Mungabukilila Ukumubombela u Yehova Napo Mungakomana ni Vyakupunuzya

1. Nkimba malusayo buli gho tukuhoboka nagho ichifukwa chakuti tuli mwigulu lya Yehova?

UKUNENA ubwanaloli tusayiwe sana ukuba chigaba icha gulu lya Yehova mumasiku aghabumalilo agha. Po ivintu pa bumi muchisu ichi vikubipila-vipila loli u Yehova akutupa abakamu na bayemba bo bakutwavwa. (Sali. 133.1) Akutwavwa ukuti tubanje bakuhoboka mumbumba zyitu. (Efe. 5.33–6.1) Sona akutwavwa pakutupa amahala gho tukulondiwa ukuti tube nu mutende uwa mumoyo.

2. Ka tukulondiwa ukubomba ichoni sona chifukwa buli?

² Tukulondiwa ukubikapo umoyo ukuti tubukilile ukumubombela u Yehova umwabusubaliwa. Chifukwa buli? Ichifukwa chakuti akabalilo kamo tungapunuziwa ni vintu vyo abantu abanji bangabomba ichifukwa chakuti bambula ukufikapo. Akabalilo kamo tunganyokela kwisinda ichifukwa cha vintu vyo tukupuvya nkani-nkani nanti ivintu ivyo, tukupuvya umwakupyanizya-pyanizya. Tukulondiwa ukujimba ukuti tubukilile ukumubombela u Yehova (1) pa kabalilo ko umukamu pamo umuyemba atupunuzya, (2) nanti umuchi pamo umulume witu atupunuzya sona, (3) nanti twanyokela kwisinda ichifukwa cha vintu vyo twapuvya. Munkani iyi inti twennye ifundo izi yiliyosi payene. Inti twennye sona vyo tungamanyilako ku bantu abasubaliwa bo bakutambuliwa mu Bayibolo.

MUBUKILILE UKUBA BAKUJIMBA NANTI UMUKILISITU UWAMWINYU ABAPUNUZYA

3. Nkimba ntamyo buli zyo abantu ba Yehova bakukomana nazyo?

³ Intamyo. Abakilisitu abamwitu bamo bali nu buntu bo bungatukalalizya. Bamo bangabomba ivintu ivyakutunyosezya kwisinda po bamo bangabomba ukusita ukutwinong’onela pamo umwambula ichisa. Akabalilo kamo bo bakututangilila bope bangapuvya ivintu. Ivyakubombiwa ngati ivi, vingapangisya bamo ukuti bande ukukayikila nanti igulu ili lya Chala. Mumalo mwakubukilila ukumubombela u Chala ‘umwakukolelana’ na bakamu na bayemba babo, vingabapangisya ukuti baleke ukukolelana na bo babapunuzya pamo bangaleka nu kwiza kunkomano. (Zefa. 3.9) Ka ukubomba bunubu mahala? Za twennye vyo tungamanyilako kwa muntu yumo yo akutambuliwa mu Bayibolo yo akakomana ni ntamyo izyakuyana bulo.

4. Nkimba ntamyo buli zyo umutumiwa u Pabuli akakomana nazyo?

⁴ Ichifwanikizyo icha mu Bayibolo. Umutumiwa u Pabuli akamanya ukuti abakamu na bayemba bache Abachikilisitu bakaba bambula ukufikapo. Umwakufwanikizya bamo muchipanga icha ku Yelusalemu bakamunyilagha. (Imbo. 9.26) Pisinda pache, bamo bakanda ukunena ivintu ivibibi vyo vikananga imbili yache. (2 Koli. 10.10) U Pabuli akennya umukamu uwabudindo akusala akabibi ivintu vyo nge vikabapunuzya abanji. (Gala. 2.11, 12) Sona umumanyani wache yumo izina lyache u Maliko, akamupunuzya. (Imbo. 15.37, 38) Ivyakubombiwa ngati ivi nge vikamupangisya ukuti aleke ukubomba ivintu na bantu bo bakamupunuzya. Mumalo mwache, akabukilila ukubennya akiza abakamu na bayemba bache nu kubukilila ukumubombela u Yehova umwabusubaliwa. Choni cho chikamwavwa u Pabuli ukuti ajimbe?

5. Choni cho chikamwavwa u Pabuli ukuti abukilile ukukolelana na bakamu na bayemba bache? (Aba Kolosi 3.13, 14) (Ennya sona ichituzi.)

⁵ U Pabuli akabaghanagha abakamu na bayemba bache. Ichifukwa chakuti u Pabuli akabaghanagha abanji, atakabika umoyo pa vintu vyo bakapuvyanga loli akennyanga inkalo zyabo inyiza. Ulughano lukamwavwa sona u Pabuli ukuti abombe vyo asimbite pa Aba Kolosi 3.13, 14. (Belenga.) Umwakukolelana ni fundo izi, ennya mo u Pabuli akabombela nu Maliko. Napo u Maliko akamuleka u Pabuli pa bulendo bwache ubwabwandilo ubwa bumishonale, loli u Pabuli atakabukilila ukumukalalila. Pisinda pache, pa kabalilo ko u Pabuli akasimbilagha ichipanga icha ku Kolose ukalata uwalughano, akamupalizya u Maliko ukuti akumwennya ukuti akubombela poka nawe sona ‘akunsangalusya nkani.’ (Kolo. 4.10, 11) Pa kabalilo ko akaba mujele ku Loma, u Pabuli akamwitizya u Maliko ukuti abuke ku ku Loma umwakuti aye amwavwe. (2 Timo. 4.11) U Pabuli akabahobokela abakamu na bayemba sona akabukilila ukukolelana nabo. Nkimba tungamanyilako ichoni kwa Pabuli?

6-7. Choni cho tukulondiwa ukubukilila ukubaghana abakamu na bayemba bitu napo akabalilo kamo bakupuvya ivintu? (1 Yohani 4.7)

⁶ Vyo tukumanyilako. U Yehova akulonda ukuti tubanje bajimvu pakulangizya ulughano abakamu na bayemba bitu. (Belenga 1 Yohani 4.7.) Nanti abakamu na bayemba batubombela ivintu muzila yo te nyiza, tungasubila ukuti vitakung’anamula ukuti balonda ukutuvulazya loli bakuyezya-yezya ukubomba cho u Yehova akuti chiza. (Mbupi. 12.18) U Chala abaghanite ababombi bache abasubaliwa napo akabalilo kamo bakupuvya ivintu. Napo tungapuvya ivintu atakutukalalila mumalo mwache akubukilila ukuba nuswe pabumanyani. (Sali. 103.9) Tukupalizya sana ichifukwa chakuti u Yehova akutuhobokela sona nuswe bulo tukulondiwa ukumweghelela umwakubahobokela abanji!—Efe. 4.32–5.1.

⁷ Tukumbukilaghe ukuti po ubumalilo buli papipi sana, tukulondiwa ukubukilila ukukolelana na bakamu na bayemba bitu. Tukulindilila ukuti intamyo inti zibukilile ukubala. Vingabombiwa ukuti akabalilo kamo tungaghiwa ukuti tuli mujele ichifukwa cha lwitiko lwitu. Nanti ivi vyiza vyabombiwa tukwiza ukulondiwa ubutuli ubwakufuma ku bakamu na bayemba bitu ukuchila kwisinda kosi. (Mbupi. 17.17) Inong’onela vyo vikabombiwa kwa songo yumo uwa chipanga izina lyache u Josep,a uwa ku Spain. U Josep na bakamu abanji bakabighalila mujele ichifukwa chakuti batakingililapo pa vya ndale. Akanena ukuti: “Ichifukwa chakuti tukikalilagha poka mujele, chikaba chipepe sana ukukalalizannya na Bakilisitu abamwitu. Tukalondiwanga ukubikapo umoyo ukuti tube bafisalyoyo nu kuhobokelana nu moyo ghosi. Ivi vikatwavwa ukuti tubukilile ukuba bakukolelana sona tukafighililanagha. Tukazyunguliliwa na bantu bo batakamughanagha u Yehova. Pachakubombiwa chimo nkavulala inyobe sona bakampinya nu bandeji, vyo vikapangisya ukuti ntakakwanisyange ukubomba chilichosi panemwene. Loli umukamu yumo akanchapilagha ivyakuvwala nu kumpwelelela muzila izyakupambana-pambana. Nkennya ukuti nkalangiziwa ulughano lo nkalondiwanga naloli pa kabalilo kala.” Pa kabalilo aka tuli ni vifukwa ivyiza vyo tukulondiwa ukutulana nanti yumo akomana ni ntamyo!

MUJIMBE NANTI UMUCHI PAMO UMULUME WINYU AKUBAPUNUZYA

8. Nkimba abantu bo bali pa sendwa bakukomana ni ntamyo buli?

⁸ Intamyo. Isendwa yiliyosi yikukomana ni ntamyo. Ibayibolo likunenela zila ukuti abantu bo basendanite bakwiza “pakukomana ni ntamyo.” (1 Koli. 7.28) Chifukwa buli? Ichifukwa chakuti isendwa yikupangisya ukuti abantu babili bo bambula ukufikapo bikalaghe poka sona bakuba ukuti bakughana pamo ukubenga ivintu ivyakupambana. Abantu bo basendanite bangaba ukuti bakuliye ku malo aghakupambana na kikalile akakupambana. Pa kabalilo ko bachili batasendanite batangamanya akiza mo uwamwabo abeleye. Uwamwabo angaba ni nkalo zimo zyo zingapangisya intamyo musendwa. Mumalo mwakuti bamanye ukuti aliwesi abombapo zimo ukuti intamyo yiwepo sona ukwennya vyo bangabomba ukuti bamalane nayo, banganda ukumupa uwamwabo uwa musendwa inongwa. Banganda ukwinong’ona ukuti ukupatunkana pamo ukusoka yoyo zila inyiza. Loli ka ukupatunkana nu kusoka koko kungamazya intamyo?b Za tumanyileko kwa mukolo yumo yo akutambuliwa mu Bayibolo yo akajimba napo akakomanagha ni ntamyo musendwa yache.

9. Nkimba u Abigelo akakomana ni ntamyo buli?

⁹ Ichifwanikizyo icha mu Bayibolo. U Abigelo akasendwa kwa Nabala yo Ibayibolo likunena ukuti akaba mukali sona uwa nkalo imbibi. (1 Samu. 25.3) Chikaba chipala sana kwa Abigelo ukwikala nu muntu ngati uyu. Nkimba u Abigelo akayagha izila impepe iyakuti amazizye isendwa yache? Akaba nu lusako ulwakumazya isendwa yache pa kabalilo ko u Devedi, yo akalindililagha ukuti ize abe we Mwene uwa Izilayeli akiza ukuti aghoghe umulume wache na banavuli bosi. (1 Samu. 25.9-13) U Abigelo nge akachimbila bulo vyo nge vikapangisya ukuti u Devedi amughoghe u Nabala. Loli atakabomba bunubu sona akapangisya ukuti u Devedi atakamughoghe u Nabala. (1 Samu. 25.23-27) Choni cho chikapangisya ukuti abombe bunubu?

10. Choni cho chibaghiye ukuti chikamwavwa u Abigelo ukuti ajimbe napo musendwa yache mukaba intamyo?

¹⁰ U Abigelo akamughana sana u Yehova sona akachindikagha ifundo zyache izyapamwanya pa nkani iya sendwa. Tutakukayikila ukuti akamanyagha vyo u Chala akamubuzya u Adamu nu Eva pa kabalilo ko akandisyanga isendwa iyabwandilo. (Ubwa. 2.24) U Abigelo akamanyagha ukuti u Yehova akwennya ukuti isendwa yapalubazu sana. Akalondagha ukumuhobosya u Chala, ivi vikapangisya ukuti abombe chilichosi cho angakwanisya ukuti afighilile abamumbumba yache ukongelezyapo nu mulume wache. Akabomba ivi umwalubilo sana ukuti apangisye u Devedi ukuti atakamughoghe u Nabala. Sona akaba wakwisengannya ukupepesya pa nongwa yo te we yuyo akananga. Ukunena ubwanaloli, u Yehova akamughana sana umukolo umujimvu uyu sona uwakwiyisya. Nkimba abachi na balume bangamanyilako ichoni kwa Abigelo?

11. (a) Nkimba u Yehova akulindilila ukuti abantu bo bali musendwa inti babombe ichoni? (Aba Efeso 5.33) (b) Nkimba mwamanyilako ichoni kwa Carmen pa mo akabombela ukuti afighilile isendwa yache? (Ennya sona ichituzi.)

¹¹ Vyo tukumanyilako. U Yehova akulonda ukuti umulume nu muchi babukilile ukwikala poka napo yumo angaba ni ntamyo. U Chala akuhoboka sana nanti akwennya abantu bo bali musendwa bakubikapo umoyo ukumalana ni ntamyo sona bakulangizannya ulughano nu muchizi. (Belenga Aba Efeso 5.33.) Inong’onela ichifwanikizyo icha Carmen. Pakati pendapo imyaka 6 ukufuma po u Carmen akasendezwa, akanda ukumanyila Ibayibolo na Bakaboni ba Yehova sona pisinda pache akoziwa. U Carmen akanena ukuti, “Umulume wane atakahoboka ukuti imanyilaghe Ibayibolo. Akanda ukumupangila u Yehova ubuzuba. Akanda ukuntuka nu kunoghofya ukuti inti andeke.” Napo vikaba bunubu, loli u Carmen akabukilila ukujimba musendwa yache. Ukwa myaka 50 akabikapo umoyo ukubukilila ukumughana nu kumuchindika umulume wache. Akanena ukuti, “Po imyaka yikendagha nkamanyila mo ningabombela ukuti imwivwisyange umulume wane sona nenaghe nawe muzila iyachisa. Pakumanya ifundo iyakuti isendwa yapalubazu sana mumaso gha Yehova, vikanavwa ukuti imbombe chilichosi cho ningakwanisya ukuti infighilile isendwa yane. Ntakayezyapo ukuti imuleke umulume wane ichifukwa chakuti imughanite u Yehova.”c Nanti mwanda pakukomana ni ntamyo musendwa yinyu, musubile ukuti u Yehova angabafighilila nu kubavwa ukuti mujimbe.

MUTAKALEKE UKUMUBOMBELA U YEHOVA NANTI MWAPUVYA IVINTU

12. Nkimba ntamyo buli zyo tungakomana nazyo nanti twapanga ubutulanongwa ubukulu?

¹² Intamyo. Akabalilo kamo nanti twapanga ubutulanongwa ubukulu, tunganyokela mwisinda. Ibayibolo likutusimikizya ukuti imbibi zyitu zingatupangisya ukuti twiyivwange ukuti swe ‘bakufwantiwa sona tutakulondiwa.’ (Sali. 51.17) Umukamu yumo izina lyache u Robert, akabikapo umoyo ukwa myaka iyinji ukuti abe mwavwilizyi. Loli akapanga ubutulanongwa ubukulu bo bukapangisya ukuti iyivwe ukuti amusambukila u Yehova. Akanena ukuti, “Nkati namanya vyo nkapanga umabyebye wane akantamya sana. Pisinda pache, ntakiyivwa akiza. Nkalila nu kwiputa kwa Yehova. Nkanda ukwinong’ona ukuti u Chala atangateghelezya sona kwa une. Choni cho atangateghelezya? Nkinong’ona ukuti u Yehova atangalonda sona ukuteghelezya inyiputo zyane ichifukwa namukalalizya.” Nanti twapanga ubutulanongwa ubukulu, tunganda ukwiyivwa ukuti umoyo witu wafwantika sona u Yehova atutagha, umwakuti pate ni chifukwa ichakuti tubukilile ukumubombela. (Sali. 38.4) Nanti mukwiyivwa bunubu ennya vyo mungamanyilako kwa muntu yumo umusubaliwa yo akutambuliwa mu Bayibolo yo akabukilila ukumubombela u Yehova napo akapanga ubutulanongwa ubukulu.

13. Nkimba u Pitala akabomba butulanongwa buli ubukulu sona akapuvya ichoni bo achili pakubomba ubutulanongwa ubu?

¹³ Ichifwanikizyo icha mu Bayibolo. Ubusiku ubwabumalilo bo u Yesu achili ataghoghiwe, umutumiwa u Pitala akapuvya ivintu ivyinji vyo vikapangisya ukuti apotwe ukubomba akiza. Ichabwandilo, u Pitala akisubila nkani nu kwituvya ukuti angabukilila ukuba musubaliwa kwa Yesu napo abatumiwa abanji bangachimbila. (Mali. 14.27-29) Ichakukonkapo, mumughunda uwa Getisemani u Pitala akapotwa ukubukilila ukuba maso. (Mali. 14.32, 37-41) Pisinda pache, u Pitala akamuleka u Yesu pa chilundilo cha bantu. (Mali. 14.50) Pabumalilo u Pitala akamukana u Yesu katatu sona akasimikizya ukunena ubumyasi umwakuti akafika na pakulapa. (Mali. 14.66-71) Ka u Pitala akabomba buli-buli akati amanya ukuti abomba ubutulanongwa ubukulu? Umoyo wache ghukamubaba sona akalila nkani na masozi nu kwiyipa inongwa. (Mali. 14.72) Inong’onela mo u Pitala akiyivwila pa kabalilo ko umumanyani wache u Yesu akaghoghiwanga. U Pitala abaghiye ukuti akiyivwa ukuti te wakulondiwa!

14. Choni cho chikamwavwa u Pitala ukuti ajimbe pakumubombela u Yehova? (Ennya ichituzi .)

¹⁴ U Pitala akaba ni vifukwa ivyinji ivyakujimbila pakumubombela u Yehova. Atakipaghula, mumalo mwache akabuka ku bakamu bache ababuzimu sona tutakukayikila ukuti bakamughomya sana. (Luka 24.33) Umwakongelezyapo, u Yesu akati azyuka akabonekela kwa Pitala ukuti amughomye. (Luka 24.34; 1 Koli. 15.5) Pabumalilo, mumalo mwakuti amupe inongwa pa vyo akapuvya, u Yesu akamubuzya umumanyani wache uyu ukuti inti apokele amabudindo aghakulu. (Yoha. 21.15-17) Napo u Pitala akamanya ukuti apuvya ivintu loli akabukilila ukuyezya-yezya ukubomba cho chiza. Chifukwa buli? Ichifukwa chakuti akasimikizya ukuti Umumanyisi wache u Yesu achili amughanite. Sona abakamu bache ababuzimu bakabukilila ukumwavwa. Nkimba tukumanyilako ichoni kwa Pitala?

15. Nkimba u Yehova akulonda ukuti tusimikizye ichoni? (Salimo 86.5; Aba Loma 8.38, 39) (Ennya sona ichituzi.)

¹⁵ Vyo tukumanyilako. U Yehova akulonda ukuti tube bakusimikizya ukuti atughanite sona wakwisengannya ukutuhobokela. (Belenga Salimo 86.5; Aba Loma 8.38, 39.) Akabalilo kamo nanti twapuvya ivintu tukwiyipa inongwa. Ivi momo vikulondiwa ukuti vibelaghe sona momo vikubelagha. Loli tutakulondiwa ukwinong’ona ukuti u Yehova atangatughana pamo ukutughobokela. Mumalo mwache tukulondiwa ukulaba ubutuli mwalubilo. U Robert, yo twamutambula kubwandilo akanena ukuti: “Nkananga ichifukwa chakuti nkasubilagha amaka ghane ukuti ningayipota ingelo.” Akamanya ukuti akalondiwanga ukunena ku basongo. Akanena ukuti: “Nkati nabomba bunubu, umwalubilo nkiyivwa ukuti u Yehova andangizya ulughano ukwendela mu basongo. Sona nkiyivwa ukuti abasongo bope banganite. Bakanavwa ukusubila ukuti u Yehova atandekite.” Nuswe bulo tungasimikizya ukuti u Yehova atughanite sona akutuhobokela nanti twalapa imbibi zyo twabomba, tukulaba ubutuli sona nanti tukubikapo umoyo ukuyezya-yezya ukuti tutakapyanizye sona vyo twabomba. (1 Yoha. 1.8, 9) Nanti tukusimikizya ukuti u Yehova atughanite sona akulonda ukutuhobokela, inti vitwavwe ukuti tutakaleke ukumubombela napo tungapuvya ivintu ivyinji.

16. Choni cho mwasimikizya ukubukilila ukumubombela u Yehova umwabujimvu?

¹⁶ U Yehova akupalizya sana ukuyezya-yezya kwitu ko tukubomba ukuti tumubombele mumasiku aghabumalilo agha. U Yehova angatwavwa ukuti tubukilile ukujimba napo tungakomana ni vyakupunuzya. Tungabukilila ukubaghana abakamu na bayemba bitu nu kubahobokela napo bangatupunuzya. Tungalangizya ukuti tumughanite u Chala ukufumila pasi pa moyo sona tukuchindika indondomeko yo abikite umwakubukilila ukubomba chilichosi cho tungakwanisya ukuti tumalane ni ntamyo zyo zinganda musendwa yitu. Sona nanti twapanga ubutulanongwa ubukulu, tungalaba ubutuli kwa Yehova, ukwitikizya ulughano nu luhobokelo lo angatupa sona tubukilile ukumubombela. Tungaba nu lusubilo ukuti u Yehova akwiza pakutusaya nanti tutakulita “pakubomba ivyiza.”—Gala. 6.9.