Wa ntete kwe Bisi-Korente
2 Buna bampangi, bu nayiza kwe beno mu lu samunina mansweki ma santu ma Nzambi, ka nasarila nzonzolo ya nzitukulu ko peleko ya ndwenga. 2 Mu bungu ti nabonga nzengolo ya lembo zaba na kani tima ha kati dieno diambu’eti Yezu Kristo, yandi wu bakoma ha poto. 3 Nayiza kwe beno wa nôka, mu bunkuta mpe na tintekoto tiatingi. 4 Bu ndieri zonzaka na bu ndieri samunaka, ka ndieri’â sarilaka nzonzolo ya bantu ba ndwenga ko. Kâ nzonzolo’ani yasongela ngolo za mpeve ya Nzambi, 5 ngatu lwabâ na timinu, ka mu ndwenga za bantu’â ko, kâ mu ngolo za Nzambi.
6 Ndwenga tuta zonzela ha kati dia bantu ba yela, kâ ka ndwenga za nza yi’â ko, peleko za mfumu za nza yi,* bawu bakwizi fuka. 7 Kâ ndwenga za Nzambi tuta zonzela mu mansweki ma santu, ndwenga za swamana, Nzambi zi katuwayila mu bungu dia mukembo’eto ntete binsamu bia bantu. 8 Ni ndwenga zi za lembane mu zaba mfumu za nza yi,* mu bungu ti tala ti za bazaba ka baketi’â honda* Mfumu ya fuluka mu mukembo ko. 9 Kâ ntiana bu watsonama: “Disu ka diamweni’â ko mpe kutu ka diawîri’â ko, mpe na kani muntu walendele mu banza misamu mia kubika Nzambi mu bungu dia bô bamuzololo.” 10 Diangana ni kwe beto Nzambi kazabikisi mio mu nzila ya mpeve’andi, mu bungu ti mpeve misamu miamiansoni yifimpaka, ni bu mibâ misamu mia ndilu mia Nzambi.
11 Mu bungu ti nani ha kati dia bantu zebi misamu mia muntu tala ti ka mpeve’â ko ya muntu wo? Mpila mosi mpe, ka muntu’â ko wayizi zaba misamu mia Nzambi tala ti ka mpeve ya Nzambi’â ko. 12 Ka tabaka mpeve ya nza ko, kâ mpeve yatûka kwe Nzambi, ngatu talenda mu zaba misamu mia tu hana Nzambi mu mbote’andi. 13 Misamu mio mpe mia tuzonzelaka, ka mu nzonzolo yi longesaka ndwenga za bantu’â ko, kâ mu yo yi balongesaka mu nzila ya mpeve, bu tubangulaka* misamu mia timpeve mu nzonzolo ya timpeve.
14 Kâ muntu wa tinsuni ka tambulaka misamu mia mpeve ya Nzambi ko, mu bungu ti buzoba bwena kwe yandi; mpe ka lendi’â kazaba mio ko, mu bungu ti mu timpeve bataluzulaka mio. 15 Muntu wa timpeve misamu miamiansoni kataluzulaka, kâ yandi beni ka muntu’â ko mu taluzulaka. 16 Mu bungu ti “nani wayizi zaba mabanza ma Yehova* ngatu kamulonga?” Kâ beto mabanza ma Kristo me neto.