwale 15, 2015. Umuyemba uyu akayiwa nu kansa uwa mubapafwa. Akanena ukuti “imbina iyi yikaba yikulu sana kukwane. Nkiyivwa ukuti naluza chilichosi, sona nkaba ni lyogha sana.” Choni cho chikamwavwa ukuti ajimbe ku ntamyo iyi? Umuyemba uyu akanena ukuti ubusiku bulibosi po achili pakughona, akiputagha kwa Yehova umwakukwezya amazyu nu kutambula ivintu ivyiza 5 vyo akapalizyanga pisiku lila. Ivi vikamwavwanga ukuti iyivwange akiza nu kumupangisya ukuti amughanaghe nkani u Yehova. Pakabalilo aka akamanya mo u Yehova akutulila ababombi bache nanti bali mu ntamyo, sona akivwisya ukuti pali ivintu ivyiza ivyinji ukuchila intamyo zyo akakomana nazyo. Ngati we muyemba Kyung-sook, nuswe bulo tuli ni vifukwa ivyinji ivyakumupalizizya u Yehova, napo tungaba ukuti tuli ni ntamyo. Nanti tukumupalizya u Yehova mu lwiputo, vingatwavwa ukuti tujimbe nu kubukilila ukuba bakuhoboka.
11. Choni cho abatumiwa bakalondiwanga ukuba bakujimba u Yesu ati anyokela kumwanya?
11 Ukumulaba u Yehova ukuti mutakabe ni lyogha po mukulumbilila. Bo achili atanyokeye kumwanya, u Yesu akabakumbusya abamanyili bache imbombo yo akabapa iyakuti balumbilile “mu Yelusalemu, na mu Yudeya mosi, sona na mu Samaliya, mupaka na ku mpaka iya chisu ichapasi.” (Imbo. 1.8; Luka 24.46-48) Akabalilo kakati kendapo, abalongozi Abachiyuda bakamupinya umutumiwa u Pitala nu Yohani nu kubuka nabo ku Sanihedilini, bakalamula ukuti abanavuli abasubaliwa aba baleke pakulumbilila sona bakaboghofya. (Imbo. 4.18, 21) Ka u Pitala nu Yohani bakabomba buli-buli?
12. Nkimba abatumiwa bakabomba ichoni ukuyana na Imbombo 4.29, 31?
12 Pakubamula abalongozi aba chipanga icha Chiyuda, u Pitala nu Yohani bakanena ukuti: “Mulonge mwe bene, nkimba choni chicho chizapo pamaso pa Chala—ukubivwila amwe [umwe] pamo ukumwivwila u Chala. Pakuti tutangaleka pakunena zizyo twiyenezya na maso ghitu nu kwiyivwila na makutu ghitu.” (Imbo. 4.19, 20) U Pitala nu Yohani bakati babasatula, abamanyili bakiputa kwa Yehova ukuti abavwe ukubomba ubwighane bwache. Bakiputa ukuti: “Utwavwe aswe [uswe] twe, babombi bako, pakulumbilila amazyu ghako nu bujivu nkani.” U Yehova akamula ulwiputo lwabo ulwakufumila pasi pa moyo.—Belenga Imbombo 4.29, 31.
13. Nkimba tukumanyilako ichoni ukufuma kwa mukamu Jin-hyuk?
13 Tungabayezya abatumiwa nanti tukubukilila ukulumbilila napo iboma lingalamula ukuti tuleke pakulumbilila. Ennya vyo umukamu Jin-hyuk akakomana navyo. Umukamu uyu akaba mujele ichifukwa chakuti iboma likakanizya imbombo yitu iyakulumbilila. Mujele, bakamupa imbombo iyakuti enelezyange abakayidi abamwabo bo bakaba ku jele iyakwabene, loli bakamwitikizya ukuti anenaghe nabo ivintu vyeka vyo bakalondiwanga. Batakamwitikizya ukuti anenaghe nabo ivyakukwafannya ni Bayibolo. Akiputa kwa Yehova ukuti amwavwe ukuba wakujimba umoyo sona waluso nanti agha ulusako ulwakuti angalumbilila. (Imbo. 5.29) Akanena ukuti: “U Yehova akamulagha inyiputo zyane akanavwa ukuti imbe ne wakujimba nu kumpa amahala ukuti nande pakumanyila nabo Ibayibolo kwa 5 minisi pamulyango uwa jele yiliyosi. Pisinda pache, ubusiku nkalemba abakalata ukuti indabi nize imbape abakayidi abamwitu.” Nuswe bulo tungaba nu lusubilo ukuti u Yehova angatwavwa ukuti tukwanisye imbombo yitu iya kulumbilila. Ngati mo u Jin-hyuk akabombela nuswe bulo tungamulaba u Yehova ukuti tube swe bakujimba sona bamahala.
14. Choni cho chingabavwa ukulimbana ni ntamyo zyo mukukomana nazyo? (Salimo 37.3, 5)
14 Ukumulaba u Yehova ukuti abavwe ukulimba ni ntamyo. Twebingi amasiku ghano tukutamiwa ichifukwa cha mabubine pamo ukutamiwa inyinong’ono, ubufwe, intamyo izya mumbumba, ukupinyiwa pamo intamyo izyakupambana-pambana. Ivintu ngati imbina izyakwambukila ni nkondo vingapangisya ukuti chibe chakutamya ukujimba ku ntamyo zyo tukukomana nazyo. Nanti mwakomana ni ntamyo yiliyosi, mumubuzye u Yehova mo mukwiyivwila. Mumubuzye mo ivintu vibeleye pa bumi bwinyu, ngati mo mungamubuzizya umumanyani winyu uwa pa moyo. Musubilaghe ukuti u Yehova ‘akwiza pakubavwa.’—Belenga Salimo 37.3, 5.
15. Ka u lwiputo lungatwavwa buli-buli ukuti tujimbe “mu ntamyo”? Nena ichifwanikizyo.
15 Nanti akabalilo kosi tukwiputa vikwiza pakutwavwa ukuti tujimbe “mu ntamyo.” (Loma 12.12) U Yehova akumanya intamyo zyo ababombi bache bakukomana nazyo, ‘akwivwa ukulila kwabo nu kubavwa.’ (Sali. 145.18, 19) U Kristie yo mupayiniya ali ni myaka 29 akitikizya ukuti ifundo iyi yabwanaloli. Umwakuchenusya akanda pakubina. Ivyakukonkapo vyache akanda pakutamiwa inyinong’ono. Pisinda pache akamanya ukuti umama wache bakamwagha ni mbina yo nge akafwa nayo. U Kristie akanena ukuti: “Nkiputa kwa Yehova ukufumila pasi pa moyo ukuti ampe amaka gho nkalondiwanga isiku lililyosi. Nkabukilila ukupanga ivintu ivya buzimu ngati ukubuka ku nkomano nu kumanyila Ibayibolo pa nemwene.” Akongelezyapo ukuti: “Ulwiputo lukanavwa ukuti ijimbe mukabalilo akakutamya ngati aka. Akabalilo kosi nkinong’onagha ukuti u Yehova akabanga nune, akinong’onele aka kakanavwa ukuti niyivwange akiza. Napo intamyo yane yitakamala mwalubilo, loli u Yehova akamulagha inyiputo zyane pakumpa umutende uwa mumoyo nu kuti umoyo wane ghube mumalo.” Tutakuluvya ukuti u Yehova “amenye na mumo akubapokela munjelo abantu babo bakumunyila.”—2 Pita. 2.9.
Ukuti mujimbe ku njelo, (1) mulabaghe ubutuli ubwa Yehova, (2) mutakabombe chilichosi cho chingapangisya ukuti muyeliwe sona (3) mughomye ubumanyani bwinyu nu Yehova (Ennya indime 16-17)
16. Choni cho tukulondiwa ubutuli ubwa Yehova ukuti tuzipote injelo?
16 Ukulaba ubutuli ubwa Yehova ukuti muzipote injelo. Ichifukwa chakuti swe bantu abambula ukufikapo, akabalilo kosi tukulimbana ni njelo zyo zingatupangisya ukuti tubombe ivintu ivibibi. U Satana akubomba chilichosi cho angakwanisya umwakuti atupangisye ukuti chibe chipala ukubomba ivintu ivyiza. Izila yoka yo akubombezya imbombo yakuti akuvulungannya akinong’onele kitu ukuti tusalaghe ivyakusangalusya ivibibi. Ivyakusangalusya vimo vingizuzya ivintu ivibibi mu nyinong’ono zyitu, vyo vingapangisya ukuti tutakabe baswepu pamaso pa Yehova sona vingatupangisya ukuti tubombe imbibi inkulu.—Mali. 7.21-23; Yako. 1.14, 15.
17. Ka tukulondiwa ukubomba ichoni nanti twalaba ubutuli ukuti tutakayeliwe? (Ennya sona ichituzi.)
17 Tukulondiwa ubutuli ubwa Yehova nanti tukulonda ukuzipota injelo izyakuti tubombe ivintu ivibibi. Mu lwiputo lwache ulwa chifwanikizyo, u Yesu akongelezyapo ifundo iyi: “Utakitikizyanje ukuti tuwile munjelo, loli utupoke kwa Satana Umubibi yula.” (Mata. 6.13) U Yehova akulonda ukuti atwavwe, loli tukulondiwa ukulaba ubutuli bwache. Nanti twalaba ubutuli kwa Yehova, tukulondiwa ukubomba chilichosi cho tungakwanisya ukuti tutakabombe ivintu vyo vingapangisya ukuti tuyeliwe. Tuyezye ukubomba chilichosi cho tungakwanisya ukuti tutakabelenge nu kwivwisya ivintu ivibibi vyo vibalite muchisu icha Satana ichi. (Sali. 97.10 ) Tungizuzya ivintu ivyiza mu nyinong’ono zyitu umwakubelenga nu kumanyila Ibayibolo. Ukwayiwapo pa nkomano nu kusendapo ichigaba pa mbombo iya kulumbilila, vingatwavwa ukufighilila inyinong’ono zyitu. U Yehova akutulayizya ukuti atakwiza pakwitikizya ukuti tuyeliwe ukuchila amaka ghitu.—1 Koli. 10.12, 13.
18. Nkimba pakabalilo aka twebosi tukulondiwa ukubomba ichoni pa nkani iya lwiputo?
18 Pakabalilo aka, aliwesi akulondiwa ukuti iputaye nkani kwa Yehova ukuti abukilile ukuba musubaliwa, ichifukwa chakuti tuli mumasiku aghabumalilo aghakutamya agha. Musale akabalilo akakuti mwiputaye ukufuma pasi pa moyo isiku lililyosi. U Yehova akulonda ukuti ‘tupungulilaghe imyoyo yitu kukwache’ mu lwiputo. (Sali. 62.8) Mumupalaghe u Yehova nu kumupalizya pa chilichosi cho ababombeye. Mumulabe ukuti abavwe umwakuti mube mwe bakujimba po mukulumbilila. Mumulabe ukuti abavwe umwakuti mujimbe ku ntamyo yiliyosi yo mungakomana nayo nu kupota injelo yiliyosi yo mungakomana nayo. Mutakitikizye chilichosi pamo aliwesi ukubalesya ukuti akabalilo kosi mwiputaye kwa Yehova. Ka u Yehova akwamula buli-buli inyiputo zyitu? Tukwiza pakunenezannya ilalusyo ilyakulondiwa ili munkani iyakukonkapo.
ULWIMBO 42 Lurombo lwa Muteŵeti wa Chiuta
a Tukulonda ukuti inyiputo zyitu zibanje izyakufumila pasi pa moyo ngati we kalata yo tungamusimbila umumanyani witu uwa pamoyo. Loli te chipepe kupaghula akabalilo akakwiputila. Akabalilo kamo chingaba chakutamya ukumanya vyo tunganena mu lwiputo. Munkani iyi inti tunenezannye ifundo zyo zingatwavwa.