Marke

11 Bu bapusana na Yerusaleme, mpe bu batula pene-pene na Betefaze mpe na Betani, ku Mongo wa miti mia Olive, watambika milongoki miandi miole, 2 mpe wabatêla: “Yendeno ku hata edio di luta mona, mpe buna kwa bu lukota, mbo lumona mwana buluku wu bakengi, wu beka lembo yuluka kwe muntu. Sutuleno wo mpe nateno wo kû. 3 Tala ti muntu lu yuriri, ‘Nti luta sila bo?’ têno, ‘Mfumu wê na dio nsatu, mpe mbo kakarisa dio na manzangu mamansoni.’” 4 Buna bayenda mpe bamona mwana buluku* wu bakanga pene-pene na mwelo, ku mbazi mu nzila, mpe basutula wo. 5 Kâ bantu bakaka batelama hâna babatêla: “Mu bungu dia nti luta suturila mwana buluku?” 6 Babatêla misamu mia ba têla Yezu, mpe bababîka benda.

7 Banata mwana buluku kwe Yezu, batûla binkuti biawu ha zulu buluku, mpe Yezu wazakala ha zulu mwana buluku. 8 Babingi bayala binkuti biawu mu nzila, kâ bakaka bazenga makaya ku misitu. 9 Bô beri kwizaka ku matu na bô beri landaka ku manima batatamana mu kawula: “Mulemvo’aku, vûkisa! Kabâ wa sakumunu yandi ta kwiza mu nkumbu ya Yehova!* 10 Timfumu tia tata’eto Davide tita kwiza tiabâ tia sakumunu! Mulemvo’aku, vûkisa, nge wê ku zulu!” 11 Wakota ku Yerusaleme mpe wayenda ku tempelo, kûna watala bima biabiansoni; kâ mu bungu ti bwisi bwatiyirila, wayenda ku Betani na ba 12.

12 Tilumbu tialanda bu beri katukaka ku Betani, nsatu yamubaka. 13 Bu beri mwa mala, wamona mufige weri na makaya, waye tala tala ti mbo kaketi baka tima mu muti wo. Kâ bu kapusana ka mona tima ko, ni makaya ma mpamba kwa, mu bungu ti ka yabâ ntangu ya fige ko. 14 Buna watâ kwe muti: “Kani kabwe ka kwena muntu ko wuvutu dia mbutu zaku.” Mpe milongoki miandi wâ mieri wâka.

15 Buna batula ku Yerusaleme. Wakota mu tempelo mpe wabatika mu tuba ku mbazi bô beri tekaka na beri sumbaka mu tempelo. Wabwisa meza ma bantu beri sobesaka mbongo na chaise za bantu beri tekaka mabembe, 16 mpe ka bîka na kani muntu ko kanata tisalulu mu kati dia tempelo. 17 Bawu keri longesaka bu keri tâka: “Ngano ka watsonama ko ti, ‘Nzo’ani mbo batâ yo nzo ya lusambulu mu bungu dia makanda mamansoni’? Kâ beno lutituri yo nzo ya mivi.” 18 Mfumu za banganga-nzambi na bitsoniki bawâ wo, mpe babatika mu dinga mpila yi bamuhondela. Tîna beri mu tînaka mu bungu ti bantu babansoni mu ndongosolo’andi beri yitukuku.

19 Bwisi bu bwayila, baduka mu mumvuka. 20 Kâ bu beri yôkaka mu nkatika pari, bamona ti mufige watiyumina tii ku midza miandi. 21 Piere wabambukila musamu wayôka mpe wamutêla: “Rabi, tala! mufige wu walokele wuyumini.” 22 Yezu wabavuturila: “Bêno na timinu mu Nzambi. 23 Wa matieleka nita lu têla, tala ti muntu têle kwe mongo ewu, ‘Nanguka mpe tilosa mu mubu,’ mpe tala ti kena na ntembe ko mu mutima’andi, kâ kwikiri ti musamu wu katêle mbo wuyilama, mbo wuyilama. 24 Ntiangu nita lu têla, bima biabiansoni bi lulomba mu lusambulu, bêno na timinu ti bia lutibakiriri, mpe mbo lubaka bio. 25 Mpe bu lusambilaka, lemvokelakeno misamu miamiansoni mi lulendi bâ na mio na bantu, ngatu Tata’eno die ku mazulu kalulemvokela mpe makuba meno.” 26* ——

27 Bakâla ku Yerusaleme. Mpe bu keri saka nzietolo mu tempelo, mfumu za banganga-nzambi, bitsoniki na bakuluntu bapusana kwe yandi 28 mpe bamutêla: “Ntia lutumu lwe naku mu yirika misamu mi? Peleko nani ku heni lutumu lwa yirika misamu mi?” 29 Yezu wabatêla: “Tiyuvu timosi niluyula. Kunganeno mvutu, mpe mbo nilutêla mu ntia lutumu nita yirikila misamu mi. 30 Bateme ya Za ngano ku zulu yatûka peleko kwe bantu? Kunganeno mvutu.” 31 Buna bawu babatika mu tâ bawu na bawu ti: “Tala ti tutêle, ‘Ku zulu,’ mbo katâ ‘Buna mu bungu dia nti lwalembo mu kwikila?’ 32 Kâ tamana yêla mu tâ, ‘Kwe bantu’?” Pôka dia bantu beri tînaka, mu bungu ti kwe babansoni, wa matieleka Za mbikuri yeri. 33 Dieka bo bavuturila Yezu: “Ka tuzebi’â ko.” Yezu wabatêla: “Meno mpe ka nilutêla ko mu lutumu lwa nani nita yirikila misamu mi.”