Za

4 Mfumu bu kazaba ti Bafarize bawâ ti Yezu milongoki miamingi keri batisaka yôka Za— 2 ni bu sa ti ka Yezu yandi beni’â ko weri batisaka kâ ni milongoki miandi— 3 wakatuka ku Yude mpe wavutu kwenda ku Galile. 4 Kâ wafwanana kayôkela ku Samaria. 5 Buna watula ku mumvuka wumosi wa Samaria wu batâka Sikare, pene-pene na musitu wa hana Yakobe kwe Yozefe. 6 Bulu dia Yakobe ni kûna diabâ. Mu bungu ti Yezu wa fwatika wabâ mu bungu dia nzietolo, waye zakala ha ndeko bulu. Kampe 12 heure yabâ.

7 Mukento wumosi wa ku Samaria wayizi baka mamba. Yezu wamutêla: “Kungana mamba ma nwa.” 8 (Milongoki miandi miayenda ku mumvuka mu sumba bima bia dia.) 9 Buna mukento wa ku Samaria wamutêla: “Bwe nge wê Muyuda ta lomba mamba ma nwa kwe meno ndie mukento wa ku Samaria?” (Mu bungu ti Bayuda ka beri’â wisanaka na Bisi-Samaria ko.) 10 Yezu wamuvuturila: “Tala ti zebiki kabu dia mpamba dia Nzambi na muntu wuta ku têla, ‘Kungana mamba ma nwa,’ ni nge keti mu lomba mamba, mpe mbo kaketi ku hana mamba ma luzingu.” 11 Mukento wamutêla: “Mfumu, ka wena na tibendolo tia mamba ko, mpe bulu ndilu diena. Buna kwe bakila mamba mo ma luzingu? 12 Ngano nge yôkele nkaka’eto Yakobe mu bunene, yandi watuhana bulu di mpe wanwa mamba ma bulu di tintwari na bala bandi mpe na bibulu biandi?” 13 Yezu wamuvuturila: “Muntu ni muntu wunwa mamba ma mbo kavutu bâ na nsatu mamba. 14 Muntu ni muntu wunwa mamba ma nimuhana kani kabwe ka vutu’â bâ na nsatu mamba ko, kâ mamba ma nimuhana mbo makwizi bâ titeko tia mamba mu yandi makwe duki mu hana luzingu lwa mankululu.” 15 Mukento wamutêla: “Mfumu, kungana mamba mo, ngatu nalembo vutu bâ na nsatu mamba, mpe ka nivutuandi kwizaka mu mbuka yi mu baka mamba.”

16 Wamutêla: “Yenda, tâ mbila bakala diaku kiza kû.” 17 Mukento wamuvuturila: “Ka ndiena na bakala ko.” Yezu wamutêla: “Mpemba ye naku bu ta tâ ti, ‘Ka ndiena na bakala ko.’ 18 Mu bungu ti babakala batanu babâ naku, mpe muntu wu luta bâ bwawu bu ka diena bakala diaku ko. Mu musamu wo, matieleka têle.” 19 Mukento wamutêla: “Mfumu, mweni ti nge mbikuri yena. 20 Nkaka zeto ku mongo ewu basambirila, kâ beno ebu lutâka ti, bantu ku Yerusaleme bafweti sambirila.” 21 Yezu wamutêla: “Mukento kunkwikila, ntangu yita kwiza yi tulembo vutu sambila Tata ku mongo wu peleko ku Yerusaleme. 22 Beno wô wu lulembolo zaba lusambilaka; beto wô wu tuzebi tusambilaka, mu bungu ti mvukulu kwe Bayuda yibatikiri. 23 Kâ ntangu ni yawu yo, mpe yitûriri, nkatika bisari bu bisambila Tata mu mpeve na mu matieleka, mu bungu ti Tata bantu ba mpila yo kata dinga bamusambila. 24 Nzambi mpeve yena, mpe bô bamusambilaka bafweti mu sambila mu mpeve na mu matieleka.” 25 Mukento wamutêla: “Nzebi ti Masiya ni yandi wo, wô wu batâka Kristo. Mpe bu kakwiza, mbo katomo tu têla misamu miamiansoni.” 26 Yezu wamutêla: “Ni meno, meno nita ku zonzesa.”

27 Mu ntangu yîna milongoki miatula, mpe miayituku mu bungu ti na mukento keri zonzaka. Diangana, ka muntu’â ko watâ: “Nti ta dinga?” Peleko “Mu bungu dia nti ta zonza na yandi?” 28 Buna mukento wasisa yuki diandi, wayenda ku mumvuka mpe watêla bantu: 29 “Yizeno lwatala muntu wukuntêlele misamu miamiansoni mi nayirika. Ngatu Kristo ni yandi kwa?” 30 Baduka ku mumvuka mpe babatika mu kwiza kwe yandi.

31 Mu ntangu yîna, milongoki ka mieri’â bîkaka ko mu mu sa tiya ebu: “Rabi, dia.” 32 Kâ wabatêla: “Bidia bie nani bi lulembolo zaba.” 33 Buna milongoki miatâ bawu na bawu: “Ka muntu’â ko mu natinini bidia, ka buna ko?” 34 Yezu wabatêla: “Bidia biani ni mu sarila luzolo lwa wô wakuntambika na mu manisa tisalu tiandi. 35 Ngano ka lutâka ko ti ngonda ziyà zisiri ntete tisalu tia tia mbutu tiatula? Tala! Meno nilutêlele: Nanguneno meso mpe taleno misitu, miyelele mu bungu dia tisalu tia tia mbutu. 36 Muntu wutiaka mbutu mfutulu’andi kata baka mpe mbutu kata kutakasa mu bungu dia luzingu lwa mankululu, buna muntu wukunaka na wutiaka mbutu tintwari bata yangalala. 37 Ntiangu tingana eti tie tia matieleka: Kunaka wakaka, tiaka mpe wakaka. 38 Nilutambikiri mu tia bima bi lwalembo mwina mpasi. Bantu bakaka basala tisalu tia ngolo, mpe beno lubakiri ndandu mu tisalu tiawu tia ngolo.”

39 Bisi-Samaria babingi ba mumvuka wo batûla timinu mu yandi, mu bungu dia misamu mia mukento wo watâ timbangi: “Kuntêlele misamu miamiansoni mi nayirika.” 40 Buna Bisi-Samaria bayiza kwe yandi, bamulomba mu bâ na bawu mpe wabâ kûna bilumbu biole. 41 Ntiangu, bantu babingi bakaka bayizi kwikila mu bungu dia misamu mi keri tâka, 42 mpe batâ kwe mukento wo: “Ka tukwikiri’â ko kwa mu bungu dia misamu mi têle; mu bungu ti beto beni tuwîri, mpe tuzebi ti wa matieleka muntu wu ni muvukisi wa nza.”

43 Ha manima ma bilumbu biole bîna, wakatuka kûna mpe wayenda ku Galile. 44 Kâ Yezu yandi beni watâ timbangi ti mbikuri ka bamuzitisaka ku nsi ya yandi beni ko. 45 Bu katula ku Galile, Bisi-Galile bamubwana, mu bungu ti bamona misamu miamiansoni mi kayirika ku Yerusaleme ku malaki, mu bungu ti bawu mpe ku malaki babâ.

46 Ha manima wavutu kwiza ku Kana ya Galile, ku kasobesela mamba mu vinu. Ku Kafarnawome, kweri na tisari timosi tia mutinu tiabâ na mwana wabâ na timbevo. 47 Bakala dio bu diawâ ti Yezu wakatuka Yude mpe watula ku Galile, wayenda kwe yandi mpe wamulomba mu kwe wasisa mwana’andi, mu bungu ti ka bâ mala ko na lufwa. 48 Kâ Yezu wamutêla: “Tala ti ka lumweni’â bidimbu na misamu mia nzitukulu ko, kani kabwe ka lukwikila ko.” 49 Tisari tia mutinu tiamutêla: “Mfumu, yiza na meno ntete mwana’ani wafwa.” 50 Yezu wamutêla: “Kâla ku nzo’aku; mwana’aku wa moyo wena.” Bakala dio wakwikila misamu mia mu têla Yezu, mpe wakâla. 51 Kâ bu keri kâlaka ku nzo, bisari biandi biayizi mu bwana mu mu têla ti mwana’andi wa moyo* weri. 52 Buna wabayula mu ntia ntangu mwana’andi wayizi wasa. Bamuvuturila: “Fievre’andi mazono yawiri ku ba 13 heure.” 53 Buna tata wabakula ti ni mu ntangu yîna Yezu kamutêla: “Mwana’aku wa moyo wena.” Buna yandi na bantu ba nzo’andi bakwikila. 54 Tio ni timangu tia nzole tia sa Yezu bu kakatuka ku Yude mu kwiza ku Galile.