Kwe Bisi-Rome
12 Bampangi, mu bungu ti Nzambi lu songele tiari tiandi tia mutima, nilutindisi mu hana nitu zeno ntiana mukayulu wa moyo, wa santu mpe Nzambi wu kalendi tambula. Mpe sarileno lenda dieno dia banza bu lukwe mu sariri. 2 Ka lubîkandi ti misamu mia nza* yi mialutwarisa. Kâ bîkeno ti Nzambi kasoba mpila’eno ya banzila, ngatu lwabakula mio mi zololo Nzambi, misamu mia mbote mi kalendi tambula, na mio mia lunga.
3 Mu bungu dia bweso bwa nzitukulu bu bakungeni, ntêle kwe muna muntu ha kati dieno mu lembo bâ na mabanza ma yôka mu yandi beni, kâ mu bâ na mabanza ma delakana; muna muntu bu kalanda bunene bwa timinu ti mu heni* Nzambi. 4 Mu bungu ti ntiana kwa nitu ye na binama biabingi, kâ binama biabiansoni ka bisalaka tisalu timosi ko, 5 buna, ni bu sa ti babingi twena, beto mpe nitu mosi kwa twena ye mu bumosi na Kristo, kâ muna muntu mu beto tinama tiena tie na nsatu ya bampwana’andi. 6 Buna makabu ma swaswana me neto tintwari na bweso bwa nzitukulu bu batuhana. Tala ti ni mbikululu, tabikula buna buta têla bunene bwa timinu tieto; 7 tala ti tisalu tabakiri, tasa miamiansoni mu sala tio; tala ti kabu dia longesa, tasa miamiansoni mu longesa; 8 tala ti kabu dieto ni mu tindisa bantu bakaka, tabatindisa; tala ti kabu dieto ni dia kabila bantu bakaka, tabakabila mu mutima wa mukaka. Muntu wutwarisaka, katwarisa mu bunsungu; wô wusongelaka tiari, kasila bo na nsayi yayansoni.
9 Luzolo lweno mu bantu bakaka lufweti bâ lwa matieleka. Yineno misamu mia mbi; kangameno mu misamu mia mbote. 10 Bêno na luzolo lwa ngolo beno na beno ntiana bantu ba kanda dimosi. Mu musamu wutariri tifu tia zangula bantu bakaka, bêno bantu ba ntete. 11 Saleno bwabwingi. Ka lubândi bilenga.* Fulukeno mu luhemo mu nzila ya mpeve. Sarileno Yehova* ntiana ngamba. 12 Yangalaleno mu tivuvu. Koreleno mpasi. Tatamaneno mu lusambulu. 13 Bakiseno bisari bia Nzambi bie na nsatu lubakusu. Dingakeno mpila zi lusongela ndiambu.* 14 Tatamaneno mu sakumuna bô balukwamisaka; sakumuneno, kâ ka lutândi ndoko. 15 Yangalaleno na bô bê mu nsayi; dileno na bô bata dila. 16 Mwineno bantu bakaka mu mpila yi lutimwinaka. Ka lubândi na mabanza ma tizangula,* kâ bêno ba kuluka. Ka lubanzandi ti luyôkele bantu bakaka mu ndwenga.
17 Ka lukarisandi mbi kwe muntu wuluyirikiri mbi. Sarileno misamu mie mia mbote ha meso ma bantu babansoni. 18 Tala ti bulendi bâ, mpe wamana bâ ti beno kwa wuta tala, bêno mu tidzunu na bantu babansoni. 19 Bampangi ba nzololo, ka lukarisandi mbi mu mbi, kâ bîkeno ti nkesi za Nzambi zasala; ntiana bu watsonama: “‘Karisa mbi musamu’ani wena; ni meno nikarisa mbi,’ Yehova* têle bo.” 20 Kâ “tala ti mbeni’aku nsatu ye nandi, mu hana bidia; tala ti nsatu mamba ye nandi, mu hana mamba; bu sila bo, mbo tûla makala ma tiya ha mutu’andi.”* 21 Ka lubîkandi ti mbi yalununga, kâ tatamaneno mu nunga mbi mu mbote.