Kwe Bisi-Rome
6 Buna bwe tutâ? Ngano tufweti tatamana mu sarila masumu ngatu bweso bwa nzitukulu bwatomo yikama? 2 Diangana kâni! Mu bungu ti ba fwa twena mu bungu dia masumu, ngano bwe tutatamana mu zinga mu masumu? 3 Peleko ka luzebi’â ko ti beto bansoni twe ba batusu mu Kristo Yezu, ba batusu twena mu lufwa lwandi? 4 Beto bazikiri na yandi mu lufwa lwandi mu nzila ya bateme’eto. Mpila mosi mpe Kristo bamuvumburi kwe ba fwa mu nzila ya ngolo* za Tata, ngatu beto mpe tabâ na luzingu lwa môna. 5 Tala ti mu bumosi twena na yandi mu lufwa lwe ntiana lwa yandi, ntembe kâni ti mbo tubâ mu bumosi na yandi mu mvumbukulu ya ba fwa ye ntiana ya yandi. 6 Wa matieleka, tuzebi ti timuntu tieto tia ntama tia bakomene ha poto na yandi ngatu nitu’eto ya masumu yalembo vutu bâ ngolo, mpe talembo tatamana mu bâ ngamba za masumu. 7 Mu bungu ti muntu wufwiri, wufutiri* masumu mandi.
8 Musamu wakaka ni wena’eti, tala ti tufwiri tintwari na Kristo, lukwikulu lwe neto ti mbo tubâ mpe ba moyo na yandi. 9 Mu bungu ti tuzebi ti bwawu bu Kristo bamuvumburi kwe ba fwa, buna ka lendi’â kavutu fwa ko. Lufwa ka lulendi’â lwavutu mu yâla ko. 10 Mu bungu ti lufwa lu kafwa ni mu katula masumu mankululu. Kâ luzingu lwe nandi bwawu bu, lwa kata zinga mu sarila luzolo lwa Nzambi. 11 Mpila mosi beno mpe, tibongeleno ntiana bantu ba fwa mu musamu wutariri masumu, kâ ntiana bantu ba moyo mu musamu wutariri Nzambi mu nzila ya Kristo Yezu.
12 Buna, ka lubîkandi ti masumu matatamana mu yâla mu nitu zeno zifwaka, ngatu lwalembo tumamana nsatu za nitu zeno. 13 Ka luhanandi nitu* zeno mu masumu ntiana bisalulu mu yirika mbi, tihaneno kwe Nzambi ntiana bantu ba fwa, kâ bê ba moyo bwawu bu. Haneno nitu* zeno kwe Nzambi ntiana bisalulu mu yirika mbote. 14 Masumu ka maluyâlandi mu bungu ti ka lusiri’â mu lutumu lwa musiku ko, kâ bwawu bu mu lutumu lwa bweso bwa nzitukulu bwa Nzambi lwena.
15 Ngano tufweti sarila masumu mu bungu ti bweso bwa nzitukulu bwa Nzambi bwe neto mpe ka twena mu lutumu lwa Musiku ko? Diangana kâni! 16 Ngano ka luzebi’â ko ti bu lutumamanaka muntu ntiana ngamba, lweka ngamba ya muntu wo wu luta tumamana? Buna beno ngamba zena za masumu manataka ku lufwa peleko ngamba za tifu tia tumama tinataka ku buderede. 17 Matondo tuta vutula kwe Nzambi mu bungu ti bu lwabêle ngamba za masumu, lwayizi tumama mu ndongosolo yi lwabakiri mu mutima’eno wawansoni. 18 Yee, mu bungu ti balukûriri mu masumu, lwayikiri ngamba za buderede. 19 Mu mpila yi banzilaka bantu nita zonzela mu bungu ti mpila’eno ya banzila ka yena ngolo ko mpe ya tinsuni yena. Nsatu za nitu zeno lweri bîkaka zasa ti lwabâ ngamba za bima bia mvindu na bia mbi. Bwawu bu, lufweti landa nsatu zisa ti lwabâ ngamba za misamu mia sungama na mia santu. 20 Mu bungu ti bu lweri ngamba za masumu, ka lwabâ na nsatu ko ya yirika misamu mia sungama.
21 Ngano mu ntangu yîna ndiatulu’eno ntia mbutu yeri butaka? Misamu milutâka nsoni bwawu bu lweri yirikaka, mu bungu ti nsuka ya misamu mio ni lufwa. 22 Kâ bwawu bu bu balukûriri mu masumu, yirikeno misamu mia santu ntiana ngamba za Nzambi. Nsuka ya misamu mio ni luzingu lwa mankululu. 23 Mu bungu ti mfutulu ya masumu ni lufwa, kâ kabu dia mpamba di hanaka Nzambi ni luzingu lwa mankululu mu nzila ya Kristo Yezu Mfumu’eto.