Kwe Bisi-Rome
2 Buna, ô muntu, ni bu sa ti nge nani wena, ka wena na mpemba ko tala ti fundisi; mu bungu ti bu ta fundisa muntu wakaka, mambu ta tizengela mu bungu ti nge ta fundisa misamu ni mio mpe yirikaka. 2 Tuzebi ti Nzambi bô bayirikaka misamu mio kafundisaka tintwari na matieleka.
3 Kâ nge, ô muntu, benzi ti mbo dioka mfundusu ya Nzambi bu fundisa bô bayirikaka misamu mio mi yirikaka nge beni? 4 Peleko bunene bwa mbote’andi, bwa tiari tiandi na bwa luvivululu lwandi ta vweza, mu bungu ti kuzebi’â ko ti Nzambi mu mbote’andi wê nandi kakunata ku nsobolo ya mabanza? 5 Kâ mu bungu dia tungu die naku na mutima’aku wuta lembo soba mabanza, nkesi ta kutakasa mu bungu dia nge beni, mu bungu dia tilumbu tia nkesi na ti moneka mfundusu ya sungama ya Nzambi. 6 Mpe Yandi mbo kasenda muna muntu tintwari na nsalulu zandi: 7 luzingu lwa mankululu kwe bô badingaka mu mu kembela na mu mu zangula, mpe badingaka luzingu mu nitu yilembo bolaka mu nzila ya tifu tiawu tia korela mu tisalu tia mbote; 8 ku lweka lwakaka, mbo kabaka nkesi mpe mbo kadasukila bô bazololo bakana, bakolamanaka matieleka, mpe basarilaka kondo kwa buderede. 9 Mpasi na tiari mbo bitula kwe muntu ni muntu* wusarilaka mbi, ntete kwe Muyuda na kwe Greke mpe; 10 kâ muntu ni muntu wusarilaka mbote mbo bamukembela, mbo bamuzangula mpe mbo kabaka tidzunu, ntete Muyuda na Greke mpe. 11 Mu bungu ti Nzambi kena na tihambula ko.
12 Mu bungu ti bô babansoni beri sumukaka ntete musiku watula, lufwa lwawu ka lusikamana mu musiku ko; kâ bô babansoni basumuka mu ntangu ya tula musiku, mu nzila ya musiku babafundisila. 13 Ka bantu’â ko bawîrikilaka musiku bê ba sungama ha matu ma Nzambi, kâ bô basarilaka musiku ni bawu batâ ba sungama. 14 Mu bungu ti mu ntangu bantu ba makanda, balembolo na musiku, yi basarilaka misamu mia musiku, bantu bo ni bu sa ti ka bena na musiku ko, musiku wê nawu mu mitima miawu. 15 Ni bantu bo basongelaka ti musiku wa tsonama wena mu mitima miawu, mu ntangu ngindu’awu yitâka timbangi tintwari na bawu beni; mpe mabanza mawu mbo mabafundaka peleko mbo mabazabikisaka ti ba sungama bena. 16 Misamu mio mbo mitula mu tilumbu Nzambi ti kafundisa misamu mia swamana mia bantu mu nzila ya Kristo Yezu tintwari na nsangu za mbote zi nita samuna.
17 Tala ti nge Muyuda bakutâka, musiku sikirilaka, mpe mu Nzambi tilwonaka, 18 nge zebi luzolo lwandi mpe tambulaka misamu mia nkatika mia mbote mu bungu ti Musiku bakulongese, 19 mpe lukwikulu lwe naku ti nge ntwarisi yena ya bô bê na meso ma fwa, mutsamina mu bungu dia bô bê mu mpimpa ya ngolo, 20 muntu wusungikaka bantu balembolo na mabanza ma delakana, mulongi wa bala ba fioti, mpe muntu wuzebi mfunu ya ndongosolo na ya matieleka me mu Musiku— 21 kâ nge ta longesa muntu wakaka, ngano kutilongesaka ko? Nge ta samuna: “Kulabandi,” ngano laba labaka? 22 Nge tâka ti: “Kusandi bunsuza,” ngano bunsuza saka? Nge yinaka biteki, ngano bima bia tempelo labaka? 23 Nge tilwonaka mu musiku, ngano Nzambi vwezaka bu kolamanaka Musiku? 24 Diangana, “bantu ba makanda nkumbu ya Nzambi bata vweza mu bungu dia beno”, ntiana kwa bu watsonama.
25 Wa matieleka, tifu tia zenga sutu salu tiena tala ti musiku sarilaka, kâ tala ti musiku vwezaka, weka ntiana’eti ka bakuzenga sutu ko ni bu sa ti dia bakuzenga. 26 Buna, tala ti muntu wu balembo zenga sutu ntumunu za sungama za Musiku kazitisaka, mbo bamubongela ntiana muntu wu bazenga sutu ni bu sa ti ka bamuzenga dio ko, ka buna ko? 27 Mpe mu bungu ti muntu wu balembo zenga sutu mu tinsuni Musiku kazitisaka, mbo kakufundisa nge vwezaka musiku ni bu sa ti Musiku wê naku wa tsonoko mpe sutu bakuzenga. 28 Mu bungu ti Muyuda wa matieleka ka wena muntu wê Muyuda mu tinsuni ko, mpe wô wu bazenga sutu mu matieleka ka yandi’â ko wu bazenga sutu mu tinsuni. 29 Kâ nkatika Muyuda ni muntu wê Muyuda ku kati, mpe ni wô wu bazenga sutu mu mutima mu nzila ya mpeve, kâ ka mu nzila ya Musiku’â ko wa tsonoko. Mukembo wa muntu wo kwe Nzambi wutûkaka, ka kwe bantu’â ko.